Дўстлар, маҳрам деб элга...
Алишер Навоий

Дўстлар, маҳрам деб элга роз ифшо қилмангиз,
Бошингизға юз бало куч бирла пайдо қилмангиз.

Фош қилманг роз, чунким асрай олмай қилдингиз,
Ўзгалардин асрамоқ боре таманно қилмангиз.

Ишқ асрориға тил маҳрам эмастур зинҳор,
Ким, кўнгулдин тилга ани ошкоро қилмангиз.

Чун кўнгулдир қалб-у тил ғаммоз, махфий розни,
Жон ҳарамидин бу иккига ҳувайдо қилмангиз.

Чун кўнгул тил бирла маҳрам бўлмади, ҳожат эмас,
Айтмоқким, элга андин нукта имло қилмангиз.

Саҳв этиб, чун роз дуррин сочтингиз, нодим бўлуб,
Оҳнинг дудин саҳоб-у кўзни дарё қилмангиз.

Чок-чок айлаб кўнгулни, тилни айлаб юз тилим,
Ташлаб итларга аларнинг йоди қатъо қилмангиз.

Менда ҳижрон дарди-ю йўқ сабр, бори дўстлар,
Чорае гар қилсангиз, жуз жоми саҳбо қилмангиз.

Чун Навоий ишқ розин асрай олмай қилди фош,
Отини роз аҳли туморинда иншо қилмангиз.

— Source: ҳттпс://wikisource.орг/wiki/До%E2%80%98stlar%2C_маҳрам_деб_элга.... Downloaded from uzbekai.com.