📅 2017-yil 13-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 13 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 13 апреля 2017 г. · Постановления Кабинета Министров
Официальный текст. Официальный документ. Редакционные примечания не включены.
📅 13 April 2017 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТАРКИБИ
Наманган вилояти Тўрақўрғон туманида атоқли маърифатпарвар Исҳоқхон Ибрат номидаги ёдгорлик мажмуасини ташкил этиш тўғрисида
XX аср Миллий уйғониш даврининг етук намояндаларидан бири, ноёб истеъдод эгаси, кўплаб Шарқ ва Ғарб тилларининг билимдони, ўлкамиздаги илк матбаачилардан бири сифатида Ватан тараққиёти йўлида фидокорона хизмат қилган Исҳоқхон Ибрат номини абадийлаштириш мақсадида Вазирлар Маҳкамаси қарор қилади:
1. Ўзбекистон Ёзувчилар уюшмаси, Бадиий академия, Маданият вазирлиги, Халқ таълими вазирлиги ва Наманган вилояти ҳокимлигининг Наманган вилояти Тўрақўрғон туманида Исҳоқхон Ибрат номидаги боғ, атоқли маърифатпарварнинг ҳайкали ва музейи ҳамда хорижий тилларга ихтисослаштирилган мактабдан иборат «Исҳоқхон Ибрат мажмуаси»ни (кейинги ўринларда — Мажмуа деб юритилади) ташкил этиш ҳақидаги таклифлари маъқуллансин.
2. Исҳоқхон Ибрат музейи Тўрақўрғон туманидаги маданий мерос объекти бўлган Ғойибназар Қози мадрасаси негизида ташкил этилсин.
Белгилансинки:
Исҳоқхон Ибрат ҳайкали ўрнатиладиган унинг номидаги боғ, хорижий тилларга ихтисослаштирилган мактаб алоҳида юридик шахслар сифатида;
3. Исҳоқхон Ибрат мажмуасини ташкил этиш бўйича республика ишчи гуруҳи иловага мувофиқ тасдиқлансин.
Республика ишчи гуруҳига тегишли вазирликлар ва идоралар билан биргаликда Мажмуани ташкил этиш ҳамда қурилиш ишларини амалга ошириш билан боғлиқ ишларни мувофиқлаштириш вазифаси юклансин.
4. Наманган вилояти ҳокимлиги 10 кун муддатда мажмуани ташкил этиш учун тегишли ер майдони ажратилишини таъминласин.
5. Ўзбекистон Республикаси Халқ таълими вазирлиги бир ой муддатда Исҳоқхон Ибрат номидаги хорижий тилларга ихтисослаштирилган мактаб уставини тасдиқласин ва уни давлат рўйхатидан ўтказсин.
6. Белгилансинки:
Исҳоқхон Ибрат ҳайкали постаменти ҳамда музей учун қўшимча бинолар қуриш Ўзбекистон Республикасининг 2017 йилги Инвестиция дастури доирасида Наманган вилояти ҳокимлигига назарда тутилган марказлаштирилган маблағлар ҳисобидан;
хорижий тилларга ихтисослаштирилган мактаб қуриш ишлари Ўзбекистон Республикаси Молия вазирлиги ҳузуридаги Таълим ва тиббиёт муассасаларининг моддий-техника базасини ривожлантириш жамғармаси маблағлари ҳисобидан;
Исҳоқхон Ибрат музейи биносининг маданий мерос объекти қисмида реставрация ишлари Ўзбекистон Республикаси Маданият вазирлигига маданий мерос объектларини реставрация қилиш ишларига ажратиладиган бюджет маблағлари, жиҳозлаш ишлари маҳаллий бюджетнинг қўшимча маблағлари ҳисобидан;
Исҳоқхон Ибрат ҳайкалини яратиш ва ўрнатиш билан боғлиқ харажатлар Ўзбекистон Республикаси Давлат бюджети параметрларида ижтимоий соҳага назарда тутилган маблағлар ҳисобидан;
Косонсой сойининг «Исҳоқхон Ибрат мажмуа»си ҳудудидан ўтган қисмининг қирғоқларини бетонлаш ва мустаҳкамлаш ишлари Ўзбекистон Республикасининг 2017 йилги Инвестиция дастури доирасида Қишлоқ ва сув хўжалиги вазирлигига ажратилган маблағлар ҳисобидан;
боғни ташкил этиш, ободонлаштириш ва кўкаламзорлаштириш билан боғлиқ харажатлар Наманган вилояти маҳаллий бюджети маблағлари ва қонунчилик ҳужжатларида тақиқланмаган бошқа манбалар ҳисобидан амалга оширилади.
7. Ўзбекистон Республикаси Молия вазирлиги Исҳоқхон Ибрат номидаги боғ ва хорижий тилларга ихтисослаштирилган мактаб фаолиятини ташкил этиш, шунингдек уларнинг тузилмаси ва сақлаш харажатларини молиялаштириш манбалари юзасидан белгиланган тартибда бир ой муддатда Вазирлар Маҳкамасига таклиф киритсин.
8. Ўзбекистон Республикаси Давлат архитектура ва қурилиш қўмитаси Мажмуа қурилиши бўйича лойиҳа-смета ҳужжатларини ишлаб чиқиш ҳамда қурилиш-монтаж ишлари бажарилиши устидан назорат ўрнатсин.
9. Ўзбекистон Республикаси Халқ таълими вазирлигига, Олий ва ўрта махсус таълим вазирлигига:
хорижий тилларга ихтисослаштирилган мактаб фаолиятини йўлга қўйиш ва уни малакали кадрлар билан таъминлаш;
умумтаълим мактаблари, академик лицейлар ва касб-ҳунар коллежлари ҳамда олий таълим муассасаларининг ўқувчи ва талабаларини ушбу мактабга кенг жалб этган ҳолда тарғибот тадбирларини ташкил этиш вазифалари юклансин.
10. Ўзбекистон Миллий телерадиокомпанияси, Ўзбекистон Миллий ахборот агентлиги, Ўзбекистон Матбуот ва ахборот агентлиги ва бошқа оммавий ахборот воситаларига Исҳоқхон Ибрат хотирасини абадийлаштириш ишларини кенг ёритиш тавсия этилсин.
11. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — «Ўзбекистон темир йўллари» АЖ бошқаруви раиси А.Ж. Раматов ва Наманган вилояти ҳокими Х.Х. Бозаров зиммасига юклансин.
Вазирлар Маҳкамасининг 2017 йил 13 апрелдаги 208-сон қарорига ИЛОВА
Наманган вилояти Тўрақўрғон туманида атоқли маърифатпарвар Исҳоқхон Ибрат номидаги ёдгорлик мажмуасини ташкил этиш бўйича республика ишчи гуруҳи
1. А. Раматов — Ўзбекистон Республикаси Бош вазирининг биринчи ўринбосари — «Ўзбекистон темир йўллари» АЖ бошқаруви раиси, ишчи гуруҳ раҳбари 2. Х. Бозаров — Наманган вилояти ҳокими, ишчи гуруҳ раҳбарининг ўринбосари 3. Р. Қосимов — Олий ва ўрта махсус таълим вазири 4. У. Иноятов — Халқ таълими вазири 5. М. Муратов — Маданият вазири 6. Ё. Турсунов — Молия вазирининг ўринбосари 7. А. Тохтаев — «Давархитектқурилиш» қўмитаси раисининг биринчи ўринбосари 8. А. Абдуллаев — Ер ресурслари, геодезия, картография ва давлат кадастри давлат қўмитаси раиси 9. Б. Абдусаматов — Табиатни муҳофаза қилиш давлат қўмитаси раиси 10. К. Мансуров — Матбуот ва ахборот агентлиги бош директори ўринбосари 11. Х. Мирзахидов — Ўзбекистон Миллий телерадиокомпанияси раиси 12. М. Ҳазратқулов — Ўзбекистон Миллий ахборот агентлиги бош директори 13. А. Қодиров — Республика Маънавият ва маърифат маркази раҳбари 15. А. Нуриддинов — Ўзбекистон Бадиий академияси раиси 16. Ш. Жалилов — Ўзбекистон фахрийларини ижтимоий қўллаб-қувватлаш «Нуроний» жамғармаси раиси 17. И. Латипов — «Тасвирий ойина» ижодий уюшмаси раиси 18. С. Саидов — Ёзувчилар уюшмаси раисининг биринчи ўринбосари 19. Ш. Ризаев — «Жаҳон адабиёти» журнали бош муҳаррири 20. М. Ходжиматов — «Гулистон» журнали бош муҳаррири 21. З. Мансуров — Наманган вилояти матбуот ва ахборот бошқармаси бошлиғи 22. П. Маткаримов — Наманган вилояти ҳокимининг Ёшлар сиёсати, ижтимоий ривожлантириш ва маънавий-маърифий ишлар бўйича ўринбосари, ишчи гуруҳ масъул котиби.
Ўзбекистон Республикасининг Бош вазири А. АРИПОВ
Тошкент ш.,
2017 йил 13 апрель,
208-сон
Oʻzbekiston Respublikasi Vazirlar Mahkamasining
qarori
TARKIBI
Namangan viloyati Toʻraqoʻrgʻon tumanida atoqli maʼrifatparvar Isʼhoqxon Ibrat nomidagi yodgorlik majmuasini tashkil etish toʻgʻrisida
XX asr Milliy uygʻonish davrining yetuk namoyandalaridan biri, noyob isteʼdod egasi, koʻplab Sharq va Gʻarb tillarining bilimdoni, oʻlkamizdagi ilk matbaachilardan biri sifatida Vatan taraqqiyoti yoʻlida fidokorona xizmat qilgan Isʼhoqxon Ibrat nomini abadiylashtirish maqsadida Vazirlar Mahkamasi qaror qiladi:
1. Oʻzbekiston Yozuvchilar uyushmasi, Badiiy akademiya, Madaniyat vazirligi, Xalq taʼlimi vazirligi va Namangan viloyati hokimligining Namangan viloyati Toʻraqoʻrgʻon tumanida Isʼhoqxon Ibrat nomidagi bogʻ, atoqli maʼrifatparvarning haykali va muzeyi hamda xorijiy tillarga ixtisoslashtirilgan maktabdan iborat “Isʼhoqxon Ibrat majmuasi”ni (keyingi oʻrinlarda — Majmua deb yuritiladi) tashkil etish haqidagi takliflari maʼqullansin.
2. Isʼhoqxon Ibrat muzeyi Toʻraqoʻrgʻon tumanidagi madaniy meros obyekti boʻlgan Gʻoyibnazar Qozi madrasasi negizida tashkil etilsin.
Belgilansinki:
Isʼhoqxon Ibrat haykali oʻrnatiladigan uning nomidagi bogʻ, xorijiy tillarga ixtisoslashtirilgan maktab alohida yuridik shaxslar sifatida;
3. Isʼhoqxon Ibrat majmuasini tashkil etish boʻyicha respublika ishchi guruhi ilovaga muvofiq tasdiqlansin.
Respublika ishchi guruhiga tegishli vazirliklar va idoralar bilan birgalikda Majmuani tashkil etish hamda qurilish ishlarini amalga oshirish bilan bogʻliq ishlarni muvofiqlashtirish vazifasi yuklansin.
4. Namangan viloyati hokimligi 10 kun muddatda majmuani tashkil etish uchun tegishli yer maydoni ajratilishini taʼminlasin.
5. Oʻzbekiston Respublikasi Xalq taʼlimi vazirligi bir oy muddatda Isʼhoqxon Ibrat nomidagi xorijiy tillarga ixtisoslashtirilgan maktab ustavini tasdiqlasin va uni davlat roʻyxatidan oʻtkazsin.
6. Belgilansinki:
Isʼhoqxon Ibrat haykali postamenti hamda muzey uchun qoʻshimcha binolar qurish Oʻzbekiston Respublikasining 2017-yilgi Investitsiya dasturi doirasida Namangan viloyati hokimligiga nazarda tutilgan markazlashtirilgan mablagʻlar hisobidan;
xorijiy tillarga ixtisoslashtirilgan maktab qurish ishlari Oʻzbekiston Respublikasi Moliya vazirligi huzuridagi Taʼlim va tibbiyot muassasalarining moddiy-texnika bazasini rivojlantirish jamgʻarmasi mablagʻlari hisobidan;
Isʼhoqxon Ibrat muzeyi binosining madaniy meros obyekti qismida restavratsiya ishlari Oʻzbekiston Respublikasi Madaniyat vazirligiga madaniy meros obyektlarini restavratsiya qilish ishlariga ajratiladigan budjet mablagʻlari, jihozlash ishlari mahalliy budjetning qoʻshimcha mablagʻlari hisobidan;
Isʼhoqxon Ibrat haykalini yaratish va oʻrnatish bilan bogʻliq xarajatlar Oʻzbekiston Respublikasi Davlat budjeti parametrlarida ijtimoiy sohaga nazarda tutilgan mablagʻlar hisobidan;
Kosonsoy soyining “Isʼhoqxon Ibrat majmua”si hududidan oʻtgan qismining qirgʻoqlarini betonlash va mustahkamlash ishlari Oʻzbekiston Respublikasining 2017-yilgi Investitsiya dasturi doirasida Qishloq va suv xoʻjaligi vazirligiga ajratilgan mablagʻlar hisobidan;
bogʻni tashkil etish, obodonlashtirish va koʻkalamzorlashtirish bilan bogʻliq xarajatlar Namangan viloyati mahalliy budjeti mablagʻlari va qonunchilik hujjatlarida taqiqlanmagan boshqa manbalar hisobidan amalga oshiriladi.
7. Oʻzbekiston Respublikasi Moliya vazirligi Isʼhoqxon Ibrat nomidagi bogʻ va xorijiy tillarga ixtisoslashtirilgan maktab faoliyatini tashkil etish, shuningdek ularning tuzilmasi va saqlash xarajatlarini moliyalashtirish manbalari yuzasidan belgilangan tartibda bir oy muddatda Vazirlar Mahkamasiga taklif kiritsin.
8. Oʻzbekiston Respublikasi Davlat arxitektura va qurilish qoʻmitasi Majmua qurilishi boʻyicha loyiha-smeta hujjatlarini ishlab chiqish hamda qurilish-montaj ishlari bajarilishi ustidan nazorat oʻrnatsin.
9. Oʻzbekiston Respublikasi Xalq taʼlimi vazirligiga, Oliy va oʻrta maxsus taʼlim vazirligiga:
xorijiy tillarga ixtisoslashtirilgan maktab faoliyatini yoʻlga qoʻyish va uni malakali kadrlar bilan taʼminlash;
umumtaʼlim maktablari, akademik litseylar va kasb-hunar kollejlari hamda oliy taʼlim muassasalarining oʻquvchi va talabalarini ushbu maktabga keng jalb etgan holda targʻibot tadbirlarini tashkil etish vazifalari yuklansin.
10. Oʻzbekiston Milliy teleradiokompaniyasi, Oʻzbekiston Milliy axborot agentligi, Oʻzbekiston Matbuot va axborot agentligi va boshqa ommaviy axborot vositalariga Isʼhoqxon Ibrat xotirasini abadiylashtirish ishlarini keng yoritish tavsiya etilsin.
11. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov va Namangan viloyati hokimi X.X. Bozarov zimmasiga yuklansin.
Vazirlar Mahkamasining 2017-yil 13-apreldagi 208-son qaroriga ILOVA
Namangan viloyati Toʻraqoʻrgʻon tumanida atoqli maʼrifatparvar Isʼhoqxon Ibrat nomidagi yodgorlik majmuasini tashkil etish boʻyicha respublika ishchi guruhi
1. A. Ramatov — Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi, ishchi guruh rahbari 2. X. Bozarov — Namangan viloyati hokimi, ishchi guruh rahbarining oʻrinbosari 3. R. Qosimov — Oliy va oʻrta maxsus taʼlim vaziri 4. U. Inoyatov — Xalq taʼlimi vaziri 5. M. Muratov — Madaniyat vaziri 6. Y. Tursunov — Moliya vazirining oʻrinbosari 7. A. Toxtayev — “Davarxitektqurilish” qoʻmitasi raisining birinchi oʻrinbosari 8. A. Abdullayev — Yer resurslari, geodeziya, kartografiya va davlat kadastri davlat qoʻmitasi raisi 9. B. Abdusamatov — Tabiatni muhofaza qilish davlat qoʻmitasi raisi 10. K. Mansurov — Matbuot va axborot agentligi bosh direktori oʻrinbosari 11. X. Mirzaxidov — Oʻzbekiston Milliy teleradiokompaniyasi raisi 12. M. Hazratqulov — Oʻzbekiston Milliy axborot agentligi bosh direktori 13. A. Qodirov — Respublika Maʼnaviyat va maʼrifat markazi rahbari 15. A. Nuriddinov — Oʻzbekiston Badiiy akademiyasi raisi 16. Sh. Jalilov — Oʻzbekiston faxriylarini ijtimoiy qoʻllab-quvvatlash “Nuroniy” jamgʻarmasi raisi 17. I. Latipov — “Tasviriy oyina” ijodiy uyushmasi raisi 18. S. Saidov — Yozuvchilar uyushmasi raisining birinchi oʻrinbosari 19. Sh. Rizayev — “Jahon adabiyoti” jurnali bosh muharriri 20. M. Xodjimatov — “Guliston” jurnali bosh muharriri 21. Z. Mansurov — Namangan viloyati matbuot va axborot boshqarmasi boshligʻi 22. P. Matkarimov — Namangan viloyati hokimining Yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari, ishchi guruh masʼul kotibi.
Oʻzbekiston Respublikasining Bosh vaziri A. ARIPOV
Toshkent sh.,
2017-yil 13-aprel,
208-son