📅 2018-yil 5-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 5 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 5 января 2018 г. · Постановления Кабинета Министров
Официальный текст. Официальный документ. Редакционные примечания не включены.
📅 5 January 2018 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тошкент шаҳридаги бассейнлар фаолиятини янада такомиллаштириш чора-тадбирлари тўғрисида
Болалар ва ёшларнинг мактабдан ташқари спорт таълими тизимини янада такомиллаштириш, аҳолини соғломлаштириш, уларни спорт билан шуғулланишга кенг жалб этиш, сув спорти турлари бўйича спорт захираси ва юксак маҳоратли спортчиларни тайёрлаш, бассейнлардан самарали фойдаланишда давлат-хусусий шерикчиликни ривожлантириш, сув спорти турлари бўйича болалар тренерларини тайёрлаш ва селекция ишларини йўлга қўйиш мақсадида Вазирлар Маҳкамаси қарор қилади:
1. Ўзбекистон Республикаси Жисмоний тарбия ва спорт вазирлиги тизимидаги Тошкент шаҳрида жойлашган бассейнларда соғломлаштириш гуруҳларида шуғулланиш учун олинадиган тўлов миқдорлари иловага мувофиқ тасдиқлансин ва 2018 йилнинг 1 февралидан бошлаб амалга киритилсин.
2. Ўзбекистон Республикаси Жисмоний тарбия ва спорт давлат қўмитаси 2018 йил 1 февралга қадар:
Ўзбекистон Республикаси Жисмоний тарбия ва спорт давлат қўмитаси тизимидаги бассейнларда (кейинги ўринларда бассейнлар деб аталади) шуғулланиш ва ундан фойдаланиш тартиби тўғрисидаги низомни ҳамда ёшлар кесимида сув спорти турлари билан шуғулланиш бўйича ўқув режалар, дастурлар ва меъёрларни ишлаб чиқиб белгиланган тартибда тасдиқласин;
Ўзбекистон давлат жисмоний тарбия институти ҳузуридаги Жисмоний тарбия ва спорт бўйича мутахассисларни илмий-методик таъминлаш, қайта тайёрлаш ва уларнинг малакасини ошириш марказида 3 ва 6 ойлик қисқа муддатли болаларни сув спорти турларига ўргатадиган тренерларнинг малакасини ошириш ва қайта тайёрлаш ўқув курсларини ташкил этсин;
бассейнларга кириш ва ўтиш жойларида видеокузатув мосламалари ҳамда турникетлар ўрнатилишини таъминласин;
бассейнларнинг манзили, иш вақти, кўрсатиладиган хизмат турлари ва нархлари аниқ кўрсатилган ҳолда Интернет жаҳон ахборот тармоғида доимий равишда кенг ёритилишини йўлга қўйсин.
3. Белгилаб қўйилсинки, бассейнларга кириш ва ўтиш жойларида видеокузатув мосламалари ва турникетларни ўрнатиш харажатлари Ўзбекистон Республикаси Жисмоний тарбия ва спорт вазирлигининг бюджетдан ташқари «Спорт» махсус ҳисоб рақами маблағлари ҳисобидан қопланади.
4. Ўзбекистон Республикаси Спорт вазирлиги Соғлиқни сақлаш вазирлиги билан биргаликда бассейнларда санитария қоидалари, нормалари ва гигиена нормативларининг бажарилиши бўйича доимий равишда тушунтириш ишларини олиб борсин.
5. Тошкент шаҳар ҳокимлиги Ўзбекистон Республикаси Жисмоний тарбия ва спорт давлат қўмитаси, Халқ таълими вазирлиги ҳамда Олий ва ўрта махсус таълим вазирлиги билан биргаликда бир ой муддатда:
Тошкент шаҳрида жойлашган давлат таълим муассасаларининг бассейнларини хатловдан ўтказсин;
хатлов якунлари бўйича давлат ва хусусий шериклик асосида фойдаланишга бериладиган Тошкент шаҳрида жойлашган давлат таълим муассасаларининг бассейнлари рўйхатини тузсин ҳамда мазкур рўйхатни ҳамда давлат ва хусусий шериклик асосида фойдаланишга бериш шартлари тўғрисидаги маълумотларни Интернет жаҳон ахборот тармоғида жойлаштирсин;
давлат ва хусусий шериклик асосида фойдаланишга бериладиган бассейнларни келиб тушган таклифларга кўра, ижарага бериш тизимини жорий этсин.
6. Ўзбекистон Республикаси Давлат архитектура ва қурилиш қўмитаси келгусида қуриладиган бассейнлардаги вентиляция тизимларининг табиий ва сунъий йўлларидан фойдаланишни ташкил этиш ҳисобига энергия жиҳатидан тежамкорлик тизимини татбиқ қилган ҳолда лойиҳа-смета ҳужжатларига тегишли ўзгартиришлар киритсин.
7. Ўзбекистон Республикаси Жисмоний тарбия ва спорт давлат қўмитаси Тошкент шаҳар ҳокимлиги билан биргаликда уч ой муддатда Тошкент шаҳрининг ҳар бир туманида 2018 — 2025 йилларда 10 тадан энергиятежамкор бассейнлар қуриш ҳамда мавжудларини реконструкция қилиш бўйича дастур лойиҳасини ишлаб чиқиб, Вазирлар Маҳкамасига киритсин.
8. Ўзбекистон Республикаси Жисмоний тарбия ва спорт давлат қўмитаси манфаатдор вазирликлар ва идоралар билан биргаликда бир ой муддатда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.
9. Мазкур қарор бажарилишини назорат қилиш Ўзбекистон Республикаси Бош вазири ўринбосари Қ.В. Акмалов ва Ўзбекистон Республикаси Жисмоний тарбия ва спорт давлат қўмитаси раиси Р.Д. Қурбонов зиммасига юклансин.
Вазирлар Маҳкамасининг 2018 йил 5 январь 8-сон қарорига ИЛОВА
Ўзбекистон Республикаси Спорт вазирлиги тизимидаги Тошкент шаҳрида жойлашган бассейнларда соғломлаштириш гуруҳларида шуғулланиш учун олинадиган тўлов миқдорлари
Ёшлар кесимида Базавий ҳисоблаш миқдорига нисбатан фоиз ҳисобида (бир ойга) 4 — 7 ёш 30 8 — 12 ёш 40 13 — 17 ёш 50 18 ва ундан катта ёшдагилар 70
Ўзбекистон Республикасининг Бош вазири А. АРИПОВ
Тошкент ш.,
2018 йил 5 январь,
8-сон
Oʻzbekiston Respublikasi Vazirlar Mahkamasining
qarori
Toshkent shahridagi basseynlar faoliyatini yanada takomillashtirish chora-tadbirlari toʻgʻrisida
Bolalar va yoshlarning maktabdan tashqari sport taʼlimi tizimini yanada takomillashtirish, aholini sogʻlomlashtirish, ularni sport bilan shugʻullanishga keng jalb etish, suv sporti turlari boʻyicha sport zaxirasi va yuksak mahoratli sportchilarni tayyorlash, basseynlardan samarali foydalanishda davlat-xususiy sherikchilikni rivojlantirish, suv sporti turlari boʻyicha bolalar trenerlarini tayyorlash va seleksiya ishlarini yoʻlga qoʻyish maqsadida Vazirlar Mahkamasi qaror qiladi:
1. Oʻzbekiston Respublikasi Jismoniy tarbiya va sport vazirligi tizimidagi Toshkent shahrida joylashgan basseynlarda sogʻlomlashtirish guruhlarida shugʻullanish uchun olinadigan toʻlov miqdorlari ilovaga muvofiq tasdiqlansin va 2018-yilning 1-fevralidan boshlab amalga kiritilsin.
2. Oʻzbekiston Respublikasi Jismoniy tarbiya va sport davlat qoʻmitasi 2018-yil 1-fevralga qadar:
Oʻzbekiston Respublikasi Jismoniy tarbiya va sport davlat qoʻmitasi tizimidagi basseynlarda (keyingi oʻrinlarda basseynlar deb ataladi) shugʻullanish va undan foydalanish tartibi toʻgʻrisidagi nizomni hamda yoshlar kesimida suv sporti turlari bilan shugʻullanish boʻyicha oʻquv rejalar, dasturlar va meʼyorlarni ishlab chiqib belgilangan tartibda tasdiqlasin;
Oʻzbekiston davlat jismoniy tarbiya instituti huzuridagi Jismoniy tarbiya va sport boʻyicha mutaxassislarni ilmiy-metodik taʼminlash, qayta tayyorlash va ularning malakasini oshirish markazida 3 va 6 oylik qisqa muddatli bolalarni suv sporti turlariga oʻrgatadigan trenerlarning malakasini oshirish va qayta tayyorlash oʻquv kurslarini tashkil etsin;
basseynlarga kirish va oʻtish joylarida videokuzatuv moslamalari hamda turniketlar oʻrnatilishini taʼminlasin;
basseynlarning manzili, ish vaqti, koʻrsatiladigan xizmat turlari va narxlari aniq koʻrsatilgan holda Internet jahon axborot tarmogʻida doimiy ravishda keng yoritilishini yoʻlga qoʻysin.
3. Belgilab qoʻyilsinki, basseynlarga kirish va oʻtish joylarida videokuzatuv moslamalari va turniketlarni oʻrnatish xarajatlari Oʻzbekiston Respublikasi Jismoniy tarbiya va sport vazirligining budjetdan tashqari “Sport” maxsus hisob raqami mablagʻlari hisobidan qoplanadi.
4. Oʻzbekiston Respublikasi Sport vazirligi Sogʻliqni saqlash vazirligi bilan birgalikda basseynlarda sanitariya qoidalari, normalari va gigiyena normativlarining bajarilishi boʻyicha doimiy ravishda tushuntirish ishlarini olib borsin.
5. Toshkent shahar hokimligi Oʻzbekiston Respublikasi Jismoniy tarbiya va sport davlat qoʻmitasi, Xalq taʼlimi vazirligi hamda Oliy va oʻrta maxsus taʼlim vazirligi bilan birgalikda bir oy muddatda:
Toshkent shahrida joylashgan davlat taʼlim muassasalarining basseynlarini xatlovdan oʻtkazsin;
xatlov yakunlari boʻyicha davlat va xususiy sheriklik asosida foydalanishga beriladigan Toshkent shahrida joylashgan davlat taʼlim muassasalarining basseynlari roʻyxatini tuzsin hamda mazkur roʻyxatni hamda davlat va xususiy sheriklik asosida foydalanishga berish shartlari toʻgʻrisidagi maʼlumotlarni Internet jahon axborot tarmogʻida joylashtirsin;
davlat va xususiy sheriklik asosida foydalanishga beriladigan basseynlarni kelib tushgan takliflarga koʻra, ijaraga berish tizimini joriy etsin.
6. Oʻzbekiston Respublikasi Davlat arxitektura va qurilish qoʻmitasi kelgusida quriladigan basseynlardagi ventilyatsiya tizimlarining tabiiy va sunʼiy yoʻllaridan foydalanishni tashkil etish hisobiga energiya jihatidan tejamkorlik tizimini tatbiq qilgan holda loyiha-smeta hujjatlariga tegishli oʻzgartirishlar kiritsin.
7. Oʻzbekiston Respublikasi Jismoniy tarbiya va sport davlat qoʻmitasi Toshkent shahar hokimligi bilan birgalikda uch oy muddatda Toshkent shahrining har bir tumanida 2018 — 2025-yillarda 10 tadan energiyatejamkor basseynlar qurish hamda mavjudlarini rekonstruksiya qilish boʻyicha dastur loyihasini ishlab chiqib, Vazirlar Mahkamasiga kiritsin.
8. Oʻzbekiston Respublikasi Jismoniy tarbiya va sport davlat qoʻmitasi manfaatdor vazirliklar va idoralar bilan birgalikda bir oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
9. Mazkur qaror bajarilishini nazorat qilish Oʻzbekiston Respublikasi Bosh vaziri oʻrinbosari Q.V. Akmalov va Oʻzbekiston Respublikasi Jismoniy tarbiya va sport davlat qoʻmitasi raisi R.D. Qurbonov zimmasiga yuklansin.
Vazirlar Mahkamasining 2018-yil 5-yanvar 8-son qaroriga ILOVA
Oʻzbekiston Respublikasi Sport vazirligi tizimidagi Toshkent shahrida joylashgan basseynlarda sogʻlomlashtirish guruhlarida shugʻullanish uchun olinadigan toʻlov miqdorlari
Yoshlar kesimida Bazaviy hisoblash miqdoriga nisbatan foiz hisobida (bir oyga) 4 — 7 yosh 30 8 — 12 yosh 40 13 — 17 yosh 50 18 va undan katta yoshdagilar 70
Oʻzbekiston Respublikasining Bosh vaziri A. ARIPOV
Toshkent sh.,
2018-yil 5-yanvar,
8-son