📅 2018-yil 2-mart · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 2 март · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 2 марта 2018 г. · Постановления Кабинета Министров
Официальный текст. Официальный документ. Редакционные примечания не включены.
📅 2 March 2018 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Олимпия ва миллий спорт турлари бўйича Нукус олий спорт маҳорати мактабини ташкил этиш тўғрисида
Ўзбекистон Республикаси Президентининг «2020 йил Токио шаҳрида (Япония) бўлиб ўтадиган XXXII ёзги Олимпия ва XVI Паралимпия ўйинларига Ўзбекистон спортчиларини муносиб тайёрлаш тўғрисида» 2017 йил 9 мартдаги ПҚ-2821-сон қарори ижросини таъминлаш ҳамда олимпия ва миллий спорт турлари бўйича республика терма жамоаларини тайёрлашни зарур даражада босқичма-босқич ташкил этиш, иқтидорли ёшларни спорт билан мунтазам шуғулланишга фаол жалб этиш, улардан мамлакат спорт терма жамоаларининг ишончли захирасини шакллантириш мақсадида Вазирлар Маҳкамаси қарор қилади:
1. Қорақалпоғистон Республикаси Вазирлар Кенгаши, Ўзбекистон Республикаси Жисмоний тарбия ва спорт давлат қўмитасининг Қорақалпоғистон Республикаси Нукус шаҳридаги М. Жуманазаров кўчасида жойлашган ва фойдаланишга топширилган янги спорт мажмуаси негизида Олимпия ва миллий спорт турлари бўйича Нукус олий спорт маҳорати мактабини (кейинги ўринларда олий спорт маҳорати мактаби деб аталади) ташкил этиш тўғрисидаги таклифига розилик берилсин.
2. Белгилаб қўйилсинки, олий спорт маҳорати мактаби ўз фаолиятини Вазирлар Маҳкамасининг 2010 йил 23 сентябрдаги 211-сон қарори билан тасдиқланган Ўзбекистон Республикасидаги Давлат бюджетидан молиялаштириладиган спорт мактаблари тўғрисидаги низомга мувофиқ амалга оширувчи мактабдан ташқари спорт-таълим муассасаси ҳисобланади.
3. Қуйидагилар олий спорт маҳорати мактабининг асосий вазифалари этиб белгилансин:
спортнинг олимпия ва миллий спорт турлари билан шуғулланиш учун зарур спорт кўрсаткичлари, спорт салоҳияти, спортнинг танланган тури бўйича профессионал кўникмалар ва маҳоратга эга бўлган иқтидорли ва истиқболли спортчиларни танлаб олиш;
олимпия ва миллий спорт турлари бўйича янги илмий-методик тавсиялар ва ютуқлар асосида спорт захираларини, терма жамоаларга юқори маҳоратли спортчилар ва малакали тренерларни тайёрлаш учун ўқув-машғулот йиғинларини ўтказиш, бунда спортчилар ва тренерларини ётоқхона билан таъминлаш ва овқатланишини ташкил этиш;
спорт терма жамоаларининг асосий ва захира таркибларини тўлдиришга қодир бўлган юқори малакали спортчиларни тайёрлаш, спортнинг олимпия ва миллий турларини ривожлантириш ҳамда замонавий билимларга эга тренерлар таркибини тайёрлаш ва уларнинг малакасини ошириш;
назарий тайёргарлик ва техник-тактик кўникмаларни такомиллаштириш, спортчиларнинг профессионал сифатларини ривожлантириш, шунингдек, олимпия ва миллий спорт турларини ривожлантиришнинг халқаро талабларига мувофиқ терма жамоаларни тайёрлаш даражасини ошириш;
спортнинг олимпия ва миллий турлари бўйича етакчи хорижий давлатлар, спорт ташкилотлари ва клублар билан ҳамкорликни ривожлантириш, шу жумладан спортчилар ва тренерлар таркибининг касб маҳоратини ошириш юзасидан Хитой давлати тажрибасидан фойдаланиш, юқори даражага эга бўлган хорижий ва мамлакатимизнинг малакали амалиётчи мутахассислари ва тренерларини шартнома асосида жалб этган ҳолда, Қорақалпоғистон Республикасидаги спорт-таълим муассасаларининг тренер-ўқитувчиларининг малакасини ошириш;
тренер-ўқитувчилар малакасини ошириш, шу жумладан болалар тренерларини тайёрлаш, иқтидорли ёш спортчиларни аниқлаш, халқаро спорт майдонларида муносиб қатнашадиган профессионал спортчиларни тайёрлаш учун уларнинг кўникма ва билимини ривожлантиришга йўналтирилган замонавий ўқитиш дастурлари ва методларини жорий этиш.
4. Қорақалпоғистон Республикаси Вазирлар Кенгаши, Ўзбекистон Республикаси Жисмоний тарбия ва спорт давлат қўмитаси бир ой муддатда:
олий спорт маҳорати мактабининг тузилмаси ва уставини белгиланган тартибда тасдиқласин, шунингдек, унинг устави белгиланган тартибда давлат рўйхатидан ўтказилишини таъминласин;
олий спорт маҳорати мактабини юқори малакали мутахассислар ва тренер-ўқитувчилар билан таъминласин;
спорт турлари бўйича ўқув-машқ жараёнини етарли даражада ташкил этиш учун зарур спорт жиҳозлари ва ўқув-методик адабиётлар билан таъминлаш ҳамда спорт заллари ва ўқув хоналарини жиҳозлаш чора-тадбирларини амалга оширсин.
5. Ўзбекистон Республикаси Жисмоний тарбия ва спорт давлат қўмитаси, Молия вазирлиги, Қорақалпоғистон Республикаси Вазирлар Кенгаши билан биргаликда 2018 йил 1 майгача олий спорт маҳорати мактаби учун қуриладиган тренерлар малакасини ошириш ўқув хоналари ва 100 ўринли меҳмонхона биносининг зарур лойиҳа-смета ҳужжатларини ишлаб чиқсин ҳамда уларни белгиланган тартибда тасдиқласин.
Белгилансинки, олий спорт маҳорати мактаби учун тренерлар малакасини ошириш ўқув хоналари ва 100 ўринли меҳмонхона биносини 2018 йил охиригача қуриш ва жиҳозлаш учун зарур маблағлар Жисмоний тарбия ва спортни ривожлантириш жамғармаси ҳисобидан ажратилади.
6. Ўзбекистон Республикаси Давлат архитектура ва қурилиш қўмитаси олий спорт маҳорати мактаби учун тренерлар малакасини ошириш ўқув хоналари ва 100 ўринли меҳмонхона биносини қуриш ва жиҳозлаш бўйича лойиҳа-смета ҳужжатлари давлат экспертизасидан белгиланган тартибда ўтказилишини таъминласин ҳамда қурилиш-монтаж ишларининг сифатли бажарилиши бўйича назорат ўрнатсин.
7. Белгилансинки, олий спорт маҳорати мактаби фаолиятини молиялаштириш:
Ўзбекистон Республикаси Давлат бюджети маблағлари;
олий спорт маҳорати мактаби фаолияти ихтисослиги бўйича пулли хизматлар кўрсатишдан тушадиган маблағлар;
жисмоний ва юридик шахсларнинг ҳомийлик хайриялари;
қонунчиликда тақиқланмаган бошқа манбалар ҳисобидан молиялаштирилади.
8. Ўзбекистон Республикаси Молия вазирлиги:
2018 йил учун Қорақалпоғистон Республикаси бюджети харажатлар параметрларига тегишли ўзгартиришлар киритсин, шунингдек, 2019 йилдан бошлаб Ўзбекистон Республикаси Давлат бюджетини шакллантиришда республика олий спорт мактаби таъминоти учун «Таълим» соҳасига ажратиладиган маблағлар доирасида зарур бюджет маблағларини назарда тутсин;
олий спорт маҳорати мактабига 1 та махсус автотранспорт воситасини сақлаш учун лимит ажратсин.
9. Ўзбекистон Республикаси Жисмоний тарбия ва спорт давлат қўмитаси манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
10. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Қ.В. Акмалов, Ўзбекистон Республикаси Жисмоний тарбия ва спорт давлат қўмитаси раисининг ўринбосари Ф.К. Турдиев ва Қорақалпоғистон Республикаси Вазирлар Кенгаши Раиси Қ.Р. Сариев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2018 йил 2 март,
157-сон
Oʻzbekiston Respublikasi Vazirlar Mahkamasining
qarori
Olimpiya va milliy sport turlari boʻyicha Nukus oliy sport mahorati maktabini tashkil etish toʻgʻrisida
Oʻzbekiston Respublikasi Prezidentining “2020-yil Tokio shahrida (Yaponiya) boʻlib oʻtadigan XXXII yozgi Olimpiya va XVI Paralimpiya oʻyinlariga Oʻzbekiston sportchilarini munosib tayyorlash toʻgʻrisida” 2017-yil 9-martdagi PQ-2821-son qarori ijrosini taʼminlash hamda olimpiya va milliy sport turlari boʻyicha respublika terma jamoalarini tayyorlashni zarur darajada bosqichma-bosqich tashkil etish, iqtidorli yoshlarni sport bilan muntazam shugʻullanishga faol jalb etish, ulardan mamlakat sport terma jamoalarining ishonchli zaxirasini shakllantirish maqsadida Vazirlar Mahkamasi qaror qiladi:
1. Qoraqalpogʻiston Respublikasi Vazirlar Kengashi, Oʻzbekiston Respublikasi Jismoniy tarbiya va sport davlat qoʻmitasining Qoraqalpogʻiston Respublikasi Nukus shahridagi M. Jumanazarov koʻchasida joylashgan va foydalanishga topshirilgan yangi sport majmuasi negizida Olimpiya va milliy sport turlari boʻyicha Nukus oliy sport mahorati maktabini (keyingi oʻrinlarda oliy sport mahorati maktabi deb ataladi) tashkil etish toʻgʻrisidagi taklifiga rozilik berilsin.
2. Belgilab qoʻyilsinki, oliy sport mahorati maktabi oʻz faoliyatini Vazirlar Mahkamasining 2010-yil 23-sentabrdagi 211-son qarori bilan tasdiqlangan Oʻzbekiston Respublikasidagi Davlat budjetidan moliyalashtiriladigan sport maktablari toʻgʻrisidagi nizomga muvofiq amalga oshiruvchi maktabdan tashqari sport-taʼlim muassasasi hisoblanadi.
3. Quyidagilar oliy sport mahorati maktabining asosiy vazifalari etib belgilansin:
sportning olimpiya va milliy sport turlari bilan shugʻullanish uchun zarur sport koʻrsatkichlari, sport salohiyati, sportning tanlangan turi boʻyicha professional koʻnikmalar va mahoratga ega boʻlgan iqtidorli va istiqbolli sportchilarni tanlab olish;
olimpiya va milliy sport turlari boʻyicha yangi ilmiy-metodik tavsiyalar va yutuqlar asosida sport zaxiralarini, terma jamoalarga yuqori mahoratli sportchilar va malakali trenerlarni tayyorlash uchun oʻquv-mashgʻulot yigʻinlarini oʻtkazish, bunda sportchilar va trenerlarini yotoqxona bilan taʼminlash va ovqatlanishini tashkil etish;
sport terma jamoalarining asosiy va zaxira tarkiblarini toʻldirishga qodir boʻlgan yuqori malakali sportchilarni tayyorlash, sportning olimpiya va milliy turlarini rivojlantirish hamda zamonaviy bilimlarga ega trenerlar tarkibini tayyorlash va ularning malakasini oshirish;
nazariy tayyorgarlik va texnik-taktik koʻnikmalarni takomillashtirish, sportchilarning professional sifatlarini rivojlantirish, shuningdek, olimpiya va milliy sport turlarini rivojlantirishning xalqaro talablariga muvofiq terma jamoalarni tayyorlash darajasini oshirish;
sportning olimpiya va milliy turlari boʻyicha yetakchi xorijiy davlatlar, sport tashkilotlari va klublar bilan hamkorlikni rivojlantirish, shu jumladan sportchilar va trenerlar tarkibining kasb mahoratini oshirish yuzasidan Xitoy davlati tajribasidan foydalanish, yuqori darajaga ega boʻlgan xorijiy va mamlakatimizning malakali amaliyotchi mutaxassislari va trenerlarini shartnoma asosida jalb etgan holda, Qoraqalpogʻiston Respublikasidagi sport-taʼlim muassasalarining trener-oʻqituvchilarining malakasini oshirish;
trener-oʻqituvchilar malakasini oshirish, shu jumladan bolalar trenerlarini tayyorlash, iqtidorli yosh sportchilarni aniqlash, xalqaro sport maydonlarida munosib qatnashadigan professional sportchilarni tayyorlash uchun ularning koʻnikma va bilimini rivojlantirishga yoʻnaltirilgan zamonaviy oʻqitish dasturlari va metodlarini joriy etish.
4. Qoraqalpogʻiston Respublikasi Vazirlar Kengashi, Oʻzbekiston Respublikasi Jismoniy tarbiya va sport davlat qoʻmitasi bir oy muddatda:
oliy sport mahorati maktabining tuzilmasi va ustavini belgilangan tartibda tasdiqlasin, shuningdek, uning ustavi belgilangan tartibda davlat roʻyxatidan oʻtkazilishini taʼminlasin;
oliy sport mahorati maktabini yuqori malakali mutaxassislar va trener-oʻqituvchilar bilan taʼminlasin;
sport turlari boʻyicha oʻquv-mashq jarayonini yetarli darajada tashkil etish uchun zarur sport jihozlari va oʻquv-metodik adabiyotlar bilan taʼminlash hamda sport zallari va oʻquv xonalarini jihozlash chora-tadbirlarini amalga oshirsin.
5. Oʻzbekiston Respublikasi Jismoniy tarbiya va sport davlat qoʻmitasi, Moliya vazirligi, Qoraqalpogʻiston Respublikasi Vazirlar Kengashi bilan birgalikda 2018-yil 1-maygacha oliy sport mahorati maktabi uchun quriladigan trenerlar malakasini oshirish oʻquv xonalari va 100 oʻrinli mehmonxona binosining zarur loyiha-smeta hujjatlarini ishlab chiqsin hamda ularni belgilangan tartibda tasdiqlasin.
Belgilansinki, oliy sport mahorati maktabi uchun trenerlar malakasini oshirish oʻquv xonalari va 100 oʻrinli mehmonxona binosini 2018-yil oxirigacha qurish va jihozlash uchun zarur mablagʻlar Jismoniy tarbiya va sportni rivojlantirish jamgʻarmasi hisobidan ajratiladi.
6. Oʻzbekiston Respublikasi Davlat arxitektura va qurilish qoʻmitasi oliy sport mahorati maktabi uchun trenerlar malakasini oshirish oʻquv xonalari va 100 oʻrinli mehmonxona binosini qurish va jihozlash boʻyicha loyiha-smeta hujjatlari davlat ekspertizasidan belgilangan tartibda oʻtkazilishini taʼminlasin hamda qurilish-montaj ishlarining sifatli bajarilishi boʻyicha nazorat oʻrnatsin.
7. Belgilansinki, oliy sport mahorati maktabi faoliyatini moliyalashtirish:
Oʻzbekiston Respublikasi Davlat budjeti mablagʻlari;
oliy sport mahorati maktabi faoliyati ixtisosligi boʻyicha pulli xizmatlar koʻrsatishdan tushadigan mablagʻlar;
jismoniy va yuridik shaxslarning homiylik xayriyalari;
qonunchilikda taqiqlanmagan boshqa manbalar hisobidan moliyalashtiriladi.
8. Oʻzbekiston Respublikasi Moliya vazirligi:
2018-yil uchun Qoraqalpogʻiston Respublikasi budjeti xarajatlar parametrlariga tegishli oʻzgartirishlar kiritsin, shuningdek, 2019-yildan boshlab Oʻzbekiston Respublikasi Davlat budjetini shakllantirishda respublika oliy sport maktabi taʼminoti uchun “Taʼlim” sohasiga ajratiladigan mablagʻlar doirasida zarur budjet mablagʻlarini nazarda tutsin;
oliy sport mahorati maktabiga 1 ta maxsus avtotransport vositasini saqlash uchun limit ajratsin.
9. Oʻzbekiston Respublikasi Jismoniy tarbiya va sport davlat qoʻmitasi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Q.V. Akmalov, Oʻzbekiston Respublikasi Jismoniy tarbiya va sport davlat qoʻmitasi raisining oʻrinbosari F.K. Turdiyev va Qoraqalpogʻiston Respublikasi Vazirlar Kengashi Raisi Q.R. Sariyev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 2-mart,
157-son