📅 2018-yil 29-mart · Prezident farmonlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 29 март · Президент фармонлари
Расмий матн. Расмий ҳужжат. Таҳририй изоҳлар киритилмаган.
📅 29 марта 2018 г. · Указы Президента
Официальный текст. Официальный документ. Редакционные примечания не включены.
📅 29 March 2018 · Presidential decrees
Official text. Official document. Editorial notes are not included.
Ўзбекистон Республикаси Президентининг
Фармони
Ўзбекистон Республикаси Президентининг 1999 йил 10 июндаги ПФ-2326-сон «Зулфия номидаги Давлат мукофотини таъсис этиш бўйича таклифларни қўллаб-қувватлаш тўғрисида»ги Фармонига ўзгартиришлар киритиш ҳақида
Ўзбекистон Республикаси Президентининг 2018 йил 2 февралдаги ПФ-5325-сон «Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида»ги Фармонига мувофиқ ёш иқтидорли қизларни қўллаб-қувватлаш ҳамда Зулфия номидаги Давлат мукофоти билан тақдирлаш тизимини янада такомиллаштириш мақсадида:
1. Ўзбекистон Республикаси Президентининг 1999 йил 10 июндаги ПФ-2326-сон «Зулфия номидаги Давлат мукофотини таъсис этиш бўйича таклифларни қўллаб-қувватлаш тўғрисида»ги Фармонига иловага мувофиқ ўзгартиришлар киритилсин.
2. Мазкур Фармоннинг ижросини назорат қилиш Ўзбекистон Республикаси Бош вазирининг ўринбосари — Ўзбекистон Хотин-қизлар қўмитаси раиси Т.К. Нарбаева зиммасига юклансин.
Ўзбекистон Республикаси Президентининг 2018 йил 29 мартдаги ПФ-5389-сон Фармонига ИЛОВА
Ўзбекистон Республикаси Президентининг 1999 йил 10 июндаги ПФ-2326-сон «Зулфия номидаги Давлат мукофотини таъсис этиш бўйича таклифларни қўллаб-қувватлаш тўғрисида»ги Фармонига киритилаётган ўзгартиришлар
1. 1-банднинг иккинчи хатбошисидаги «биттадан» сўзи «иккитадан» сўзи билан алмаштирилсин.
2. 2-бандда :
а) иккинчи хатбоши қуйидаги таҳрирда баён этилсин:
«Зулфия номидаги Давлат мукофоти таълим, фан, адабиёт, маданият, санъат, спорт ва жамоатчилик фаолиятида алоҳида ютуқларга эришган ўн тўрт ёшга тўлган ва ўттиз ёшдан ошмаган иқтидорли қизларга берилади»;
б) тўртинчи хатбоши қуйидаги таҳрирда баён этилсин:
«умумий ўрта, ўрта махсус, касб-ҳунар таълими муассасаларининг Зулфия номидаги Давлат мукофоти лауреатлари бўлган ўқувчилари олий таълим муассасаларининг бакалавриатига, бакалавриат талабалари эса олий таълим муассасаларининг магистратурасига тегишли йўналиш ва ихтисослик бўйича кириш синовларисиз давлат грантлари асосида қабул қилинади».
3. 1-иловада :
а) 1-банд қуйидаги таҳрирда баён этилсин:
«Зулфия номидаги Давлат мукофоти таълим, фан, адабиёт, маданият, санъат, спорт ва жамоатчилик фаолиятида алоҳида ютуқларга эришган ўн тўрт ёшга тўлган ва ўттиз ёшдан ошмаган иқтидорли қизларга берилади.
Зулфия номидаги Давлат мукофоти ҳар йили Қорақалпоғистон Республикаси, вилоятлар ва Тошкент шаҳридан икки нафардан талабгорларга берилади»;
б) 2-бандда :
биринчи хатбошидаги «адабиёт, маданият, санъат, фан, таълим» сўзлари «таълим, фан, адабиёт, маданият, санъат, спорт ва жамоатчилик» сўзлари билан алмаштирилсин;
иккинчи хатбошидаги «республика хотин-қизлар қўмитаси қошидаги» сўзлари «Ўзбекистон Хотин-қизлар қўмитаси ҳузуридаги» сўзлари билан алмаштирилсин.
4. 2-илованинг 1-банди қуйидаги таҳрирда баён этилсин:
«Ўзбекистон Хотин-қизлар қўмитаси ҳузуридаги Зулфия номидаги Давлат мукофоти комиссияси (кейинги ўринларда Комиссия деб аталади) таълим, фан, адабиёт, маданият, санъат, спорт ва бошқа соҳалардаги энг нуфузли арбоблардан, ижодий уюшмалар, нодавлат нотижорат ташкилотлари, таълим, маданият ва спорт муассасаларининг таниқли вакилларидан ташкил топади ва унинг таркиби ҳар тўрт йилда учдан икки қисми янгиланиши назарда тутилган ҳолда Вазирлар Маҳкамаси томонидан тасдиқланади. Мазкур Комиссия аъзолари жамоатчилик асосида ишлайдилар».
Ўзбекистон Республикаси Президенти Ш. МИРЗИЁЕВ
Тошкент ш.,
2018 йил 29 март,
ПФ-5389-сон
Oʻzbekiston Respublikasi Prezidentining
Farmoni
Oʻzbekiston Respublikasi Prezidentining 1999-yil 10-iyundagi PF-2326-son “Zulfiya nomidagi Davlat mukofotini taʼsis etish boʻyicha takliflarni qoʻllab-quvvatlash toʻgʻrisida”gi Farmoniga oʻzgartirishlar kiritish haqida
Oʻzbekiston Respublikasi Prezidentining 2018-yil 2-fevraldagi PF-5325-son “Xotin-qizlarni qoʻllab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari toʻgʻrisida”gi Farmoniga muvofiq yosh iqtidorli qizlarni qoʻllab-quvvatlash hamda Zulfiya nomidagi Davlat mukofoti bilan taqdirlash tizimini yanada takomillashtirish maqsadida:
1. Oʻzbekiston Respublikasi Prezidentining 1999-yil 10-iyundagi PF-2326-son “Zulfiya nomidagi Davlat mukofotini taʼsis etish boʻyicha takliflarni qoʻllab-quvvatlash toʻgʻrisida”gi Farmoniga ilovaga muvofiq oʻzgartirishlar kiritilsin.
2. Mazkur Farmonning ijrosini nazorat qilish Oʻzbekiston Respublikasi Bosh vazirining oʻrinbosari — Oʻzbekiston Xotin-qizlar qoʻmitasi raisi T.K. Narbayeva zimmasiga yuklansin.
Oʻzbekiston Respublikasi Prezidentining 2018-yil 29-martdagi PF-5389-son Farmoniga ILOVA
Oʻzbekiston Respublikasi Prezidentining 1999-yil 10-iyundagi PF-2326-son “Zulfiya nomidagi Davlat mukofotini taʼsis etish boʻyicha takliflarni qoʻllab-quvvatlash toʻgʻrisida”gi Farmoniga kiritilayotgan oʻzgartirishlar
1. 1-bandning ikkinchi xatboshisidagi “bittadan” soʻzi “ikkitadan” soʻzi bilan almashtirilsin.
2. 2-bandda :
a) ikkinchi xatboshi quyidagi tahrirda bayon etilsin:
“Zulfiya nomidagi Davlat mukofoti taʼlim, fan, adabiyot, madaniyat, sanʼat, sport va jamoatchilik faoliyatida alohida yutuqlarga erishgan oʻn toʻrt yoshga toʻlgan va oʻttiz yoshdan oshmagan iqtidorli qizlarga beriladi”;
b) toʻrtinchi xatboshi quyidagi tahrirda bayon etilsin:
“umumiy oʻrta, oʻrta maxsus, kasb-hunar taʼlimi muassasalarining Zulfiya nomidagi Davlat mukofoti laureatlari boʻlgan oʻquvchilari oliy taʼlim muassasalarining bakalavriatiga, bakalavriat talabalari esa oliy taʼlim muassasalarining magistraturasiga tegishli yoʻnalish va ixtisoslik boʻyicha kirish sinovlarisiz davlat grantlari asosida qabul qilinadi”.
3. 1-ilovada :
a) 1-band quyidagi tahrirda bayon etilsin:
“Zulfiya nomidagi Davlat mukofoti taʼlim, fan, adabiyot, madaniyat, sanʼat, sport va jamoatchilik faoliyatida alohida yutuqlarga erishgan oʻn toʻrt yoshga toʻlgan va oʻttiz yoshdan oshmagan iqtidorli qizlarga beriladi.
Zulfiya nomidagi Davlat mukofoti har yili Qoraqalpogʻiston Respublikasi, viloyatlar va Toshkent shahridan ikki nafardan talabgorlarga beriladi”;
b) 2-bandda :
birinchi xatboshidagi “adabiyot, madaniyat, sanʼat, fan, taʼlim” soʻzlari “taʼlim, fan, adabiyot, madaniyat, sanʼat, sport va jamoatchilik” soʻzlari bilan almashtirilsin;
ikkinchi xatboshidagi “respublika xotin-qizlar qoʻmitasi qoshidagi” soʻzlari “Oʻzbekiston Xotin-qizlar qoʻmitasi huzuridagi” soʻzlari bilan almashtirilsin.
4. 2-ilovaning 1-bandi quyidagi tahrirda bayon etilsin:
“Oʻzbekiston Xotin-qizlar qoʻmitasi huzuridagi Zulfiya nomidagi Davlat mukofoti komissiyasi (keyingi oʻrinlarda Komissiya deb ataladi) taʼlim, fan, adabiyot, madaniyat, sanʼat, sport va boshqa sohalardagi eng nufuzli arboblardan, ijodiy uyushmalar, nodavlat notijorat tashkilotlari, taʼlim, madaniyat va sport muassasalarining taniqli vakillaridan tashkil topadi va uning tarkibi har toʻrt yilda uchdan ikki qismi yangilanishi nazarda tutilgan holda Vazirlar Mahkamasi tomonidan tasdiqlanadi. Mazkur Komissiya aʼzolari jamoatchilik asosida ishlaydilar”.
Oʻzbekiston Respublikasi Prezidenti Sh. MIRZIYOYEV
Toshkent sh.,
2018-yil 29-mart,
PF-5389-son
Президента Республики Узбекистан
Указ
О внесении изменений в Указ Президента Республики Узбекистан от 10 июня 1999 года № УП-2326 «О поддержке предложений по учреждению Государственной премии имени Зульфии»
В целях поддержки талантливых девушек и совершенствования присуждения Государственной премии имени Зульфии в соответствии с Указом Президента Республики Узбекистан от 2 февраля 2018 года № УП-5325 «О мерах по коренному совершенствованию деятельности в сфере поддержки женщин и укрепления института семьи»:
1. Внести изменения в Указ Президента Республики Узбекистан от 10 июня 1999 года № УП-2326 «О поддержке предложений по учреждению Государственной премии имени Зульфии» согласно приложению .
2. Контроль за исполнением настоящего Указа возложить на заместителя Премьер-министра Республики Узбекистан — председателя Комитета женщин Узбекистана Т.К. Нарбаеву.
ПРИЛОЖЕНИЕ к Указу Президента Республики Узбекистан от 29 марта 2018 года № УП-5389
Изменения, вносимые в Указ Президента Республики Узбекистан от 10 июня 1999 года № УП-2326 «О поддержке предложений по учреждению Государственной премии имени Зульфии»
1. В абзаце втором пункта 1 слова «по одной» заменить словами «по две».
2. В пункте 2 :
а) абзац второй изложить в следующей редакции:
«Государственная премия имени Зульфии присуждается одаренным девушкам в возрасте от четырнадцати до тридцати лет включительно, достигшим особых успехов в образовании, науке, литературе, культуре, искусстве, спорте и общественной деятельности»;
б) абзац четвертый изложить в следующей редакции:
«учащиеся общих средних, средних специальных, профессиональных образовательных учреждений, ставшие лауреатами Государственной премии имени Зульфии, принимаются в бакалавриат, студенты бакалавриата в магистратуру высших образовательных учреждений по соответствующему направлению и специальности без вступительных испытаний на основе государственных грантов».
3. В приложении № 1 :
а) пункт 1 изложить в следующей редакции:
«Государственная премия имени Зульфии присуждается одаренным девушкам в возрасте от четырнадцати до тридцати лет включительно, достигшим особых успехов в образовании, науке, литературе, культуре, искусстве, спорте и общественной деятельности.
Государственная премия имени Зульфии присуждается ежегодно по двум соискательницам от Республики Каракалпакстан, областей и города Ташкента»;
б) в пункте 2 :
в абзаце первом слова «литературы, культуры, искусства, науки, образования» заменить словами «образования, науки, литературы, культуры, искусства, спорта и общественной деятельности»;
в абзаце втором слова «при Комитете женщин республики» заменить словами «при Комитете женщин Узбекистана».
4. Пункт 1 приложения № 2 изложить в следующей редакции:
«Комиссия по Государственной премии имени Зульфии (далее — Комиссия) при Комитете женщин Узбекистана состоит из авторитетных деятелей образования, науки, литературы, культуры, искусства, спорта и других сфер, видных представителей творческих союзов, общественных организаций, учреждений образования, культуры и спорта и состав Комиссии утверждается Кабинетом Министров с учетом обновления двух третей ее членов каждые четыре года. Члены данной комиссии ведут работу на общественных началах».
Президент Республики Узбекистан Ш. МИРЗИЁЕВ
г. Ташкент,
29 марта 2018 г.,
№ УП-5389