Ketding
Abdulhamid Choʻlpon

Yo‘ldoshim, zim-ziyo bo‘lding-da, ketding,
Bor eding – yo‘qolding, o‘lding-da, ketding,
Gul eding, ochilmay so‘lding-da, ketding,
Yo‘qlik dengiziga to‘lding-da, ketding.

Qichqirib orqangdan yugurdim, chopdim,
G‘ariblar mozorin istadim, topdim,
Ko‘ray deb so‘ng chog‘da telmurib boqdim,
Sen esang yuzingni burding-da, ketding.

Elingning tilagi yetimmi qoldi?
Boshiga qayg‘uni o‘limmi soldi?
Joningni tangrisi sevibmi oldi?
Aytmading, og‘zingni yumding-da, ketding.

Bog‘changga yosh qo‘llar ekalar gullar,
Ochilmoq istaylar lola, sunbullar,
Borliq kuylarini kuylar bulbullar,
Sen bo‘lsa yo‘qlikka urding-da, ketding,
Ko‘karmay, yasharmay, qurding-da, ketding!..

1920–yil

— Source: https://wikisource.org/wiki/Ketding. Downloaded from uzbekai.com.