Кетдинг
Абдулҳамид Чўлпон

Йўлдошим, зим-зиё бўлдинг-да, кетдинг,
Бор эдинг – йўқолдинг, ўлдинг-да, кетдинг,
Гул эдинг, очилмай сўлдинг-да, кетдинг,
Йўқлик денгизига тўлдинг-да, кетдинг.

Қичқириб орқангдан югурдим, чопдим,
Ғариблар мозорин истадим, топдим,
Кўрай деб сўнг чоғда телмуриб боқдим,
Сен эсанг юзингни бурдинг-да, кетдинг.

Элингнинг тилаги етимми қолди?
Бошига қайғуни ўлимми солди?
Жонингни тангриси севибми олди?
Айтмадинг, оғзингни юмдинг-да, кетдинг.

Боғчангга ёш қўллар экалар гуллар,
Очилмоқ истайлар лола, сунбуллар,
Борлиқ куйларини куйлар булбуллар,
Сен бўлса йўқликка урдинг-да, кетдинг,
Кўкармай, яшармай, қурдинг-да, кетдинг!..

1920–йил

— Source: ҳттпс://wikisource.орг/wiki/Кетдинг. Downloaded from uzbekai.com.