📅 2017-yil 25-yanvar · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 25 январь · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 25 января 2017 г. · Постановления Президента
Официальный текст. Официальный документ. Редакционные примечания не включены.
📅 25 January 2017 · Presidential resolutions
Official text. Official document. Editorial notes are not included.
Ўзбекистон Республикаси Президентининг
Қарори
Ўзбекистон Республикасининг Биринчи Президенти Ислом Абдуғаниевич Каримовнинг хотирасини абадийлаштириш тўғрисида
Мустақил Ўзбекистон давлатининг асосчиси, буюк давлат ва сиёсат арбоби, ўзбек халқининг улуғ ва ардоқли фарзанди, мамлакатимизнинг Биринчи Президенти Ислом Абдуғаниевич Каримов Ватанимизни мустабид тузум қарамлигидан озод қилиб, ҳалокат ёқасига келиб қолган юртимизни қайта тиклади. Буюк Йўлбошчимиз ғоят қалтис ва таҳликали бир вазиятда оғир қийинчиликлар ва синовларга қарамай, тарихан қисқа даврда Ўзбекистонни жадал ва барқарор суръатлар билан ривожланаётган замонавий демократик давлатга айлантирди.
Ислом Абдуғаниевич Каримов ўзининг серқирра сиёсий фаолияти, олийжаноб инсоний фазилатлари билан Ватанимизнинг кўп асрлик тарихида ўчмас из қолдирди. У нафақат Ўзбекистон, балки жаҳон миқёсида катта ҳурмат ва обрў-эътиборга сазовор бўлган улкан шахс ва арбоб сифатида танилди.
Кўп миллатли Ўзбекистон халқининг қалбидан чуқур жой олган Биринчи Президентимизнинг сўнмас хотирасини абадийлаштириш бўйича вазирликлар ва идоралар, маҳаллий давлат ҳокимияти органлари, нодавлат нотижорат ташкилотлари, мамлакатимиз фуқароларидан кўплаб таклифлар тушмоқда.
Халқимизнинг самимий тилаклари ва хоҳиш-иродасидан келиб чиқиб, она Ватанимиз мустақиллиги, эл-юртимиз равнақи йўлидаги буюк тарихий хизматларини инобатга олиб, Ўзбекистон Республикасининг Биринчи Президенти, Ўзбекистон Қаҳрамони Ислом Абдуғаниевич Каримовнинг ёрқин хотирасини абадийлаштириш мақсадида:
1. Қуйидагилар:
2016 йил октябрь ойида Ислом Каримов номидаги Республика хайрия жамоат фонди тузилгани;
Тошкент шаҳар, Яшнобод туманининг Фарғона йўли кўчасида жойлашган жоме масжидга «Ислом ота жоме масжиди» деб ном берилгани;
Ўзбекистон Республикаси Президентининг 2016 йил 2 декабрда «Буюк давлат ва сиёсат арбоби, Ўзбекистон Республикасининг Биринчи Президенти Ислом Абдуғаниевич Каримов сиймоси тасвирланган ҳайкални яратиш бўйича халқаро ижодий танловни ташкил этиш тўғрисида»ги қарори қабул қилингани маълумот учун қабул қилинсин.
2. Вазирлар Маҳкамаси (А.Арипов) Ўзбекистон Республикасининг Биринчи Президенти Ислом Каримовнинг хотирасини абадийлаштириш чора-тадбирлари режасини ўрнатилган тартибда ишлаб чиқсин.
Шу муносабат билан қуйидаги вазифалар топширилсин:
Ўзбекистон Республикаси Маданият вазирлиги, Молия вазирлиги, Давлат архитектура ва қурилиш қўмитаси, Ўзбекистон Бадиий академияси ва Самарқанд вилояти ҳокимлиги билан биргаликда Самарқанд шаҳрида Ислом Каримов дафн этилган ҳудудда ёдгорлик мажмуасини барпо этиш;
тегишли вазирлик ва идоралар, маҳаллий ҳокимликлар билан биргаликда Ўзбекистон Республикасининг Биринчи Президенти Ислом Абдуғаниевич Каримов сиймосини яратиш бўйича халқаро ижодий танловда ғолиб деб топилган ҳайкалларни мамлакатимиз пойтахти Тошкент шаҳрида, Ислом Каримов туғилиб ўсган Самарқанд шаҳрида ва у киши биринчи раҳбар бўлиб ишлаган Қашқадарё вилоятининг Қарши шаҳрида ўрнатиш;
Ўзбекистон Республикаси Маданият вазирлиги, Молия вазирлиги, Адлия вазирлиги, Ўзбекистон Фанлар академияси, Ўзбекистон Бадиий академияси, Тошкент шаҳри ва Самарқанд вилояти ҳокимликлари биргаликда: Биринчи Президентимиз кўп йиллар давомида фаолият олиб борган Тошкент шаҳридаги Оқсарой қароргоҳида (Ўзбекистон кўчаси, 45) Ислом Каримов номидаги илмий-маърифий ёдгорлик мажмуасини ташкил этиш ва Ислом Каримов номидаги Республика хайрия жамоат фондини ҳам ушбу манзил бўйича жойлаштириш; Самарқанд шаҳрида Ислом Каримов музейини ташкил этиш;
қуйидаги муассаса ва объектларга:
Тошкент давлат техника университетига;
Асака шаҳридаги автомобиль заводига;
Фарғона шаҳридаги Санъат саройига;
Тошкент халқаро аэропортига;
Қорақалпоғистон Республикаси, Тошкент шаҳри ва вилоятлардаги марказий кўчаларга (маҳаллий давлат ҳокимияти органлари таклифлари асосида) Ислом Каримов номини бериш;
ҳар йили Биринчи Президентимиз таваллуд топган сана — 30 январь кунини кенг нишонлаш, 2 сентябрь кунини Хотира куни сифатида ёд этиш. Ушбу саналар муносабати билан оммавий ахборот воситаларида Ислом Каримов ҳаёти ва фаолиятини кенг ёритиш;
олий ўқув юртлари талабалари учун Ислом Каримов номидаги давлат стипендиясини жорий этиш;
Ислом Каримовнинг ҳаёти ва фаолияти ҳақида илмий ва бадиий асарлар, ҳужжатли ва бадиий фильмлар яратиш;
Ислом Каримов сиймоси акс эттирилган махсус почта маркаларини чиқариш.
3. Ўзбекистон Миллий ахборот агентлиги, Ўзбекистон миллий телерадиокомпанияси ва бошқа оммавий ахборот воситалари томонидан Ўзбекистон Республикасининг Биринчи Президенти Ислом Абдуғаниевич Каримовнинг хотирасини абадийлаштириш билан боғлиқ тадбирлар кенг ёритилсин.
4. Мазкур қарорнинг бажарилишини назорат қилиш Ўзбекистон Республикасининг Бош вазири А. Арипов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2017 йил 25 январь,
ПҚ-2744-сон
Oʻzbekiston Respublikasi Prezidentining
Qarori
Oʻzbekiston Respublikasining Birinchi Prezidenti Islom Abdugʻaniyevich Karimovning xotirasini abadiylashtirish toʻgʻrisida
Mustaqil Oʻzbekiston davlatining asoschisi, buyuk davlat va siyosat arbobi, oʻzbek xalqining ulugʻ va ardoqli farzandi, mamlakatimizning Birinchi Prezidenti Islom Abdugʻaniyevich Karimov Vatanimizni mustabid tuzum qaramligidan ozod qilib, halokat yoqasiga kelib qolgan yurtimizni qayta tikladi. Buyuk Yoʻlboshchimiz gʻoyat qaltis va tahlikali bir vaziyatda ogʻir qiyinchiliklar va sinovlarga qaramay, tarixan qisqa davrda Oʻzbekistonni jadal va barqaror surʼatlar bilan rivojlanayotgan zamonaviy demokratik davlatga aylantirdi.
Islom Abdugʻaniyevich Karimov oʻzining serqirra siyosiy faoliyati, oliyjanob insoniy fazilatlari bilan Vatanimizning koʻp asrlik tarixida oʻchmas iz qoldirdi. U nafaqat Oʻzbekiston, balki jahon miqyosida katta hurmat va obroʻ-eʼtiborga sazovor boʻlgan ulkan shaxs va arbob sifatida tanildi.
Koʻp millatli Oʻzbekiston xalqining qalbidan chuqur joy olgan Birinchi Prezidentimizning soʻnmas xotirasini abadiylashtirish boʻyicha vazirliklar va idoralar, mahalliy davlat hokimiyati organlari, nodavlat notijorat tashkilotlari, mamlakatimiz fuqarolaridan koʻplab takliflar tushmoqda.
Xalqimizning samimiy tilaklari va xohish-irodasidan kelib chiqib, ona Vatanimiz mustaqilligi, el-yurtimiz ravnaqi yoʻlidagi buyuk tarixiy xizmatlarini inobatga olib, Oʻzbekiston Respublikasining Birinchi Prezidenti, Oʻzbekiston Qahramoni Islom Abdugʻaniyevich Karimovning yorqin xotirasini abadiylashtirish maqsadida:
1. Quyidagilar:
2016-yil oktabr oyida Islom Karimov nomidagi Respublika xayriya jamoat fondi tuzilgani;
Toshkent shahar, Yashnobod tumanining Fargʻona yoʻli koʻchasida joylashgan jome masjidga “Islom ota jome masjidi” deb nom berilgani;
Oʻzbekiston Respublikasi Prezidentining 2016-yil 2-dekabrda “Buyuk davlat va siyosat arbobi, Oʻzbekiston Respublikasining Birinchi Prezidenti Islom Abdugʻaniyevich Karimov siymosi tasvirlangan haykalni yaratish boʻyicha xalqaro ijodiy tanlovni tashkil etish toʻgʻrisida”gi qarori qabul qilingani maʼlumot uchun qabul qilinsin.
2. Vazirlar Mahkamasi (A.Aripov) Oʻzbekiston Respublikasining Birinchi Prezidenti Islom Karimovning xotirasini abadiylashtirish chora-tadbirlari rejasini oʻrnatilgan tartibda ishlab chiqsin.
Shu munosabat bilan quyidagi vazifalar topshirilsin:
Oʻzbekiston Respublikasi Madaniyat vazirligi, Moliya vazirligi, Davlat arxitektura va qurilish qoʻmitasi, Oʻzbekiston Badiiy akademiyasi va Samarqand viloyati hokimligi bilan birgalikda Samarqand shahrida Islom Karimov dafn etilgan hududda yodgorlik majmuasini barpo etish;
tegishli vazirlik va idoralar, mahalliy hokimliklar bilan birgalikda Oʻzbekiston Respublikasining Birinchi Prezidenti Islom Abdugʻaniyevich Karimov siymosini yaratish boʻyicha xalqaro ijodiy tanlovda gʻolib deb topilgan haykallarni mamlakatimiz poytaxti Toshkent shahrida, Islom Karimov tugʻilib oʻsgan Samarqand shahrida va u kishi birinchi rahbar boʻlib ishlagan Qashqadaryo viloyatining Qarshi shahrida oʻrnatish;
Oʻzbekiston Respublikasi Madaniyat vazirligi, Moliya vazirligi, Adliya vazirligi, Oʻzbekiston Fanlar akademiyasi, Oʻzbekiston Badiiy akademiyasi, Toshkent shahri va Samarqand viloyati hokimliklari birgalikda: Birinchi Prezidentimiz koʻp yillar davomida faoliyat olib borgan Toshkent shahridagi Oqsaroy qarorgohida (Oʻzbekiston koʻchasi, 45) Islom Karimov nomidagi ilmiy-maʼrifiy yodgorlik majmuasini tashkil etish va Islom Karimov nomidagi Respublika xayriya jamoat fondini ham ushbu manzil boʻyicha joylashtirish; Samarqand shahrida Islom Karimov muzeyini tashkil etish;
quyidagi muassasa va obyektlarga:
Toshkent davlat texnika universitetiga;
Asaka shahridagi avtomobil zavodiga;
Fargʻona shahridagi Sanʼat saroyiga;
Toshkent xalqaro aeroportiga;
Qoraqalpogʻiston Respublikasi, Toshkent shahri va viloyatlardagi markaziy koʻchalarga (mahalliy davlat hokimiyati organlari takliflari asosida) Islom Karimov nomini berish;
har yili Birinchi Prezidentimiz tavallud topgan sana — 30-yanvar kunini keng nishonlash, 2-sentabr kunini Xotira kuni sifatida yod etish. Ushbu sanalar munosabati bilan ommaviy axborot vositalarida Islom Karimov hayoti va faoliyatini keng yoritish;
oliy oʻquv yurtlari talabalari uchun Islom Karimov nomidagi davlat stipendiyasini joriy etish;
Islom Karimovning hayoti va faoliyati haqida ilmiy va badiiy asarlar, hujjatli va badiiy filmlar yaratish;
Islom Karimov siymosi aks ettirilgan maxsus pochta markalarini chiqarish.
3. Oʻzbekiston Milliy axborot agentligi, Oʻzbekiston milliy teleradiokompaniyasi va boshqa ommaviy axborot vositalari tomonidan Oʻzbekiston Respublikasining Birinchi Prezidenti Islom Abdugʻaniyevich Karimovning xotirasini abadiylashtirish bilan bogʻliq tadbirlar keng yoritilsin.
4. Mazkur qarorning bajarilishini nazorat qilish Oʻzbekiston Respublikasining Bosh vaziri A. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2017-yil 25-yanvar,
PQ-2744-son
Президента Республики Узбекистан
Постановление
Об увековечении памяти Первого Президента Республики Узбекистан Ислама Абдуганиевича Каримова
Основатель нашего независимого государства, выдающийся государственный и политический деятель, великий сын узбекского народа, Первый Президент Республики Узбекистан Ислам Абдуганиевич Каримов, освободив нашу Родину от тоталитарного строя, возродил страну, оказавшуюся в то время на краю пропасти. Несмотря на трудности и тяжелые испытания, за исторически короткий период он превратил Узбекистан в современное демократическое государство, развивающееся динамичными и стабильными темпами.
Ислам Абдуганиевич Каримов своей многогранной политической деятельностью, благородными человеческими качествами оставил неизгладимый след в многовековой истории нашей Родины. Как яркая, выдающаяся личность и государственный деятель, он пользовался огромным уважением и авторитетом не только в Узбекистане, но и в мировом сообществе.
От министерств и ведомств, местных органов государственной власти, негосударственных некоммерческих организаций, граждан нашей многонациональной страны поступает множество предложений об увековечении памяти Первого Президента Узбекистана.
Исходя из искренних пожеланий, волеизъявления наших соотечественников, учитывая великие исторические заслуги Первого Президента Республики Узбекистан, Героя Узбекистана Ислама Абдуганиевича Каримова в обретении национальной независимости, обеспечении развития и процветания страны, в целях увековечения его светлой памяти:
1. Принять к сведению:
создание в октябре 2016 года Республиканского благотворительного общественного фонда имени Ислама Каримова;
наименование расположенной по улице Фаргона йули Яшнабадского района города Ташкента мечети «Ислом ота жоме масжиди»;
принятие 2 декабря 2016 года постановления Президента Республики Узбекистан «Об организации международного творческого конкурса по созданию памятника великому государственному и политическому деятелю, Первому Президенту Республики Узбекистан Исламу Абдуганиевичу Каримову».
2. Кабинету Министров (А.Арипов) разработать в установленном порядке план мероприятий по увековечению памяти Первого Президента Республики Узбекистан Ислама Каримова.
В связи с этим поручить:
Министерству культуры, Министерству финансов Республики Узбекистан, Государственному комитету по архитектуре и строительству, Академии художеств Узбекистана и Самаркандскому областному хокимияту возведение мемориального комплекса в городе Самарканде на территории, где находится место захоронения Ислама Каримова;
соответствующим министерствам, ведомствам и местным органам государственной власти по итогам международного творческого конкурса установление памятников Первому Президенту Республики Узбекистан Исламу Абдуганиевичу Каримову в столице нашей страны — городе Ташкенте, в городе Самарканде, где родился и вырос Ислам Каримов, и в городе Карши, где он работал руководителем Кашкадарьинской области;
Министерству культуры, Министерству финансов, Министерству юстиции Республики Узбекистан, Академии наук Узбекистана, Академии художеств Узбекистана, хокимиятам города Ташкента и Самаркандской области организацию: в городе Ташкенте, в резиденции Оксарой (ул. Узбекистанская, 45), где на протяжении долгих лет работал Первый Президент, — Научно-просветительского мемориального комплекса имени Ислама Каримова и размещение по этому же адресу созданного Республиканского благотворительного общественного фонда имени Ислама Каримова; в городе Самарканде — музея Ислама Каримова;
присвоение имени Ислама Каримова следующим учреждениям и объектам:
Ташкентскому государственному техническому университету;
автомобильному заводу в городе Асаке;
Дворцу искусств в городе Фергане;
Ташкентскому международному аэропорту;
центральным улицам в Республике Каракалпакстан, городе Ташкенте и областях (на основе предложений местных органов государственной власти);
организацию ежегодного широкого празднования дня рождения Первого Президента страны — 30 января, а также установление 2 сентября Днем памяти Первого Президента. В связи с этими датами — широко освещать в средствах массовой информации жизнь и деятельность Ислама Каримова;
учреждение Государственной стипендии имени Ислама Каримова для студентов высших учебных заведений;
создание научных и художественных произведений, документальных и художественных фильмов о жизни и деятельности Ислама Каримова;
выпуск специальных почтовых марок с портретом Ислама Каримова.
3. Национальному информационному агентству Узбекистана, Национальной телерадиокомпании Узбекистана и другим средствам массовой информации широко освещать мероприятия, связанные с увековечением памяти Первого Президента Республики Узбекистан Ислама Абдуганиевича Каримова.
4. Контроль за исполнением данного постановления возложить на Премьер-министра Республики Узбекистан А. Арипова.
Президент Республики Узбекистан Ш. МИРЗИЁЕВ
г. Ташкент,
25 января 2017 г.,
№ ПП-2744