UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

ТАРКИБИ

Миллий маданиятимиз ривожига катта ҳисса қўшган санъаткорларни ҳамда ўзбек санъатини дунё саҳналарида муваффақиятли намойиш этиб келаётган ёшларни қўллаб-қувватлаш чора-тадбирлари тўғрисида

Ўзбекистон Республикаси Президентининг 2017 йил 31 майдаги ПҚ-3022-сон қарори билан тасдиқланган Ўзбекистон маданият ва санъат соҳасини такомиллаштириш бўйича 2017 — 2021 йилларга мўлжалланган чора-тадбирлар дастури ижросини таъминлаш, шунингдек, маданиятимиз ва санъатимиз ривожига катта ҳисса қўшган таниқли санъаткорларни ҳамда санъаткор ёшларни рағбатлантириш мақсадида Вазирлар Маҳкамаси қарор қилади:

1. Қуйидагилар:

Миллий маданиятимиз ривожига катта ҳисса қўшган санъаткорларни ҳамда ўзбек санъатини дунё саҳналарида муваффақиятли намойиш этиб келаётган ёшларни Ўзбекистон Республикаси Президенти номидан рағбатлантириш тартиби тўғрисидаги низом 1-иловага мувофиқ;

Миллий маданиятимиз ривожига катта ҳисса қўшган санъаткорларни ҳамда ўзбек санъатини дунё саҳналарида муваффақиятли намойиш этиб келаётган ёшларни Ўзбекистон Республикаси Президенти номидан рағбатлантириш бўйича республика комиссиясининг таркиби 2-иловага мувофиқ;

Миллий маданиятимиз ривожига катта ҳисса қўшган санъаткорларни ҳамда ўзбек санъатини дунё саҳналарида муваффақиятли намойиш этиб келаётган ёшларни Ўзбекистон Республикаси Президенти номидан рағбатлантириш бўйича ҳудудий комиссияларнинг намунавий таркиби 3-иловага мувофиқ тасдиқлансин.

2. Белгилаб қўйилсинки, мукофотлаш ва сертификат бланкасини тайёрлаш учун зарур маблағлар Ўзбекистон Республикаси Маданият вазирлигининг маданий тадбирларни молиялаштириш учун ҳар йили назарда тутиладиган Ўзбекистон Республикаси Давлат бюджети маблағлари ҳисобидан ажратилади.

3. Мазкур қарорнинг бажарилишини назорат қилиш Ўзбекистон Республикаси Маданият вазири Б.С. Сайфуллаев зиммасига ҳамда Ўзбекистон Республикаси Вазирлар Маҳкамасининг Маданият, санъат ва ёшлар сиёсати масалалари ахборот-таҳлил департаментига юклансин.

Вазирлар Маҳкамасининг 2018 йил 6 апрелдаги 271-сон қарорига 1-ИЛОВА

1-боб. Умумий қоидалар

1. Ушбу Низом Ўзбекистон санъати ва маданияти ривожига катта ҳисса қўшган санъаткорларни ҳамда жаҳон миқёсидаги нуфузли кўрик-танлов ва фестивалларда юқори ўринларни эгаллаган, ўзбек санъати ва маданиятини дунё саҳналарида муваффақиятли намойиш этиб келаётган ёшларни (кейинги ўринларда маданият соҳаси вакиллари деб аталади) Ўзбекистон Республикаси Президенти номидан рағбатлантириш (кейинги ўринларда мукофотлаш деб аталади) тартибини белгилайди.

2. Мукофотлашга, қоида тариқасида, қуйидаги соҳаларда фаолият юритаётган маданият соҳаси вакиллари тавсия этилади:

композитор, бастакор ва санъатшунослар;

театр, кино ва оммавий тадбирлар актёрлари, режиссёрлари;

дирижёрлар, балетмейстерлар;

мусиқа, хор, рақс, цирк, оркестр, ансамбль ижрочилари ва ушбу жамоаларнинг бадиий раҳбарлари;

достон ижрочилиги намояндалари;

шоир ва ёзувчилар;

музей ҳамда моддий ва номоддий маданий мерос объектларини муҳофаза қилиш соҳасида фаолият кўрсатаётган ходимлар;

тасвирий ва амалий санъат вакиллари, дизайнерлар.

Мукофотлашга маданият соҳасининг бошқа йўналишларида фаолият юритаётган номзодлар ҳам тавсия этилиши мумкин.

3. Номзодларни кўриб чиқиш ва танлаб олиш икки босқичда амалга оширилади.

Биринчи босқичда (Қорақалпоғистон Республикаси, вилоятлар ва Тошкент шаҳри бўйича) номзодларни кўриб чиқиш ва танлаб олиш Миллий маданиятимиз ривожига катта ҳисса қўшган санъаткорларни ҳамда ўзбек санъатини дунё саҳналарида муваффақиятли намойиш этиб келаётган ёшларни Ўзбекистон Республикаси Президенти номидан рағбатлантириш бўйича ҳудудий комиссиялар (кейинги ўринларда ҳудудий комиссия деб аталади) томонидан амалга оширилади.

Биринчи босқич якунлари бўйича ҳудудлардан мукофотлашга танлаб олинган (тавсия этилган) номзодлар танловнинг иккинчи босқичида иштирок этиш ҳуқуқига эга бўлади.

Иккинчи босқич (республика бўйича) Миллий маданиятимиз ривожига катта ҳисса қўшган санъаткорларни ҳамда ўзбек санъатини дунё саҳналарида муваффақиятли намойиш этиб келаётган ёшларни Ўзбекистон Республикаси Президенти номидан рағбатлантириш бўйича республика комиссияси (кейинги ўринларда Республика комиссияси деб аталади) томонидан ўтказилади.

4. Мукофотлашга тавсия этилаётган номзодларнинг ҳужжатларини қабул қилиш ушбу Низомга иловага схемага мувофиқ амалга оширилади.

5. Республика комиссияси ва ҳудудий комиссиялар жамоатчилик асосида фаолият юритади.

Ўзбекистон Республикаси Маданият вазирлиги республика комиссиясининг ишчи органи ҳисобланади.

Қорақалпоғистон Республикаси Маданият вазирлиги, вилоятлар маданият бошқармалари ва Тошкент шаҳар маданият бош бошқармаси ҳудудий комиссияларнинг ишчи органи (кейинги ўринларда ҳудудий комиссиянинг ишчи органи деб аталади) ҳисобланади.

2-боб. Мукофотлашга тавсия этилаётган номзодларни танлаб олиш мезонлари

6. Мукофотлашга тавсия этилаётган номзодлар қуйидаги мезонлар асосида танлаб олинади:

Ўзбекистонда доимий истиқомат қилган ҳолда ижодий фаолият юритаётганлиги;

жаҳон миқёсидаги кўрик-танлов ва фестивалларда юқори ўринларни (1-4-ўринлар) эгаллаганлиги;

ўзбек санъати ва маданиятини дунё саҳналарида мунтазам равишда муваффақиятли намойиш этиб келаётганлиги;

муносиб ижодий кадрларни тайёрлаганлиги, ўзининг ўқув адабиётлари, илмий ишлари, катта амалий тажрибаси билан уларни тарбиялашга салмоқли ҳисса қўшганлиги (Ўзбекистон санъати ва маданияти ривожига катта ҳисса қўшган санъаткорлар учун);

сўнгги беш йил мобайнида маданият ва санъат соҳасини ривожлантириш йўлидаги ижоди билан бир қаторда миллий истиқлол ғоялари ва маданий-маънавий қадриятларни ёшларга сингдириш ва эътиқодини юксалтиришдаги ибратли хизмати ва ёшларнинг алоҳида ютуқлари.

Ушбу банднинг тўртинчи — олтинчи хатбошларида назарда тутилган мезонлар асосида мукофотлашга тавсия этилаётган номзодларни танлаб олиш ҳар бир номзоднинг мукофотлашга муносиблиги Республика комиссияси ва ҳудудий комиссиялар томонидан ҳаққоний ва холисона баҳолаган ҳолда ҳал этилади.

3-боб. Мукофотлашга тавсия этилаётган номзодларнинг ҳужжатларини қабул қилиш

7. Маданият ва санъат соҳасидаги ташкилотлар ўз ташаббусига кўра ҳар йили 1 июнга қадар мукофотлашга тавсия этиладиган номзодларни танлаб олади ва номзод тўғрисида ташкилотнинг биринчи раҳбари томонидан имзоланган тавсияномани ҳудудий комиссиянинг ишчи органига тақдим этади.

8. Маданият соҳасининг вакили (номзод), унинг ота-онаси ёки унинг ўрнини босувчи шахс фуқароларнинг ўзини ўзи бошқариш органининг тавсияномасини ушбу Низомнинг 7-бандида кўрсатилган муддатда ҳудудий комиссиянинг ишчи органига тақдим этиши мумкин.

9. Ушбу Низомнинг 7 ва 8-бандларида кўрсатилган тавсияномаларга қуйидаги ҳужжатлар илова қилинади:

номзоднинг маълумотнома-объективкаси (анкета);

оммавий ахборот воситаларида номзод ҳақида берилган кўрсатув ва эшиттиришларнинг CD дискдаги ёзуви ёки мамлакатимизда ва чет элларда чоп этилган мақолалар нусхаси (агар бўлса);

номзоднинг ижодий ишлари, фаолияти ва эришган ютуқларини акс эттирувчи ҳужжатлар (муаллифлик асарлари ёки репертуар рўйхати, видео-аудио альбомлари, турли тадбирларда қўлга киритган совринли ўринлар учун сертификат ва дипломлар нусхаси) тўплами.

Номзодлардан ушбу бандда кўрсатилмаган бошқа ҳужжатлар талаб этилишига йўл қўйилмайди.

4-боб. Тавсия этилаётган номзодларнинг ҳужжатларини кўриб чиқиш тартиби

10. Ҳудудий комиссиянинг ишчи органи тақдим этилган ҳужжатларни ушбу Низомнинг 9-бандига мувофиқ тўлиқлиги юзасидан кўриб чиқади.

Ҳужжатлар тўлиқ бўлмаган ҳолда тақдим этилган тақдирда, улар уч иш куни мобайнида ушбу ҳужжатларни тақдим этувчига камчиликлар ҳамда ҳужжатларни қайта тақдим этишнинг аниқ муддати кўрсатилган ҳолда қайтарилади.

Ушбу Низомнинг 9-бандида кўрсатилган ҳужжатлар тўлиқ бўлган тақдирда, улар ҳудудий комиссиянинг ишчи органи томонидан ҳудудий комиссияга кўриб чиқиш ва тегишли қарор қабул қилиш учун тақдим этилади.

11. Ҳудудий комиссия номзодларнинг ушбу Низомда белгиланган талабларга мувофиқлигини ўрганиб чиқади.

Ўрганиш натижалари бўйича ҳар бир ҳудудий комиссия мукофотлаш учун тавсия этиладиган 3 нафар номзодни аниқлаб, улар тўғрисида ҳужжатларни ҳар йили 15 июнга қадар кўриб чиқиш учун Республика комиссиясига киритади.

12. Республика комиссияси ҳудудий комиссиялар томонидан тақдим этилган номзодларнинг ушбу Низомда белгиланган талабларга мувофиқлигини кўриб чиқиб, мукофотлаш учун Қорақалпоғистон Республикаси, вилоятлар ҳамда Тошкент шаҳридан тавсия этиладиган жами 20 нафар номзодни аниқлайди ҳамда улар юзасидан таклифларни ҳар йили 1 июлга қадар келишиш учун Ўзбекистон Республикаси Президенти Администрациясига тақдим этади.

Республиканинг бирор вилоятидан муносиб номзод тавсия этилмаган тақдирда ушбу ҳудудга ажратилган ўрин Тошкент шаҳри, Қорақалпоғистон Республикаси ва бошқа вилоятларга берилиши мумкин.

13. Ўзбекистон Республикаси Президенти Администрацияси билан келишилган номзодлар рўйхати (танлов ғолиблари) Республика комиссиясининг тегишли қарори билан тасдиқланади.

Танлов ғолиблари уларни рағбатлантириш тўғрисида Республика комиссиясининг тегишли қарори асосида ушбу қарор қабул қилинган кунда белгиланган базавий ҳисоблаш миқдорининг 50 баравари миқдорида бир марталик пул мукофоти билан моддий рағбатлантирилади ва уларга мукофотланганлик тўғрисида сертификат топширилади.

5-боб. Тақдирлаш маросимини ташкил этиш ва ўтказиш

14. Мукофотлаш маросими ҳар йили Тошкент шаҳрида Мустақиллик байрами арафасида ўтказилади.

15. Ушбу Низом талаблари асосида мукофотлаш такроран амалга оширилмайди.

16. Мукофотлаш учун зарур маблағлар Ўзбекистон Республикаси Маданият вазирлигининг маданий тадбирларни молиялаштириш учун ҳар йили назарда тутиладиган Ўзбекистон Республикаси Давлат бюджети маблағларидан ажратилади.

17. Мукофотланадиган маданият ва санъат вакиллари рўйхати республика оммавий ахборот воситаларида эълон қилинади.

6-боб. Якунловчи қоида

18. Ушбу Низом талаблари бузилишида айбдор бўлган шахслар қонунчиликка мувофиқ жавоб берадилар.

Мукофотлашга тавсия этилаётган номзодларнинг ҳужжатларини қабул қилиш

Вазирлар Маҳкамасининг 2018 йил 6 апрелдаги 271-сон қарорига 2-ИЛОВА

Миллий маданиятимиз ривожига катта ҳисса қўшган санъаткорларни ҳамда ўзбек санъатини дунё саҳналарида муваффақиятли намойиш этиб келаётган ёшларни Ўзбекистон Республикаси Президенти номидан рағбатлантириш бўйича республика комиссиясининг

А. Арипов — Ўзбекистон Республикасининг Бош вазири, Республика комиссияси раиси Б. Сайфуллаев — Ўзбекистон Республикаси маданият вазири, Республика комиссияси раиси ўринбосари К. Акилова — Ўзбекистон Республикаси маданият вазирининг ўринбосари Ш. Ризаев — «Ўзбеккино» Миллий агентлиги бош директорининг биринчи ўринбосари Ф. Ташмуҳамедов — Ўзбекистон Бадиий академияси раисининг ўринбосари С. Саидов — Ўзбекистон Ёзувчилар уюшмаси раисининг биринчи ўринбосари, Ўзбекистон халқ шоири Х. Рахимов — Ўзбекистон композиторлари ва бастакорлари уюшмаси раиси ўринбосари, Ўзбекистон санъат арбоби Ш. Тохтасимов — Тошкент давлат миллий рақс ва хореография олий мактаби ректори С. Бегматов — Ўзбекистон Миллий мақом санъати маркази раҳбари, санъатшунослик фанлари номзоди, профессор Б. Қурбонов — Р. Глиэр номидаги Республика ихтисослаштирилган мусиқа академик лицейи директори, Ўзбекистонда хизмат кўрсатган ёшлар мураббийи, профессор Ф. Зокиров — Ўзбекистон халқ артисти Ё. Аҳмедов — Ўзбекистон халқ артисти З. Зоиров — Вазирлар Маҳкамасининг етакчи мутахассиси, Республика комиссияси масъул котиби

Вазирлар Маҳкамасининг 2018 йил 6 апрелдаги 271-сон қарорига 3-ИЛОВА

Миллий маданиятимиз ривожига катта ҳисса қўшган санъаткорларни ҳамда ўзбек санъатини дунё саҳналарида муваффақиятли намойиш этиб келаётган ёшларни Ўзбекистон Республикаси Президенти номидан рағбатлантириш бўйича ҳудудий комиссияларнинг намунавий

лавозимига кўра — Қорақалпоғистон Республикаси Вазирлар Кенгаши Раисининг, вилоятлар ва Тошкент шаҳар ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари, Комиссия раиси лавозимига кўра — Қорақалпоғистон Республикаси маданият вазири, вилоят маданият бошқармаси бошлиғи ва Тошкент шаҳар маданият бош бошқармаси бошлиғи, Комиссия раисининг ўринбосари лавозимига кўра — Ўзбекистон Ёзувчилар уюшмасининг ҳудудий бўлинмаси раҳбари лавозимига кўра — «Ўзбеккино» миллий агентлигининг ҳудудий бўлими раҳбари лавозимига кўра — Ўзбекистон Бадиий академиясининг Бадиий ижодкорлар уюшмаси ҳудудий бўлими раиси лавозимига кўра — Ўзбекистон композиторлари ва бастакорлари уюшмасининг ҳудудий бўлими раиси лавозимига кўра — Академик ва халқ бадиий жамоалари дирекциясининг ҳудудий бўлинмалари раҳбари

Ўзбекистон Республикасининг Бош вазири А. АРИПОВ

Тошкент ш.,

2018 йил 6 апрель,

271-сон

(Қонун ҳужжатлари маълумотлари миллий базаси, 09.04.2018 й., 09/18/271/1043-сон; 14.05.2019 й., 09/19/397/3123-сон; 29.12.2019 й., 09/19/1046/4242-сон; Қонунчилик маълумотлари миллий базаси, 24.07.2021 й., 06/21/6269/0704-сон; 05.04.2022 й., 09/22/153/0266-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

SXEMASI

TARKIBI

Milliy madaniyatimiz rivojiga katta hissa qoʻshgan sanʼatkorlarni hamda oʻzbek sanʼatini dunyo sahnalarida muvaffaqiyatli namoyish etib kelayotgan yoshlarni qoʻllab-quvvatlash chora-tadbirlari toʻgʻrisida

Oʻzbekiston Respublikasi Prezidentining 2017-yil 31-maydagi PQ-3022-son qarori bilan tasdiqlangan Oʻzbekiston madaniyat va sanʼat sohasini takomillashtirish boʻyicha 2017 — 2021-yillarga moʻljallangan chora-tadbirlar dasturi ijrosini taʼminlash, shuningdek, madaniyatimiz va sanʼatimiz rivojiga katta hissa qoʻshgan taniqli sanʼatkorlarni hamda sanʼatkor yoshlarni ragʻbatlantirish maqsadida Vazirlar Mahkamasi qaror qiladi:

1. Quyidagilar:

Milliy madaniyatimiz rivojiga katta hissa qoʻshgan sanʼatkorlarni hamda oʻzbek sanʼatini dunyo sahnalarida muvaffaqiyatli namoyish etib kelayotgan yoshlarni Oʻzbekiston Respublikasi Prezidenti nomidan ragʻbatlantirish tartibi toʻgʻrisidagi nizom 1-ilovaga muvofiq;

2. Belgilab qoʻyilsinki, mukofotlash va sertifikat blankasini tayyorlash uchun zarur mablagʻlar Oʻzbekiston Respublikasi Madaniyat vazirligining madaniy tadbirlarni moliyalashtirish uchun har yili nazarda tutiladigan Oʻzbekiston Respublikasi Davlat budjeti mablagʻlari hisobidan ajratiladi.

3. Mazkur qarorning bajarilishini nazorat qilish Oʻzbekiston Respublikasi Madaniyat vaziri B.S. Sayfullayev zimmasiga hamda Oʻzbekiston Respublikasi Vazirlar Mahkamasining Madaniyat, sanʼat va yoshlar siyosati masalalari axborot-tahlil departamentiga yuklansin.

Vazirlar Mahkamasining 2018-yil 6-apreldagi 271-son qaroriga 1-ILOVA

1-bob. Umumiy qoidalar

1. Ushbu Nizom Oʻzbekiston sanʼati va madaniyati rivojiga katta hissa qoʻshgan sanʼatkorlarni hamda jahon miqyosidagi nufuzli koʻrik-tanlov va festivallarda yuqori oʻrinlarni egallagan, oʻzbek sanʼati va madaniyatini dunyo sahnalarida muvaffaqiyatli namoyish etib kelayotgan yoshlarni (keyingi oʻrinlarda madaniyat sohasi vakillari deb ataladi) Oʻzbekiston Respublikasi Prezidenti nomidan ragʻbatlantirish (keyingi oʻrinlarda mukofotlash deb ataladi) tartibini belgilaydi.

2. Mukofotlashga, qoida tariqasida, quyidagi sohalarda faoliyat yuritayotgan madaniyat sohasi vakillari tavsiya etiladi:

kompozitor, bastakor va sanʼatshunoslar;

teatr, kino va ommaviy tadbirlar aktyorlari, rejissorlari;

dirijorlar, baletmeysterlar;

musiqa, xor, raqs, sirk, orkestr, ansambl ijrochilari va ushbu jamoalarning badiiy rahbarlari;

doston ijrochiligi namoyandalari;

shoir va yozuvchilar;

muzey hamda moddiy va nomoddiy madaniy meros obyektlarini muhofaza qilish sohasida faoliyat koʻrsatayotgan xodimlar;

tasviriy va amaliy sanʼat vakillari, dizaynerlar.

Mukofotlashga madaniyat sohasining boshqa yoʻnalishlarida faoliyat yuritayotgan nomzodlar ham tavsiya etilishi mumkin.

3. Nomzodlarni koʻrib chiqish va tanlab olish ikki bosqichda amalga oshiriladi.

Birinchi bosqichda (Qoraqalpogʻiston Respublikasi, viloyatlar va Toshkent shahri boʻyicha) nomzodlarni koʻrib chiqish va tanlab olish Milliy madaniyatimiz rivojiga katta hissa qoʻshgan sanʼatkorlarni hamda oʻzbek sanʼatini dunyo sahnalarida muvaffaqiyatli namoyish etib kelayotgan yoshlarni Oʻzbekiston Respublikasi Prezidenti nomidan ragʻbatlantirish boʻyicha hududiy komissiyalar (keyingi oʻrinlarda hududiy komissiya deb ataladi) tomonidan amalga oshiriladi.

Birinchi bosqich yakunlari boʻyicha hududlardan mukofotlashga tanlab olingan (tavsiya etilgan) nomzodlar tanlovning ikkinchi bosqichida ishtirok etish huquqiga ega boʻladi.

Ikkinchi bosqich (respublika boʻyicha) Milliy madaniyatimiz rivojiga katta hissa qoʻshgan sanʼatkorlarni hamda oʻzbek sanʼatini dunyo sahnalarida muvaffaqiyatli namoyish etib kelayotgan yoshlarni Oʻzbekiston Respublikasi Prezidenti nomidan ragʻbatlantirish boʻyicha respublika komissiyasi (keyingi oʻrinlarda Respublika komissiyasi deb ataladi) tomonidan oʻtkaziladi.

4. Mukofotlashga tavsiya etilayotgan nomzodlarning hujjatlarini qabul qilish ushbu Nizomga ilovaga sxemaga muvofiq amalga oshiriladi.

5. Respublika komissiyasi va hududiy komissiyalar jamoatchilik asosida faoliyat yuritadi.

Oʻzbekiston Respublikasi Madaniyat vazirligi respublika komissiyasining ishchi organi hisoblanadi.

Qoraqalpogʻiston Respublikasi Madaniyat vazirligi, viloyatlar madaniyat boshqarmalari va Toshkent shahar madaniyat bosh boshqarmasi hududiy komissiyalarning ishchi organi (keyingi oʻrinlarda hududiy komissiyaning ishchi organi deb ataladi) hisoblanadi.

2-bob. Mukofotlashga tavsiya etilayotgan nomzodlarni tanlab olish mezonlari

6. Mukofotlashga tavsiya etilayotgan nomzodlar quyidagi mezonlar asosida tanlab olinadi:

Oʻzbekistonda doimiy istiqomat qilgan holda ijodiy faoliyat yuritayotganligi;

jahon miqyosidagi koʻrik-tanlov va festivallarda yuqori oʻrinlarni (1-4-oʻrinlar) egallaganligi;

oʻzbek sanʼati va madaniyatini dunyo sahnalarida muntazam ravishda muvaffaqiyatli namoyish etib kelayotganligi;

munosib ijodiy kadrlarni tayyorlaganligi, oʻzining oʻquv adabiyotlari, ilmiy ishlari, katta amaliy tajribasi bilan ularni tarbiyalashga salmoqli hissa qoʻshganligi (Oʻzbekiston sanʼati va madaniyati rivojiga katta hissa qoʻshgan sanʼatkorlar uchun);

soʻnggi besh yil mobaynida madaniyat va sanʼat sohasini rivojlantirish yoʻlidagi ijodi bilan bir qatorda milliy istiqlol gʻoyalari va madaniy-maʼnaviy qadriyatlarni yoshlarga singdirish va eʼtiqodini yuksaltirishdagi ibratli xizmati va yoshlarning alohida yutuqlari.

Ushbu bandning toʻrtinchi — oltinchi xatboshlarida nazarda tutilgan mezonlar asosida mukofotlashga tavsiya etilayotgan nomzodlarni tanlab olish har bir nomzodning mukofotlashga munosibligi Respublika komissiyasi va hududiy komissiyalar tomonidan haqqoniy va xolisona baholagan holda hal etiladi.

3-bob. Mukofotlashga tavsiya etilayotgan nomzodlarning hujjatlarini qabul qilish

7. Madaniyat va sanʼat sohasidagi tashkilotlar oʻz tashabbusiga koʻra har yili 1-iyunga qadar mukofotlashga tavsiya etiladigan nomzodlarni tanlab oladi va nomzod toʻgʻrisida tashkilotning birinchi rahbari tomonidan imzolangan tavsiyanomani hududiy komissiyaning ishchi organiga taqdim etadi.

8. Madaniyat sohasining vakili (nomzod), uning ota-onasi yoki uning oʻrnini bosuvchi shaxs fuqarolarning oʻzini oʻzi boshqarish organining tavsiyanomasini ushbu Nizomning 7-bandida koʻrsatilgan muddatda hududiy komissiyaning ishchi organiga taqdim etishi mumkin.

9. Ushbu Nizomning 7 va 8-bandlarida koʻrsatilgan tavsiyanomalarga quyidagi hujjatlar ilova qilinadi:

nomzodning maʼlumotnoma-obyektivkasi (anketa);

ommaviy axborot vositalarida nomzod haqida berilgan koʻrsatuv va eshittirishlarning CD diskdagi yozuvi yoki mamlakatimizda va chet ellarda chop etilgan maqolalar nusxasi (agar boʻlsa);

nomzodning ijodiy ishlari, faoliyati va erishgan yutuqlarini aks ettiruvchi hujjatlar (mualliflik asarlari yoki repertuar roʻyxati, video-audio albomlari, turli tadbirlarda qoʻlga kiritgan sovrinli oʻrinlar uchun sertifikat va diplomlar nusxasi) toʻplami.

Nomzodlardan ushbu bandda koʻrsatilmagan boshqa hujjatlar talab etilishiga yoʻl qoʻyilmaydi.

4-bob. Tavsiya etilayotgan nomzodlarning hujjatlarini koʻrib chiqish tartibi

10. Hududiy komissiyaning ishchi organi taqdim etilgan hujjatlarni ushbu Nizomning 9-bandiga muvofiq toʻliqligi yuzasidan koʻrib chiqadi.

Hujjatlar toʻliq boʻlmagan holda taqdim etilgan taqdirda, ular uch ish kuni mobaynida ushbu hujjatlarni taqdim etuvchiga kamchiliklar hamda hujjatlarni qayta taqdim etishning aniq muddati koʻrsatilgan holda qaytariladi.

Ushbu Nizomning 9-bandida koʻrsatilgan hujjatlar toʻliq boʻlgan taqdirda, ular hududiy komissiyaning ishchi organi tomonidan hududiy komissiyaga koʻrib chiqish va tegishli qaror qabul qilish uchun taqdim etiladi.

11. Hududiy komissiya nomzodlarning ushbu Nizomda belgilangan talablarga muvofiqligini oʻrganib chiqadi.

Oʻrganish natijalari boʻyicha har bir hududiy komissiya mukofotlash uchun tavsiya etiladigan 3 nafar nomzodni aniqlab, ular toʻgʻrisida hujjatlarni har yili 15-iyunga qadar koʻrib chiqish uchun Respublika komissiyasiga kiritadi.

12. Respublika komissiyasi hududiy komissiyalar tomonidan taqdim etilgan nomzodlarning ushbu Nizomda belgilangan talablarga muvofiqligini koʻrib chiqib, mukofotlash uchun Qoraqalpogʻiston Respublikasi, viloyatlar hamda Toshkent shahridan tavsiya etiladigan jami 20 nafar nomzodni aniqlaydi hamda ular yuzasidan takliflarni har yili 1-iyulga qadar kelishish uchun Oʻzbekiston Respublikasi Prezidenti Administratsiyasiga taqdim etadi.

Respublikaning biror viloyatidan munosib nomzod tavsiya etilmagan taqdirda ushbu hududga ajratilgan oʻrin Toshkent shahri, Qoraqalpogʻiston Respublikasi va boshqa viloyatlarga berilishi mumkin.

13. Oʻzbekiston Respublikasi Prezidenti Administratsiyasi bilan kelishilgan nomzodlar roʻyxati (tanlov gʻoliblari) Respublika komissiyasining tegishli qarori bilan tasdiqlanadi.

Tanlov gʻoliblari ularni ragʻbatlantirish toʻgʻrisida Respublika komissiyasining tegishli qarori asosida ushbu qaror qabul qilingan kunda belgilangan bazaviy hisoblash miqdorining 50 baravari miqdorida bir martalik pul mukofoti bilan moddiy ragʻbatlantiriladi va ularga mukofotlanganlik toʻgʻrisida sertifikat topshiriladi.

5-bob. Taqdirlash marosimini tashkil etish va oʻtkazish

14. Mukofotlash marosimi har yili Toshkent shahrida Mustaqillik bayrami arafasida oʻtkaziladi.

15. Ushbu Nizom talablari asosida mukofotlash takroran amalga oshirilmaydi.

16. Mukofotlash uchun zarur mablagʻlar Oʻzbekiston Respublikasi Madaniyat vazirligining madaniy tadbirlarni moliyalashtirish uchun har yili nazarda tutiladigan Oʻzbekiston Respublikasi Davlat budjeti mablagʻlaridan ajratiladi.

17. Mukofotlanadigan madaniyat va sanʼat vakillari roʻyxati respublika ommaviy axborot vositalarida eʼlon qilinadi.

6-bob. Yakunlovchi qoida

18. Ushbu Nizom talablari buzilishida aybdor boʻlgan shaxslar qonunchilikka muvofiq javob beradilar.

Mukofotlashga tavsiya etilayotgan nomzodlarning hujjatlarini qabul qilish

Vazirlar Mahkamasining 2018-yil 6-apreldagi 271-son qaroriga 2-ILOVA

A. Aripov — Oʻzbekiston Respublikasining Bosh vaziri, Respublika komissiyasi raisi B. Sayfullayev — Oʻzbekiston Respublikasi madaniyat vaziri, Respublika komissiyasi raisi oʻrinbosari K. Akilova — Oʻzbekiston Respublikasi madaniyat vazirining oʻrinbosari Sh. Rizayev — “Oʻzbekkino” Milliy agentligi bosh direktorining birinchi oʻrinbosari F. Tashmuhamedov — Oʻzbekiston Badiiy akademiyasi raisining oʻrinbosari S. Saidov — Oʻzbekiston Yozuvchilar uyushmasi raisining birinchi oʻrinbosari, Oʻzbekiston xalq shoiri X. Raximov — Oʻzbekiston kompozitorlari va bastakorlari uyushmasi raisi oʻrinbosari, Oʻzbekiston sanʼat arbobi Sh. Toxtasimov — Toshkent davlat milliy raqs va xoreografiya oliy maktabi rektori S. Begmatov — Oʻzbekiston Milliy maqom sanʼati markazi rahbari, sanʼatshunoslik fanlari nomzodi, professor B. Qurbonov — R. Glier nomidagi Respublika ixtisoslashtirilgan musiqa akademik litseyi direktori, Oʻzbekistonda xizmat koʻrsatgan yoshlar murabbiyi, professor F. Zokirov — Oʻzbekiston xalq artisti Yo. Ahmedov — Oʻzbekiston xalq artisti Z. Zoirov — Vazirlar Mahkamasining yetakchi mutaxassisi, Respublika komissiyasi masʼul kotibi

Vazirlar Mahkamasining 2018-yil 6-apreldagi 271-son qaroriga 3-ILOVA

lavozimiga koʻra — Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari, Komissiya raisi lavozimiga koʻra — Qoraqalpogʻiston Respublikasi madaniyat vaziri, viloyat madaniyat boshqarmasi boshligʻi va Toshkent shahar madaniyat bosh boshqarmasi boshligʻi, Komissiya raisining oʻrinbosari lavozimiga koʻra — Oʻzbekiston Yozuvchilar uyushmasining hududiy boʻlinmasi rahbari lavozimiga koʻra — “Oʻzbekkino” milliy agentligining hududiy boʻlimi rahbari lavozimiga koʻra — Oʻzbekiston Badiiy akademiyasining Badiiy ijodkorlar uyushmasi hududiy boʻlimi raisi lavozimiga koʻra — Oʻzbekiston kompozitorlari va bastakorlari uyushmasining hududiy boʻlimi raisi lavozimiga koʻra — Akademik va xalq badiiy jamoalari direksiyasining hududiy boʻlinmalari rahbari

Oʻzbekiston Respublikasining Bosh vaziri A. ARIPOV

Toshkent sh.,

2018-yil 6-aprel,

271-son

(Qonun hujjatlari maʼlumotlari milliy bazasi, 09.04.2018-y., 09/18/271/1043-son; 14.05.2019-y., 09/19/397/3123-son; 29.12.2019-y., 09/19/1046/4242-son; Qonunchilik maʼlumotlari milliy bazasi, 24.07.2021-y., 06/21/6269/0704-son; 05.04.2022-y., 09/22/153/0266-son)

lex.uz