UzbekAI

Ўзбекистон автомобиль ва дарё транспорти агентлиги бошлиғининг

буйруғи

НИЗОМ

Автомобиль транспортида йўловчилар ва юклар ташувчи автотранспорт воситаларида лицензия карточкалари мавжуд бўлишини, Ўзбекистон Республикаси ҳудудида халқаро автомобилларда ташувларни амалга ошириш шартларига риоя этилишини, ҳайдовчиларнинг меҳнат ва дам олиш режимига риоя этилишини назорат қилиш тартиби тўғрисидаги низомни тасдиқлаш ҳақида

Ўзбекистон Республикасининг «Йўл ҳаракати тўғрисида»ги Қонуни ва Ўзбекистон Республикаси Вазирлар Маҳкамасининг 2017 йил 25 апрелдаги 238-сон «Аҳолига транспорт хизмати кўрсатиш ҳамда шаҳарлар ва қишлоқларда автобусларда йўловчилар ташиш тизимини янада такомиллаштириш чора-тадбирларини амалга ошириш тўғрисида»ги қарорига мувофиқ буюраман:

2. Мазкур буйруқ расмий эълон қилинган кундан эътиборан кучга киради.

Ўзбекистон автомобиль ва дарё транспорти агентлиги бошлиғининг 2017 йил 12 июлдаги 61-сон буйруғига ИЛОВА

Мазкур Низом автомобиль транспортида йўловчилар ва юклар ташувчи автотранспорт воситаларида лицензия карточкалари мавжуд бўлишини, Ўзбекистон Республикаси ҳудудида халқаро автомобилларда ташувларни амалга ошириш шартларига риоя этилишини, ҳайдовчиларнинг меҳнат ва дам олиш режимига риоя этилишини назорат қилиш тартибини белгилайди.

1-боб. Умумий қоидалар

1. Автомобиль транспортида йўловчилар ва юклар ташувчи автотранспорт воситаларида лицензия карточкалари мавжуд бўлишини, Ўзбекистон Республикаси ҳудудида халқаро автомобилларда ташувларни амалга ошириш шартларига риоя этилишини, ҳайдовчиларнинг меҳнат ва дам олиш режимига риоя этилишини назорат қилиш (бундан буён матнда назорат деб юритилади) йўловчилар тўпланадиган ва юклар ортиладиган ҳамда тушириладиган йирик пунктларда (темир йўл вокзаллари ва станцияларида, дарё портларида, бозорларда, метрополитеннинг охирги станцияларида, автовокзалларда (автостанцияларда), автобус йўналишларининг оралиқ ва охирги тўхташ бекатларида ва ҳ. к.) ҳамда Ўзбекистон Республикаси Ички ишлар вазирлиги Давлат йўл ҳаракати хавфсизлиги хизматининг стационар постларида амалга оширилади.

2. Назорат Ўзбекистон Республикаси Транспорт вазирлиги ҳудудий бошқармаларининг инспекторлари (бундан буён матнда инспекторлар деб юритилади) томонидан амалга оширилади.

3. Мазкур Низом талаблари:

табиий офатларни (зилзила, тошқинлар, ёнғинлар, эпидемиялар ва ҳ. к.) ва уларнинг оқибатларини тугатишда ёки қутқарув операцияларида фойдаланилаётган;

ўқув-машқ жараёнида фойдаланилаётган;

Ўзбекистон Республикаси Мудофаа вазирлиги, Давлат хавфсизлик хизмати, Фавқулодда вазиятлар вазирлиги, Ички ишлар вазирлигига қарашли тузилмалар томонидан кузатиб борилаётган;

конструктив такомилига етказиш, таъмирлаш ёки уларга техник хизмат кўрсатиш доирасида йўл синовларидан ўтказилаётган фойдаланишга топширилмаган;

божхона органлари томонидан божхона назорати остида кузатиб борилаётган автотранспорт воситаларини назорат қилишга татбиқ этилмайди.

4. Ушбу Низомда қуйидаги тушунчалар қўлланилади:

лицензия карточкаси — йўловчилар ва юк ташиш учун фойдаланиладиган муайян автотранспорт воситасига белгиланган тартибда лицензияловчи орган томонидан бериладиган автотранспорт воситалари билан йўловчилар ва юклар ташишни амалга ошириш (ҳуқуқи) учун рухсатнома;

йўл варақаси — автотранспорт воситасининг ишини аниқлаш ва ҳисобга олиш учун белгиланган намунадаги юридик ҳужжат.

2-боб. Назоратни амалга ошириш тартиби

5. Назоратни амалга оширишда инспектор:

автотранспорт воситасининг олдига келиши, фамилиясини, лавозимини айтиб ҳайдовчига ўзини таништириши, ҳайдовчининг талабига кўра хизмат гувоҳномасини кўрсатиши;

ҳайдовчиларга уларнинг ҳуқуқларини тушунтириши;

шахснинг ҳуқуқ ва қонуний манфаатларига қатъий риоя қилиши, ўз хизмат вазифасини аниқ бажариши, ҳайдовчига нисбатан маданиятли муомалада бўлиши лозим.

6. Инспектор автотранспорт воситасининг лицензия карточкасини кўздан кечиради.

7. Назоратни амалга оширишда лицензия карточкаси мавжуд бўлмаган тақдирда, инспектор томонидан тегишли далолатнома тузилади.

8. Ўзбекистон Республикаси ҳудудида халқаро автомобилларда ташувларни амалга ошириш шартларига риоя этилишини назорат қилишда инспектор томонидан қуйидагилар текширилади:

йўловчилар, багаж ва юкларни мунтазам ва номунтазам ташиш учун рухсат берувчи ҳужжатларни;

ҳаракат жадвалига риоя қилинишини;

номунтазам халқаро автомобилда йўловчилар ва багаж ташишларда йўловчилар рўйхати мавжудлигини;

Ўзбекистон Республикаси ҳудудида хорижий давлатларга тегишли бўлган автотранспорт воситаларида йўловчилар, багаж ёки юкларни ташиш, шу жумладан Ўзбекистон Республикаси ҳудудига вақтинчалик келтирилган хорижий давлатлар автотранспорт воситаларида ташишларни ( каботаж ташишларни) амалга оширишда халқаро шартномалар шартларига риоя этилишини;

хорижий давлатларга тегишли бўлган автотранспорт воситаларининг Ўзбекистон Республикаси ҳудудига белгиланган ўтиш пунктлари орқали кириб келганлигини.

9. Хорижий давлатга тегишли бўлган автотранспорт воситаси назоратдан ўтказилганда ушбу автотранспорт воситасига берилган рухсатнома бланкасининг орқа томонига тегишли ёзув орқали назорат ўтказилганлиги қайд этилади ҳамда инспектор томонидан имзоланиб, махсус штамп билан тасдиқланади.

Назоратдан ўтказилган хорижий давлатларга тегишли бўлган автотранспорт воситалари тўғрисидаги ахборот, шу жумладан аниқланган камчиликлар билдирги кўринишида инспектор томонидан Ўзбекистон Республикаси Транспорт вазирлигининг ҳудудий бошқармасига, транспорт маълумотлар базаси ва ташишлар хавфсизлиги суръати мониторинги ахборот-таҳлил тизимига киритиш учун топширилади.

10. Автомобилда халқаро ташишларни амалга оширишда ҳайдовчиларнинг меҳнат ва дам олиш режими Халқаро автомобилда ташишни амалга оширувчи транспорт воситалари экипажлари ишига дахлдор Европа Битимига (Женева, 1970 йил 1 июль) мувофиқ белгиланади.

Автомобилда халқаро ташишда ҳайдовчиларнинг меҳнат ва дам олиш режимини назорат қилиш Рақамли назорат қурилмаларидан фойдаланиш тўғрисидаги йўриқномага (рўйхат рақами 2346, 2012 йил 26 март) мувофиқ рақамли назорат қурилмаси хотирасида сақланиб қоладиган параметрлар орқали назорат қилиб борилади.

11. Ўзбекистон Республикаси ҳудудида ички ташувларни амалга оширишда ҳайдовчиларнинг меҳнат ва дам олиш режими Ўзбекистон Республикасининг Меҳнат кодексига мувофиқ белгиланади.

Бунда ҳайдовчиларнинг меҳнат ва дам олиш режимини назорат қилиш йўл варақаси орқали амалга оширилади.

3-боб. Якуний қоидалар

12. Назоратни амалга ошириш давомида инспекторнинг хатти-ҳаракатларидан (қарорларидан) норози бўлган шахслар қонунчиликда белгиланган тартибда юқори турувчи органга (мансабдор шахсга) ёки судга шикоят қилишга ҳақли.

13. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгарликка тортиладилар.

14. Мазкур Низом Ўзбекистон Республикаси Ички ишлар вазирлиги, Ташқи ишлар вазирлиги, Давлат солиқ қўмитаси ва Давлат божхона қўмитаси билан келишилган.

Бошлиқ ўринбосари Ш. ШОВАҲОБОВ

Ички ишлар вазири А. АЗИЗОВ

Ташқи ишлар вазири А. КАМИЛОВ

Давлат солиқ қўмитаси раиси Б. ПАРПИЕВ

Давлат божхона қўмитаси раиси М. ТОХИРИЙ

Тошкент ш.,

2017 йил 12 июль,

2017 йил 28 июнь

2017 йил 5 июль

2017 йил 4 июль

2017 йил 23 июнь

61-сон

(Ўзбекистон Республикаси қонун ҳужжатлари тўплами, 2017 й., 30-сон, 759-модда; Қонунчилик маълумотлари миллий базаси, 28.07.2021 й., 10/21/3313/0724-сон; 19.08.2024 й., 10/24/3552/0630-сон; 17.03.2025 й., 10/25/3612/0248-сон)

lex.uz

Oʻzbekiston avtomobil va daryo transporti agentligi boshligʻining

buyrugʻi

NIZOM

Avtomobil transportida yoʻlovchilar va yuklar tashuvchi avtotransport vositalarida litsenziya kartochkalari mavjud boʻlishini, Oʻzbekiston Respublikasi hududida xalqaro avtomobillarda tashuvlarni amalga oshirish shartlariga rioya etilishini, haydovchilarning mehnat va dam olish rejimiga rioya etilishini nazorat qilish tartibi toʻgʻrisidagi nizomni tasdiqlash haqida

Oʻzbekiston Respublikasining “Yoʻl harakati toʻgʻrisida”gi Qonuni va Oʻzbekiston Respublikasi Vazirlar Mahkamasining 2017-yil 25-apreldagi 238-son “Aholiga transport xizmati koʻrsatish hamda shaharlar va qishloqlarda avtobuslarda yoʻlovchilar tashish tizimini yanada takomillashtirish chora-tadbirlarini amalga oshirish toʻgʻrisida”gi qaroriga muvofiq buyuraman:

2. Mazkur buyruq rasmiy eʼlon qilingan kundan eʼtiboran kuchga kiradi.

Oʻzbekiston avtomobil va daryo transporti agentligi boshligʻining 2017-yil 12-iyuldagi 61-son buyrugʻiga ILOVA

Mazkur Nizom avtomobil transportida yoʻlovchilar va yuklar tashuvchi avtotransport vositalarida litsenziya kartochkalari mavjud boʻlishini, Oʻzbekiston Respublikasi hududida xalqaro avtomobillarda tashuvlarni amalga oshirish shartlariga rioya etilishini, haydovchilarning mehnat va dam olish rejimiga rioya etilishini nazorat qilish tartibini belgilaydi.

1-bob. Umumiy qoidalar

1. Avtomobil transportida yoʻlovchilar va yuklar tashuvchi avtotransport vositalarida litsenziya kartochkalari mavjud boʻlishini, Oʻzbekiston Respublikasi hududida xalqaro avtomobillarda tashuvlarni amalga oshirish shartlariga rioya etilishini, haydovchilarning mehnat va dam olish rejimiga rioya etilishini nazorat qilish (bundan buyon matnda nazorat deb yuritiladi) yoʻlovchilar toʻplanadigan va yuklar ortiladigan hamda tushiriladigan yirik punktlarda (temir yoʻl vokzallari va stansiyalarida, daryo portlarida, bozorlarda, metropolitenning oxirgi stansiyalarida, avtovokzallarda (avtostansiyalarda), avtobus yoʻnalishlarining oraliq va oxirgi toʻxtash bekatlarida va h. k.) hamda Oʻzbekiston Respublikasi Ichki ishlar vazirligi Davlat yoʻl harakati xavfsizligi xizmatining statsionar postlarida amalga oshiriladi.

2. Nazorat Oʻzbekiston Respublikasi Transport vazirligi hududiy boshqarmalarining inspektorlari (bundan buyon matnda inspektorlar deb yuritiladi) tomonidan amalga oshiriladi.

3. Mazkur Nizom talablari:

tabiiy ofatlarni (zilzila, toshqinlar, yongʻinlar, epidemiyalar va h. k.) va ularning oqibatlarini tugatishda yoki qutqaruv operatsiyalarida foydalanilayotgan;

oʻquv-mashq jarayonida foydalanilayotgan;

Oʻzbekiston Respublikasi Mudofaa vazirligi, Davlat xavfsizlik xizmati, Favqulodda vaziyatlar vazirligi, Ichki ishlar vazirligiga qarashli tuzilmalar tomonidan kuzatib borilayotgan;

konstruktiv takomiliga yetkazish, taʼmirlash yoki ularga texnik xizmat koʻrsatish doirasida yoʻl sinovlaridan oʻtkazilayotgan foydalanishga topshirilmagan;

bojxona organlari tomonidan bojxona nazorati ostida kuzatib borilayotgan avtotransport vositalarini nazorat qilishga tatbiq etilmaydi.

4. Ushbu Nizomda quyidagi tushunchalar qoʻllaniladi:

litsenziya kartochkasi — yoʻlovchilar va yuk tashish uchun foydalaniladigan muayyan avtotransport vositasiga belgilangan tartibda litsenziyalovchi organ tomonidan beriladigan avtotransport vositalari bilan yoʻlovchilar va yuklar tashishni amalga oshirish (huquqi) uchun ruxsatnoma;

yoʻl varaqasi — avtotransport vositasining ishini aniqlash va hisobga olish uchun belgilangan namunadagi yuridik hujjat.

2-bob. Nazoratni amalga oshirish tartibi

5. Nazoratni amalga oshirishda inspektor:

avtotransport vositasining oldiga kelishi, familiyasini, lavozimini aytib haydovchiga oʻzini tanishtirishi, haydovchining talabiga koʻra xizmat guvohnomasini koʻrsatishi;

haydovchilarga ularning huquqlarini tushuntirishi;

shaxsning huquq va qonuniy manfaatlariga qatʼiy rioya qilishi, oʻz xizmat vazifasini aniq bajarishi, haydovchiga nisbatan madaniyatli muomalada boʻlishi lozim.

6. Inspektor avtotransport vositasining litsenziya kartochkasini koʻzdan kechiradi.

7. Nazoratni amalga oshirishda litsenziya kartochkasi mavjud boʻlmagan taqdirda, inspektor tomonidan tegishli dalolatnoma tuziladi.

8. Oʻzbekiston Respublikasi hududida xalqaro avtomobillarda tashuvlarni amalga oshirish shartlariga rioya etilishini nazorat qilishda inspektor tomonidan quyidagilar tekshiriladi:

yoʻlovchilar, bagaj va yuklarni muntazam va nomuntazam tashish uchun ruxsat beruvchi hujjatlarni;

harakat jadvaliga rioya qilinishini;

nomuntazam xalqaro avtomobilda yoʻlovchilar va bagaj tashishlarda yoʻlovchilar roʻyxati mavjudligini;

Oʻzbekiston Respublikasi hududida xorijiy davlatlarga tegishli boʻlgan avtotransport vositalarida yoʻlovchilar, bagaj yoki yuklarni tashish, shu jumladan Oʻzbekiston Respublikasi hududiga vaqtinchalik keltirilgan xorijiy davlatlar avtotransport vositalarida tashishlarni ( kabotaj tashishlarni) amalga oshirishda xalqaro shartnomalar shartlariga rioya etilishini;

xorijiy davlatlarga tegishli boʻlgan avtotransport vositalarining Oʻzbekiston Respublikasi hududiga belgilangan oʻtish punktlari orqali kirib kelganligini.

9. Xorijiy davlatga tegishli boʻlgan avtotransport vositasi nazoratdan oʻtkazilganda ushbu avtotransport vositasiga berilgan ruxsatnoma blankasining orqa tomoniga tegishli yozuv orqali nazorat oʻtkazilganligi qayd etiladi hamda inspektor tomonidan imzolanib, maxsus shtamp bilan tasdiqlanadi.

Nazoratdan oʻtkazilgan xorijiy davlatlarga tegishli boʻlgan avtotransport vositalari toʻgʻrisidagi axborot, shu jumladan aniqlangan kamchiliklar bildirgi koʻrinishida inspektor tomonidan Oʻzbekiston Respublikasi Transport vazirligining hududiy boshqarmasiga, transport maʼlumotlar bazasi va tashishlar xavfsizligi surʼati monitoringi axborot-tahlil tizimiga kiritish uchun topshiriladi.

10. Avtomobilda xalqaro tashishlarni amalga oshirishda haydovchilarning mehnat va dam olish rejimi Xalqaro avtomobilda tashishni amalga oshiruvchi transport vositalari ekipajlari ishiga daxldor Yevropa Bitimiga (Jeneva, 1970-yil 1-iyul) muvofiq belgilanadi.

Avtomobilda xalqaro tashishda haydovchilarning mehnat va dam olish rejimini nazorat qilish Raqamli nazorat qurilmalaridan foydalanish toʻgʻrisidagi yoʻriqnomaga (roʻyxat raqami 2346, 2012-yil 26-mart) muvofiq raqamli nazorat qurilmasi xotirasida saqlanib qoladigan parametrlar orqali nazorat qilib boriladi.

11. Oʻzbekiston Respublikasi hududida ichki tashuvlarni amalga oshirishda haydovchilarning mehnat va dam olish rejimi Oʻzbekiston Respublikasining Mehnat kodeksiga muvofiq belgilanadi.

Bunda haydovchilarning mehnat va dam olish rejimini nazorat qilish yoʻl varaqasi orqali amalga oshiriladi.

3-bob. Yakuniy qoidalar

12. Nazoratni amalga oshirish davomida inspektorning xatti-harakatlaridan (qarorlaridan) norozi boʻlgan shaxslar qonunchilikda belgilangan tartibda yuqori turuvchi organga (mansabdor shaxsga) yoki sudga shikoyat qilishga haqli.

13. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgarlikka tortiladilar.

14. Mazkur Nizom Oʻzbekiston Respublikasi Ichki ishlar vazirligi, Tashqi ishlar vazirligi, Davlat soliq qoʻmitasi va Davlat bojxona qoʻmitasi bilan kelishilgan.

Boshliq oʻrinbosari Sh. SHOVAHOBOV

Ichki ishlar vaziri A. AZIZOV

Tashqi ishlar vaziri A. KAMILOV

Davlat soliq qoʻmitasi raisi B. PARPIYEV

Davlat bojxona qoʻmitasi raisi M. TOXIRIY

Toshkent sh.,

2017-yil 12-iyul,

2017-yil 28-iyun

2017-yil 5-iyul

2017-yil 4-iyul

2017-yil 23-iyun

61-son

(Oʻzbekiston Respublikasi qonun hujjatlari toʻplami, 2017-y., 30-son, 759-modda; Qonunchilik maʼlumotlari milliy bazasi, 28.07.2021-y., 10/21/3313/0724-son; 19.08.2024-y., 10/24/3552/0630-son; 17.03.2025-y., 10/25/3612/0248-son)

lex.uz