📅 2017-yil 25-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 25 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 25 июля 2017 г. · Постановления Кабинета Министров
Официальный текст. Официальный документ. Редакционные примечания не включены.
📅 25 July 2017 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Андижон шаҳрида Муҳаммад Юсуф номидаги ижод мактабини ва Муҳаммад Юсуфнинг бюсти ўрнатилган хиёбонни ташкил этиш тўғрисида
Ўзбек шеъриятининг ривожланишига салмоқли ҳисса қўшган нодир истеъдод соҳиби, Ватан куйчиси, бадиий теран, фалсафий шеърлари билан халқимиз кўнглидан чуқур жой олган Ўзбекистон халқ шоири Муҳаммад Юсуф номини абадийлаштириш, шоир издошларини кашф этиш ҳамда уларнинг истеъдодларини кенг намоён қилишларига шарт-шароитлар яратиш мақсадида Вазирлар Маҳкамаси қарор қилади:
1. Андижон давлат университети қошидаги 4-сон академик лицей ҳудудида Муҳаммад Юсуф номидаги ижод мактаби (кейинги ўринларда — ижод мактаби) ва Муҳаммад Юсуфнинг бюсти (кейинги ўринларда — бюст) ўрнатилган хиёбон ташкил этилсин.
2. Белгилаб қўйилсинки, ижод мактабида ҳар бир синфдаги ўқувчилар сони 20 нафарни ташкил қилади, 7-синфларга эса ижодий танловлар, тест ва бошқа синовлар асосида қабул қилинади.
Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ижод мактабининг моддий-техник базаси, имкониятлари, педагог кадрлар салоҳиятидан ҳамда мавжуд талаб ва эҳтиёждан келиб чиққан ҳолда, кейинги йилларда ўқувчиларни қабул қилиш квоталарига ўзгартиришлар киритиш ҳуқуқи берилади.
3. Андижон вилояти ҳокимлиги Ўзбекистон Республикаси Давлат архитектура ва қурилиш қўмитаси, Халқ таълими вазирлиги ҳамда Ўзбекистон Бадиий академияси билан биргаликда 2017 йил 1 сентябргача:
Андижон давлат университети қошидаги 4-сон академик лицей биносининг 1-қаватида 150 ўринли ўқув биносини ихтисослаштирилган мактабга мослаштириш бўйича таъмирлаш ишларини амалга ошириш ва уни фойдаланишга топшириш;
бюстнинг ижодий ва техник параметрларини ишлаб чиқиш ҳамда уни сифатли яратиш;
Андижон давлат университети қошидаги 4-сон академик лицей ҳудудида бюст ўрнатилган хиёбонни ташкил этиш чораларини кўрсин.
4. Андижон вилояти ҳокимлиги, Ўзбекистон Республикаси Халқ таълими вазирлигининг ва Ўзбекистон Бадиий академиясининг ихтисослаштирилган мактабда таъмирлаш ҳамда бюст ўрнатилган хиёбонни ташкил этиш ишларини амалга ошириш бўйича:
буюртмачи этиб — Андижон вилояти ҳокимлиги ҳузуридаги «Ягона буюртмачи хизмати» инжиниринг компаниясини;
бош лойиҳачи ташкилот этиб — «Андижонфуқаролойиҳа» МЧЖни белгилаш;
пудратчи ташкилотни, истисно тариқасида, танлов савдолари ўтказилмасдан энг яхши таклифларни танлаб олиш орқали аниқлаш тўғрисидаги таклифлари маъқуллансин.
5. Белгилаб қўйилсинки, мактабда таъмирлаш ишлари, бюст яратиш ҳамда бюст ўрнатиладиган хиёбонни ташкил этиш билан боғлиқ харажатлар Андижон вилояти маҳаллий бюджети маблағлари ҳисобига амалга оширилади.
6. Ўзбекистон Республикаси Давлат архитектура ва қурилиш қўмитаси ишлаб чиқилган лойиҳа-смета ҳужжатларини белгиланган тартибда давлат экспертизасидан ўтказсин ва қурилиш-таъмирлаш ишларининг сифатли бажарилиши устидан давлат архитектура-қурилиш назоратини тизимли равишда амалга оширсин.
7. Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги Иқтисодиёт ва молия вазирлиги билан биргаликда ижод мактабининг моддий-техник базасини мустаҳкамлаш мақсадида уни ўқув-лаборатория жиҳозлари, компьютер техникаси, ўқув-методик мажмуалар, ўқитувчилар учун методик қўлланмалар ҳамда бадиий адабиётлар билан таъминлаш чораларини кўрсин.
9. Ўзбекистон Республикаси Иқтисодиёт ва молия вазирлиги Ўзбекистон Республикаси Давлат бюджети параметрларида Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ажратилган маблағлар доирасида ижод мактабининг таъминоти учун зарур маблағларни назарда тутсин.
10. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — «Ўзбекистон темир йўллари» АЖ бошқаруви раиси А.Ж. Раматов, Ўзбекистон Республикаси халқ таълими вазири У.И. Иноятов ва Андижон вилоятининг ҳокими Ш.К. Абдураҳмонов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2017 йил 25 июль,
539-сон
Oʻzbekiston Respublikasi Vazirlar Mahkamasining
qarori
Andijon shahrida Muhammad Yusuf nomidagi ijod maktabini va Muhammad Yusufning byusti oʻrnatilgan xiyobonni tashkil etish toʻgʻrisida
Oʻzbek sheʼriyatining rivojlanishiga salmoqli hissa qoʻshgan nodir isteʼdod sohibi, Vatan kuychisi, badiiy teran, falsafiy sheʼrlari bilan xalqimiz koʻnglidan chuqur joy olgan Oʻzbekiston xalq shoiri Muhammad Yusuf nomini abadiylashtirish, shoir izdoshlarini kashf etish hamda ularning isteʼdodlarini keng namoyon qilishlariga shart-sharoitlar yaratish maqsadida Vazirlar Mahkamasi qaror qiladi:
1. Andijon davlat universiteti qoshidagi 4-son akademik litsey hududida Muhammad Yusuf nomidagi ijod maktabi (keyingi oʻrinlarda — ijod maktabi) va Muhammad Yusufning byusti (keyingi oʻrinlarda — byust) oʻrnatilgan xiyobon tashkil etilsin.
2. Belgilab qoʻyilsinki, ijod maktabida har bir sinfdagi oʻquvchilar soni 20 nafarni tashkil qiladi, 7-sinflarga esa ijodiy tanlovlar, test va boshqa sinovlar asosida qabul qilinadi.
Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ijod maktabining moddiy-texnik bazasi, imkoniyatlari, pedagog kadrlar salohiyatidan hamda mavjud talab va ehtiyojdan kelib chiqqan holda, keyingi yillarda oʻquvchilarni qabul qilish kvotalariga oʻzgartirishlar kiritish huquqi beriladi.
3. Andijon viloyati hokimligi Oʻzbekiston Respublikasi Davlat arxitektura va qurilish qoʻmitasi, Xalq taʼlimi vazirligi hamda Oʻzbekiston Badiiy akademiyasi bilan birgalikda 2017-yil 1-sentabrgacha:
Andijon davlat universiteti qoshidagi 4-son akademik litsey binosining 1-qavatida 150 oʻrinli oʻquv binosini ixtisoslashtirilgan maktabga moslashtirish boʻyicha taʼmirlash ishlarini amalga oshirish va uni foydalanishga topshirish;
byustning ijodiy va texnik parametrlarini ishlab chiqish hamda uni sifatli yaratish;
Andijon davlat universiteti qoshidagi 4-son akademik litsey hududida byust oʻrnatilgan xiyobonni tashkil etish choralarini koʻrsin.
4. Andijon viloyati hokimligi, Oʻzbekiston Respublikasi Xalq taʼlimi vazirligining va Oʻzbekiston Badiiy akademiyasining ixtisoslashtirilgan maktabda taʼmirlash hamda byust oʻrnatilgan xiyobonni tashkil etish ishlarini amalga oshirish boʻyicha:
buyurtmachi etib — Andijon viloyati hokimligi huzuridagi “Yagona buyurtmachi xizmati” injiniring kompaniyasini;
bosh loyihachi tashkilot etib — “Andijonfuqaroloyiha” MCHJni belgilash;
pudratchi tashkilotni, istisno tariqasida, tanlov savdolari oʻtkazilmasdan eng yaxshi takliflarni tanlab olish orqali aniqlash toʻgʻrisidagi takliflari maʼqullansin.
5. Belgilab qoʻyilsinki, maktabda taʼmirlash ishlari, byust yaratish hamda byust oʻrnatiladigan xiyobonni tashkil etish bilan bogʻliq xarajatlar Andijon viloyati mahalliy budjeti mablagʻlari hisobiga amalga oshiriladi.
6. Oʻzbekiston Respublikasi Davlat arxitektura va qurilish qoʻmitasi ishlab chiqilgan loyiha-smeta hujjatlarini belgilangan tartibda davlat ekspertizasidan oʻtkazsin va qurilish-taʼmirlash ishlarining sifatli bajarilishi ustidan davlat arxitektura-qurilish nazoratini tizimli ravishda amalga oshirsin.
7. Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi Iqtisodiyot va moliya vazirligi bilan birgalikda ijod maktabining moddiy-texnik bazasini mustahkamlash maqsadida uni oʻquv-laboratoriya jihozlari, kompyuter texnikasi, oʻquv-metodik majmualar, oʻqituvchilar uchun metodik qoʻllanmalar hamda badiiy adabiyotlar bilan taʼminlash choralarini koʻrsin.
9. Oʻzbekiston Respublikasi Iqtisodiyot va moliya vazirligi Oʻzbekiston Respublikasi Davlat budjeti parametrlarida Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ajratilgan mablagʻlar doirasida ijod maktabining taʼminoti uchun zarur mablagʻlarni nazarda tutsin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi xalq taʼlimi vaziri U.I. Inoyatov va Andijon viloyatining hokimi Sh.K. Abdurahmonov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2017-yil 25-iyul,
539-son