UzbekAI

Ўзбекистон Республикаси Вазирлар Маҳкамасининг

қарори

Тошкент шаҳар аҳолисини асосий турдаги қишлоқ хўжалиги ва чорвачилик маҳсулотлари билан кафолатли таъминлаш тизимини янада такомиллаштириш чора-тадбирлари тўғрисида

Тошкент шаҳар аҳолиси истеъмоли учун асосий турдаги қишлоқ хўжалиги ва чорвачилик маҳсулотларини сифатли ва мақбул нархларда кафолатли етказиб берилишини таъминлаш, уларни уюшган савдосини ташкил этиш, ички истеъмол бозорида ушбу маҳсулотлар нархларини барқарорлаштириш учун етарли миқдорда захирасини яратиш мақсадида Вазирлар Маҳкамаси қарор қилади:

1. Ўзбекистон Республикаси Қишлоқ ва сув хўжалиги вазирлиги, Иқтисодиёт вазирлиги ва Тошкент шаҳар ҳокимлигининг Тошкент шаҳар ҳокимлиги муассислигида шаҳар аҳолисига асосий турдаги қишлоқ хўжалиги ва чорвачилик маҳсулотларини тизимли етказиб бериш, қайта ишлаш ва захирасини яратишга ихтисослашган «Toshkent agro zaxira xizmat» давлат унитар корхонасини (кейинги ўринларда Давлат корхонаси деб аталади) ташкил этиш тўғрисидаги таклифи маъқуллансин.

2. Тошкент шаҳар ҳокимлиги белгиланган тартибда Давлат корхонаси уставини ишлаб чиқсин ва тасдиқласин ҳамда уни давлат рўйхатидан ўтказилишини таъминласин.

3. Қуйидагилар Давлат корхонасининг асосий вазифалари этиб белгилансин:

Тошкент шаҳар аҳолисига, жумладан аҳоли яшаш мавзеларига асосий турдаги қишлоқ хўжалиги ва чорвачилик маҳсулотларини (кейинги ўринларда маҳсулот деб аталади) ўз вақтида етказиб берилиши ва сотилишини таъминлаш, ички истеъмол бозорида маҳсулотлар нархларини барқарорлаштириш;

агросаноат соҳасидаги ташкилотлар, деҳқон ва фермер хўжаликларидан тайёр маҳсулотларни сотиб олиш, сақлаш, қайта ишлаш, консервация қилиш, қадоқлаш ва сотиш;

маҳсулотлар захирасини яратиш ишларини ташкил этиш ҳамда қиш ва баҳор мавсумида уларнинг нархлари сунъий равишда ошиб кетишини олдини олиш чора-тадбирларини амалга ошириш;

Тошкент шаҳрининг туманларида маҳсулотлар савдосини амалга оширувчи шохобчалар, савдо дўконларини ташкил этиш ҳамда деҳқон ва фермер хўжаликлари томонидан ўзлари етиштирган маҳсулотларни ушбу шохобчалар ва савдо дўконларида сотилишини таъминлаш;

маҳсулотларни етиштириш мақсадида Тошкент вилояти Оҳангарон туманида жойлашган қишлоқ хўжалигига мўлжалланган ерлардан фойдаланиш;

ўзи етиштирган маҳсулотларни қайта ишлайдиган ташкилотлар фаолиятини йўлга қўйиш ва уларни Тошкент шаҳар аҳолисига мақбул нархларда уюшган савдосини ташкил этиш.

4. Тошкент вилояти ҳокимлиги, Ўзбекистон Республикаси Қишлоқ ва сув хўжалиги вазирлиги, Ер ресурслари, геодезия, картография ва давлат кадастри давлат қўмитаси, Ўрмон хўжалиги давлат қўмитаси билан биргаликда, тажриба тариқасида, Давлат корхонасига Тошкент вилоятининг Оҳангарон тумани, «Бирлик», «Шодмалик», «Ғаллақудуқ» ва «Дўстлик» массивлари ҳудудидан қишлоқ хўжалик фаолиятини амалга ошириш учун 10 минг гектардан кам бўлмаган ер участкасини бириктирилишини ҳамда чорвачилик фаолиятини амалга ошириш учун «Оҳангарон» ўрмон хўжалиги ҳудудидан 20 минг гектардан кам бўлмаган ер участкаларини ўрнатилган тартибда ижарага берилишини таъминласин.

5. Тошкент вилоят ҳокимлиги, Хусусийлаштирилган корхоналарга кўмаклашиш ва рақобатни ривожлантириш давлат қўмитаси фермер хўжаликлари ва тадбиркорлик субъектларига қулай шароитлар яратиш мақсадида Тошкент вилоятининг Оҳангарон туманида бўш турган ва самарали фойдаланилмаётган бино ва иншоотлар рўйхатини шакллантириб, ўрнатилган тартибда Давлат корхонасига берилишини таъминласин.

6. Тошкент шаҳар ва Тошкент вилояти ҳокимликларига:

бириктирилган ҳудудда қишлоқ хўжалиги ва чорвачилик фаолиятини амалга ошириш учун белгиланган тартибда фермер хўжаликлари ва бошқа тадбиркорлик субъектларини жалб қилиш, ер майдони жойлашган ҳудуддаги туман ҳокимлиги, Давлат корхонаси ва тадбиркорлик субъектлари (фермер хўжаликлари) ўртасида ихтиёрий равишда тузилган уч томонлама шартнома асосида фаолиятни йўлга қўйиш;

жалб қилинган фермер хўжаликлари ва бошқа тадбиркорлик субъектлари фаолияти учун зарур шарт-шароитларни яратиш;

Тошкент шаҳрининг ички истеъмол бозорида маҳсулотлар нархларини барқарорлаштириш бўйича тегишли ишларни амалга ошириш вазифалари юклатилсин.

7. Тошкент шаҳар ҳокимлигига Давлат корхонасининг асосий вазифалари бажарилишини таъминлаш мақсадида маҳсулотларни сотиш учун Тошкент шаҳар туманларидаги аҳоли яшаш мавзеларида намунавий лойиҳадаги кичик енгил типдаги савдо дўконларини (дала дўконларини) жойлаштиришга рухсат берилсин.

8. Тижорат банкларига Давлат корхонасига 3 йилдан кам бўлмаган муддатга имтиёзли кредитлар ажратиш тавсия этилсин.

9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — қишлоқ ва сув хўжалиги вазири З.Т. Мирзаев ва Тошкент шаҳар ҳокими Р.Ж. Усманов зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2017 йил 21 ноябрь,

927-сон

(Қонун ҳужжатлари маълумотлари миллий базаси, 25.11.2017 й., 09/17/927/0316-сон)

Oʻzbekiston Respublikasi Vazirlar Mahkamasining

qarori

Toshkent shahar aholisini asosiy turdagi qishloq xoʻjaligi va chorvachilik mahsulotlari bilan kafolatli taʼminlash tizimini yanada takomillashtirish chora-tadbirlari toʻgʻrisida

Toshkent shahar aholisi isteʼmoli uchun asosiy turdagi qishloq xoʻjaligi va chorvachilik mahsulotlarini sifatli va maqbul narxlarda kafolatli yetkazib berilishini taʼminlash, ularni uyushgan savdosini tashkil etish, ichki isteʼmol bozorida ushbu mahsulotlar narxlarini barqarorlashtirish uchun yetarli miqdorda zaxirasini yaratish maqsadida Vazirlar Mahkamasi qaror qiladi:

1. Oʻzbekiston Respublikasi Qishloq va suv xoʻjaligi vazirligi, Iqtisodiyot vazirligi va Toshkent shahar hokimligining Toshkent shahar hokimligi muassisligida shahar aholisiga asosiy turdagi qishloq xoʻjaligi va chorvachilik mahsulotlarini tizimli yetkazib berish, qayta ishlash va zaxirasini yaratishga ixtisoslashgan “Toshkent agro zaxira xizmat” davlat unitar korxonasini (keyingi oʻrinlarda Davlat korxonasi deb ataladi) tashkil etish toʻgʻrisidagi taklifi maʼqullansin.

2. Toshkent shahar hokimligi belgilangan tartibda Davlat korxonasi ustavini ishlab chiqsin va tasdiqlasin hamda uni davlat roʻyxatidan oʻtkazilishini taʼminlasin.

3. Quyidagilar Davlat korxonasining asosiy vazifalari etib belgilansin:

Toshkent shahar aholisiga, jumladan aholi yashash mavzelariga asosiy turdagi qishloq xoʻjaligi va chorvachilik mahsulotlarini (keyingi oʻrinlarda mahsulot deb ataladi) oʻz vaqtida yetkazib berilishi va sotilishini taʼminlash, ichki isteʼmol bozorida mahsulotlar narxlarini barqarorlashtirish;

agrosanoat sohasidagi tashkilotlar, dehqon va fermer xoʻjaliklaridan tayyor mahsulotlarni sotib olish, saqlash, qayta ishlash, konservatsiya qilish, qadoqlash va sotish;

mahsulotlar zaxirasini yaratish ishlarini tashkil etish hamda qish va bahor mavsumida ularning narxlari sunʼiy ravishda oshib ketishini oldini olish chora-tadbirlarini amalga oshirish;

Toshkent shahrining tumanlarida mahsulotlar savdosini amalga oshiruvchi shoxobchalar, savdo doʻkonlarini tashkil etish hamda dehqon va fermer xoʻjaliklari tomonidan oʻzlari yetishtirgan mahsulotlarni ushbu shoxobchalar va savdo doʻkonlarida sotilishini taʼminlash;

mahsulotlarni yetishtirish maqsadida Toshkent viloyati Ohangaron tumanida joylashgan qishloq xoʻjaligiga moʻljallangan yerlardan foydalanish;

oʻzi yetishtirgan mahsulotlarni qayta ishlaydigan tashkilotlar faoliyatini yoʻlga qoʻyish va ularni Toshkent shahar aholisiga maqbul narxlarda uyushgan savdosini tashkil etish.

4. Toshkent viloyati hokimligi, Oʻzbekiston Respublikasi Qishloq va suv xoʻjaligi vazirligi, Yer resurslari, geodeziya, kartografiya va davlat kadastri davlat qoʻmitasi, Oʻrmon xoʻjaligi davlat qoʻmitasi bilan birgalikda, tajriba tariqasida, Davlat korxonasiga Toshkent viloyatining Ohangaron tumani, “Birlik”, “Shodmalik”, “Gʻallaquduq” va “Doʻstlik” massivlari hududidan qishloq xoʻjalik faoliyatini amalga oshirish uchun 10 ming gektardan kam boʻlmagan yer uchastkasini biriktirilishini hamda chorvachilik faoliyatini amalga oshirish uchun “Ohangaron” oʻrmon xoʻjaligi hududidan 20 ming gektardan kam boʻlmagan yer uchastkalarini oʻrnatilgan tartibda ijaraga berilishini taʼminlasin.

5. Toshkent viloyat hokimligi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasi fermer xoʻjaliklari va tadbirkorlik subyektlariga qulay sharoitlar yaratish maqsadida Toshkent viloyatining Ohangaron tumanida boʻsh turgan va samarali foydalanilmayotgan bino va inshootlar roʻyxatini shakllantirib, oʻrnatilgan tartibda Davlat korxonasiga berilishini taʼminlasin.

6. Toshkent shahar va Toshkent viloyati hokimliklariga:

biriktirilgan hududda qishloq xoʻjaligi va chorvachilik faoliyatini amalga oshirish uchun belgilangan tartibda fermer xoʻjaliklari va boshqa tadbirkorlik subyektlarini jalb qilish, yer maydoni joylashgan hududdagi tuman hokimligi, Davlat korxonasi va tadbirkorlik subyektlari (fermer xoʻjaliklari) oʻrtasida ixtiyoriy ravishda tuzilgan uch tomonlama shartnoma asosida faoliyatni yoʻlga qoʻyish;

jalb qilingan fermer xoʻjaliklari va boshqa tadbirkorlik subyektlari faoliyati uchun zarur shart-sharoitlarni yaratish;

Toshkent shahrining ichki isteʼmol bozorida mahsulotlar narxlarini barqarorlashtirish boʻyicha tegishli ishlarni amalga oshirish vazifalari yuklatilsin.

7. Toshkent shahar hokimligiga Davlat korxonasining asosiy vazifalari bajarilishini taʼminlash maqsadida mahsulotlarni sotish uchun Toshkent shahar tumanlaridagi aholi yashash mavzelarida namunaviy loyihadagi kichik yengil tipdagi savdo doʻkonlarini (dala doʻkonlarini) joylashtirishga ruxsat berilsin.

8. Tijorat banklariga Davlat korxonasiga 3 yildan kam boʻlmagan muddatga imtiyozli kreditlar ajratish tavsiya etilsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — qishloq va suv xoʻjaligi vaziri Z.T. Mirzayev va Toshkent shahar hokimi R.J. Usmanov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2017-yil 21-noyabr,

927-son

(Qonun hujjatlari maʼlumotlari milliy bazasi, 25.11.2017-y., 09/17/927/0316-son)