Тонг эрмас тўн кийиб ўлсамки йўқ бу қиш манга пўстин...
Табибий Аҳмад

Тонг эрмас тўн кийиб ўлсамки йўқ бу қиш манга пўстин,
Агарчи хотиримда жилвагардур борҳо пўстин.

Демай пўстинниким ўзга либосим ҳам қолин эрмас,
Илоҳий, қил манга айлаб карам эмди ато пўстин.

Адамдин то келиб қилдим бу қишлоқ хонани маскан,
Киярга топмадим умрим ўтуб ман бенаво пўстин.

Не бахти шумдиндурким, манго етмас бириси ҳам,
Агарчи беҳисобу ҳад эрур олам аро пўстин.

Совуқдин гаҳ қочиб кирсам ичига қолтираб, қақшаб,
Танимға парвариш қилғай эди мисли ано пўстин.

Агар пўстин совуқда пўстдин эрмас эса, аҳбоб,
Недин қишда талаб айлар фақиру ағниё пўстин.

Қиш ичра иккимизга борҳо мақсад эрур буким,
Отамға орзу чакман, мангадур муддао пўстин.

Бу қиш ичра тараҳҳум айлабон мискин Табибийнинг
Тани урёниға бергай худо чакман ва ё пўстин.

— Source: ҳттпс://wikisource.орг/wiki/Тонг_эрмас_то%E2%80%98n_кийиб_о%E2%80%98lsamki_ё%E2%80%98q_бу_қиш_манга_по%E2%80%98stin.... Downloaded from uzbekai.com.