📅 2017-yil 19-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 19 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 19 июля 2017 г. · Постановления Кабинета Министров
Официальный текст. Официальный документ. Редакционные примечания не включены.
📅 19 July 2017 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
РЎЙХАТИ
Ўзбекистон Республикаси Фанлар академиясининг «Фан ва турмуш» журнали фаолиятини янада такомиллаштириш тўғрисида
Ўзбекистон Республикаси Президентининг «Фанлар академияси фаолияти, илмий-тадқиқот ишларини ташкил этиш, бошқариш ва молиялаштиришни янада такомиллаштириш чора-тадбирлари тўғрисида» 2017 йил 17 февралдаги ПҚ–2789-сон қарорида Ўзбекистон Республикаси Фанлар академиясининг асосий вазифаларидан бири сифатида белгиланган мамлакатимиз илм-фани, илмий салоҳияти, фан ва техника соҳасидаги ютуқларини оммалаштириш ва тарғиб қилиш борасида Академиянинг «Фан ва турмуш» журнали алоҳида аҳамият касб этишини инобатга олган ҳолда, журнал фаолиятини янада такомиллаштириш мақсадида Вазирлар Маҳкамаси қарор қилади:
1. Ўзбекистон Республикаси Фанлар академияси «Фан ва турмуш» журналининг асосий вазифалари этиб қуйидагилар белгилансин:
мамлакатимизнинг илм-фан, илмий салоҳият, фан ва техника соҳасидаги ютуқларини оммалаштириш ва тарғиб қилиш;
фан ва техника соҳасидаги энг долзарб янгиликларнинг моҳиятини илмий-оммабоп шаклда халқимизга, айниқса ёш авлодга етказиш;
мамлакатимизда илм-фанни ривожлантириш йўлида олиб борилаётган ислоҳотларнинг мазмун-моҳиятидан, илм-фаннинг таълим ва ишлаб чиқариш билан интеграцияси механизмларини мустаҳкамлаш ва ривожлантириш борасида амалга оширилаётган ишлардан аҳолини, айниқса ёш авлодни мунтазам хабардор қилиб бориш;
иқтисодиётнинг реал секторини ривожлантириш учун хизмат қиладиган янги технологияларни яратиш ва амалиётга татбиқ этиш соҳасида амалий аҳамиятга эга бўлган илмий-техникавий тадқиқотлар ва технологик ишланмалар ишлаб чиқарилишини тарғиб қилиш.
2. Белгилаб қўйилсинки, «Ўзбекистон Республикаси Фанлар академияси «Фан ва турмуш» журнали» давлат унитар корхонасининг (кейинги ўринларда Журнал таҳририяти деб аталади) фаолиятини молиялаштириш:
сотув, обуна ва рекламадан тушадиган маблағлар;
Ўзбекистон Республикаси Фан ва технологиялар агентлиги томонидан ўтказиладиган танловларнинг натижалари бўйича ажратиладиган грантлар, жумладан, мақсадли грантлар;
жисмоний ва юридик шахсларнинг ҳомийлик хайриялари;
халқаро молия институтлари ва бошқа институтларнинг, хорижий ҳукумат ташкилотларининг грантлари;
қонунчиликда тақиқланмаган бошқа манбалар ҳисобидан амалга оширилади.
3. Ҳомий ташкилотларнинг Ўзбекистон Республикаси Фанлар академиясининг «Фан ва турмуш» журнали фаолиятини янада такомиллаштириш билан боғлиқ харажатларни қоплаш учун унга ҳомийлик хайриялари ажратиш тўғрисидаги таклифлари иловага мувофиқ маъқуллансин.
4. «Ўзавтосаноат» акциядорлик жамияти Журнал таҳририятига «Дамас» русумли автомобиль ажратсин.
Белгилаб қўйилсинки, «Дамас» русумли автомобилни харид қилиш билан боғлиқ харажатлар Журнал таҳририятига ушбу қарорга мувофиқ ажратилаётган ҳомийлик хайриялари ҳисобидан қопланади.
5. Ўзбекистон Республикаси Фанлар академияси:
бир ой муддатда Журнал таҳририятининг янгиланган тузилмасини ва уставини ишлаб чиқсин ва тасдиқласин;
Журнал таҳририяти фаолиятини тубдан такомиллаштириш, шу жумладан таҳририят кенгаши таркибига академиклар, республиканинг йирик олимлари ва иқтисодиётнинг реал сектори вакилларини киритиш, Журнал таҳририяти фаолиятига ахборот-коммуникация технологияларини кенг жорий этиш, унинг рукнларини кенгайтириш ва мақолалар сифатини ошириш орқали обуначилар сонини кўпайтириш бўйича комплекс чора-тадбирларни икки ой муддатда ишлаб чиқсин ва тасдиқласин.
6. Мазкур қарорнинг бажарилишини назорат қилиш Вазирлар Маҳкамасининг Таълим, илм-фан ва ёшлар сиёсати масалалари ахборот-таҳлил департаментига юклансин.
Вазирлар Маҳкамасининг 2017 йил 19 июлдаги 518-сон қарорига ИЛОВА
Ўзбекистон Республикаси Фанлар академиясининг «Фан ва турмуш» журнали фаолиятини янада такомиллаштириш билан боғлиқ харажатларни қоплаш учун унга ҳомийлик хайрияларини ажратаётган ҳомий ташкилотлар
млн сўм Т/р Ҳомий ташкилотнинг номи Ҳомийлик хайрияларининг миқдори 1. «Ўзбекнефтгаз» АЖ 25,0 2. «Ўзпахтаёғ» АЖ 25,0 3. «Ўзфармсаноат» ДАК 25,0 4. «Навоий кон-маталлургия комбинати» ДК 25,0
Ўзбекистон Республикасининг Бош вазири А. АРИПОВ
Тошкент ш.,
2017 йил 19 июль,
518-сон
Oʻzbekiston Respublikasi Vazirlar Mahkamasining
qarori
ROʻYXATI
Oʻzbekiston Respublikasi Fanlar akademiyasining “Fan va turmush” jurnali faoliyatini yanada takomillashtirish toʻgʻrisida
Oʻzbekiston Respublikasi Prezidentining “Fanlar akademiyasi faoliyati, ilmiy-tadqiqot ishlarini tashkil etish, boshqarish va moliyalashtirishni yanada takomillashtirish chora-tadbirlari toʻgʻrisida” 2017-yil 17-fevraldagi PQ–2789-son qarorida Oʻzbekiston Respublikasi Fanlar akademiyasining asosiy vazifalaridan biri sifatida belgilangan mamlakatimiz ilm-fani, ilmiy salohiyati, fan va texnika sohasidagi yutuqlarini ommalashtirish va targʻib qilish borasida Akademiyaning “Fan va turmush” jurnali alohida ahamiyat kasb etishini inobatga olgan holda, jurnal faoliyatini yanada takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Fanlar akademiyasi “Fan va turmush” jurnalining asosiy vazifalari etib quyidagilar belgilansin:
mamlakatimizning ilm-fan, ilmiy salohiyat, fan va texnika sohasidagi yutuqlarini ommalashtirish va targʻib qilish;
fan va texnika sohasidagi eng dolzarb yangiliklarning mohiyatini ilmiy-ommabop shaklda xalqimizga, ayniqsa yosh avlodga yetkazish;
mamlakatimizda ilm-fanni rivojlantirish yoʻlida olib borilayotgan islohotlarning mazmun-mohiyatidan, ilm-fanning taʼlim va ishlab chiqarish bilan integratsiyasi mexanizmlarini mustahkamlash va rivojlantirish borasida amalga oshirilayotgan ishlardan aholini, ayniqsa yosh avlodni muntazam xabardor qilib borish;
iqtisodiyotning real sektorini rivojlantirish uchun xizmat qiladigan yangi texnologiyalarni yaratish va amaliyotga tatbiq etish sohasida amaliy ahamiyatga ega boʻlgan ilmiy-texnikaviy tadqiqotlar va texnologik ishlanmalar ishlab chiqarilishini targʻib qilish.
2. Belgilab qoʻyilsinki, “Oʻzbekiston Respublikasi Fanlar akademiyasi “Fan va turmush” jurnali” davlat unitar korxonasining (keyingi oʻrinlarda Jurnal tahririyati deb ataladi) faoliyatini moliyalashtirish:
sotuv, obuna va reklamadan tushadigan mablagʻlar;
Oʻzbekiston Respublikasi Fan va texnologiyalar agentligi tomonidan oʻtkaziladigan tanlovlarning natijalari boʻyicha ajratiladigan grantlar, jumladan, maqsadli grantlar;
jismoniy va yuridik shaxslarning homiylik xayriyalari;
xalqaro moliya institutlari va boshqa institutlarning, xorijiy hukumat tashkilotlarining grantlari;
qonunchilikda taqiqlanmagan boshqa manbalar hisobidan amalga oshiriladi.
3. Homiy tashkilotlarning Oʻzbekiston Respublikasi Fanlar akademiyasining “Fan va turmush” jurnali faoliyatini yanada takomillashtirish bilan bogʻliq xarajatlarni qoplash uchun unga homiylik xayriyalari ajratish toʻgʻrisidagi takliflari ilovaga muvofiq maʼqullansin.
4. “Oʻzavtosanoat” aksiyadorlik jamiyati Jurnal tahririyatiga “Damas” rusumli avtomobil ajratsin.
Belgilab qoʻyilsinki, “Damas” rusumli avtomobilni xarid qilish bilan bogʻliq xarajatlar Jurnal tahririyatiga ushbu qarorga muvofiq ajratilayotgan homiylik xayriyalari hisobidan qoplanadi.
5. Oʻzbekiston Respublikasi Fanlar akademiyasi:
bir oy muddatda Jurnal tahririyatining yangilangan tuzilmasini va ustavini ishlab chiqsin va tasdiqlasin;
Jurnal tahririyati faoliyatini tubdan takomillashtirish, shu jumladan tahririyat kengashi tarkibiga akademiklar, respublikaning yirik olimlari va iqtisodiyotning real sektori vakillarini kiritish, Jurnal tahririyati faoliyatiga axborot-kommunikatsiya texnologiyalarini keng joriy etish, uning ruknlarini kengaytirish va maqolalar sifatini oshirish orqali obunachilar sonini koʻpaytirish boʻyicha kompleks chora-tadbirlarni ikki oy muddatda ishlab chiqsin va tasdiqlasin.
6. Mazkur qarorning bajarilishini nazorat qilish Vazirlar Mahkamasining Taʼlim, ilm-fan va yoshlar siyosati masalalari axborot-tahlil departamentiga yuklansin.
Vazirlar Mahkamasining 2017-yil 19-iyuldagi 518-son qaroriga ILOVA
Oʻzbekiston Respublikasi Fanlar akademiyasining “Fan va turmush” jurnali faoliyatini yanada takomillashtirish bilan bogʻliq xarajatlarni qoplash uchun unga homiylik xayriyalarini ajratayotgan homiy tashkilotlar
mln soʻm T/r Homiy tashkilotning nomi Homiylik xayriyalarining miqdori 1. “Oʻzbekneftgaz” AJ 25,0 2. “Oʻzpaxtayogʻ” AJ 25,0 3. “Oʻzfarmsanoat” DAK 25,0 4. “Navoiy kon-matallurgiya kombinati” DK 25,0
Oʻzbekiston Respublikasining Bosh vaziri A. ARIPOV
Toshkent sh.,
2017-yil 19-iyul,
518-son