Виждон эрки
Абдулҳамид Чўлпон

Ай тутқинлар, ай эзилган,
Ай қийналган, йўқсил эллар,
Ай умидсиз, ай чизилган
Дор олдига... оппоқ диллар!

Ай бевалар, бечоралар,
Ай боғланган кишанларга.
Ай эрк учун оворалар,
Кўп ялинманг сиз уларга!

Бўрилардан омон кутмак
Тентакларнинг ишидир ул.
Ҳар монеъни ҳатлаб ўтмак —
Турмушда энг тўғри бир йўл!

Зулм олдида ҳар бир нарса,
Эҳтимолки бўйин эгар.
Агар зулм авжга келса,
Кўк бошида ерга тегар.

Ҳайвонларга, инсонларга
Золим эга бўлмай қолмас.
Фақат эркин виждонларга
Эга бўлмоқ — мумкин эмас!

Самарқанд, 1922, 9–июнь

— Source: ҳттпс://wikisource.орг/wiki/Виждон_эрки. Downloaded from uzbekai.com.