Falak zulm aylab elga oshkor ohista-ohista...
Roqim

Falak zulm aylab elga oshkor ohista-ohista,
Olur jonin qilib beixtiyor ohista-ohista.

Emay-ichmay bukun ko‘b jam’ qilding siymu zar naqdin,
Bo‘lur go‘ringda tongla mo‘ru mor, ohista-ohista.

Qilib zulm elga, yig‘nab mol mag‘rur o‘lma, ey zolim,
Falak tortar nihodingdin damor, ohista-ohista.

Aning bedodu zulmidin zalilu zor bo‘lg‘aysen,
Ketib ilgingdin izzu e’tibor ohista-ohista.

Tama’ni tark qilmay, izzat istar xalqdin harkim
Bo‘lur bu fe’lidin, albatta, xor, ohista-ohista.

Topib ogohlik, tengrig‘a loyiq, qilmadim bir ish,
O‘tub g‘aflat bila laylu nahor ohista-ohista.

Zamon ahli nifoqidin xalos o‘lg‘oysen, ey Roqim,
Alardin tortsang o‘zni kanor, ohista-ohista.

— Source: https://wikisource.org/wiki/Falak_zulm_aylab_elga_oshkor_ohista-ohista.... Downloaded from uzbekai.com.