UzbekAI

Ўзбекистон Республикаси Вазирлар Маҳкамасининг

қарори

Архитектура ва қурилиш соҳасидаги олий таълим муассасаларида сиртқи (махсус сиртқи) таълимни ташкил этиш чора-тадбирлари тўғрисида

Архитектура ва қурилиш соҳасини етук ва малакали мутахассислар билан таъминлаш, ушбу соҳанинг, айниқса жойларда олий маълумотли кадрларга бўлган эҳтиёжини қондириш ва уларни тайёрлаш тизимини сифатли ташкил этишни янада такомиллаштириш мақсадида Вазирлар Маҳкамаси қарор қилади:

1. Ўзбекистон Республикаси Давлат архитектура ва қурилиш қўмитаси, Олий ва ўрта махсус таълим вазирлиги ҳамда Иқтисодиёт вазирлигининг 2018/2019 ўқув йилидан бошлаб Тошкент архитектура-қурилиш институти, Самарқанд давлат архитектура-қурилиш институти ва Наманган муҳандислик- қурилиш институтида (кейинги ўринларда архитектура ва қурилиш соҳасидаги олий таълим муассасалари деб аталади) сиртқи (махсус сиртқи) таълимни ташкил этиш тўғрисидаги таклифи маъқуллансин.

2. Ўзбекистон Республикаси Иқтисодиёт вазирлиги, Давлат архитектура ва қурилиш қўмитаси, Олий ва ўрта махсус таълим вазирлиги, Молия вазирлиги архитектура ва қурилиш соҳасидаги олий таълим муассасаларида 2018/2019 ўқув йилидан бошлаб сиртқи (махсус сиртқи) таълим учун қабул квоталарини белгиланган тартибда шакллантирсин.

3. Белгилаб қўйилсинки:

архитектура ва қурилиш соҳасидаги олий таълим муассасаларида сиртқи (махсус сиртқи) таълим жараёнини ташкил этиш Вазирлар Маҳкамасининг 2017 йил 21 ноябрдаги 930-сон қарори билан тасдиқланган Олий таълим муассасасида сиртқи (махсус сиртқи) таълимни ташкил этиш тартиби тўғрисидаги низом асосида амалга оширилади;

махсус сиртқи таълим шаклига архитектура ва қурилиш соҳасидаги ёки турдош таълим йўналиши бўйича ўрта махсус, касб-ҳунар маълумотига ва таълим йўналишига мувофиқ соҳа, касб, лавозимларда камида уч йиллик амалий иш стажига эга бўлган, Ўзбекистон Республикаси Давлат архитектура ва қурилиш қўмитаси томонидан тавсиянома берилган ҳамда тест синовлари ва (ёки) касбий (ижодий) имтиҳондан муваффақиятли ўтган абитуриентлар ҳисобидан амалга оширилади;

сиртқи (махсус сиртқи) таълимда ўқиш тўлов-контракт асосида ташкил этилади;

сиртқи (махсус сиртқи) таълимда тегишли таълим йўналишлари бўйича малака талаблари, ўқув режалари, фан дастурлари ҳамда ўқув ва ўқув-методик адабиётларни ишлаб чиқиш бўйича Тошкент архитектура-қурилиш институти таянч олий таълим муассасаси ҳисобланади.

4. Ўзбекистон Республикаси Давлат архитектура ва қурилиш қўмитаси ҳамда Олий ва ўрта махсус таълим вазирлиги:

а) Давлат тест маркази билан биргаликда 2018/2019 ўқув йилидан бошлаб архитектура ва қурилиш соҳасидаги олий таълим муассасаларининг сиртқи (махсус сиртқи) таълимига талабаларни қабул қилиш жараёнлари юқори савияда ва адолатли ташкил этилишини таъминласин;

б) 2018 йил 1 июнгача:

сиртқи (махсус сиртқи) таълим йўналишларининг малака талаблари, ўқув режаси ва фан дастурларини тасдиқлаш, шунингдек, уларга мувофиқ фанлар бўйича ўқув адабиётлари билан таъминлаш;

сиртқи (махсус сиртқи) таълимда дарс беришга юқори салоҳиятга эга бўлган етакчи мутахассислар ва профессор-ўқитувчиларни, шу жумладан, хорижий таълим муассасалари ва илмий муассасалар билан ҳамкорлик доирасида чет эллик мутахассисларни жалб этиш чораларини кўрсин.

5. Ўзбекистон Республикаси Давлат архитектура ва қурилиш қўмитаси манфаатдор вазирликлар ва идоралар билан биргаликда бир ой муддатда улар томонидан қабул қилинган норматив-ҳуқуқий ҳужжатларни ушбу қарорга мувофиқлаштирсин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — «Ўзбекистон темир йўллари» АЖ бошқаруви раиси А.Ж. Раматов, Ўзбекистон Республикаси Бош вазирининг ўринбосари Қ.В. Акмалов ҳамда Давлат архитектура ва қурилиш қўмитаси раиси Б.И. Зокиров зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2018 йил 27 январь,

64-сон

(Қонун ҳужжатлари маълумотлари миллий базаси, 01.02.2018 й., 09/18/64/0638-сон)

Oʻzbekiston Respublikasi Vazirlar Mahkamasining

qarori

Arxitektura va qurilish sohasidagi oliy taʼlim muassasalarida sirtqi (maxsus sirtqi) taʼlimni tashkil etish chora-tadbirlari toʻgʻrisida

Arxitektura va qurilish sohasini yetuk va malakali mutaxassislar bilan taʼminlash, ushbu sohaning, ayniqsa joylarda oliy maʼlumotli kadrlarga boʻlgan ehtiyojini qondirish va ularni tayyorlash tizimini sifatli tashkil etishni yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Davlat arxitektura va qurilish qoʻmitasi, Oliy va oʻrta maxsus taʼlim vazirligi hamda Iqtisodiyot vazirligining 2018/2019 oʻquv yilidan boshlab Toshkent arxitektura-qurilish instituti, Samarqand davlat arxitektura-qurilish instituti va Namangan muhandislik- qurilish institutida (keyingi oʻrinlarda arxitektura va qurilish sohasidagi oliy taʼlim muassasalari deb ataladi) sirtqi (maxsus sirtqi) taʼlimni tashkil etish toʻgʻrisidagi taklifi maʼqullansin.

2. Oʻzbekiston Respublikasi Iqtisodiyot vazirligi, Davlat arxitektura va qurilish qoʻmitasi, Oliy va oʻrta maxsus taʼlim vazirligi, Moliya vazirligi arxitektura va qurilish sohasidagi oliy taʼlim muassasalarida 2018/2019 oʻquv yilidan boshlab sirtqi (maxsus sirtqi) taʼlim uchun qabul kvotalarini belgilangan tartibda shakllantirsin.

3. Belgilab qoʻyilsinki:

arxitektura va qurilish sohasidagi oliy taʼlim muassasalarida sirtqi (maxsus sirtqi) taʼlim jarayonini tashkil etish Vazirlar Mahkamasining 2017-yil 21-noyabrdagi 930-son qarori bilan tasdiqlangan Oliy taʼlim muassasasida sirtqi (maxsus sirtqi) taʼlimni tashkil etish tartibi toʻgʻrisidagi nizom asosida amalga oshiriladi;

maxsus sirtqi taʼlim shakliga arxitektura va qurilish sohasidagi yoki turdosh taʼlim yoʻnalishi boʻyicha oʻrta maxsus, kasb-hunar maʼlumotiga va taʼlim yoʻnalishiga muvofiq soha, kasb, lavozimlarda kamida uch yillik amaliy ish stajiga ega boʻlgan, Oʻzbekiston Respublikasi Davlat arxitektura va qurilish qoʻmitasi tomonidan tavsiyanoma berilgan hamda test sinovlari va (yoki) kasbiy (ijodiy) imtihondan muvaffaqiyatli oʻtgan abituriyentlar hisobidan amalga oshiriladi;

sirtqi (maxsus sirtqi) taʼlimda oʻqish toʻlov-kontrakt asosida tashkil etiladi;

sirtqi (maxsus sirtqi) taʼlimda tegishli taʼlim yoʻnalishlari boʻyicha malaka talablari, oʻquv rejalari, fan dasturlari hamda oʻquv va oʻquv-metodik adabiyotlarni ishlab chiqish boʻyicha Toshkent arxitektura-qurilish instituti tayanch oliy taʼlim muassasasi hisoblanadi.

4. Oʻzbekiston Respublikasi Davlat arxitektura va qurilish qoʻmitasi hamda Oliy va oʻrta maxsus taʼlim vazirligi:

a) Davlat test markazi bilan birgalikda 2018/2019 oʻquv yilidan boshlab arxitektura va qurilish sohasidagi oliy taʼlim muassasalarining sirtqi (maxsus sirtqi) taʼlimiga talabalarni qabul qilish jarayonlari yuqori saviyada va adolatli tashkil etilishini taʼminlasin;

b) 2018-yil 1-iyungacha:

sirtqi (maxsus sirtqi) taʼlim yoʻnalishlarining malaka talablari, oʻquv rejasi va fan dasturlarini tasdiqlash, shuningdek, ularga muvofiq fanlar boʻyicha oʻquv adabiyotlari bilan taʼminlash;

sirtqi (maxsus sirtqi) taʼlimda dars berishga yuqori salohiyatga ega boʻlgan yetakchi mutaxassislar va professor-oʻqituvchilarni, shu jumladan, xorijiy taʼlim muassasalari va ilmiy muassasalar bilan hamkorlik doirasida chet ellik mutaxassislarni jalb etish choralarini koʻrsin.

5. Oʻzbekiston Respublikasi Davlat arxitektura va qurilish qoʻmitasi manfaatdor vazirliklar va idoralar bilan birgalikda bir oy muddatda ular tomonidan qabul qilingan normativ-huquqiy hujjatlarni ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi Bosh vazirining oʻrinbosari Q.V. Akmalov hamda Davlat arxitektura va qurilish qoʻmitasi raisi B.I. Zokirov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 27-yanvar,

64-son

(Qonun hujjatlari maʼlumotlari milliy bazasi, 01.02.2018-y., 09/18/64/0638-son)