Жамолинг васфини қилдим чаманда...
Атоий

Жамолинг васфини қилдим чаманда,
Қизорди гул уёттин анжуманда.

Таманно қилғали лаълингни кўнглум,
Киши билмас аниким, қолди қанда.

Чу жонимдин азиз жонона сенсен,
Керакмас жон манга сенсиз баданда.

Манга ул дунёда жаннат не ҳожат,
Эшикинг тупроғи басдур кафанда.

Солиб борма мени, эй Юсуфи ҳусн,
Бу кун Яъқубтек байт ул-ҳазанда.

Узун сочингдин узмасмен кўнгулни,
Оёғинг қайда бўлса, бошим анда.

Тилар эл мансаби олий, валекин
Атойи сарви озодинга банда.

— Source: ҳттпс://wikisource.орг/wiki/Жамолинг_васфини_қилдим_чаманда.... Downloaded from uzbekai.com.