Жам’ бўлғон ғунчалар, гулдек паришон ўлмангиз...
Қорий Хўқандий

Жам’ бўлғон ғунчалар, гулдек паришон ўлмангиз.
Андалиби хушнаво бўлғон гулафшон бўлмангиз.

Сабзадин олам тамошогоҳ, сайри боғ учун
Очилинг гул-гул давомат доғи хирмон ўлмангиз.

Дўстлар гўё банотун-наъш бўстонлар аро,
Лола баргидек паришон, диллари қон ўлмангиз.

Васл боғи сабзу хуррам гуллар очилган каби,
Сочилиб ҳарён жудоликдин пушаймон ўлмангиз.

Сабъаи сайёрадек бир бурждин айлаб тулу’,
Дил уйини равшан айлаб, бечароғон ўлмангиз.

Ошнолик рутбаси бўлсин мусаллам сизлара,
Нозанинлар зулфидек ҳарёна ларзон ўлмангиз.

Сайри гулзор айлаган булбул каби бўстон аро
Бетамошойи суман, бесарву райҳон ўлмангиз.

Ифтироқи васлидин кўкси қародур лолани,
Қамчи урган рахшдек ҳарёна жавлон ўлмангиз.

Сайр этиб оби равондек келсангиз Фарғонага,
Қорининг бўстонидин ғайрига меҳмон ўлмангиз.

— Source: ҳттпс://wikisource.орг/wiki/Жам%E2%80%99_бо%E2%80%98lg%E2%80%98on_г%E2%80%98unchalar%2C_гулдек_паришон_о%E2%80%98lmangiz.... Downloaded from uzbekai.com.