📅 2017-yil 24-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 24 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 24 октября 2017 г. · Постановления Кабинета Министров
Официальный текст. Официальный документ. Редакционные примечания не включены.
📅 24 October 2017 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Сирдарё вилоятининг Боёвут туманида экспортбоп мева-сабзавот маҳсулотлари етиштириш, сақлаш ва қайта ишлашга ихтисослаштирилган замонавий агрокомплекс фаолиятини кенгайтириш тўғрисида
Сирдарё вилоятининг Боёвут туманида қишлоқ хўжалиги инфратузилмасини ривожлантириш, ҳудудда экспортбоп мева-сабзавот маҳсулотлари етиштириш, сақлаш ва қайта ишлашни янада кенгайтириш ҳамда ушбу йўналишга ихтисослаштирилган замонавий агрокомплекс фаолиятини кенгайтириш мақсадида Вазирлар Маҳкамаси қарор қилади:
1. Қуйидагилар:
Сирдарё вилоятининг Боёвут туманидаги қишлоқ хўжалиги техникасини сақлаш, уларга сервис хизмати кўрсатиш ва қишлоқ хўжалиги маҳсулотлари етиштиришга ихтисослаштирилган «Боёвут тезкор мадад» масъулияти чекланган жамиятига (кейинги ўринларда жамият деб аталади) Ўзбекистон Республика товар-хом ашё биржаси акциядорлик жамияти (кейинги ўринларда «ЎзРТХБ» АЖ деб аталади) томонидан 2,8 млрд сўмлик молиявий ёрдам кўрсатилганлиги;
«ЎзРТХБ» АЖнинг молиявий ёрдам маблағлари унинг жамият устав фондидаги улуши сифатида киритилиши тўғрисида жамиятнинг қарори қабул қилинганлиги маълумот учун қабул қилинсин.
2. «ЎзРТХБ» АЖ томонидан жамиятга ажратилган молиявий ёрдам маблағлари жамиятнинг устав фондига йўналтирилиши йўли билан «ЎзРТХБ» АЖ жамиятнинг иштирокчиси бўлишига розилик берилсин.
3. «ЎзРТХБ» АЖ Сирдарё вилояти ҳокимлиги билан биргаликда бир ҳафта муддатда жамиятнинг таъсис ҳужжатларига тегишли ўзгартиришлар киритилишини таъминласин.
4. «ЎзРТХБ» АЖ:
жамият негизида замонавий агрокомплекс ташкил қилишни ва юқори технологиялар билан жиҳозланган мева-сабзавот маҳсулотларини қайта ишлаш, консервация қилиш ҳамда сақлаш лойиҳалари амалга оширилиши йўлга қўйилишини;
агрокомплекснинг экспорт салоҳиятини янада ошириш ва янги иш ўринлар яратиш бўйича 2017-2018 йилларга мўлжалланган чора-тадбирлар режасини ишлаб чиқсин ва тасдиқласин ҳамда амалга оширилишини таъминласин.
5. Сирдарё вилояти ҳокимлиги жамият негизида янги истиқболли лойиҳаларни амалга ошириш мақсадида қўшимча ер майдонларини белгиланган тартибда ажратсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Қўчқоров, Сирдарё вилояти ҳокими Ғ.Ғ. Мирзаев ва Ўзбекистон Республика товар-хом ашё биржаси акциядорлик жамияти бошқаруви раиси вазифасини вақтинча бажарувчи А.Р. Нагаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2017 йил 24 октябрь,
866-сон
Oʻzbekiston Respublikasi Vazirlar Mahkamasining
qarori
Sirdaryo viloyatining Boyovut tumanida eksportbop meva-sabzavot mahsulotlari yetishtirish, saqlash va qayta ishlashga ixtisoslashtirilgan zamonaviy agrokompleks faoliyatini kengaytirish toʻgʻrisida
Sirdaryo viloyatining Boyovut tumanida qishloq xoʻjaligi infratuzilmasini rivojlantirish, hududda eksportbop meva-sabzavot mahsulotlari yetishtirish, saqlash va qayta ishlashni yanada kengaytirish hamda ushbu yoʻnalishga ixtisoslashtirilgan zamonaviy agrokompleks faoliyatini kengaytirish maqsadida Vazirlar Mahkamasi qaror qiladi:
1. Quyidagilar:
Sirdaryo viloyatining Boyovut tumanidagi qishloq xoʻjaligi texnikasini saqlash, ularga servis xizmati koʻrsatish va qishloq xoʻjaligi mahsulotlari yetishtirishga ixtisoslashtirilgan “Boyovut tezkor madad” masʼuliyati cheklangan jamiyatiga (keyingi oʻrinlarda jamiyat deb ataladi) Oʻzbekiston Respublika tovar-xom ashyo birjasi aksiyadorlik jamiyati (keyingi oʻrinlarda “OʻzRTXB” AJ deb ataladi) tomonidan 2,8 mlrd soʻmlik moliyaviy yordam koʻrsatilganligi;
“OʻzRTXB” AJning moliyaviy yordam mablagʻlari uning jamiyat ustav fondidagi ulushi sifatida kiritilishi toʻgʻrisida jamiyatning qarori qabul qilinganligi maʼlumot uchun qabul qilinsin.
2. “OʻzRTXB” AJ tomonidan jamiyatga ajratilgan moliyaviy yordam mablagʻlari jamiyatning ustav fondiga yoʻnaltirilishi yoʻli bilan “OʻzRTXB” AJ jamiyatning ishtirokchisi boʻlishiga rozilik berilsin.
3. “OʻzRTXB” AJ Sirdaryo viloyati hokimligi bilan birgalikda bir hafta muddatda jamiyatning taʼsis hujjatlariga tegishli oʻzgartirishlar kiritilishini taʼminlasin.
4. “OʻzRTXB” AJ:
jamiyat negizida zamonaviy agrokompleks tashkil qilishni va yuqori texnologiyalar bilan jihozlangan meva-sabzavot mahsulotlarini qayta ishlash, konservatsiya qilish hamda saqlash loyihalari amalga oshirilishi yoʻlga qoʻyilishini;
agrokompleksning eksport salohiyatini yanada oshirish va yangi ish oʻrinlar yaratish boʻyicha 2017-2018-yillarga moʻljallangan chora-tadbirlar rejasini ishlab chiqsin va tasdiqlasin hamda amalga oshirilishini taʼminlasin.
5. Sirdaryo viloyati hokimligi jamiyat negizida yangi istiqbolli loyihalarni amalga oshirish maqsadida qoʻshimcha yer maydonlarini belgilangan tartibda ajratsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov, Sirdaryo viloyati hokimi Gʻ.Gʻ. Mirzayev va Oʻzbekiston Respublika tovar-xom ashyo birjasi aksiyadorlik jamiyati boshqaruvi raisi vazifasini vaqtincha bajaruvchi A.R. Nagayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2017-yil 24-oktabr,
866-son