📅 2017-yil 27-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 27 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 ноября 2017 г. · Постановления Кабинета Министров
Официальный текст. Официальный документ. Редакционные примечания не включены.
📅 27 November 2017 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТУЗИЛМАСИ
Самарқанд давлат архитектура ва қурилиш институти ҳузурида «Самарқанд меъмор лойиҳа» лойиҳа-қидирув ташкилотини ташкил этиш чора-тадбирлари тўғрисида
Самарқанд вилояти шаҳар ва туманлари ҳудудларини архитектура ва шаҳарсозлик жиҳатидан режалаштириш ишини тубдан яхшилаш, соҳадаги илмий-тадқиқот ишларини ва илғор чет эл тажрибасини амалиётга татбиқ этиш, замонавий техника ва технологияларни лойиҳалаштириш ва қурилишга жорий этиш, турар жойлар, ижтимоий ва ишлаб чиқариш инфратузилмаси объектларининг замонавий турдаги, шу жумладан, экспериментал лойиҳаларини ишлаб чиқишни ташкил қилиш мақсадида Вазирлар Маҳкамаси қарор қилади:
1. Самарқанд вилояти ҳокимлиги, Самарқанд давлат архитектура-қурилиш институти, Ўзбекистон Республикаси Давлат архитектура ва қурилиш қўмитасининг Самарқанд давлат архитектура-қурилиш институти муассислигида давлат унитар корхонаси шаклидаги «Самарқанд меъмор лойиҳа» лойиҳа-қидирув ташкилотини (кейинги ўринларда «Самарқанд меъмор лойиҳа» ДУК деб аталади) ташкил этиш ҳақидаги таклифига розилик берилсин.
2. «Самарқанд меъмор лойиҳа» ДУКнинг ходимлари чекланган умумий сони 117 нафар бўлган тузилмаси иловага мувофиқ тасдиқлансин.
«Самарқанд меъмор лойиҳа» ДУК директорига Самарқанд давлат архитектура-қурилиш институти ва Ўзбекистон Республикаси Давлат архитектура ва қурилиш қўмитаси билан келишган ҳолда, зарурат бўлганда, «Самарқанд меъмор лойиҳа» ДУКнинг тасдиқланган тузилмасига ходимларнинг чекланган умумий сони ва меҳнатга ҳақ тўлаш фонди доирасида ўзгартиришлар киритиш ҳуқуқи берилсин.
3. Қуйидагилар «Самарқанд меъмор лойиҳа» ДУКнинг асосий вазифалари этиб белгилансин:
Самарқанд вилоятининг шаҳар ва туманларида қурилиши режалаштирилаётган муҳим аҳамиятга эга бўлган объектларни лойиҳалаштириш ҳамда ҳудуднинг архитектура-режалаштириш лойиҳаларини ишлаб чиқиш;
аҳоли пунктлари ҳудудларини қуришни ривожлантириш ҳужжатларини ишлаб чиқиш;
транспорт ва йўл қурилиши объектлари ва комплексларини лойиҳалаштириш;
умумий фойдаланиладиган автомобиль йўлларини, магистрал муҳандислик тармоқларини, жумладан, уларнинг муҳандислик тармоқлари ва тизимлари билан бирга, қуриш, реконструкция қилиш ва таъмирлаш бўйича ҳужжатларни ишлаб чиқиш;
намунавий лойиҳалаштиришдан кенг фойдаланиш ҳамда лойиҳаларни оптималлаштириш ва қийматини пасайтириш чораларини кўриш;
қурилишнинг илғор услубларини, замонавий ва энергия жиҳатдан самарали қурилиш материалларининг турларини лойиҳа ечимларига устувор татбиқ этиш;
илғор хорижий тажрибадан фойдаланган ҳолда лойиҳалаштиришнинг замонавий, илмий жиҳатдан асосланган технологик тартибларни ишлаб чиқиш ва татбиқ этиш;
лойиҳаларни энергия жиҳатдан тежамкор ва иқтисодий самараси юқори бўлган, илғор ва янги турдаги қурилиш материалларини қўллашни назарда тутадиган замонавий технологияларни жорий этиш ҳисобига ишлаб чиқиш;
халқаро стандартлар даражасида қўллашни назарда тутадиган лойиҳалаштириш жараёнларига замонавий стандартларни татбиқ этиш бўйича таклифлар ишлаб чиқиш;
соҳага оид илмий-тадқиқот ва олий таълим муассасалари билан изчил ҳамкорликни амалга ошириш.
4. Белгилансинки:
«Самарқанд меъмор лойиҳа» ДУК раҳбари бир вақтнинг ўзида жамоатчилик асосида Самарқанд вилоят ҳокимининг лойиҳа-қидирув ишлари бўйича ёрдамчиси ҳисобланади;
«Самарқанд меъмор лойиҳа» ДУКнинг Италия, Жанубий Корея, Хитой ва бошқа хорижий мамлакатлардан тажрибали лойиҳачи меъморларни жалб қилиш билан боғлиқ ҳамда уларга сарф этиладиган барча харажатлари дастлабки уч йил мобайнида «Ўзбекистон темир йўллари» АЖ томонидан қопланади;
«Самарқанд меъмор лойиҳа» ДУК Самарқанд давлат архитектура-қурилиш институти талабаларининг ўқув-ишлаб чиқариш амалиётини ўтишида таянч ташкилот ҳисобланади.
5. Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси, Давлат архитектура ва қурилиш қўмитаси, Самарқанд вилояти ҳокимлиги ҳамда Самарқанд давлат архитектура-қурилиш институти Самарқанд шаҳар, Лолазор кўчаси, 70-уй манзилидаги ўқув лабораторияси биноси мажмуаси оператив бошқарув ҳуқуқи асосида «Самарқанд меъмор лойиҳа» ДУКга берилишини таъминласинлар.
6. Самарқанд давлат архитектура-қурилиш институти бир ой муддатда «Самарқанд меъмор лойиҳа» ДУКнинг уставини ва штат жадвалини ишлаб чиқсин ҳамда белгиланган тартибда тасдиқласин.
7. Белгилаб қўйилсинки:
«Самарқанд меъмор лойиҳа» ДУКнинг ўз маблағлари ва қонун ҳужжатларида тақиқланмаган бошқа манбалар унинг фаолиятини молиялаштириш манбалари ҳисобланади.
«Самарқанд меъмор лойиҳа» ДУК директори Ўзбекистон Республикаси Давлат архитектура ва қурилиш қўмитаси ҳамда Самарқанд вилояти ҳокимлиги билан келишган ҳолда Самарқанд давлат архитектура-қурилиш институти ректори томонидан лавозимга тайинланади ва лавозимдан озод қилинади.
8. Самарқанд вилояти ҳокимлиги Ўзбекистон Республикаси Давлат архитектура ва қурилиш қўмитаси билан биргаликда икки ой муддатда:
«Самарқанд меъмор лойиҳа» ДУКнинг моддий-техник базасини мустаҳкамлаш ва уни қурилиш объектларини лойиҳалаштириш соҳасида юқори малакали кадрлар ва мутахассислар билан тўлдириш;
«Самарқанд меъмор лойиҳа» ДУКга оператив бошқарув ҳуқуқи асосида бериладиган Самарқанд шаҳар, Лолазор кўчаси, 70-уй манзилидаги ўқув лабораторияси биносини капитал таъмирлаш билан боғлиқ ташкилий масалаларни ҳал этиш ва молиялаштириш манбаларини аниқлаш чораларини кўрсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — «Ўзбекистон темир йўллари» АЖ бошқаруви раиси А.Ж. Раматов, Ўзбекистон Республикаси Давлат архитектура ва қурилиш қўмитаси раиси Б.И. Зокиров ва Самарқанд вилояти ҳокими Т.И. Жўраев зиммасига юклансин.
Вазирлар Маҳкамасининг 2017 йил 27 ноябрдаги 945-сон қарорига ИЛОВА
«Самарқанд меъмор лойиҳа» давлат унитар корхонасининг
Ўзбекистон Республикасининг Бош вазири А. АРИПОВ
Тошкент ш.,
2017 йил 27 ноябрь,
945-сон
Oʻzbekiston Respublikasi Vazirlar Mahkamasining
qarori
TUZILMASI
Samarqand davlat arxitektura va qurilish instituti huzurida “Samarqand meʼmor loyiha” loyiha-qidiruv tashkilotini tashkil etish chora-tadbirlari toʻgʻrisida
Samarqand viloyati shahar va tumanlari hududlarini arxitektura va shaharsozlik jihatidan rejalashtirish ishini tubdan yaxshilash, sohadagi ilmiy-tadqiqot ishlarini va ilgʻor chet el tajribasini amaliyotga tatbiq etish, zamonaviy texnika va texnologiyalarni loyihalashtirish va qurilishga joriy etish, turar joylar, ijtimoiy va ishlab chiqarish infratuzilmasi obyektlarining zamonaviy turdagi, shu jumladan, eksperimental loyihalarini ishlab chiqishni tashkil qilish maqsadida Vazirlar Mahkamasi qaror qiladi:
1. Samarqand viloyati hokimligi, Samarqand davlat arxitektura-qurilish instituti, Oʻzbekiston Respublikasi Davlat arxitektura va qurilish qoʻmitasining Samarqand davlat arxitektura-qurilish instituti muassisligida davlat unitar korxonasi shaklidagi “Samarqand meʼmor loyiha” loyiha-qidiruv tashkilotini (keyingi oʻrinlarda “Samarqand meʼmor loyiha” DUK deb ataladi) tashkil etish haqidagi taklifiga rozilik berilsin.
2. “Samarqand meʼmor loyiha” DUKning xodimlari cheklangan umumiy soni 117 nafar boʻlgan tuzilmasi ilovaga muvofiq tasdiqlansin.
“Samarqand meʼmor loyiha” DUK direktoriga Samarqand davlat arxitektura-qurilish instituti va Oʻzbekiston Respublikasi Davlat arxitektura va qurilish qoʻmitasi bilan kelishgan holda, zarurat boʻlganda, “Samarqand meʼmor loyiha” DUKning tasdiqlangan tuzilmasiga xodimlarning cheklangan umumiy soni va mehnatga haq toʻlash fondi doirasida oʻzgartirishlar kiritish huquqi berilsin.
3. Quyidagilar “Samarqand meʼmor loyiha” DUKning asosiy vazifalari etib belgilansin:
Samarqand viloyatining shahar va tumanlarida qurilishi rejalashtirilayotgan muhim ahamiyatga ega boʻlgan obyektlarni loyihalashtirish hamda hududning arxitektura-rejalashtirish loyihalarini ishlab chiqish;
aholi punktlari hududlarini qurishni rivojlantirish hujjatlarini ishlab chiqish;
transport va yoʻl qurilishi obyektlari va komplekslarini loyihalashtirish;
umumiy foydalaniladigan avtomobil yoʻllarini, magistral muhandislik tarmoqlarini, jumladan, ularning muhandislik tarmoqlari va tizimlari bilan birga, qurish, rekonstruksiya qilish va taʼmirlash boʻyicha hujjatlarni ishlab chiqish;
namunaviy loyihalashtirishdan keng foydalanish hamda loyihalarni optimallashtirish va qiymatini pasaytirish choralarini koʻrish;
qurilishning ilgʻor uslublarini, zamonaviy va energiya jihatdan samarali qurilish materiallarining turlarini loyiha yechimlariga ustuvor tatbiq etish;
ilgʻor xorijiy tajribadan foydalangan holda loyihalashtirishning zamonaviy, ilmiy jihatdan asoslangan texnologik tartiblarni ishlab chiqish va tatbiq etish;
loyihalarni energiya jihatdan tejamkor va iqtisodiy samarasi yuqori boʻlgan, ilgʻor va yangi turdagi qurilish materiallarini qoʻllashni nazarda tutadigan zamonaviy texnologiyalarni joriy etish hisobiga ishlab chiqish;
xalqaro standartlar darajasida qoʻllashni nazarda tutadigan loyihalashtirish jarayonlariga zamonaviy standartlarni tatbiq etish boʻyicha takliflar ishlab chiqish;
sohaga oid ilmiy-tadqiqot va oliy taʼlim muassasalari bilan izchil hamkorlikni amalga oshirish.
4. Belgilansinki:
“Samarqand meʼmor loyiha” DUK rahbari bir vaqtning oʻzida jamoatchilik asosida Samarqand viloyat hokimining loyiha-qidiruv ishlari boʻyicha yordamchisi hisoblanadi;
“Samarqand meʼmor loyiha” DUKning Italiya, Janubiy Koreya, Xitoy va boshqa xorijiy mamlakatlardan tajribali loyihachi meʼmorlarni jalb qilish bilan bogʻliq hamda ularga sarf etiladigan barcha xarajatlari dastlabki uch yil mobaynida “Oʻzbekiston temir yoʻllari” AJ tomonidan qoplanadi;
“Samarqand meʼmor loyiha” DUK Samarqand davlat arxitektura-qurilish instituti talabalarining oʻquv-ishlab chiqarish amaliyotini oʻtishida tayanch tashkilot hisoblanadi.
5. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Davlat arxitektura va qurilish qoʻmitasi, Samarqand viloyati hokimligi hamda Samarqand davlat arxitektura-qurilish instituti Samarqand shahar, Lolazor koʻchasi, 70-uy manzilidagi oʻquv laboratoriyasi binosi majmuasi operativ boshqaruv huquqi asosida “Samarqand meʼmor loyiha” DUKga berilishini taʼminlasinlar.
6. Samarqand davlat arxitektura-qurilish instituti bir oy muddatda “Samarqand meʼmor loyiha” DUKning ustavini va shtat jadvalini ishlab chiqsin hamda belgilangan tartibda tasdiqlasin.
7. Belgilab qoʻyilsinki:
“Samarqand meʼmor loyiha” DUKning oʻz mablagʻlari va qonun hujjatlarida taqiqlanmagan boshqa manbalar uning faoliyatini moliyalashtirish manbalari hisoblanadi.
“Samarqand meʼmor loyiha” DUK direktori Oʻzbekiston Respublikasi Davlat arxitektura va qurilish qoʻmitasi hamda Samarqand viloyati hokimligi bilan kelishgan holda Samarqand davlat arxitektura-qurilish instituti rektori tomonidan lavozimga tayinlanadi va lavozimdan ozod qilinadi.
8. Samarqand viloyati hokimligi Oʻzbekiston Respublikasi Davlat arxitektura va qurilish qoʻmitasi bilan birgalikda ikki oy muddatda:
“Samarqand meʼmor loyiha” DUKning moddiy-texnik bazasini mustahkamlash va uni qurilish obyektlarini loyihalashtirish sohasida yuqori malakali kadrlar va mutaxassislar bilan toʻldirish;
“Samarqand meʼmor loyiha” DUKga operativ boshqaruv huquqi asosida beriladigan Samarqand shahar, Lolazor koʻchasi, 70-uy manzilidagi oʻquv laboratoriyasi binosini kapital taʼmirlash bilan bogʻliq tashkiliy masalalarni hal etish va moliyalashtirish manbalarini aniqlash choralarini koʻrsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi Davlat arxitektura va qurilish qoʻmitasi raisi B.I. Zokirov va Samarqand viloyati hokimi T.I. Joʻrayev zimmasiga yuklansin.
Vazirlar Mahkamasining 2017-yil 27-noyabrdagi 945-son qaroriga ILOVA
“Samarqand meʼmor loyiha” davlat unitar korxonasining
Oʻzbekiston Respublikasining Bosh vaziri A. ARIPOV
Toshkent sh.,
2017-yil 27-noyabr,
945-son