Kurash
Abdulhamid Choʻlpon

Baqirguvchi, o‘kirguvchi bir tovush
Botirlarning jon so‘ragan tovshidir.
Yiqitguvchi, ag‘darguvchi qo‘zg‘alish
Yaqindagi zo‘r kurashning boshidir.

Tentaklardek borar yerin bilolmay,
Unda-bunda o‘zni urgan dushmandir.
Keng yurakda tura olmay, sig‘olmay
Toshib ketgan yo‘qsildagi imondir.

Ulug‘, qattiq ag‘darguvchi bir kurash,
Yo bor bo‘lish, yo yo‘q bo‘lish:
– Yo‘q yarash!..

Toshkent. 1921, 8-mart

— Source: https://wikisource.org/wiki/Kurash. Downloaded from uzbekai.com.