📅 2017-yil 20-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 20 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 20 октября 2017 г. · Постановления Кабинета Министров
Официальный текст. Официальный документ. Редакционные примечания не включены.
📅 20 October 2017 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
Кам таъминланган оилаларни бандлик билан таъминлаш учун тижорат банклари томонидан микрокредитлар ажратиш тартиби тўғрисидаги низомни тасдиқлаш ҳақида
Ўзбекистон Республикаси Президентининг «Аҳолининг кам таъминланган қатламларини қўллаб-қувватлашга оид қўшимча чора-тадбирлари тўғрисида» 2017 йил 12 сентябрдаги ПҚ-3268-сон қарорига асосан муайян меҳнат турлари билан шуғулланиш истагида бўлган кам таъминланган оилаларга микрокредитлар ажратишнинг самарали механизмини яратиш мақсадида Вазирлар Маҳкамаси қарор қилади:
1. Кам таъминланган оилаларни бандлик билан таъминлаш учун тижорат банклари томонидан микрокредитлар ажратиш тартиби тўғрисидаги Низом иловага мувофиқ тасдиқлансин.
2. Муайян меҳнат турлари билан шуғулланиш истагида бўлган кам таъминланган оилаларга уларнинг оилаларини етарли даражада таъминлаш имконини берадиган имтиёзли шартлар асосида микрокредитлар ажратувчи тижорат банкларини Ўзбекистон Республикаси Марказий банки белгилаб бериши маълумот учун қабул қилинсин.
Ўзбекистон Республикаси Марказий банкига муайян меҳнат турлари билан шуғулланиш истагида бўлган кам таъминланган оилаларга имтиёзли шартлар асосида микрокредитлар ажратувчи тижорат банклари белгилангандан сўнг, уларнинг рўйхатини оммавий ахборот воситаларида кенг ёритиш тавсия этилсин.
3. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Қўчқоров зиммасига юклансин.
Вазирлар Маҳкамасининг 2017 йил 20 октябрдаги 857-сон қарорига ИЛОВА
Кам таъминланган оилаларни бандлик билан таъминлаш учун тижорат банклари томонидан микрокредитлар ажратиш тартиби тўғрисидаги
1-боб. Умумий қоидалар
1. Ушбу Низом муайян меҳнат турлари билан шуғулланиш истагида бўлган кам таъминланган оилаларга уларнинг оилаларини етарли даражада таъминлаш имконини берадиган имтиёзли шартлар асосида микрокредитлар ажратиш тартибини белгилайди.
2. Ушбу Низомда қуйидаги асосий тушунчалар қўлланилади:
қарз олувчи — Ўзбекистон Касаба уюшмалари Федерацияси, «Маҳалла» хайрия жамоат фонди, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, шунингдек тижорат банкларининг масъул ходимларидан ташкил топган ишчи гуруҳ томонидан шакллантирилган рўйхатга киритилган муайян меҳнат турлари билан шуғулланиш истагида бўлган кам таъминланган оиланинг вояга етган аъзоси;
банк — Ўзбекистон Республикаси Марказий банки томонидан белгилаб берилган, қарз олувчиларга микрокредитлар ажратадиган тижорат банки.
2-боб. Микрокредитларни ажратиш шартлари
3. Микрокредитлар қайтаришлик, тўловлилик, таъминланганлик, муддатлилик ва мақсадли фойдаланиш шартлари асосида ушбу Низомнинг иловасида келтирилган схемага асосан берилади.
4. Микрокредитлар қарз олувчиларга:
тикув машиналари, матолар ва бошқа сарф материаллари, косибчилик фаолияти учун инвентарлар, маиший, компьютер ва бошқа техникалар, шунингдек, меҳнат билан бандликни таъминловчи бошқа асбоб-ускуналар харид қилиш;
шахсий томорқа участкаларини ривожлантириш (кичик-иссиқхоналар барпо этиш, чорва моллари, парранда сотиб олиш, оғилхона ва товуқхона қуриш, боғдорчилик инвентарлари ва асбоблари харид қилиш) мақсадлари учун ажратилади.
5. Микрокредитлар банклар томонидан қарз олувчиларга базавий ҳисоблаш миқдорининг 100 баравари миқдоригача йиллик 4 фоиз ставкада ажратилади.
6. Қарз олувчиларга микрокредит қайтариш муддатини узайтириш ҳуқуқисиз, 6 ойгача бўлган имтиёзли давр билан, 3 йилдан кўп бўлмаган муддатга банк кредит қўмитасининг белгиланган тартибда расмийлаштирилган қарори асосида берилади.
3-боб. Микрокредитларни расмийлаштириш тартиби
7. Микрокредит олиш учун қарз олувчи томонидан банкка қуйидаги ҳужжатлар тақдим этилади:
мазкур Низомнинг 4-бандида назарда тутилган мақсадлар учун микрокредит олиш учун сўралган ариза;
шахсий томорқа участкаларини ривожлантириш мақсадлари учун микрокредит сўралган ҳолларда қарз олувчида томорқа участкаси мавжудлиги кўрсатилган ўзини-ўзи бошқариш органлари томонидан берилган маълумотнома;
микрокредитни қайтаришнинг таъминланиши тўғрисида ҳужжат.
8. Микрокредитлар қайтарилишининг таъминоти сифатида банкка қуйидаги таъминот турларидан бири тақдим этилади:
мол-мулк гарови;
тижорат банки ёки суғурта компанияси кафолати;
учинчи шахс кафиллиги;
қарз олувчи томонидан олинган микрокредитни қайтармаслик хатарининг банк фойдасига суғурта қилинганлиги.
9. Қарз олувчи мазкур Низомнинг 7-бандида назарда тутилган тегишли ҳужжатларни топширишда ўзининг шахсини тасдиқловчи ҳужжатини кўрсатади ҳамда ундан нусха тақдим этади.
10. Микрокредит сўраб, мазкур Низомнинг 7-бандида кўрсатилган барча зарур ҳужжатлар илова қилинган ҳолда берилган ариза банкка келиб тушган кундан бошлаб, банк кредит қўмитаси томонидан ушбу ариза бўйича қарор қабул қилиш муддати 3 иш кунидан ошмаслиги лозим.
11. Микрокредит бериш асослантирилган ҳолда рад этилган тақдирда, банк аризачига бу ҳақда кейинги иш кунидан кечиктирмаган ҳолда ёзма шаклда маълум қилиши шарт.
4-боб. Микрокредитларни ажратиш ва уларни қайтариш тартиби
12. Микрокредитлар қарз олувчининг ссуда ҳисобварағидан унинг тўлов топшириқномасига асосан, кредит шартномасида белгиланган мақсадлар учун тегишли ташкилотларнинг банкдаги талаб қилиб олингунча депозит ҳисобварағига пул ўтказиш йўли билан амалга оширилади.
13. Қарз олувчиларга берилган микрокредитлар ҳисоби алоҳида белгиланган баланс ҳисобварақларида юритилади.
14. Қарз олувчи микрокредит ҳамда унга ҳисобланган фоизларни нақд пулда, банк пластик карточкалари орқали ёки қарз олувчининг омонат ҳисобварағидан пул ўтказиб бериш йўли билан тўлаши мумкин.
15. Банк томонидан микрокредитдан фойдаланишнинг муддати давомида фуқаролар йигини ходими иштирокида микрокредитдан мақсадли фойдаланилаётганлигини аниқлаш бўйича бевосита жойига чиқиб, доимий мониторинг ўтказилади.
16. Олинган микрокредитдан бошқа мақсадда фойдаланилганлик аниқланган тақдирда, банк кредит шартномасида белгиланган тартибда микрокредитнинг мақсадсиз ишлатилган қисмини қарз олувчидан муддатидан илгари ундириб олиш ҳуқуқига эга.
17. Микрокредитлар бўйича қарздорликни ундиришда биринчи навбатда микрокредитдан фойдаланганлик учун фоизлар ундирилади.
18. Микрокредит белгиланган муддатларда қайтарилмаган тақдирда, банк ундирувни қонунчилик ҳужжатларида белгиланган тартибда микрокредитнинг қайтарилиш таъминоти сифатида тақдим этилган таъминот турига қаратади.
5-боб. Якунловчи қоида
19. Ушбу Низом талабларини бузишда айбдор шахслар қонунчилик ҳужжатларида белгиланган тартибда жавобгар бўлади.
Кам таъминланган оилаларни бандлик билан таъминлаш учун тижорат банклари томонидан микрокредитлар ажратиш тартиби тўғрисидаги Низомга ИЛОВА
Кам таъминланган оилаларни бандлик билан таъминлаш учун тижорат банклари томонидан микрокредитлар ажратиш
Ўзбекистон Республикасининг Бош вазири А. АРИПОВ
Тошкент ш.,
2017 йил 20 октябрь,
857-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
Kam taʼminlangan oilalarni bandlik bilan taʼminlash uchun tijorat banklari tomonidan mikrokreditlar ajratish tartibi toʻgʻrisidagi nizomni tasdiqlash haqida
Oʻzbekiston Respublikasi Prezidentining “Aholining kam taʼminlangan qatlamlarini qoʻllab-quvvatlashga oid qoʻshimcha chora-tadbirlari toʻgʻrisida” 2017-yil 12-sentabrdagi PQ-3268-son qaroriga asosan muayyan mehnat turlari bilan shugʻullanish istagida boʻlgan kam taʼminlangan oilalarga mikrokreditlar ajratishning samarali mexanizmini yaratish maqsadida Vazirlar Mahkamasi qaror qiladi:
1. Kam taʼminlangan oilalarni bandlik bilan taʼminlash uchun tijorat banklari tomonidan mikrokreditlar ajratish tartibi toʻgʻrisidagi Nizom ilovaga muvofiq tasdiqlansin.
2. Muayyan mehnat turlari bilan shugʻullanish istagida boʻlgan kam taʼminlangan oilalarga ularning oilalarini yetarli darajada taʼminlash imkonini beradigan imtiyozli shartlar asosida mikrokreditlar ajratuvchi tijorat banklarini Oʻzbekiston Respublikasi Markaziy banki belgilab berishi maʼlumot uchun qabul qilinsin.
Oʻzbekiston Respublikasi Markaziy bankiga muayyan mehnat turlari bilan shugʻullanish istagida boʻlgan kam taʼminlangan oilalarga imtiyozli shartlar asosida mikrokreditlar ajratuvchi tijorat banklari belgilangandan soʻng, ularning roʻyxatini ommaviy axborot vositalarida keng yoritish tavsiya etilsin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov zimmasiga yuklansin.
Vazirlar Mahkamasining 2017-yil 20-oktabrdagi 857-son qaroriga ILOVA
Kam taʼminlangan oilalarni bandlik bilan taʼminlash uchun tijorat banklari tomonidan mikrokreditlar ajratish tartibi toʻgʻrisidagi
1-bob. Umumiy qoidalar
1. Ushbu Nizom muayyan mehnat turlari bilan shugʻullanish istagida boʻlgan kam taʼminlangan oilalarga ularning oilalarini yetarli darajada taʼminlash imkonini beradigan imtiyozli shartlar asosida mikrokreditlar ajratish tartibini belgilaydi.
2. Ushbu Nizomda quyidagi asosiy tushunchalar qoʻllaniladi:
qarz oluvchi — Oʻzbekiston Kasaba uyushmalari Federatsiyasi, “Mahalla” xayriya jamoat fondi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, shuningdek tijorat banklarining masʼul xodimlaridan tashkil topgan ishchi guruh tomonidan shakllantirilgan roʻyxatga kiritilgan muayyan mehnat turlari bilan shugʻullanish istagida boʻlgan kam taʼminlangan oilaning voyaga yetgan aʼzosi;
bank — Oʻzbekiston Respublikasi Markaziy banki tomonidan belgilab berilgan, qarz oluvchilarga mikrokreditlar ajratadigan tijorat banki.
2-bob. Mikrokreditlarni ajratish shartlari
3. Mikrokreditlar qaytarishlik, toʻlovlilik, taʼminlanganlik, muddatlilik va maqsadli foydalanish shartlari asosida ushbu Nizomning ilovasida keltirilgan sxemaga asosan beriladi.
4. Mikrokreditlar qarz oluvchilarga:
tikuv mashinalari, matolar va boshqa sarf materiallari, kosibchilik faoliyati uchun inventarlar, maishiy, kompyuter va boshqa texnikalar, shuningdek, mehnat bilan bandlikni taʼminlovchi boshqa asbob-uskunalar xarid qilish;
shaxsiy tomorqa uchastkalarini rivojlantirish (kichik-issiqxonalar barpo etish, chorva mollari, parranda sotib olish, ogʻilxona va tovuqxona qurish, bogʻdorchilik inventarlari va asboblari xarid qilish) maqsadlari uchun ajratiladi.
5. Mikrokreditlar banklar tomonidan qarz oluvchilarga bazaviy hisoblash miqdorining 100 baravari miqdorigacha yillik 4 foiz stavkada ajratiladi.
6. Qarz oluvchilarga mikrokredit qaytarish muddatini uzaytirish huquqisiz, 6 oygacha boʻlgan imtiyozli davr bilan, 3 yildan koʻp boʻlmagan muddatga bank kredit qoʻmitasining belgilangan tartibda rasmiylashtirilgan qarori asosida beriladi.
3-bob. Mikrokreditlarni rasmiylashtirish tartibi
7. Mikrokredit olish uchun qarz oluvchi tomonidan bankka quyidagi hujjatlar taqdim etiladi:
mazkur Nizomning 4-bandida nazarda tutilgan maqsadlar uchun mikrokredit olish uchun soʻralgan ariza;
shaxsiy tomorqa uchastkalarini rivojlantirish maqsadlari uchun mikrokredit soʻralgan hollarda qarz oluvchida tomorqa uchastkasi mavjudligi koʻrsatilgan oʻzini-oʻzi boshqarish organlari tomonidan berilgan maʼlumotnoma;
mikrokreditni qaytarishning taʼminlanishi toʻgʻrisida hujjat.
8. Mikrokreditlar qaytarilishining taʼminoti sifatida bankka quyidagi taʼminot turlaridan biri taqdim etiladi:
mol-mulk garovi;
tijorat banki yoki sugʻurta kompaniyasi kafolati;
uchinchi shaxs kafilligi;
qarz oluvchi tomonidan olingan mikrokreditni qaytarmaslik xatarining bank foydasiga sugʻurta qilinganligi.
9. Qarz oluvchi mazkur Nizomning 7-bandida nazarda tutilgan tegishli hujjatlarni topshirishda oʻzining shaxsini tasdiqlovchi hujjatini koʻrsatadi hamda undan nusxa taqdim etadi.
10. Mikrokredit soʻrab, mazkur Nizomning 7-bandida koʻrsatilgan barcha zarur hujjatlar ilova qilingan holda berilgan ariza bankka kelib tushgan kundan boshlab, bank kredit qoʻmitasi tomonidan ushbu ariza boʻyicha qaror qabul qilish muddati 3 ish kunidan oshmasligi lozim.
11. Mikrokredit berish asoslantirilgan holda rad etilgan taqdirda, bank arizachiga bu haqda keyingi ish kunidan kechiktirmagan holda yozma shaklda maʼlum qilishi shart.
4-bob. Mikrokreditlarni ajratish va ularni qaytarish tartibi
12. Mikrokreditlar qarz oluvchining ssuda hisobvaragʻidan uning toʻlov topshiriqnomasiga asosan, kredit shartnomasida belgilangan maqsadlar uchun tegishli tashkilotlarning bankdagi talab qilib olinguncha depozit hisobvaragʻiga pul oʻtkazish yoʻli bilan amalga oshiriladi.
13. Qarz oluvchilarga berilgan mikrokreditlar hisobi alohida belgilangan balans hisobvaraqlarida yuritiladi.
14. Qarz oluvchi mikrokredit hamda unga hisoblangan foizlarni naqd pulda, bank plastik kartochkalari orqali yoki qarz oluvchining omonat hisobvaragʻidan pul oʻtkazib berish yoʻli bilan toʻlashi mumkin.
15. Bank tomonidan mikrokreditdan foydalanishning muddati davomida fuqarolar yigini xodimi ishtirokida mikrokreditdan maqsadli foydalanilayotganligini aniqlash boʻyicha bevosita joyiga chiqib, doimiy monitoring oʻtkaziladi.
16. Olingan mikrokreditdan boshqa maqsadda foydalanilganlik aniqlangan taqdirda, bank kredit shartnomasida belgilangan tartibda mikrokreditning maqsadsiz ishlatilgan qismini qarz oluvchidan muddatidan ilgari undirib olish huquqiga ega.
17. Mikrokreditlar boʻyicha qarzdorlikni undirishda birinchi navbatda mikrokreditdan foydalanganlik uchun foizlar undiriladi.
18. Mikrokredit belgilangan muddatlarda qaytarilmagan taqdirda, bank undiruvni qonunchilik hujjatlarida belgilangan tartibda mikrokreditning qaytarilish taʼminoti sifatida taqdim etilgan taʼminot turiga qaratadi.
5-bob. Yakunlovchi qoida
19. Ushbu Nizom talablarini buzishda aybdor shaxslar qonunchilik hujjatlarida belgilangan tartibda javobgar boʻladi.
Kam taʼminlangan oilalarni bandlik bilan taʼminlash uchun tijorat banklari tomonidan mikrokreditlar ajratish tartibi toʻgʻrisidagi Nizomga ILOVA
Kam taʼminlangan oilalarni bandlik bilan taʼminlash uchun tijorat banklari tomonidan mikrokreditlar ajratish
Oʻzbekiston Respublikasining Bosh vaziri A. ARIPOV
Toshkent sh.,
2017-yil 20-oktabr,
857-son