На қилай
Бобораҳим Машраб

Бу тани хокийни-ю руҳи равонни на қилай?!
Бўлмаса қошимда жонон бу жаҳонни на қилай?!

Ёрсиз ҳам бодасиз Маккага бормоқ не керак?!
Иброҳимдин қолғон ул эски дўконни на қилай?!

Урайинму бошима саккиз беҳишт-у дўзахин,
Бўлмаса васли менга икки жаҳонни на қилай?!

Заррае нури қуёшдек бу жаҳон ичра тамом,
Ошкора бўлмаса сирри ниҳонни на қилай?!

Аршнинг кунгурасин устиға қўйдум оёғим,
Ломакондин хабар олдим, бу маконни на қилай?!

Бир худодин ўзгаси барча ғалатдур, Машрабо,
Гул агар бўлса қўлумда, ул тиканни на қилай?!

— Source: ҳттпс://wikisource.орг/wiki/На_қилай. Downloaded from uzbekai.com.