📅 2017-yil 11-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 11 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 11 августа 2017 г. · Постановления Кабинета Министров
Официальный текст. Официальный документ. Редакционные примечания не включены.
📅 11 August 2017 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Таълим муассасаларида чет тилларини ўқитишнинг сифатини янада такомиллаштириш чора-тадбирлари тўғрисида
Узлуксиз таълим тизимининг барча босқичларида ўсиб келаётган ёш авлодни чет тилларига ўқитиш сифатини таъминлаш, чет тилларида эркин сўзлаша оладиган мутахассисларни тайёрлаш тизимини тубдан такомиллаштириш, ушбу йўналишдаги ўқув дастурларининг узвийлиги ва узлуксизлигини таъминлаш, чет тилларини билиш даражасини баҳолашнинг миллий тест тизимини ривожлантириш асосида малака сертификатига эга бўлган ўқувчилар, талабалар ва педагогларга имтиёзлар бериш ҳамда уларни рағбатлантириш мақсадида Вазирлар Маҳкамаси қарор қилади:
1. Ўзбекистон Республикаси Вазирлар Маҳкамаси ҳузуридаги Давлат тест маркази, Халқ таълими вазирлиги, Олий ва ўрта махсус таълим вазирлиги, Ўрта махсус, касб-ҳунар таълими марказига:
2017-2018 ўқув йилидан бошлаб узлуксиз таълим тизимининг барча босқичларида чет тилини ўзлаштириш даражасини давлат таълим стандартларида белгиланган «Тинглаб тушуниш» (Listening), «Ўқиш» (Reading), «Ёзиш» (Writing), «Гапириш» (Speaking) кўникмалари асосида баҳолаб бориш механизмини ишлаб чиқиб, амалиётга жорий этиш;
2018 йил 1 январдан бошлаб чет тилини билиш даражаси тўғрисидаги давлат намунасидаги малака сертификатига эга бўлган ўқувчи, талаба ва педагогларга етакчи хорижий таълим муассасаларида тил ўрганиш амалиётларини ташкил этиш;
2018 йил 1 сентябрга қадар чет тилларини ўқитишнинг асосий босқичлари умумий ўрта таълим муассасалари ва академик лицейларда таъминланишини назарда тутган ҳолда узлуксиз таълим тизимининг барча босқичларида ўзаро узвийлик ва узлуксизлик тамойилларига асосан ўқув дастурларини ишлаб чиқиб, амалиётга жорий этиш вазифалари юклансин.
2. Ўзбекистон Республикаси Олий ва ўрта махсус таълим вазирлиги 2017 йил 1 октябрдан бошлаб тизимида олий таълим муассасалари бўлган вазирликлар ва идоралар билан биргаликда:
олий таълим муассасаларининг чет тили кафедралари базасида профессор-ўқитувчилар учун дарсдан ташқари вақтда тегишли мутахассислик фанларини чет тилида ўқитиш бўйича хизмат кўрсатадиган курсларнинг ташкил этилишини;
тил ўрганишни хоҳловчи талабалар учун олий таълим муассасаларида мулоқот даражасида тил ўргатиш бўйича интенсив курслар фаолиятини йўлга қўйиш, мутахассисликлар бўйича атамалар луғатларини яратиш, чет тилларда турли кўрик-танловлар ўтказиш, чет эллик етакчи мутахассисларни ўқув жараёнига жалб этиш, мутахассислик фанлари бўйича чет тилларида маърузалар ташкил этиш чоралари кўрилишини;
Ўзбекистон Республикаси Молия вазирлиги Олий ва ўрта махсус таълим вазирлиги, Халқ таълими вазирлиги билан биргаликда мутахассислик фанларидан чет тилида дарс берадиган, B2 ва ундан юқори даражадаги малака сертификатга эга бўлган таълим муассасалари педагогларининг иш ҳақларига 100 фоизгача устамалар белгилаш тартиби ишлаб чиқилишини амалиётга жорий этилишини таъминласин.
3. Ўзбекистон Республикаси Вазирлар Маҳкамаси ҳузуридаги Давлат тест маркази Олий ва ўрта махсус таълим вазирлиги, Халқ таълими вазирлиги билан биргаликда чет тилини билиш даражасини баҳолашнинг миллий тест тизимини кенг қўллаган ҳолда 2018 йил 1 январдан бошлаб малака сертификатига эга бўлган талабгорларга сертификатни олгандан бошлаб 2 йилгача қуйидаги имтиёзлар бериш тартибини жорий этсин:
чет тилини билиш даражаси тўғрисидаги давлат намунасидаги А2 ва ундан юқори даражадаги малака сертификатга эга бўлган умумий ўрта таълим муассасалари битирувчиларига ўрта махсус, касб-ҳунар таълими муассасаларининг саралаш тест синовлари рўйхатига чет тили (инглиз, немис, француз) фани киритилган ўрта махсус, касб-ҳунар таълими муассасаларига киришда чет тили фанидан максимал балл бериш ва уларни чет тили фанидан тест синовидан озод этиш;
4. Ўзбекистон Республикаси Вазирлар Маҳкамаси ҳузуридаги Давлат тест маркази Халқ таълими вазирлиги, Олий ва ўрта махсус таълим вазирлиги, Ўрта махсус, касб-ҳунар таълими маркази билан биргаликда сертификат олиш истагини билдирган талабгорлар учун талаб ҳажмидан келиб чиққан ҳолда тизимли равишда ҳудудларда тест синовларининг ўтказилишини таъминласинлар.
5. Ўзбекистон Миллий ахборот агентлиги ва Ўзбекистон миллий телерадиокомпаниясига оммавий ахборот воситаларида чет тилларида ташкил этилаётган дастурлар ҳажмини ва таъсирчанлигини ошириш, айниқса болалар ва ёшлар учун қизиқарли мавзуларда мақолалар чоп этиш ҳамда телерадиодастурлар тайёрлаш тавсия этилсин.
6. Мазкур қарорнинг бажарилишини назорат қилиш Ўзбекистон Республикаси Халқ таълими вазири У.И. Иноятов, Олий ва ўрта махсус таълим вазири И.У. Маджидов зиммасига ҳамда Ўзбекистон Республикаси Вазирлар Маҳкамасининг Таълим, илм-фан ва ёшлар сиёсати масалалари ахборот-таҳлил департаментига юклансин.
Ўзбекистон Республикасининг Бош вазири А. АРИПОВ
Тошкент ш.,
2017 йил 11 август,
610-сон
Oʻzbekiston Respublikasi Vazirlar Mahkamasining
qarori
Taʼlim muassasalarida chet tillarini oʻqitishning sifatini yanada takomillashtirish chora-tadbirlari toʻgʻrisida
Uzluksiz taʼlim tizimining barcha bosqichlarida oʻsib kelayotgan yosh avlodni chet tillariga oʻqitish sifatini taʼminlash, chet tillarida erkin soʻzlasha oladigan mutaxassislarni tayyorlash tizimini tubdan takomillashtirish, ushbu yoʻnalishdagi oʻquv dasturlarining uzviyligi va uzluksizligini taʼminlash, chet tillarini bilish darajasini baholashning milliy test tizimini rivojlantirish asosida malaka sertifikatiga ega boʻlgan oʻquvchilar, talabalar va pedagoglarga imtiyozlar berish hamda ularni ragʻbatlantirish maqsadida Vazirlar Mahkamasi qaror qiladi:
1. Oʻzbekiston Respublikasi Vazirlar Mahkamasi huzuridagi Davlat test markazi, Xalq taʼlimi vazirligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markaziga:
2017-2018 oʻquv yilidan boshlab uzluksiz taʼlim tizimining barcha bosqichlarida chet tilini oʻzlashtirish darajasini davlat taʼlim standartlarida belgilangan “Tinglab tushunish” (Listening), “Oʻqish” (Reading), “Yozish” (Writing), “Gapirish” (Speaking) koʻnikmalari asosida baholab borish mexanizmini ishlab chiqib, amaliyotga joriy etish;
2018-yil 1-yanvardan boshlab chet tilini bilish darajasi toʻgʻrisidagi davlat namunasidagi malaka sertifikatiga ega boʻlgan oʻquvchi, talaba va pedagoglarga yetakchi xorijiy taʼlim muassasalarida til oʻrganish amaliyotlarini tashkil etish;
2018-yil 1-sentabrga qadar chet tillarini oʻqitishning asosiy bosqichlari umumiy oʻrta taʼlim muassasalari va akademik litseylarda taʼminlanishini nazarda tutgan holda uzluksiz taʼlim tizimining barcha bosqichlarida oʻzaro uzviylik va uzluksizlik tamoyillariga asosan oʻquv dasturlarini ishlab chiqib, amaliyotga joriy etish vazifalari yuklansin.
2. Oʻzbekiston Respublikasi Oliy va oʻrta maxsus taʼlim vazirligi 2017-yil 1-oktabrdan boshlab tizimida oliy taʼlim muassasalari boʻlgan vazirliklar va idoralar bilan birgalikda:
oliy taʼlim muassasalarining chet tili kafedralari bazasida professor-oʻqituvchilar uchun darsdan tashqari vaqtda tegishli mutaxassislik fanlarini chet tilida oʻqitish boʻyicha xizmat koʻrsatadigan kurslarning tashkil etilishini;
til oʻrganishni xohlovchi talabalar uchun oliy taʼlim muassasalarida muloqot darajasida til oʻrgatish boʻyicha intensiv kurslar faoliyatini yoʻlga qoʻyish, mutaxassisliklar boʻyicha atamalar lugʻatlarini yaratish, chet tillarda turli koʻrik-tanlovlar oʻtkazish, chet ellik yetakchi mutaxassislarni oʻquv jarayoniga jalb etish, mutaxassislik fanlari boʻyicha chet tillarida maʼruzalar tashkil etish choralari koʻrilishini;
Oʻzbekiston Respublikasi Moliya vazirligi Oliy va oʻrta maxsus taʼlim vazirligi, Xalq taʼlimi vazirligi bilan birgalikda mutaxassislik fanlaridan chet tilida dars beradigan, B2 va undan yuqori darajadagi malaka sertifikatga ega boʻlgan taʼlim muassasalari pedagoglarining ish haqlariga 100 foizgacha ustamalar belgilash tartibi ishlab chiqilishini amaliyotga joriy etilishini taʼminlasin.
3. Oʻzbekiston Respublikasi Vazirlar Mahkamasi huzuridagi Davlat test markazi Oliy va oʻrta maxsus taʼlim vazirligi, Xalq taʼlimi vazirligi bilan birgalikda chet tilini bilish darajasini baholashning milliy test tizimini keng qoʻllagan holda 2018-yil 1-yanvardan boshlab malaka sertifikatiga ega boʻlgan talabgorlarga sertifikatni olgandan boshlab 2 yilgacha quyidagi imtiyozlar berish tartibini joriy etsin:
chet tilini bilish darajasi toʻgʻrisidagi davlat namunasidagi A2 va undan yuqori darajadagi malaka sertifikatga ega boʻlgan umumiy oʻrta taʼlim muassasalari bitiruvchilariga oʻrta maxsus, kasb-hunar taʼlimi muassasalarining saralash test sinovlari roʻyxatiga chet tili (ingliz, nemis, fransuz) fani kiritilgan oʻrta maxsus, kasb-hunar taʼlimi muassasalariga kirishda chet tili fanidan maksimal ball berish va ularni chet tili fanidan test sinovidan ozod etish;
4. Oʻzbekiston Respublikasi Vazirlar Mahkamasi huzuridagi Davlat test markazi Xalq taʼlimi vazirligi, Oliy va oʻrta maxsus taʼlim vazirligi, Oʻrta maxsus, kasb-hunar taʼlimi markazi bilan birgalikda sertifikat olish istagini bildirgan talabgorlar uchun talab hajmidan kelib chiqqan holda tizimli ravishda hududlarda test sinovlarining oʻtkazilishini taʼminlasinlar.
5. Oʻzbekiston Milliy axborot agentligi va Oʻzbekiston milliy teleradiokompaniyasiga ommaviy axborot vositalarida chet tillarida tashkil etilayotgan dasturlar hajmini va taʼsirchanligini oshirish, ayniqsa bolalar va yoshlar uchun qiziqarli mavzularda maqolalar chop etish hamda teleradiodasturlar tayyorlash tavsiya etilsin.
6. Mazkur qarorning bajarilishini nazorat qilish Oʻzbekiston Respublikasi Xalq taʼlimi vaziri U.I. Inoyatov, Oliy va oʻrta maxsus taʼlim vaziri I.U. Madjidov zimmasiga hamda Oʻzbekiston Respublikasi Vazirlar Mahkamasining Taʼlim, ilm-fan va yoshlar siyosati masalalari axborot-tahlil departamentiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2017-yil 11-avgust,
610-son