📅 2017-yil 20-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2017 йил 20 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 20 декабря 2017 г. · Постановления Кабинета Министров
Официальный текст. Официальный документ. Редакционные примечания не включены.
📅 20 December 2017 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон амалий санъат ва ҳунармандчилик тарихи давлат музейини ташкил этиш тўғрисида
Мустақиллик йилларида тикланган Ўзбекистоннинг кўҳна ва бой миллий ҳунармандчилик тарихи, бугунги кунгача сақланиб қолган ўзига хос мактабларининг анъаналари ҳамда амалий санъат ва ҳунармандчилик асарларини асраш, халқаро миқёсда кенг тарғиб этиш, илмий ўрганиш ва келажак авлодга етказиш, шунингдек, бу борада етарли шарт-шароитлар яратиш мақсадида Вазирлар Маҳкамаси қарор қилади:
1. Ўзбекистон Республикаси Маданият вазирлиги, Тошкент шаҳри ҳокимлиги, Ўзбекистон Бадиий академияси, «Ҳунарманд» уюшмасининг:
Ўзбекистон амалий санъат музейи негизида Ўзбекистон амалий санъат ва ҳунармандчилик тарихи давлат музейини ташкил этиш;
2017 — 2019 йилларда Ўзбекистон амалий санъат ва ҳунармандчилик тарихи давлат музейи биносини реконструкция қилиш, янги кўргазма зали ва маъмурий бино қуриш, ободонлаштириш ва жиҳозлаш ишларини амалга ошириш тўғрисидаги таклифлари маъқуллансин.
2. Қуйидагилар Ўзбекистон амалий санъат ва ҳунармандчилик тарихи давлат музейи (кейинги ўринларда музей деб юритилади) фаолиятининг асосий йўналишлари этиб белгилансин:
амалий санъат ва миллий ҳунармандчиликнинг бугунги кунгача сақланиб қолган ўзига хос мактабларининг анъаналари ҳамда амалий санъат ва ҳунармандчилик асарларини асраш, халқаро миқёсда кенг тарғиб этиш, илмий ўрганиш ҳамда келажак авлодга етказиш;
халқимизнинг амалий санъат ва миллий ҳунармандчилик тарихи ҳамда бой маданий меросини, унинг инсоният тарихидаги ролини ҳаққоний ёритиш;
мамлакатимизнинг маданият, санъат ва бошқа соҳаларда эришилган ютуқларини кенг тарғиб қилишга қаратилган музей экспозицияларини ташкил этиш;
халқимизнинг маданий бойлиги ҳисобланган музей ашёлари ва музей коллекцияларини асраб-авайлаш, ўрганиш, бойитиб бориш, намойиш этиш, дунё жамоатчилигига танитиш ва тарғиб этиш;
ноёб экспонатларни намойиш этиш орқали фуқароларда, айниқса ёш авлодда миллий ва умуминсоний қадриятлар, бебаҳо тарихий ва маданий меросга ҳурмат, ғурур ва ифтихор, Ватанга садоқат ва муҳаббат туйғуларини тарбиялаш ва кучайтириш; музей ашёлари ва музей коллекцияларини илмий тадқиқ қилиш ишларини амалга ошириш ва уларнинг натижаларини эълон қилиб бориш.
музей ашёлари ва музей коллекцияларини илмий тадқиқ қилиш ишларини амалга ошириш ва уларнинг натижаларини эълон қилиб бориш.
3. Белгилаб қўйилсинки, музейни сақлаш билан боғлиқ харажатлар Ўзбекистон Республикасининг республика бюджети, пуллик хизматлардан тушадиган маблағлар ва қонунчиликда тақиқланмаган бошқа манбалар ҳисобидан молиялаштирилади.
4. Ўзбекистон Республикаси Маданият вазирлиги, Тошкент шаҳри ҳокимлигининг музей биносини реконструкция қилиш, янги кўргазма зали ва маъмурий бино қуриш, ободонлаштириш ва жиҳозлаш ишларини бажариш доирасида:
Ўзбекистон Республикаси Маданият вазирлиги ҳузуридаги «Объектларни қуриш, реконструкция қилиш, капитал ва жорий таъмирлаш бўйича буюртмачи хизмати» давлат муассасаси — буюртмачи этиб;
«Meros chashmasi» унитар корхонаси — истисно тариқасида бош лойиҳа ташкилоти этиб;
бош пудрат ташкилоти қонунчиликда белгиланган тартибда танлов савдолари асосида музей биносининг моддий маданий мерос объекти ҳисобланишини эътиборга олган ҳолда аниқланиши тўғрисидаги таклифига розилик берилсин.
5. Тошкент шаҳри ҳокимлиги Ўзбекистон Республикаси Маданият вазирлигининг таклифига биноан икки ой муддатда музейнинг янги кўргазма зали ва маъмурий биносини қуриш учун зарур ер участкасини ажратсин, шунингдек, ушбу ер участкасидаги жисмоний шахсларнинг бино ва иншоотларни бузиш ва тозалаш ишларини буюртмачи маблағлари ҳисобидан ҳамда жисмоний шахсларнинг бузишга тушган бино ва иншоотларига белгиланган тартибда компенсация тўловларини ҳомийлик хайриялари ҳисобига амалга оширсин.
6. Ўзбекистон Республикаси Маданият вазирлиги Давлат архитектура ва қурилиш қўмитаси билан биргаликда янги қуриладиган биноларни муҳандислик коммуникацияларига улаш бўйича архитектура-режалаштириш топшириғи (АРТ-1, АРТ-2)ни лойиҳалаштириш топшириқномаларини тайёрласин ҳамда лойиҳа-смета ҳужжатларини белгиланган тартибда давлат экспертизасидан ўтказсин.
7. «Асака» акциядорлик тижорат банки ва Акциядорлик тижорат «Алоқабанк»нинг музей биносини реконструкция қилиш, янги кўргазма зали ва маъмурий бино қуриш, ободонлаштириш ва жиҳозлаш ишлари бўйича лойиҳа-смета ҳужжатларини ишлаб чиқиш, экспертизадан ўтказиш ҳамда қурилиш-таъмирлаш ишларини бажариш учун 12 млрд. сўм миқдоридаги маблағларни тенг улушларда ҳомийлик асосида 2017-2018 йиллар давомида ажратиши тўғрисидаги таклифлари маъқуллансин.
8. Ўзбекистон Республикаси Иқтисодиёт вазирлиги ва Молия вазирлиги Маданият вазирлигининг асосланган ҳисоб-китобларига мувофиқ музей биносини реконструкция қилиш, янги кўргазма зали ва маъмурий бинони қуриш, ободонлаштириш ва жиҳозлаш ишларининг ишлаб чиқилган лойиҳа-смета ҳужжатларига асосан аниқланган маблағни мазкур қарорнинг 7-бандига асосан ҳамда экспертиза хулосасига биноан йўналтирилган ҳомийлик маблағларига етмаган қисмини Ўзбекистон Республикасининг 2019 йил Инвестиция дастурига киритилишини таъминласин.
9. Ўзбекистон Республикаси Давлат архитектура ва қурилиш қўмитаси бажарилаётган реконструкция ва қурилиш-монтаж ишлари устидан давлат архитектура-қурилиш назоратини амалга оширсин.
10. Ўзбекистон Республикаси Маданият вазирлиги:
Ўзбекистон Республикаси Туризмни ривожлантириш давлат қўмитаси билан биргаликда миллий меросимиз, қадимий тарихимиз ва маданиятимизни тарғиб қилиш мақсадида музейга хорижий сайёҳларни кенг жалб этиш чораларини кўрсин;
«Ҳунарманд» уюшмаси билан биргаликда музейда қуриладиган янги кўргазмалар зали учун Ўзбекистон Республикасининг мустақиллик йилларида миллий ҳунармандчиликнинг ривожи ва эришган ютуқларига бағишланган экспозиция яратсин;
Олий ва ўрта махсус таълим вазирлиги Халқ таълими вазирлиги, Ўрта махсус, касб-ҳунар таълими маркази, Республика Маънавият ва маърифат маркази билан биргаликда музейда мунтазам равишда турли мавзулардаги давра суҳбатлари, учрашувлар, маҳорат дарслари каби маънавий тадбирлар, шунингдек, мактаб дастурига оид очиқ дарслар ўтказилишини таъминласин ва уларга таълим муассасалари ўқувчи ва талабаларини белгиланган тартибда кенг жалб этиш чораларини кўрсин.
11. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — «Ўзбекистон темир йўллари» АЖ бошқаруви раиси А.Ж. Раматов ҳамда Ўзбекистон Республикаси маданият вазири Б.С. Сайфуллаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2017 йил 20 декабрь,
1003-сон
Oʻzbekiston Respublikasi Vazirlar Mahkamasining
qarori
Oʻzbekiston amaliy sanʼat va hunarmandchilik tarixi davlat muzeyini tashkil etish toʻgʻrisida
Mustaqillik yillarida tiklangan Oʻzbekistonning koʻhna va boy milliy hunarmandchilik tarixi, bugungi kungacha saqlanib qolgan oʻziga xos maktablarining anʼanalari hamda amaliy sanʼat va hunarmandchilik asarlarini asrash, xalqaro miqyosda keng targʻib etish, ilmiy oʻrganish va kelajak avlodga yetkazish, shuningdek, bu borada yetarli shart-sharoitlar yaratish maqsadida Vazirlar Mahkamasi qaror qiladi:
1. Oʻzbekiston Respublikasi Madaniyat vazirligi, Toshkent shahri hokimligi, Oʻzbekiston Badiiy akademiyasi, “Hunarmand” uyushmasining:
Oʻzbekiston amaliy sanʼat muzeyi negizida Oʻzbekiston amaliy sanʼat va hunarmandchilik tarixi davlat muzeyini tashkil etish;
2017 — 2019-yillarda Oʻzbekiston amaliy sanʼat va hunarmandchilik tarixi davlat muzeyi binosini rekonstruksiya qilish, yangi koʻrgazma zali va maʼmuriy bino qurish, obodonlashtirish va jihozlash ishlarini amalga oshirish toʻgʻrisidagi takliflari maʼqullansin.
2. Quyidagilar Oʻzbekiston amaliy sanʼat va hunarmandchilik tarixi davlat muzeyi (keyingi oʻrinlarda muzey deb yuritiladi) faoliyatining asosiy yoʻnalishlari etib belgilansin:
amaliy sanʼat va milliy hunarmandchilikning bugungi kungacha saqlanib qolgan oʻziga xos maktablarining anʼanalari hamda amaliy sanʼat va hunarmandchilik asarlarini asrash, xalqaro miqyosda keng targʻib etish, ilmiy oʻrganish hamda kelajak avlodga yetkazish;
xalqimizning amaliy sanʼat va milliy hunarmandchilik tarixi hamda boy madaniy merosini, uning insoniyat tarixidagi rolini haqqoniy yoritish;
mamlakatimizning madaniyat, sanʼat va boshqa sohalarda erishilgan yutuqlarini keng targʻib qilishga qaratilgan muzey ekspozitsiyalarini tashkil etish;
xalqimizning madaniy boyligi hisoblangan muzey ashyolari va muzey kolleksiyalarini asrab-avaylash, oʻrganish, boyitib borish, namoyish etish, dunyo jamoatchiligiga tanitish va targʻib etish;
noyob eksponatlarni namoyish etish orqali fuqarolarda, ayniqsa yosh avlodda milliy va umuminsoniy qadriyatlar, bebaho tarixiy va madaniy merosga hurmat, gʻurur va iftixor, Vatanga sadoqat va muhabbat tuygʻularini tarbiyalash va kuchaytirish; muzey ashyolari va muzey kolleksiyalarini ilmiy tadqiq qilish ishlarini amalga oshirish va ularning natijalarini eʼlon qilib borish.
muzey ashyolari va muzey kolleksiyalarini ilmiy tadqiq qilish ishlarini amalga oshirish va ularning natijalarini eʼlon qilib borish.
3. Belgilab qoʻyilsinki, muzeyni saqlash bilan bogʻliq xarajatlar Oʻzbekiston Respublikasining respublika budjeti, pullik xizmatlardan tushadigan mablagʻlar va qonunchilikda taqiqlanmagan boshqa manbalar hisobidan moliyalashtiriladi.
4. Oʻzbekiston Respublikasi Madaniyat vazirligi, Toshkent shahri hokimligining muzey binosini rekonstruksiya qilish, yangi koʻrgazma zali va maʼmuriy bino qurish, obodonlashtirish va jihozlash ishlarini bajarish doirasida:
Oʻzbekiston Respublikasi Madaniyat vazirligi huzuridagi “Obyektlarni qurish, rekonstruksiya qilish, kapital va joriy taʼmirlash boʻyicha buyurtmachi xizmati” davlat muassasasi — buyurtmachi etib;
“Meros chashmasi” unitar korxonasi — istisno tariqasida bosh loyiha tashkiloti etib;
bosh pudrat tashkiloti qonunchilikda belgilangan tartibda tanlov savdolari asosida muzey binosining moddiy madaniy meros obyekti hisoblanishini eʼtiborga olgan holda aniqlanishi toʻgʻrisidagi taklifiga rozilik berilsin.
5. Toshkent shahri hokimligi Oʻzbekiston Respublikasi Madaniyat vazirligining taklifiga binoan ikki oy muddatda muzeyning yangi koʻrgazma zali va maʼmuriy binosini qurish uchun zarur yer uchastkasini ajratsin, shuningdek, ushbu yer uchastkasidagi jismoniy shaxslarning bino va inshootlarni buzish va tozalash ishlarini buyurtmachi mablagʻlari hisobidan hamda jismoniy shaxslarning buzishga tushgan bino va inshootlariga belgilangan tartibda kompensatsiya toʻlovlarini homiylik xayriyalari hisobiga amalga oshirsin.
6. Oʻzbekiston Respublikasi Madaniyat vazirligi Davlat arxitektura va qurilish qoʻmitasi bilan birgalikda yangi quriladigan binolarni muhandislik kommunikatsiyalariga ulash boʻyicha arxitektura-rejalashtirish topshirigʻi (ART-1, ART-2)ni loyihalashtirish topshiriqnomalarini tayyorlasin hamda loyiha-smeta hujjatlarini belgilangan tartibda davlat ekspertizasidan oʻtkazsin.
7. “Asaka” aksiyadorlik tijorat banki va Aksiyadorlik tijorat “Aloqabank”ning muzey binosini rekonstruksiya qilish, yangi koʻrgazma zali va maʼmuriy bino qurish, obodonlashtirish va jihozlash ishlari boʻyicha loyiha-smeta hujjatlarini ishlab chiqish, ekspertizadan oʻtkazish hamda qurilish-taʼmirlash ishlarini bajarish uchun 12 mlrd. soʻm miqdoridagi mablagʻlarni teng ulushlarda homiylik asosida 2017-2018-yillar davomida ajratishi toʻgʻrisidagi takliflari maʼqullansin.
8. Oʻzbekiston Respublikasi Iqtisodiyot vazirligi va Moliya vazirligi Madaniyat vazirligining asoslangan hisob-kitoblariga muvofiq muzey binosini rekonstruksiya qilish, yangi koʻrgazma zali va maʼmuriy binoni qurish, obodonlashtirish va jihozlash ishlarining ishlab chiqilgan loyiha-smeta hujjatlariga asosan aniqlangan mablagʻni mazkur qarorning 7-bandiga asosan hamda ekspertiza xulosasiga binoan yoʻnaltirilgan homiylik mablagʻlariga yetmagan qismini Oʻzbekiston Respublikasining 2019-yil Investitsiya dasturiga kiritilishini taʼminlasin.
9. Oʻzbekiston Respublikasi Davlat arxitektura va qurilish qoʻmitasi bajarilayotgan rekonstruksiya va qurilish-montaj ishlari ustidan davlat arxitektura-qurilish nazoratini amalga oshirsin.
10. Oʻzbekiston Respublikasi Madaniyat vazirligi:
Oʻzbekiston Respublikasi Turizmni rivojlantirish davlat qoʻmitasi bilan birgalikda milliy merosimiz, qadimiy tariximiz va madaniyatimizni targʻib qilish maqsadida muzeyga xorijiy sayyohlarni keng jalb etish choralarini koʻrsin;
“Hunarmand” uyushmasi bilan birgalikda muzeyda quriladigan yangi koʻrgazmalar zali uchun Oʻzbekiston Respublikasining mustaqillik yillarida milliy hunarmandchilikning rivoji va erishgan yutuqlariga bagʻishlangan ekspozitsiya yaratsin;
Oliy va oʻrta maxsus taʼlim vazirligi Xalq taʼlimi vazirligi, Oʻrta maxsus, kasb-hunar taʼlimi markazi, Respublika Maʼnaviyat va maʼrifat markazi bilan birgalikda muzeyda muntazam ravishda turli mavzulardagi davra suhbatlari, uchrashuvlar, mahorat darslari kabi maʼnaviy tadbirlar, shuningdek, maktab dasturiga oid ochiq darslar oʻtkazilishini taʼminlasin va ularga taʼlim muassasalari oʻquvchi va talabalarini belgilangan tartibda keng jalb etish choralarini koʻrsin.
11. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov hamda Oʻzbekiston Respublikasi madaniyat vaziri B.S. Sayfullayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2017-yil 20-dekabr,
1003-son