Дарди дилим анго дедим...
Огаҳий

Дарди дилим анго дедим, дема они манго, деди,
Ким манга ошиқ ўлса ул лозим эрур анго, деди.

Юз уза икки наргисинг, ваҳ, не бало қаро, дедим,
Кўнглунг-у жонинг олғучи икки қаро бало, деди.

Лабларинг оғзима етур жон топойин анго, дедим,
Лаъли табассум айлабон йўқму ўлум санго, деди.

Қучмоқ эрур белинг ҳазин кўнглума муддао, дедим,
Йўқму уётинг ушбу сўз дегали, беибо, деди.

Ҳуснунгга айлайин назар ман сори бир қара, дедим,
Ёшурубон юзин, кет, эй масхара, беҳаё, деди.

Бўсайи лаб савоб учун айла манго ато, дедим,
Қош-у қапоғини четиб, қўй, бу сўзинг хато, деди.

Ваҳ, эркан этмагунг ҳеч вафо манго, дедим,
Зоҳир ўлубдурур қачон ҳусн элидин вафо, деди.

Хаста кўнгулга қилғасан мунча недин жафо, дедим,
Дема жафо они санинг дардингадур даво, деди.

Огаҳий комини недин айламагунг раво, дедим,
Ком топорму жонин ул қилмоғ уча фидо, деди.

— Source: ҳттпс://wikisource.орг/wiki/Дарди_дилим_анго_дедим.... Downloaded from uzbekai.com.