Ul oykim zulfining har torig‘a yuz xasta band etmish...
Miriy

Ul oykim zulfining har torig‘a yuz xasta band etmish,
Quyosh yuzluk sanamlar vola aylab mustamand etmish.

Bo‘lung ey ahli dil voqifkim ul husn ahlining shohi,
Ko‘zikim sho‘xroqdur, sho‘xliq rasmin pisand etmish.

Oyog‘ing tufrog‘ini istaram, o‘pkamg‘a zahram yo‘q,
Bu gulshan ichra tokim sarv qadding sar baland etmish.

Ne dey fatton ko‘zungdin benasib etti ko‘z uyqudin,
Ne dey mijgon o‘qungdin qon yoshimdin bahramand etmish.

Desam o‘ldum, kular, o‘ltur desam der tongla o‘lturgum,
Vafosiz va’daga afsona aylab rishxand etmish.

Yiqilsam yo‘lig‘a solmas nazar, solmas nazardin ham,
Yiroqroqdin yomon holimga boqib no‘shxand etmish.

Navosiz nola, afg‘onsiz fig‘ondin Miriy jon bergum,
Bu munglug‘ notavon jonim g‘ami hijron lavand etmish.

— Source: https://wikisource.org/wiki/Ul_oykim_zulfining_har_torig%E2%80%98a_yuz_xasta_band_etmish.... Downloaded from uzbekai.com.