Ёруғ юлдузга
Абдулҳамид Чўлпон

Гўзал юлдуз, нурли юлдуз, тез сўзла
Оталарнинг тарихдаги хатосин;
Шул хатодан осиғланиб ёвларнинг
Эл кўксида сурган ишрат, сафосин.

Сўзла, англат ўтгандаги турмушнинг
Бутун қонли, шонли, жонли ерларин.
Кўз олдимга жилвалантир юрт учун
Жонлар бериб, қонлар тўккан эрларин.

Ўйнат, қўзғат, тўлқинлантир, ҳовлиқтир
Кенг Ҳазарнинг кўм-кўк юмшоқ сувларин.
Сўзлаттириб чарчат, ҳорсин, чарчасин,
Тери оқсин, кўкка чиқар буғларин.

Кўпиклантир, майда оппоқ кўпикдан
Кўйлак кийдир, ясантир сув бетларин.
Ул сувлар-ла пардоз қилдир, кийинтир
Тоғли, тошли қирғоқларин, четларин.

Нега жимсан, нега жавоб бермайсан?
Нега кўзинг қизаринди, ёшланди?
Нега юзинг сўлган каби юмшарди?
Нега сенда бир талваса бошланди?

Биламан мен: сўзламайсан шунинг-чун

Сўзлайдирган яхши сўзинг йўқ эрур.
Оғиз очсанг йўқсил элни эзмакка,
Қон қилмоққа ҳасратларинг кўп эрур.

Майли, майли, қандоқ аччиқ бўлса ҳам,
Тўғри сўзни яширмасдан сўзлай бер.
Ҳар қанчалар юрак ёргич куй бўлса,
Ботир бўлиб секингина куйлай бер.

Ўтганларнинг заҳари ҳам бу кунда
Кўнгилларга тегмай ўтар кабидир.
Кечмишларнинг йиғиси ҳам шу кунда
Йўқсил дилни суюнтирар кабидир.

Фалокатлар кўрган ота-боболар
Истиқлолнинг қимматини билмаган.
Эл ва юртни сақлар учун сўнг хонлар
Тузуккина чора, тадбир қилмаган.

Биз, йўқсиллар, бошқаларга қул бўлиб,
Чет оёқлар товонида эзилдик.
Ҳар ярамас, ҳар бузуқнинг тагида
Алам тортган, жабр кўрган биз эдик.

Етар, бўлди! Мени гапга солдинг-да,
Ўзинг унда тинглабгина турасан.
Яна, тағин таъсирланиб сўзимдан,
Оҳ-воҳ қилиб ўзни ҳар ён урасан.

Сўзла сен-да тилларингни ўйнатиб,
Эски олам ичра бизни олиб бор.
Яшрин ётган пардаларни, зулматни
Қараб турма, нуринг билан йирт, юбор!

Ялинтирма, бошқаларга ялинган
Каби сен ҳам ялинтирмоқ истайсан.

Эзилганни эзишликка, сен гўзал,
Озроқ шарм, озроқ ҳаё қилмайсан.

Сўзла, англат, гўзал юлдуз, тез сўзла,
Мен-да сенинг чиройлигинг сўзларман.
Ҳазардаги кўпикларга бирлашиб
Сени мақтаб ширин куйлар куйларман.

Оғиз очдинг, товшинг келди, эй юлдуз,
Сўзла-сўзла, ёт киши йўқ, иккимиз!..

Баҳри Ҳазар. 1920, 19-август

— Source: ҳттпс://wikisource.орг/wiki/Ёруг%CA%BB_юлдузга. Downloaded from uzbekai.com.