Менгиз ё равзайи ризвонмудур бу...
Атоий

Менгиз ё равзайи ризвонмудур бу?
Оғиз ё ғунчайи хандонмудур бу?

Қароқчи кўзларин ким кўрса айтур:
«Ажаб айёри Туркистонмудур бу?»

Чиқар ҳар лаҳза юз минг шева бирла,
Малойик хўйлуқ инсонмудур бу?

Жаҳонни тутти Юсуфдек жамоли,
Малоҳат Мисрида султонмудур бу?

Хатиким, сафҳа гул узра кўрунур,
Ғубори хатму ё райҳонмудур бу?

Мудаввар гўйи сиймин, ё занаҳдон?
Муанбар зулф ё чавгонмудур бу?

Атоийни кўруб кўйинда айтур:
«Ҳамул мискини саргардонмудур бу»?

— Source: ҳттпс://wikisource.орг/wiki/Менгиз_ё_равзайи_ризвонмудур_бу.... Downloaded from uzbekai.com.