UzbekAI

Ўзбекистон Республикаси Вазирлар Маҳкамасининг

қарори

Ўзбекистон ёшлар иттифоқининг моддий-техника базасини янада такомиллаштириш чора-тадбирлари тўғрисида

Ўзбекистон Республикаси Президентининг «Ўзбекистон ёшлар иттифоқи фаолиятини такомиллаштиришга доир комплекс чора-тадбирлар тўғрисида» 2017 йил 18 июлдаги ПҚ-3138-сон қарорига мувофиқ Ўзбекистон ёшлар иттифоқи фаолиятини ҳар томонлама қўллаб-қувватлаш ҳамда аҳолининг, айниқса ёшларнинг китобга бўлган қизиқишини ошириш, уларни китоблар билан таъминлаш тизимини янада самарали ташкил этиш мақсадида Вазирлар Маҳкамаси қарор қилади:

1. Ўзбекистон ёшлар иттифоқи, Ўзбекистон матбуот ва ахборот агентлиги, Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси ҳамда «Ўздавкитобсавдотаъминоти» МЧЖнинг:

Ўзбекистон матбуот ва ахборот агентлигининг майдони 270 кв.м бўлган Тошкент шаҳри, Мирзо Улуғбек тумани, Марказ-1, Мустақиллик кўчаси, 6-уй ва майдони 1650 кв.м бўлган Тошкент шаҳри, Мирзо Улуғбек тумани, Марказ-1, Мустақиллик кўчаси 7-уй манзилида жойлашган биноларини Ўзбекистон матбуот ва ахборот агентлиги «Китоб олами» МЧЖнинг устав фондига давлат улуши сифатида белгиланган тартибда бериш;

«Ўзбекистон», «Ўқитувчи», Ғафур Ғулом ва Чўлпон номидаги нашриёт-матбаа ижодий уйлари, «Ўзбекистон миллий энциклопедияси» давлат илмий нашриёти давлат корхонаси, «Ўздавкитобсавдотаъминоти» МЧЖ ҳамда Ўзбекистон матбуот ва ахборот агентлигининг «Китоб олами» МЧЖ устав фондидаги ўз улушларини Ўзбекистон ёшлар иттифоқига мулк ҳуқуқи асосида бепул бериш тўғрисидаги таклифларига розилик берилсин.

2. Ўзбекистон матбуот ва ахборот агентлиги Ўзбекистон ёшлар иттифоқи ҳамда Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси билан биргаликда икки ой муддатда:

«Китоб олами» МЧЖ устав фонди ушбу қарорнинг 1-бандида кўрсатилган бинолар ҳисобига оширилишини;

«Китоб олами» МЧЖнинг уставига тегишли ўзгартиришлар киритилишини таъминласин.

3. Ўзбекистон ёшлар иттифоқи «Китоб олами» МЧЖ фаолиятини самарали ташкил этиш, шу жумладан республиканинг барча ҳудудларида унинг филиалларини очиш ва моддий-техника базасини мустаҳкамлаш чораларини кўрсин.

4. Вазирлар Маҳкамасининг «Давлат мулкидан самарали фойдаланиш чора-тадбирлари тўғрисида» 2015 йил 15 июлдаги 193-сон қарори ўз кучини йўқотган деб ҳисоблансин.

5. Мазкур қарорнинг бажарилишини назорат қилиш Ўзбекистон матбуот ва ахборот агентлиги бош директори Л.Х. Тангриев, Ўзбекистон ёшлар иттифоқи раиси Қ.Қ. Қуранбоев зиммасига, Вазирлар Маҳкамасининг Таълим, илм-фан ва ёшлар сиёсати масалалари ҳамда Маданият, санъат ва туризмни ривожлантириш масалалари ахборот-таҳлил департаментларига юклансин.

Ўзбекистон Республикасининг Бош вазири А. АРИПОВ

Тошкент ш.,

2017 йил 18 сентябрь,

737-сон

(Ўзбекистон Республикаси қонун ҳужжатлари тўплами, 2017 й., 38-сон, 1046-модда)

Oʻzbekiston Respublikasi Vazirlar Mahkamasining

qarori

Oʻzbekiston yoshlar ittifoqining moddiy-texnika bazasini yanada takomillashtirish chora-tadbirlari toʻgʻrisida

Oʻzbekiston Respublikasi Prezidentining “Oʻzbekiston yoshlar ittifoqi faoliyatini takomillashtirishga doir kompleks chora-tadbirlar toʻgʻrisida” 2017-yil 18-iyuldagi PQ-3138-son qaroriga muvofiq Oʻzbekiston yoshlar ittifoqi faoliyatini har tomonlama qoʻllab-quvvatlash hamda aholining, ayniqsa yoshlarning kitobga boʻlgan qiziqishini oshirish, ularni kitoblar bilan taʼminlash tizimini yanada samarali tashkil etish maqsadida Vazirlar Mahkamasi qaror qiladi:

1. Oʻzbekiston yoshlar ittifoqi, Oʻzbekiston matbuot va axborot agentligi, Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi hamda “Oʻzdavkitobsavdotaʼminoti” MCHJning:

Oʻzbekiston matbuot va axborot agentligining maydoni 270 kv.m boʻlgan Toshkent shahri, Mirzo Ulugʻbek tumani, Markaz-1, Mustaqillik koʻchasi, 6-uy va maydoni 1650 kv.m boʻlgan Toshkent shahri, Mirzo Ulugʻbek tumani, Markaz-1, Mustaqillik koʻchasi 7-uy manzilida joylashgan binolarini Oʻzbekiston matbuot va axborot agentligi “Kitob olami” MCHJning ustav fondiga davlat ulushi sifatida belgilangan tartibda berish;

“Oʻzbekiston”, “Oʻqituvchi”, Gʻafur Gʻulom va Choʻlpon nomidagi nashriyot-matbaa ijodiy uylari, “Oʻzbekiston milliy ensiklopediyasi” davlat ilmiy nashriyoti davlat korxonasi, “Oʻzdavkitobsavdotaʼminoti” MCHJ hamda Oʻzbekiston matbuot va axborot agentligining “Kitob olami” MCHJ ustav fondidagi oʻz ulushlarini Oʻzbekiston yoshlar ittifoqiga mulk huquqi asosida bepul berish toʻgʻrisidagi takliflariga rozilik berilsin.

2. Oʻzbekiston matbuot va axborot agentligi Oʻzbekiston yoshlar ittifoqi hamda Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi bilan birgalikda ikki oy muddatda:

“Kitob olami” MCHJ ustav fondi ushbu qarorning 1-bandida koʻrsatilgan binolar hisobiga oshirilishini;

“Kitob olami” MCHJning ustaviga tegishli oʻzgartirishlar kiritilishini taʼminlasin.

3. Oʻzbekiston yoshlar ittifoqi “Kitob olami” MCHJ faoliyatini samarali tashkil etish, shu jumladan respublikaning barcha hududlarida uning filiallarini ochish va moddiy-texnika bazasini mustahkamlash choralarini koʻrsin.

4. Vazirlar Mahkamasining “Davlat mulkidan samarali foydalanish chora-tadbirlari toʻgʻrisida” 2015-yil 15-iyuldagi 193-son qarori oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston matbuot va axborot agentligi bosh direktori L.X. Tangriyev, Oʻzbekiston yoshlar ittifoqi raisi Q.Q. Quranboyev zimmasiga, Vazirlar Mahkamasining Taʼlim, ilm-fan va yoshlar siyosati masalalari hamda Madaniyat, sanʼat va turizmni rivojlantirish masalalari axborot-tahlil departamentlariga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 18-sentabr,

737-son

(Oʻzbekiston Respublikasi qonun hujjatlari toʻplami, 2017-y., 38-son, 1046-modda)