Кет
Абдулҳамид Чўлпон

Кет, кўзимни алдагувчи хоин нур,
Кет, оловли чизиғимдан нари юр!

Кет, заҳарли қизғалдоқни ирғитма,
Кўнглимдаги сўнг умидни йўқ этма!
Кет, илоҳий виждонимни булғама,
Бутлар билан тегарамни чулғама.
Кет, эй тўққиз пари кўзли қора қуш,
Йиқиқ бўлган кўкрагимдан четда уч!
Кет, севгимнинг улуғ ёви, кўринма,
Лаънат сочиб, ёнларимда юринма.

Эски дўстлар йўл адашиб ўлдилар,
Янги дўстлар бунинг учун кулдилар.
Янги йўлга оёқ босмай тўхтасам,
Бу йўлларда қутилишлик йўқ десам,
Сен ул чоғда қайси йўлга солардинг?
Фалокатдан қандай тортиб олардинг?
«Ун»инг қўпол… қийнагувчи қилиғинг,

Кет, мангулик йўққа кўчсин борлиғинг!
Кет, малаклар достонини ўқима,
Кет, аслсиз эртакларни тўқима!

Кет, севгили кўкрагимга тинчлик бер,
Кет, сенинг-чун қучоқ очган қора ер.

Кет, жонимни қийнагувчи жоду – ҳур,
Кет, кўнглимни алдагувчи ёлғон нур!

1922-йил

— Source: ҳттпс://wikisource.орг/wiki/Кет. Downloaded from uzbekai.com.