📅 2017-yil 26-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 26 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 26 июля 2017 г. · Постановления Кабинета Министров
Официальный текст. Официальный документ. Редакционные примечания не включены.
📅 26 July 2017 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТУЗИЛМАСИ
Ўрмон хўжалиги илмий-тадқиқот институтининг Андижон филиалини ташкил этиш тўғрисида
Андижон вилояти ўрмон фонди ерларининг экологик ҳолатини яхшилаш, қайта тиклаш, тоғ олди ва адир ерларидан унумли фойдаланиш жумладан, ёнғоқ, писта, бодом кўчатлари ҳамда доривор ўсимликларни етиштиришни кўпайтириш, ўрмонларни кенгайтириш ва иҳота ўрмонлари барпо этишда самарали инновацион усулларни қўллаш, ўсимликлар селекцияси ва уруғчилиги бўйича илмий тадқиқотларни амалга ошириш, ўрмон хўжалиги соҳасида кадрлар илмий салоҳиятини янада ошириш, уларни тайёрлаш ва малакасини оширишни ташкил этиш мақсадида Вазирлар Маҳкамаси қарор қилади:
1. Андижон вилояти ҳокимлиги, Ўзбекистон Республикаси Ўрмон хўжалиги давлат қўмитаси ва Фанлар Академиясининг Ўрмон хўжалиги илмий-тадқиқот институтининг Андижон филиалини (кейинги ўринларда Филиал деб аталади) ташкил этиш тўғрисидаги таклифига розилик берилсин.
2. Ўрмон хўжалиги илмий-тадқиқот институтининг Андижон филиалининг тузилмаси иловага мувофиқ тасдиқлансин.
Филиал директори Ўрмон хўжалиги илмий-тадқиқот институти директори тавсиясига кўра Ўзбекистон Республикаси Ўрмон хўжалиги давлат қўмитаси раиси томонидан лавозимга тайинланади ва лавозимидан озод этилади.
Филиал директори Ўрмон хўжалиги илмий-тадқиқот институти директори ўринбосарига тенглаштирилади.
3. Филиалнинг асосий вазифалари ва йўналишлари этиб қуйидагилар белгилансин:
доривор ўсимликлар уруғчилигини йўлга қўйиш, шунингдек манзарали, мевали дарахт ва бута кўчатларини етиштириш ва етказиб бериш;
ўрмон фонди ерларида ноёб манзарали ва мевали, шу жумладан, ёнғоқ, писта, бодом, унаби ва лимон кўчатлари ҳамда доривор ўсимликларни етиштириш агротехнологияси бўйича илмий тадқиқотларни олиб бориш;
ўрмон хўжаликларида чорвачилик, паррандачилик, асаларичилик, балиқчилик, қуёнчиликни ривожлантириш юзасидан тавсиялар ишлаб чиқиш;
манзарали ўсимликлар кўчатларини етиштиришнинг илмий асосларини ҳамда истиқболли технологияларини ишлаб чиқиш ва жорий этиш;
ўрмон фонди ерларининг экологик ҳолатини яхшилаш, ўрмонларни кенгайтириш ва қайта тиклаш, иҳота ўрмонлари барпо этиш бўйича самарали инновацион усулларни ишлаб чиқиш;
эрозияга қарши ўрмон барпо этишнинг илмий асосланган технологияларини ишлаб чиқиш ва жорий этиш;
доривор ўсимликлар плантацияларини ташкил этиш, тоғ ёнбағирларидаги ерларда етиштириладиган, қурғоқчилик, зараркунанда ва касалликларга чидамли ўсимликлар селекцияси ва уруғчилиги бўйича илмий тадқиқотларни амалга ошириш;
ўрмон хўжалиги соҳаси учун кадрлар илмий салоҳиятини янада ошириш, уларни тайёрлаш ва малакасини оширишни ташкил этиш.
4. Қуйидагилар Филиал фаолиятини молиялаштиришнинг асосий манбалари этиб белгилансин:
Ўзбекистон Республикаси Ўрмон хўжалиги давлат қўмитасининг Ўрмон хўжалигини ривожлантириш жамғармаси ва республика бюджетидан ажратиладиган маблағлар;
давлат илмий дастурлари доирасида ажратиладиган грантлар;
хўжалик фаолиятидан, халқаро молиявий институтлар ва хорижий донорлик ташкилотларнинг грантлари, шунингдек ҳомийлик хайриялари ҳамда қонун ҳужжатларида таъқиқланмаган бошқа манбалар.
Белгилаб қўйилсинки, Филиал ходимларига республика илмий-тадқиқот институтлари ходимлари учун белгиланган меҳнатга ҳақ тўлаш ва моддий рағбатлантириш тартиби татбиқ этилади.
5. Ўзбекистон Республикаси Молия вазирлиги Филиалга бир дона махсус автотранспорт таъминотига лимит ажратсин.
6. Ўзбекистон Республикаси Ўрмон хўжалиги давлат қўмитаси икки ой муддатда:
Ўрмон хўжалиги илмий-тадқиқот институтининг Андижон филиали тўғрисидаги низомни тасдиқлаш;
Андижон вилояти ҳокимлиги билан биргаликда Филиални зарур мебель, компьютер техникаси, алоқа воситалари ва бошқа моддий воситалар билан таъминлаш;
Андижон вилояти ҳокимлиги, Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси билан биргаликда Филиални бўш турган бино билан текин фойдаланиш ҳуқуқи асосида таъминлаш;
Ўзбекистон Республикаси Иқтисодиёт вазирлиги, Қишлоқ ва сув хўжалиги вазирлиги, Инвестициялар бўйича давлат қўмитаси, Ташқи иқтисодий фаолият миллий банки, Фан ва технологиялар агентлиги билан биргаликда зарур замонавий лаборатория жиҳозлари сотиб олиш ҳамда фундаментал, амалий ва инновацион лойиҳаларни амалга ошириш учун давлат ва халқаро грантларни жалб қилиш чораларини кўрсин.
7. Ўзбекистон Республикаси Ташқи иқтисодий фаолият миллий банкига Андижон давлат ўрмон хўжалигига белгиланган вазифаларни амалга ошириш жумладан, моддий техник базани ривожлантириш, минерал ўғит ва ёқилғи мойлаш материаллари сотиб олиш ҳамда айланма маблағлар билан таъминлаш учун Ўзбекистон Республикаси Марказий банкининг қайта молиялаштириш ставкасидан ошмаган ҳолда кредитлар ажратиш тавсия этилсин.
8. Андижон вилояти ҳокимлиги, Ўзбекистон Республикаси Ўрмон хўжалиги давлат қўмитаси, Ер ресурслари, геодезия, картография ва давлат кадастри давлат қўмитаси билан биргаликда заъфарон ўсимлиги бўйича илмий-тадқиқот ишларини олиб бориш, уни кўпайтириш ва етиштиришга ихтисослаштирилган «Shafran ilmiy tadqiqot markazi» масъулияти чекланган жамиятига Андижон вилоятининг Қўрғонтепа туманидан 20 гектар ва Марҳамат туманидан 20 гектар унумдорлиги юқори, суғориладиган ер майдонлари ажратилишини таъминласин.
9. Ўзбекистон Республикаси Ўрмон хўжалиги давлат қўмитаси Ташқи ишлар вазирлиги билан биргаликда 2018 — 2020 йилларда ўрмончилик соҳасини самарали фаолиятини йўлга қўйиш мақсадида, Ўзбекистон Республикаси Ўрмон хўжалиги давлат қўмитасининг Ўрмон хўжалигини ривожлантириш жамғармаси ва грантлар ҳисобидан етакчи давлатлар тажрибаларини ўрганишни ташкил қилсин.
10. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — қишлоқ ва сув хўжалиги вазири З.Т. Мирзаев зиммасига юклансин.
Вазирлар Маҳкамасининг 2017 йил 26 июлдаги 544-сонли қарорига ИЛОВА
Ўрмон хўжалиги илмий-тадқиқот институти Андижон филиалининг
Ўзбекистон Республикасининг Бош вазири А. АРИПОВ
Тошкент ш.,
2017 йил 26 июль,
544-сон
Oʻzbekiston Respublikasi Vazirlar Mahkamasining
qarori
TUZILMASI
Oʻrmon xoʻjaligi ilmiy-tadqiqot institutining Andijon filialini tashkil etish toʻgʻrisida
Andijon viloyati oʻrmon fondi yerlarining ekologik holatini yaxshilash, qayta tiklash, togʻ oldi va adir yerlaridan unumli foydalanish jumladan, yongʻoq, pista, bodom koʻchatlari hamda dorivor oʻsimliklarni yetishtirishni koʻpaytirish, oʻrmonlarni kengaytirish va ihota oʻrmonlari barpo etishda samarali innovatsion usullarni qoʻllash, oʻsimliklar seleksiyasi va urugʻchiligi boʻyicha ilmiy tadqiqotlarni amalga oshirish, oʻrmon xoʻjaligi sohasida kadrlar ilmiy salohiyatini yanada oshirish, ularni tayyorlash va malakasini oshirishni tashkil etish maqsadida Vazirlar Mahkamasi qaror qiladi:
1. Andijon viloyati hokimligi, Oʻzbekiston Respublikasi Oʻrmon xoʻjaligi davlat qoʻmitasi va Fanlar Akademiyasining Oʻrmon xoʻjaligi ilmiy-tadqiqot institutining Andijon filialini (keyingi oʻrinlarda Filial deb ataladi) tashkil etish toʻgʻrisidagi taklifiga rozilik berilsin.
2. Oʻrmon xoʻjaligi ilmiy-tadqiqot institutining Andijon filialining tuzilmasi ilovaga muvofiq tasdiqlansin.
Filial direktori Oʻrmon xoʻjaligi ilmiy-tadqiqot instituti direktori tavsiyasiga koʻra Oʻzbekiston Respublikasi Oʻrmon xoʻjaligi davlat qoʻmitasi raisi tomonidan lavozimga tayinlanadi va lavozimidan ozod etiladi.
Filial direktori Oʻrmon xoʻjaligi ilmiy-tadqiqot instituti direktori oʻrinbosariga tenglashtiriladi.
3. Filialning asosiy vazifalari va yoʻnalishlari etib quyidagilar belgilansin:
dorivor oʻsimliklar urugʻchiligini yoʻlga qoʻyish, shuningdek manzarali, mevali daraxt va buta koʻchatlarini yetishtirish va yetkazib berish;
oʻrmon fondi yerlarida noyob manzarali va mevali, shu jumladan, yongʻoq, pista, bodom, unabi va limon koʻchatlari hamda dorivor oʻsimliklarni yetishtirish agrotexnologiyasi boʻyicha ilmiy tadqiqotlarni olib borish;
oʻrmon xoʻjaliklarida chorvachilik, parrandachilik, asalarichilik, baliqchilik, quyonchilikni rivojlantirish yuzasidan tavsiyalar ishlab chiqish;
manzarali oʻsimliklar koʻchatlarini yetishtirishning ilmiy asoslarini hamda istiqbolli texnologiyalarini ishlab chiqish va joriy etish;
oʻrmon fondi yerlarining ekologik holatini yaxshilash, oʻrmonlarni kengaytirish va qayta tiklash, ihota oʻrmonlari barpo etish boʻyicha samarali innovatsion usullarni ishlab chiqish;
eroziyaga qarshi oʻrmon barpo etishning ilmiy asoslangan texnologiyalarini ishlab chiqish va joriy etish;
dorivor oʻsimliklar plantatsiyalarini tashkil etish, togʻ yonbagʻirlaridagi yerlarda yetishtiriladigan, qurgʻoqchilik, zararkunanda va kasalliklarga chidamli oʻsimliklar seleksiyasi va urugʻchiligi boʻyicha ilmiy tadqiqotlarni amalga oshirish;
oʻrmon xoʻjaligi sohasi uchun kadrlar ilmiy salohiyatini yanada oshirish, ularni tayyorlash va malakasini oshirishni tashkil etish.
4. Quyidagilar Filial faoliyatini moliyalashtirishning asosiy manbalari etib belgilansin:
Oʻzbekiston Respublikasi Oʻrmon xoʻjaligi davlat qoʻmitasining Oʻrmon xoʻjaligini rivojlantirish jamgʻarmasi va respublika budjetidan ajratiladigan mablagʻlar;
davlat ilmiy dasturlari doirasida ajratiladigan grantlar;
xoʻjalik faoliyatidan, xalqaro moliyaviy institutlar va xorijiy donorlik tashkilotlarning grantlari, shuningdek homiylik xayriyalari hamda qonun hujjatlarida taʼqiqlanmagan boshqa manbalar.
Belgilab qoʻyilsinki, Filial xodimlariga respublika ilmiy-tadqiqot institutlari xodimlari uchun belgilangan mehnatga haq toʻlash va moddiy ragʻbatlantirish tartibi tatbiq etiladi.
5. Oʻzbekiston Respublikasi Moliya vazirligi Filialga bir dona maxsus avtotransport taʼminotiga limit ajratsin.
6. Oʻzbekiston Respublikasi Oʻrmon xoʻjaligi davlat qoʻmitasi ikki oy muddatda:
Oʻrmon xoʻjaligi ilmiy-tadqiqot institutining Andijon filiali toʻgʻrisidagi nizomni tasdiqlash;
Andijon viloyati hokimligi bilan birgalikda Filialni zarur mebel, kompyuter texnikasi, aloqa vositalari va boshqa moddiy vositalar bilan taʼminlash;
Andijon viloyati hokimligi, Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi bilan birgalikda Filialni boʻsh turgan bino bilan tekin foydalanish huquqi asosida taʼminlash;
Oʻzbekiston Respublikasi Iqtisodiyot vazirligi, Qishloq va suv xoʻjaligi vazirligi, Investitsiyalar boʻyicha davlat qoʻmitasi, Tashqi iqtisodiy faoliyat milliy banki, Fan va texnologiyalar agentligi bilan birgalikda zarur zamonaviy laboratoriya jihozlari sotib olish hamda fundamental, amaliy va innovatsion loyihalarni amalga oshirish uchun davlat va xalqaro grantlarni jalb qilish choralarini koʻrsin.
7. Oʻzbekiston Respublikasi Tashqi iqtisodiy faoliyat milliy bankiga Andijon davlat oʻrmon xoʻjaligiga belgilangan vazifalarni amalga oshirish jumladan, moddiy texnik bazani rivojlantirish, mineral oʻgʻit va yoqilgʻi moylash materiallari sotib olish hamda aylanma mablagʻlar bilan taʼminlash uchun Oʻzbekiston Respublikasi Markaziy bankining qayta moliyalashtirish stavkasidan oshmagan holda kreditlar ajratish tavsiya etilsin.
8. Andijon viloyati hokimligi, Oʻzbekiston Respublikasi Oʻrmon xoʻjaligi davlat qoʻmitasi, Yer resurslari, geodeziya, kartografiya va davlat kadastri davlat qoʻmitasi bilan birgalikda zaʼfaron oʻsimligi boʻyicha ilmiy-tadqiqot ishlarini olib borish, uni koʻpaytirish va yetishtirishga ixtisoslashtirilgan “Shafran ilmiy tadqiqot markazi” masʼuliyati cheklangan jamiyatiga Andijon viloyatining Qoʻrgʻontepa tumanidan 20 gektar va Marhamat tumanidan 20 gektar unumdorligi yuqori, sugʻoriladigan yer maydonlari ajratilishini taʼminlasin.
9. Oʻzbekiston Respublikasi Oʻrmon xoʻjaligi davlat qoʻmitasi Tashqi ishlar vazirligi bilan birgalikda 2018 — 2020-yillarda oʻrmonchilik sohasini samarali faoliyatini yoʻlga qoʻyish maqsadida, Oʻzbekiston Respublikasi Oʻrmon xoʻjaligi davlat qoʻmitasining Oʻrmon xoʻjaligini rivojlantirish jamgʻarmasi va grantlar hisobidan yetakchi davlatlar tajribalarini oʻrganishni tashkil qilsin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — qishloq va suv xoʻjaligi vaziri Z.T. Mirzayev zimmasiga yuklansin.
Vazirlar Mahkamasining 2017-yil 26-iyuldagi 544-sonli qaroriga ILOVA
Oʻrmon xoʻjaligi ilmiy-tadqiqot instituti Andijon filialining
Oʻzbekiston Respublikasining Bosh vaziri A. ARIPOV
Toshkent sh.,
2017-yil 26-iyul,
544-son