📅 2017-yil 16-noyabr · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 16 ноябрь · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 16 ноября 2017 г. · Постановления Президента
Официальный текст. Официальный документ. Редакционные примечания не включены.
📅 16 November 2017 · Presidential resolutions
Official text. Official document. Editorial notes are not included.
Ўзбекистон Республикаси Президентининг
Қарори
Мирзо Улуғбек номидаги Ўзбекистон Миллий университети таркибида «Таэквондо ва спорт фаолияти» факультетини ташкил этиш тўғрисида
Жамиятимизда соғлом турмуш тарзини шакллантириш, ёш авлоднинг жисмоний тарбия ва спорт билан мунтазам шуғулланиши учун замон талабларига мос шарт-шароитлар яратиш, спорт мусобақалари орқали ёшларда ўз иродаси, кучи ва имкониятларига бўлган ишончни мустаҳкамлаш, мардлик ва ватанпарварлик, Ватанга садоқат туйғуларини камол топтириш, шунингдек, ёшлар орасидан иқтидорли спортчиларни саралаб олиш ишларини тизимли ташкиллаштириш ҳамда жисмоний тарбия ва спортни янада ривожлантиришга йўналтирилган кенг кўламли ишлар амалга оширилмоқда.
Юртимиз вакиллари Олимпия ва Осиё ўйинлари, жаҳон ва Осиё чемпионатлари ҳамда турли халқаро спорт мусобақаларида юксак натижаларга эришиб келмоқдалар. Жумладан, республикамизда таэквондо WTF спорт тури жадал равишда ривожланиб, ёшлар ўртасида ўтказиладиган уч босқичли «Умид ниҳоллари», «Баркамол авлод» ва Универсиада спорт мусобақалари доирасида янада оммалашиб бораётгани айниқса эътиборлидир.
Мустақиллик йилларида мазкур спорт тури бўйича спортчиларимиз нуфузли халқаро спорт мусобақаларида муносиб иштирок этиб, 44 та олтин, 64 та кумуш ва 71 та бронза медалларини қўлга киритган ҳолда дунёда Ўзбекистоннинг обрў-эътибори ва спорт салоҳиятини янада оширмоқдалар.
Ўзбекистон Республикасида таэквондо WTF спорт турини янада ривожлантириш, юқори маҳоратли спортчилар ва кадрлар тайёрлаш тизимини такомиллаштириш мақсадида:
1. Ўзбекистон Республикаси Олий ва ўрта махсус таълим вазирлиги, Жисмоний тарбия ва спорт давлат қўмитаси, Ўзбекистон таэквондо WTF ассоциациясининг Мирзо Улуғбек номидаги Ўзбекистон Миллий университети таркибида «Таэквондо ва спорт фаолияти» факультетини (кейинги ўринларда факультет деб аталади) ташкил этиш тўғрисидаги таклифи маъқуллансин.
2. Қуйидагилар факультетнинг асосий вазифалари этиб белгилансин:
таэквондо WTF спорт турини ўқитиш ва амалий тайёрлаш услубларини ҳамда унинг тарихи, фалсафаси, классификациясини ўзлаштирган, таълим жараёнида замонавий педагогик ва ахборот-коммуникация технологияларидан фойдалана оладиган юқори малакали кадрлар тайёрлаш;
халқаро илғор тажрибадан фойдаланиб, юқори даражага эга бўлган хорижий ва мамлакатимизнинг малакали амалиётчи мутахассислари ва тренерларини таълим жараёнига жалб этган ҳолда кадрлар тайёрлаш тизимини такомиллаштириш;
юқори малакали тренер ва ўқитувчиларни тайёрлаш, иқтидорли ёш спортчиларни аниқлаш, халқаро спорт мусобақаларида муносиб қатнашадиган профессионал спортчилар тайёрлаш учун уларнинг кўникма ва билимларини ривожлантиришга йўналтирилган замонавий ўқитиш дастурлари ва методларини ишлаб чиқиш;
таълим олувчиларда индивидуал қобилиятлари ва истеъдодларини ҳисобга олган ҳолда жисмоний тарбия ва спортга оид кўникмаларни шакллантириш;
юқори интеллектуал салоҳиятга ва спорт соҳасида пухта билимларга эга мутахассисларни тайёрлаш;
республика ва халқаро спорт мусобақаларида юқори натижаларга эришадиган ҳамда Ўзбекистон миллий терма жамоалари таркибида иштирок этадиган иқтидорли спортчиларни тайёрлаш;
ўқитиш ва тайёрлашнинг барча даражаларида инновацион методикаларни жорий этиш ҳамда жисмоний тарбия ва спорт соҳасига оид долзарб мавзулар бўйича чуқур илмий тадқиқотлар ўтказиш;
мавжуд ўқув-методик, моддий-техник базани ҳар томонлама мустаҳкамлаш ва такомиллаштириш, таълим жараёнига спортчилар тайёрлашнинг сифат жиҳатидан янги даражасини таъминлайдиган ўқитишнинг замонавий техник воситаларини, педагогик технологияларни жорий этиш.
3. Ўзбекистон Республикаси Иқтисодиёт вазирлиги, Олий ва ўрта махсус таълим вазирлиги, Молия вазирлиги Мирзо Улуғбек номидаги Ўзбекистон Миллий университетида 2018/2019 ўқув йилидан бошлаб таэквондо WTF ҳамда спорт тадбирларини ташкил этиш ва бошқариш таълим йўналишлари бўйича қабул квоталарини шакллантирсин.
4. Ўзбекистон Республикаси Вазирлар Маҳкамаси икки ой муддатда факультетни малакали мутахассислар ва профессор-ўқитувчилар билан таъминлаш, ихтисослик фанлари бўйича ўқув-методик адабиётлар яратиш ва ўқув дастурларини ишлаб чиқиш, унинг моддий-техник базасини мустаҳкамлаш ва молиялаштиришни назарда тутувчи Ҳукумат қарорини қабул қилсин.
5. Ўзбекистон таэквондо WTF ассоциациясининг факультет учун ажратиладиган спорт иншоотларини таъмирлаш ва спорт анжомлари билан жиҳозлаш учун зарур бўладиган маблағларни ажратиш тўғрисидаги таклифи маъқуллансин.
7. Ўзбекистон Республикаси Олий ва ўрта махсус таълим вазирлиги бошқа манфаатдор вазирликлар ва идоралар билан биргаликда бир ой муддатда қонун ҳужжатларига ушбу қарордан келиб чиқадиган ўзгартириш ва қўшимчалар киритиш тўғрисидаги таклифларни Вазирлар Маҳкамасига киритсин.
8. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов ва Ўзбекистон Республикаси Президентининг Давлат маслаҳатчиси А.Н. Юнусходжаев, Ўзбекистон Республикаси Олий ва ўрта махсус таълим вазири И.У. Мажидов ва Ўзбекистон Республикаси Жисмоний тарбия ва спорт давлат қўмитаси раиси Р.Д. Курбанов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2017 йил 16 ноябрь,
ПҚ-3390-сон
Oʻzbekiston Respublikasi Prezidentining
Qarori
Mirzo Ulugʻbek nomidagi Oʻzbekiston Milliy universiteti tarkibida “Taekvondo va sport faoliyati” fakultetini tashkil etish toʻgʻrisida
Jamiyatimizda sogʻlom turmush tarzini shakllantirish, yosh avlodning jismoniy tarbiya va sport bilan muntazam shugʻullanishi uchun zamon talablariga mos shart-sharoitlar yaratish, sport musobaqalari orqali yoshlarda oʻz irodasi, kuchi va imkoniyatlariga boʻlgan ishonchni mustahkamlash, mardlik va vatanparvarlik, Vatanga sadoqat tuygʻularini kamol toptirish, shuningdek, yoshlar orasidan iqtidorli sportchilarni saralab olish ishlarini tizimli tashkillashtirish hamda jismoniy tarbiya va sportni yanada rivojlantirishga yoʻnaltirilgan keng koʻlamli ishlar amalga oshirilmoqda.
Yurtimiz vakillari Olimpiya va Osiyo oʻyinlari, jahon va Osiyo chempionatlari hamda turli xalqaro sport musobaqalarida yuksak natijalarga erishib kelmoqdalar. Jumladan, respublikamizda taekvondo WTF sport turi jadal ravishda rivojlanib, yoshlar oʻrtasida oʻtkaziladigan uch bosqichli “Umid nihollari”, “Barkamol avlod” va Universiada sport musobaqalari doirasida yanada ommalashib borayotgani ayniqsa eʼtiborlidir.
Mustaqillik yillarida mazkur sport turi boʻyicha sportchilarimiz nufuzli xalqaro sport musobaqalarida munosib ishtirok etib, 44 ta oltin, 64 ta kumush va 71 ta bronza medallarini qoʻlga kiritgan holda dunyoda Oʻzbekistonning obroʻ-eʼtibori va sport salohiyatini yanada oshirmoqdalar.
Oʻzbekiston Respublikasida taekvondo WTF sport turini yanada rivojlantirish, yuqori mahoratli sportchilar va kadrlar tayyorlash tizimini takomillashtirish maqsadida:
1. Oʻzbekiston Respublikasi Oliy va oʻrta maxsus taʼlim vazirligi, Jismoniy tarbiya va sport davlat qoʻmitasi, Oʻzbekiston taekvondo WTF assotsiatsiyasining Mirzo Ulugʻbek nomidagi Oʻzbekiston Milliy universiteti tarkibida “Taekvondo va sport faoliyati” fakultetini (keyingi oʻrinlarda fakultet deb ataladi) tashkil etish toʻgʻrisidagi taklifi maʼqullansin.
2. Quyidagilar fakultetning asosiy vazifalari etib belgilansin:
taekvondo WTF sport turini oʻqitish va amaliy tayyorlash uslublarini hamda uning tarixi, falsafasi, klassifikatsiyasini oʻzlashtirgan, taʼlim jarayonida zamonaviy pedagogik va axborot-kommunikatsiya texnologiyalaridan foydalana oladigan yuqori malakali kadrlar tayyorlash;
xalqaro ilgʻor tajribadan foydalanib, yuqori darajaga ega boʻlgan xorijiy va mamlakatimizning malakali amaliyotchi mutaxassislari va trenerlarini taʼlim jarayoniga jalb etgan holda kadrlar tayyorlash tizimini takomillashtirish;
yuqori malakali trener va oʻqituvchilarni tayyorlash, iqtidorli yosh sportchilarni aniqlash, xalqaro sport musobaqalarida munosib qatnashadigan professional sportchilar tayyorlash uchun ularning koʻnikma va bilimlarini rivojlantirishga yoʻnaltirilgan zamonaviy oʻqitish dasturlari va metodlarini ishlab chiqish;
taʼlim oluvchilarda individual qobiliyatlari va isteʼdodlarini hisobga olgan holda jismoniy tarbiya va sportga oid koʻnikmalarni shakllantirish;
yuqori intellektual salohiyatga va sport sohasida puxta bilimlarga ega mutaxassislarni tayyorlash;
respublika va xalqaro sport musobaqalarida yuqori natijalarga erishadigan hamda Oʻzbekiston milliy terma jamoalari tarkibida ishtirok etadigan iqtidorli sportchilarni tayyorlash;
oʻqitish va tayyorlashning barcha darajalarida innovatsion metodikalarni joriy etish hamda jismoniy tarbiya va sport sohasiga oid dolzarb mavzular boʻyicha chuqur ilmiy tadqiqotlar oʻtkazish;
mavjud oʻquv-metodik, moddiy-texnik bazani har tomonlama mustahkamlash va takomillashtirish, taʼlim jarayoniga sportchilar tayyorlashning sifat jihatidan yangi darajasini taʼminlaydigan oʻqitishning zamonaviy texnik vositalarini, pedagogik texnologiyalarni joriy etish.
3. Oʻzbekiston Respublikasi Iqtisodiyot vazirligi, Oliy va oʻrta maxsus taʼlim vazirligi, Moliya vazirligi Mirzo Ulugʻbek nomidagi Oʻzbekiston Milliy universitetida 2018/2019 oʻquv yilidan boshlab taekvondo WTF hamda sport tadbirlarini tashkil etish va boshqarish taʼlim yoʻnalishlari boʻyicha qabul kvotalarini shakllantirsin.
4. Oʻzbekiston Respublikasi Vazirlar Mahkamasi ikki oy muddatda fakultetni malakali mutaxassislar va professor-oʻqituvchilar bilan taʼminlash, ixtisoslik fanlari boʻyicha oʻquv-metodik adabiyotlar yaratish va oʻquv dasturlarini ishlab chiqish, uning moddiy-texnik bazasini mustahkamlash va moliyalashtirishni nazarda tutuvchi Hukumat qarorini qabul qilsin.
5. Oʻzbekiston taekvondo WTF assotsiatsiyasining fakultet uchun ajratiladigan sport inshootlarini taʼmirlash va sport anjomlari bilan jihozlash uchun zarur boʻladigan mablagʻlarni ajratish toʻgʻrisidagi taklifi maʼqullansin.
7. Oʻzbekiston Respublikasi Oliy va oʻrta maxsus taʼlim vazirligi boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar kiritish toʻgʻrisidagi takliflarni Vazirlar Mahkamasiga kiritsin.
8. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidentining Davlat maslahatchisi A.N. Yunusxodjayev, Oʻzbekiston Respublikasi Oliy va oʻrta maxsus taʼlim vaziri I.U. Majidov va Oʻzbekiston Respublikasi Jismoniy tarbiya va sport davlat qoʻmitasi raisi R.D. Kurbanov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2017-yil 16-noyabr,
PQ-3390-son