Маконимни мунаввар қилгали, эй ёр, хуш келдинг...
Қорий Хўқандий

Маконимни мунаввар қилгали, эй ёр, хуш келдинг,
Висолинг шарбатиға айладинг саршор, хуш келдинг.

Лаболаб тўлганичун нўш этиб жоми муҳаббатни,
Сўрай, деб мўр ҳолини Сулаймонвор, хуш келдинг.

Алифдек дўстни жон ичра жо қилсам муносибдур,
Кўнгул вайронасини тузгали меъмор, хуш келдинг.

Азизлар суннати афтодаларни ҳолини сўрмоқ,
Миниб шабдизи ҳиммат марди майдонвор, хуш келдинг.

Уруб кўси иноят, ҳар тарафга айладинг жавлон,
Зиҳи бахтинг саманди бўлди, хуш рафтор, хуш келдинг.

Лаб очдим мадҳ учун бўлғай муносиб, гарчи аҳволим,
Паришон ҳол кўнглум бўлди файз осор, хуш келдинг.

Ёқиб шамъи муҳаббат бўлди дил кошонаси равшан
Бўлуб, очилди гўё ғунчалар гулзор, хуш келдинг.

Муҳаббат боғини гулчини Қорий дўст йодида,
Неча дафтар ёзиб ашъори шаккарбор, хуш келдинг.

— Source: ҳттпс://wikisource.орг/wiki/Маконимни_мунаввар_қилгали%2C_эй_ёр%2C_хуш_келдинг.... Downloaded from uzbekai.com.