Yor hajrida ko‘zum qatrasi chandon-chandon...
Shavqiy Kattaqoʻrgʻoniy

Yor hajrida ko‘zum qatrasi chandon-chandon
Oqtikim, qoldi ulus ko‘rgali qayron-hayron.

Charxdek sochtim o‘lub ham yoshim anjum-anjum,
Kelgali kulbama ul oy araqafshon-afshon.

O‘lturub erdim aning yodida men qon yig‘lab,
Sundi may men sari ul mug‘bacha xandon-xandon.

Qoshi yosini chekib, noz ila novak otgach,
O‘tti ko‘ksum siparidin o‘qi parron-parron.

Shukrkim, ko‘nglum uyin ayladi ravshan tun subh,
Ko‘rguzub mehri vafosin manga alvon-alvon…

Dayrdin lutf ila, Shavqiy, sanga miyno-miyno
Bersalar boda, sumur go‘shada pinhon-pinhon.

— Source: https://wikisource.org/wiki/Yor_hajrida_ko%E2%80%98zum_qatrasi_chandon-chandon.... Downloaded from uzbekai.com.