UzbekAI

Ўзбекистон Республикаси Халқ таълими вазирининг

буйруғи

НАМУНАВИЙ НИЗОМ

Умумий ўрта таълим муассасасининг методик кенгаши тўғрисидаги намунавий низомни тасдиқлаш ҳақида

Ўзбекистон Республикасининг «Таълим тўғрисида»ги Қонунига мувофиқ буюраман:

1. Умумий ўрта таълим муассасасининг методик кенгаши тўғрисидаги намунавий низом иловага мувофиқ тасдиқлансин.

2. Мазкур буйруқ расмий эълон қилинган кундан эътиборан кучга киради.

Ўзбекистон Республикаси халқ таълими вазирининг 2016 йил 31 мартдаги 3-мҳ-сон буйруғига ИЛОВА

Умумий ўрта таълим муассасаси методик кенгаши тўғрисидаги

Мазкур Низом Ўзбекистон Республикасининг «Таълим тўғрисида»ги Қонунига мувофиқ, умумий ўрта таълим муассасаси (бундан буён матнда умумтаълим муассасаси деб юритилади) методик кенгашининг мақсади, асосий вазифалари ва унинг фаолиятини ташкил қилиш тартибини белгилайди.

1-боб. Умумий қоидалар

1. Методик кенгаш умумтаълим муассасасининг таълим, методик ва инновацион фаолиятини таъминлаш юзасидан методик хизматни амалга оширадиган жамоавий орган ҳисобланади. Методик кенгашнинг фаолияти жамоатчилик асосида ташкил этилади.

Мазкур Низом талаблари барча умумтаълим муассасаларига нисбатан татбиқ этилади.

2. Методик кенгаш педагогик жамоанинг инновация, тажриба-синов, таълим-тарбия жараёнларини ривожлантиришда услубий бирлашмаларнинг ишини мувофиқлаштиради.

3. Методик кенгаш ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорларига, ушбу Низомга, бошқа норматив-ҳуқуқий ҳужжатларга, шунингдек умумтаълим муассасасининг уставига амал қилади.

2-боб. Методик кенгашнинг мақсади ва асосий вазифалари

4. Методик кенгашнинг мақсади умумтаълим муассасаси ўқитувчиларининг малакасини ошириш, уларнинг касбий компетенцияларини ривожлантириш, касбий маҳоратини ўстириш ҳамда методик ишларга тез мослашувчанлигини таъминлашдан иборат.

5. Методик кенгашнинг асосий вазифалари қуйидагилардан иборат:

умумтаълим муассасасида таълим-тарбия сифатини ошириш учун зарур бўлган методик фаолиятни мувофиқлаштириш, педагог ходимларнинг фаолияти самарадорлигини ошириш;

умумтаълим муассасасининг ўқув дастури, ўқув режаси ва унинг ривожлантириш дастурларини бирламчи экспертизадан ўтказиш ҳамда тасдиқлаш учун умумтаълим муассасасининг педагогик кенгашига тавсия этиш;

умумтаълим муассасаси ўқитувчиларига замонавий педагогик технологияларни, таълим методлари, шакли ва воситаларини излаб топишга кўмаклашиш, дарс жараёнида қўллашга шароит яратиш, илғор иш тажрибаларини оммалаштириш ва таълим жараёнида ютуқларга эришаётган педагогик ходимлар фаолиятини қўллаб-қувватлаш бўйича тавсиялар бериш;

ўқувчилар билими, кўникма ва малакаларининг давлат таълим стандартига мослигини ўрганиш, таҳлил қилиш, мониторинг қилиш ва натижаларига кўра аниқланган бўшлиқларни тўлдириш бўйича методик тавсиялар ишлаб чиқиш;

ўқув йили якунида ўқувчиларни кейинги синфга кўчириш ёки синфда қолдириш масаласини кўриб чиқиш;

педагог ходимларнинг охирги уч йилдаги иш натижаларини таҳлил қилиб бориш, аниқланган камчиликларни бартараф этиш юзасидан тавсиялар бериш, педагог ходимлар ва услубий бирлашма раҳбарларига методик ишларни самарали ташкил этиш бўйича асосий вазифаларни белгилаб бериш;

педагог ходимнинг инновацион фаолиятини ташкил қилиш, уларнинг ижодий изланишлари учун семинарлар, тренинг машғулотлари, педагогик технологиялар бўйича тақдимотлар ҳамда очиқ дарслар ташкил этиш;

умумтаълим муассасаси педагог ходимларининг малака оширишларини ташкил этиш;

педагог ходимларнинг малака ошириш курсидан кейинги фаолиятларини таҳлил қилиш, уларнинг малака ошириш курси давомида олган билимлари асосида ўқув семинарлар ташкил этиш, уларнинг иш режаси асосида ижодий ҳисоботларини эшитиш;

фанлар бўйича синфдан ташқари (факультатив, тўгарак) ишларни мувофиқлаштириш;

фан олимпиадалари ва танловларнинг мактаб босқичларини ўтказиш ҳамда уларнинг самарали ташкил этилишини назорат қилиш;

педагогик жамоанинг таълим-тарбия жараёнини ривожлантиришга ва амалиётда қўллашга йўналтирилган тажриба-синов, илмий-тадқиқот, инновацион, ижодий фаолиятига оид ташаббусларини қўллаб-қувватлаш ва уларни рағбатлантириш чораларини кўриш;

педагогик ходимларни илмий, методик, дидактик материаллар, ўқув дастурлари билан таъминлаш;

илғор педагогик ва ахборот-коммуникацион технологиялар асосида дарс ўтишнинг янги методларини синовдан ўтказиш;

таълим соҳасида тажриба алмашиш мақсадида бошқа таълим муассасалари билан ҳамкорлик қилиш;

услубий бирлашмалар ҳисоботини эшитиш, муҳокама қилиш ва улар фаолиятини такомиллаштириш бўйича тавсиялар бериш;

таълим мазмунини ривожлантиришга оид масалаларни ҳал қилиш, инновацион дастурлар тузиш, диагностик таҳлил ўтказиш, янги педагогик технологияларни ишлаб чиқиш учун вақтинчалик ижодий гуруҳлар фаолиятини ташкил этиш;

педагог ходимлар томонидан ишлаб чиқилган ўқув-методик қўлланмалар ва дидактик материалларни муҳокамадан ўтказиш.

3-боб. Методик кенгашнинг таркиби ва унинг фаолиятини ташкил қилиш

6. Методик кенгаш таркиби умумтаълим муассасаси директорининг буйруғи билан шакллантирилади.

7. Методик кенгаш умумтаълим муассасасининг педагогик кенгашига бўйсунади ва ўз фаолиятини педагогик кенгаш қарорларини бажаришга йўналтиради.

8. Методик кенгаш аъзолигига умумтаълим муассасаси директорининг ўринбосарлари, услубий бирлашмалар раҳбарлари, олий, биринчи ва иккинчи тоифали ўқитувчилар киритилади. Методик кенгаш умумтаълим муассасаси педагог ходимлари сони ва ўқувчилар контингентидан келиб чиқиб 5 — 15 кишидан иборат таркибда шакллантирилади.

9. Методик кенгаш раиси умумтаълим муассасаси директорининг ўқув ишлари бўйича ўринбосари ҳисобланади. Методик кенгаш котиби ўқитувчилар орасидан тайинланади.

10. Методик кенгашнинг фаолияти умумтаълим муассасаси директори томонидан назорат қилинади.

11. Методик кенгаш фаолияти йиллик иш режа асосида ташкил этилади. Иш режа методик кенгаш йиғилишида кўриб чиқилади ва умумтаълим муассасаси педагогик кенгашининг қарорига асосан умумтаълим муассасаси директори томонидан тасдиқланади.

12. Методик кенгаш йиғилиши ҳар чоракда камида икки марта ўтказилади. Методик кенгаш баённомаси кенгаш котиби томонидан юритилади. Баённома методик кенгаш раиси, кенгаш аъзолари ва котиби томонидан имзоланади.

Баённомаларнинг рақами, санаси ва йиғилишда кўрилган масалалар тўғрисидаги маълумотлар методик кенгаш баённомаларини қайд этиш дафтарига ёзиб борилади. Баённомаларни қайд этиш дафтари рақамланади, ип ўтказиб тикилади ҳамда умумтаълим муассасаси директори томонидан имзоланиб муҳрланади.

Методик кенгашда ўқув, маънавий-маърифий, хўжалик ва бошқа йўналишларга оид масалалар муҳокама қилинган тақдирда, мазкур йўналиш учун масъул бўлган шахс муҳокама жараёнига жалб этилади.

4-боб. Методик кенгашнинг ҳуқуқ ва мажбуриятлари

13. Методик кенгаш қуйидаги ҳуқуқларга эга:

умумтаълим муассасасининг ўқув жараёнини такомиллаштиришда иштирок этиш;

педагог ходимларнинг илғор иш тажрибаларини оммалаштириш ва амалиётга жорий этишга оид масалаларни кўриб чиқиш;

ўқув йили якунида ўқувчиларни кейинги синфга кўчириш ёки синфда қолдириш масалалари бўйича мактаб педагогика кенгашига тавсиялар бериш;

умумтаълим муассасаси раҳбариятига ўқув, маънавий-маърифий, илмий-методик ва тажриба-синов ишларида фаол иштирок этган педагог ходимларни моддий рағбатлантириш тўғрисида таклиф киритиш;

педагог ходимнинг малака тоифасини ошириш бўйича таклиф бериш;

педагог ходимларга малака ошириш шакллари бўйича тавсиялар бериш;

фан олимпиадалари, танловлар ва турли мусобақаларда қатнашиш учун ўқитувчилар ва ўқувчилар номзодини тавсия этиш;

умумтаълим муассасаси фаолиятига оид ижтимоий сўровнома ўтказиш, унинг натижаларидан келиб чиқиб ўқув жараёнини такомиллаштириш бўйича чоралар кўриш.

14. Методик кенгаш қуйидагиларга мажбур:

ҳар чоракда фаолияти юзасидан умумтаълим муассасасининг педагогик кенгашига ҳисобот топшириш;

таълим-тарбия сифатини янада яхшилаш бўйича таклифлар тайёрлаш ва педагогик кенгашга тақдим этиш;

ўқув режасини ишлашда иштирок этиш;

янги ахборот-коммуникацион технологияларни жорий этиш бўйича педагогик изланишлар олиб бориш;

иқтидорли ўқувчилар билан алоҳида режа асосида ишлашни ташкил этиш;

педагог ходимларга умумий ўрта таълимга оид норматив-ҳуқуқий ва методик ҳужжатлар юзасидан тушунтириш ва кўрсатмалар бериш.

5-боб. Методик кенгаш ҳужжатлари

15. Методик кенгашда унинг фаолиятига оид қуйидаги ҳужжатлар бўлиши лозим:

умумтаълим муассасаси директорининг методик кенгаш тўғрисидаги низом ва унинг таркибини тасдиқлаш тўғрисидаги буйруғи;

методик кенгашнинг тасдиқланган иш режаси;

умумтаълим муассасасининг педагог ходимлари ва уларнинг методик ишлари ҳақида маълумотлар йиғмажилди;

педагог ходимлар томонидан ташкил этиладиган очиқ дарс машғулотлари ва тарбиявий соатлар жадваллари;

фан олимпиадалари, танловлар ва мусобақаларни ўтказиш режа-жадвали;

услубий бирлашмаларнинг ҳисоботлари;

йиғилиш баённомалари;

методик кенгашда муҳокама қилинган масалалар юзасидан таҳлилий материаллар.

16. Методик кенгаш ҳужжатларининг сақланишига методик кенгаш раиси ва котиби жавобгар ҳисобланади.

Методик кенгаш ҳужжатлари кенгашда уч йил мобайнида сақланади ҳамда тегишли архивга топширилади.

6-боб. Якуний қоида

17. Мазкур Низом талаблари бузилишида айбдор бўлган шахслар қонун ҳужжатларига мувофиқ жавобгар бўлади.

Вазир У. ИНОЯТОВ

Тошкент ш.,

2016 йил 31 март,

3-мҳ-сон

(Ўзбекистон Республикаси қонун ҳужжатлари тўплами, 2016 й., 18-сон, 205-модда; Қонунчилик маълумотлари миллий базаси, 28.12.2021 й., 10/21/2781-1/1202-сон )

lex.uz

Oʻzbekiston Respublikasi Xalq taʼlimi vazirining

buyrugʻi

NAMUNAVIY NIZOM

Umumiy oʻrta taʼlim muassasasining metodik kengashi toʻgʻrisidagi namunaviy nizomni tasdiqlash haqida

Oʻzbekiston Respublikasining “Taʼlim toʻgʻrisida”gi Qonuniga muvofiq buyuraman:

1. Umumiy oʻrta taʼlim muassasasining metodik kengashi toʻgʻrisidagi namunaviy nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Oʻzbekiston Respublikasi xalq taʼlimi vazirining 2016-yil 31-martdagi 3-mh-son buyrugʻiga ILOVA

Umumiy oʻrta taʼlim muassasasi metodik kengashi toʻgʻrisidagi

Mazkur Nizom Oʻzbekiston Respublikasining “Taʼlim toʻgʻrisida”gi Qonuniga muvofiq, umumiy oʻrta taʼlim muassasasi (bundan buyon matnda umumtaʼlim muassasasi deb yuritiladi) metodik kengashining maqsadi, asosiy vazifalari va uning faoliyatini tashkil qilish tartibini belgilaydi.

1-bob. Umumiy qoidalar

1. Metodik kengash umumtaʼlim muassasasining taʼlim, metodik va innovatsion faoliyatini taʼminlash yuzasidan metodik xizmatni amalga oshiradigan jamoaviy organ hisoblanadi. Metodik kengashning faoliyati jamoatchilik asosida tashkil etiladi.

Mazkur Nizom talablari barcha umumtaʼlim muassasalariga nisbatan tatbiq etiladi.

2. Metodik kengash pedagogik jamoaning innovatsiya, tajriba-sinov, taʼlim-tarbiya jarayonlarini rivojlantirishda uslubiy birlashmalarning ishini muvofiqlashtiradi.

3. Metodik kengash oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlariga, ushbu Nizomga, boshqa normativ-huquqiy hujjatlarga, shuningdek umumtaʼlim muassasasining ustaviga amal qiladi.

2-bob. Metodik kengashning maqsadi va asosiy vazifalari

4. Metodik kengashning maqsadi umumtaʼlim muassasasi oʻqituvchilarining malakasini oshirish, ularning kasbiy kompetensiyalarini rivojlantirish, kasbiy mahoratini oʻstirish hamda metodik ishlarga tez moslashuvchanligini taʼminlashdan iborat.

5. Metodik kengashning asosiy vazifalari quyidagilardan iborat:

umumtaʼlim muassasasida taʼlim-tarbiya sifatini oshirish uchun zarur boʻlgan metodik faoliyatni muvofiqlashtirish, pedagog xodimlarning faoliyati samaradorligini oshirish;

umumtaʼlim muassasasining oʻquv dasturi, oʻquv rejasi va uning rivojlantirish dasturlarini birlamchi ekspertizadan oʻtkazish hamda tasdiqlash uchun umumtaʼlim muassasasining pedagogik kengashiga tavsiya etish;

umumtaʼlim muassasasi oʻqituvchilariga zamonaviy pedagogik texnologiyalarni, taʼlim metodlari, shakli va vositalarini izlab topishga koʻmaklashish, dars jarayonida qoʻllashga sharoit yaratish, ilgʻor ish tajribalarini ommalashtirish va taʼlim jarayonida yutuqlarga erishayotgan pedagogik xodimlar faoliyatini qoʻllab-quvvatlash boʻyicha tavsiyalar berish;

oʻquvchilar bilimi, koʻnikma va malakalarining davlat taʼlim standartiga mosligini oʻrganish, tahlil qilish, monitoring qilish va natijalariga koʻra aniqlangan boʻshliqlarni toʻldirish boʻyicha metodik tavsiyalar ishlab chiqish;

oʻquv yili yakunida oʻquvchilarni keyingi sinfga koʻchirish yoki sinfda qoldirish masalasini koʻrib chiqish;

pedagog xodimlarning oxirgi uch yildagi ish natijalarini tahlil qilib borish, aniqlangan kamchiliklarni bartaraf etish yuzasidan tavsiyalar berish, pedagog xodimlar va uslubiy birlashma rahbarlariga metodik ishlarni samarali tashkil etish boʻyicha asosiy vazifalarni belgilab berish;

pedagog xodimning innovatsion faoliyatini tashkil qilish, ularning ijodiy izlanishlari uchun seminarlar, trening mashgʻulotlari, pedagogik texnologiyalar boʻyicha taqdimotlar hamda ochiq darslar tashkil etish;

umumtaʼlim muassasasi pedagog xodimlarining malaka oshirishlarini tashkil etish;

pedagog xodimlarning malaka oshirish kursidan keyingi faoliyatlarini tahlil qilish, ularning malaka oshirish kursi davomida olgan bilimlari asosida oʻquv seminarlar tashkil etish, ularning ish rejasi asosida ijodiy hisobotlarini eshitish;

fanlar boʻyicha sinfdan tashqari (fakultativ, toʻgarak) ishlarni muvofiqlashtirish;

fan olimpiadalari va tanlovlarning maktab bosqichlarini oʻtkazish hamda ularning samarali tashkil etilishini nazorat qilish;

pedagogik jamoaning taʼlim-tarbiya jarayonini rivojlantirishga va amaliyotda qoʻllashga yoʻnaltirilgan tajriba-sinov, ilmiy-tadqiqot, innovatsion, ijodiy faoliyatiga oid tashabbuslarini qoʻllab-quvvatlash va ularni ragʻbatlantirish choralarini koʻrish;

pedagogik xodimlarni ilmiy, metodik, didaktik materiallar, oʻquv dasturlari bilan taʼminlash;

ilgʻor pedagogik va axborot-kommunikatsion texnologiyalar asosida dars oʻtishning yangi metodlarini sinovdan oʻtkazish;

taʼlim sohasida tajriba almashish maqsadida boshqa taʼlim muassasalari bilan hamkorlik qilish;

uslubiy birlashmalar hisobotini eshitish, muhokama qilish va ular faoliyatini takomillashtirish boʻyicha tavsiyalar berish;

taʼlim mazmunini rivojlantirishga oid masalalarni hal qilish, innovatsion dasturlar tuzish, diagnostik tahlil oʻtkazish, yangi pedagogik texnologiyalarni ishlab chiqish uchun vaqtinchalik ijodiy guruhlar faoliyatini tashkil etish;

pedagog xodimlar tomonidan ishlab chiqilgan oʻquv-metodik qoʻllanmalar va didaktik materiallarni muhokamadan oʻtkazish.

3-bob. Metodik kengashning tarkibi va uning faoliyatini tashkil qilish

6. Metodik kengash tarkibi umumtaʼlim muassasasi direktorining buyrugʻi bilan shakllantiriladi.

7. Metodik kengash umumtaʼlim muassasasining pedagogik kengashiga boʻysunadi va oʻz faoliyatini pedagogik kengash qarorlarini bajarishga yoʻnaltiradi.

8. Metodik kengash aʼzoligiga umumtaʼlim muassasasi direktorining oʻrinbosarlari, uslubiy birlashmalar rahbarlari, oliy, birinchi va ikkinchi toifali oʻqituvchilar kiritiladi. Metodik kengash umumtaʼlim muassasasi pedagog xodimlari soni va oʻquvchilar kontingentidan kelib chiqib 5 — 15 kishidan iborat tarkibda shakllantiriladi.

9. Metodik kengash raisi umumtaʼlim muassasasi direktorining oʻquv ishlari boʻyicha oʻrinbosari hisoblanadi. Metodik kengash kotibi oʻqituvchilar orasidan tayinlanadi.

10. Metodik kengashning faoliyati umumtaʼlim muassasasi direktori tomonidan nazorat qilinadi.

11. Metodik kengash faoliyati yillik ish reja asosida tashkil etiladi. Ish reja metodik kengash yigʻilishida koʻrib chiqiladi va umumtaʼlim muassasasi pedagogik kengashining qaroriga asosan umumtaʼlim muassasasi direktori tomonidan tasdiqlanadi.

12. Metodik kengash yigʻilishi har chorakda kamida ikki marta oʻtkaziladi. Metodik kengash bayonnomasi kengash kotibi tomonidan yuritiladi. Bayonnoma metodik kengash raisi, kengash aʼzolari va kotibi tomonidan imzolanadi.

Bayonnomalarning raqami, sanasi va yigʻilishda koʻrilgan masalalar toʻgʻrisidagi maʼlumotlar metodik kengash bayonnomalarini qayd etish daftariga yozib boriladi. Bayonnomalarni qayd etish daftari raqamlanadi, ip oʻtkazib tikiladi hamda umumtaʼlim muassasasi direktori tomonidan imzolanib muhrlanadi.

Metodik kengashda oʻquv, maʼnaviy-maʼrifiy, xoʻjalik va boshqa yoʻnalishlarga oid masalalar muhokama qilingan taqdirda, mazkur yoʻnalish uchun masʼul boʻlgan shaxs muhokama jarayoniga jalb etiladi.

4-bob. Metodik kengashning huquq va majburiyatlari

13. Metodik kengash quyidagi huquqlarga ega:

umumtaʼlim muassasasining oʻquv jarayonini takomillashtirishda ishtirok etish;

pedagog xodimlarning ilgʻor ish tajribalarini ommalashtirish va amaliyotga joriy etishga oid masalalarni koʻrib chiqish;

oʻquv yili yakunida oʻquvchilarni keyingi sinfga koʻchirish yoki sinfda qoldirish masalalari boʻyicha maktab pedagogika kengashiga tavsiyalar berish;

umumtaʼlim muassasasi rahbariyatiga oʻquv, maʼnaviy-maʼrifiy, ilmiy-metodik va tajriba-sinov ishlarida faol ishtirok etgan pedagog xodimlarni moddiy ragʻbatlantirish toʻgʻrisida taklif kiritish;

pedagog xodimning malaka toifasini oshirish boʻyicha taklif berish;

pedagog xodimlarga malaka oshirish shakllari boʻyicha tavsiyalar berish;

fan olimpiadalari, tanlovlar va turli musobaqalarda qatnashish uchun oʻqituvchilar va oʻquvchilar nomzodini tavsiya etish;

umumtaʼlim muassasasi faoliyatiga oid ijtimoiy soʻrovnoma oʻtkazish, uning natijalaridan kelib chiqib oʻquv jarayonini takomillashtirish boʻyicha choralar koʻrish.

14. Metodik kengash quyidagilarga majbur:

har chorakda faoliyati yuzasidan umumtaʼlim muassasasining pedagogik kengashiga hisobot topshirish;

taʼlim-tarbiya sifatini yanada yaxshilash boʻyicha takliflar tayyorlash va pedagogik kengashga taqdim etish;

oʻquv rejasini ishlashda ishtirok etish;

yangi axborot-kommunikatsion texnologiyalarni joriy etish boʻyicha pedagogik izlanishlar olib borish;

iqtidorli oʻquvchilar bilan alohida reja asosida ishlashni tashkil etish;

pedagog xodimlarga umumiy oʻrta taʼlimga oid normativ-huquqiy va metodik hujjatlar yuzasidan tushuntirish va koʻrsatmalar berish.

5-bob. Metodik kengash hujjatlari

15. Metodik kengashda uning faoliyatiga oid quyidagi hujjatlar boʻlishi lozim:

umumtaʼlim muassasasi direktorining metodik kengash toʻgʻrisidagi nizom va uning tarkibini tasdiqlash toʻgʻrisidagi buyrugʻi;

metodik kengashning tasdiqlangan ish rejasi;

umumtaʼlim muassasasining pedagog xodimlari va ularning metodik ishlari haqida maʼlumotlar yigʻmajildi;

pedagog xodimlar tomonidan tashkil etiladigan ochiq dars mashgʻulotlari va tarbiyaviy soatlar jadvallari;

fan olimpiadalari, tanlovlar va musobaqalarni oʻtkazish reja-jadvali;

uslubiy birlashmalarning hisobotlari;

yigʻilish bayonnomalari;

metodik kengashda muhokama qilingan masalalar yuzasidan tahliliy materiallar.

16. Metodik kengash hujjatlarining saqlanishiga metodik kengash raisi va kotibi javobgar hisoblanadi.

Metodik kengash hujjatlari kengashda uch yil mobaynida saqlanadi hamda tegishli arxivga topshiriladi.

6-bob. Yakuniy qoida

17. Mazkur Nizom talablari buzilishida aybdor boʻlgan shaxslar qonun hujjatlariga muvofiq javobgar boʻladi.

Vazir U. INOYATOV

Toshkent sh.,

2016-yil 31-mart,

3-mh-son

(Oʻzbekiston Respublikasi qonun hujjatlari toʻplami, 2016-y., 18-son, 205-modda; Qonunchilik maʼlumotlari milliy bazasi, 28.12.2021-y., 10/21/2781-1/1202-son )

lex.uz