📅 2018-yil 6-mart · Vazirlik va idoralar hujjatlari · Moliya vazirligi Oliy va oʻrta maxsus taʼlim vazirligi
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 6 март · Вазирлик ва идоралар ҳужжатлари · Молия вазирлиги Олий ва ўрта махсус таълим вазирлиги
Расмий матн. Расмий ҳужжат. Таҳририй изоҳлар киритилмаган.
📅 6 марта 2018 г. · Документы министерств и ведомств · Министерства финансов Министерства высшего и среднего специального образования
Официальный текст. Официальный документ. Редакционные примечания не включены.
📅 6 March 2018 · Ministry and agency documents · Moliya vazirligi Oliy va oʻrta maxsus taʼlim vazirligi
Official text. Official document. Editorial notes are not included.
Ўзбекистон Республикаси Молия вазирлиги Ўзбекистон Республикаси Олий ва ўрта махсус таълим вазирлигининг
Қарори
ҚОИДАЛАРИ
Ўзбекистон ёшлар иттифоқи томонидан Ўзбекистон Республикаси Қуролли Кучлари сафида муддатли ҳарбий хизматни ўтаган ва олий таълим муассасаларига тўлов-контракт шакли асосида ўқишга қабул қилинган талабаларга моддий ёрдам кўрсатиш қоидаларини тасдиқлаш тўғрисида
Ўзбекистон Республикаси Президентининг 2017 йил 5 июлдаги ПФ-5106-сон «Ёшларга оид давлат сиёсати самарадорлигини ошириш ва Ўзбекистон ёшлар иттифоқи фаолиятини қўллаб-қувватлаш тўғрисида»ги Фармони ҳамда Ўзбекистон Республикаси Президентининг 2005 йил 31 октябрдаги ПҚ-213-сон «Ўзбекистон Республикаси Қуролли Кучлари сафида муддатли ҳарбий хизматни ўтаётган ҳарбий хизматчиларга бериладиган имтиёзлар тизимини янада такомиллаштириш чора-тадбирлари тўғрисида»ги қарорига мувофиқ Ўзбекистон Республикаси Молия вазирлиги ва Олий ва ўрта махсус таълим вазирлиги қарор қилади:
1. Ўзбекистон ёшлар иттифоқи томонидан Ўзбекистон Республикаси Қуролли Кучлари сафида муддатли ҳарбий хизматни ўтаган ва олий таълим муассасаларига тўлов-контракт шакли асосида ўқишга қабул қилинган талабаларга моддий ёрдам кўрсатиш қоидалари иловага мувофиқ тасдиқлансин.
2. Ўзбекистон Республикаси Молия вазирлиги ва Олий ва ўрта махсус таълим вазирлигининг 2016 йил 26 сентябрдаги 73, 4-2016-сон «Ўзбекистон «Камолот» ёшлар ижтимоий ҳаракати томонидан Ўзбекистон Республикаси Қуролли Кучлари сафида муддатли ҳарбий хизматни ўтаган ва олий таълим муассасаларига тўлов-контракт шакли асосида ўқишга қабул қилинган талабаларга моддий ёрдам кўрсатиш қоидаларини тасдиқлаш тўғрисида»ги қарори (рўйхат рақами 2838, 2016 йил 15 ноябрь) (Ўзбекистон Республикаси қонун ҳужжатлари тўплами, 2016 й., 46-сон, 533-модда) ўз кучини йўқотган деб топилсин.
3. Мазкур қарор расмий эълон қилинган кундан эътиборан кучга киради.
Ўзбекистон Республикаси Молия вазирлиги ҳамда Олий ва ўрта махсус таълими вазирлигининг 2018 йил 6 мартдаги 59, 5-2018-сон қарорига ИЛОВА
Ўзбекистон ёшлар иттифоқи томонидан Ўзбекистон Республикаси Қуролли Кучлари сафида муддатли ҳарбий хизматни ўтаган ва олий таълим муассасаларига тўлов-контракт шакли асосида ўқишга қабул қилинган талабаларга моддий ёрдам кўрсатиш
Мазкур Қоидалар Ўзбекистон Республикаси Президентининг 2005 йил 31 октябрдаги ПҚ-213-сон «Ўзбекистон Республикаси Қуролли Кучлари сафида муддатли ҳарбий хизматни ўтаётган ҳарбий хизматчиларга бериладиган имтиёзлар тизимини янада такомиллаштириш чора-тадбирлари тўғрисида»ги қарорига мувофиқ Ўзбекистон ёшлар иттифоқи (бундан буён матнда Иттифоқ деб юритилади) томонидан Ўзбекистон Республикаси Қуролли Кучлари сафида муддатли ҳарбий хизматни ўтаган, ҳарбий қисмлар қўмондонлигининг тавсияномасига эга бўлган, Ўзбекистон Республикаси олий таълим муассасаларига тўлов-контракт шакли асосида ўқишга қабул қилинган талабаларга моддий ёрдам кўрсатиш шартлари ва тартибини белгилайди.
1-боб. Умумий қоидалар
1. Мазкур Қоидалар олий таълим муассасаларида бакалавриат таълим йўналиши бўйича тўлов-контракт шакли асосида ўқиётган талабаларга нисбатан қўлланилади.
2. Мазкур Қоидаларга мувофиқ Ўзбекистон Республикаси Қуролли Кучлари сафида муддатли ҳарбий хизматни ўтаган, ҳарбий қисмлар қўмондонлигининг тавсияномасига эга бўлган, Ўзбекистон Республикаси олий таълим муассасаларига тўлов-контракт шакли асосида ўқишга қабул қилинган талабалар жорий ўқиш йилида Иттифоқнинг олий таълим муассасаларидаги бошланғич ташкилоти фаолиятида фаол қатнашган тақдирда Иттифоқ томонидан моддий ёрдам олиш ҳуқуқига эга бўлади.
3. Ўзбекистон Республикаси таълим муассасаларига ўқишга қабул қилиш бўйича Давлат комиссияси қарори билан олий таълим муассасаларининг бакалавриат таълим йўналишига қўшимча оширилган тўлов-контракт асосида ўқишга қабул қилинган талабалар бакалавриат таълим йўналишининг иккинчи босқичидан бошлаб моддий ёрдам олиш ҳуқуқига эга бўлади.
4. Моддий ёрдам кўрсатиш Иттифоқ томонидан мазкур Қоидаларнинг 1-бандида кўрсатилган талабаларга тўлов-контракт шакли асосида ўқиш учун тузилган шартнома миқдорининг 35 фоизини тўлаш орқали кўрсатилади. Бунда талабаларга моддий ёрдам кўрсатиш улар томонидан шартномада белгиланган тўлов миқдорининг 65 фоизини белгиланган муддатларда тўлаш шарти билан амалга оширилади.
2-боб. Талабаларга моддий ёрдам кўрсатиш тўғрисидаги масалани кўриб чиқиш
5. Ҳар йили 1 февралдан кечикмай олий таълим муассасаси Иттифоқнинг олий таълим муассасасидаги бошланғич ташкилоти Ёшлар Кенгашига (бундан буён матнда Иттифоқнинг Ёшлар Кенгаши деб юритилади) Ўзбекистон Республикаси Қуролли Кучлари сафида муддатли ҳарбий хизматни ўтаган, ҳарбий қисмлар қўмондонлигининг тавсияномасига эга бўлган ва олий таълим муассасасига тўлов-контракт шакли асосида ўқишга қабул қилинган талабаларнинг (бундан буён матнда талабалар деб юритилади) рўйхатини, шунингдек уларнинг ўзлаштириши ва интизоми тўғрисидаги маълумотларни тақдим қилади.
6. Ҳар йили 20 февралдан кечикмай талабалар Иттифоқнинг Ёшлар Кенгашига Иттифоқ томонидан моддий ёрдам кўрсатилиши тўғрисида ариза билан мурожаат қилади.
7. Ҳар йили 1 мартдан 5 мартга қадар бўлган муддатда Иттифоқнинг Ёшлар Кенгаши талабаларнинг аризаларини кўриб чиқади ҳамда мазкур Қоидаларнинг 9-бандида кўрсатилган кўрсаткичлар асосида қарор қабул қилади.
8. Иттифоқнинг Ёшлар Кенгаши талабаларнинг аризаларини кўриб чиқиш натижасида:
талабага моддий ёрдам кўрсатиш тўғрисида Иттифоқнинг Марказий Кенгашига тавсия этиш ҳақида;
талабани моддий ёрдамга тавсия этишни рад этиш ҳақида қарор қабул қилади.
Талабани моддий ёрдамга тавсия этиш рад этилган тақдирда, Иттифоқнинг Ёшлар Кенгаши мажлисининг баёнида муайян талаба нима учун рад этилганлиги сабаблари аниқ кўрсатилади.
9. Иттифоқнинг Ёшлар Кенгаши талабаларни моддий ёрдамга тавсия этиш тўғрисидаги масалани кўриб чиқишда талабаларнинг олдинги ўқув йилидаги қуйидаги асосий кўрсаткичлари (биринчи босқич талабалари учун ўқув йилининг биринчи семестр натижалари) инобатга олади:
талабанинг Иттифоқ фаолиятидаги (маънавий-маърифий ва жамоат ишларида, Иттифоқнинг Ёшлар Кенгаши, маҳаллий ва ҳудудий кенгашлари, Иттифоқнинг Марказий Кенгаши томонидан ташкил этилган лойиҳа танловлардаги) фаол иштироки;
талабанинг олий таълим муассасасида белгиланган ички тартиб-қоидаларига риоя этиши (ички тартиб қоидаларга риоя этилмаганлиги ҳолати фақатгина олий таълим муассасаси ректори томонидан эълон қилинган ҳайфсан олганлиги билан аниқланади, бунда талабанинг талабалик гувоҳномаси ҳамда рейтинг дафтарчасининг йўқотилганлиги учун олий таълим муассасаси ректори томонидан эълон қилинган хайфсан инобатга олинмайди);
талабанинг ўрганилаётган даврдаги ўртача ўзлаштириш кўрсаткичи. Бунда талабанинг ўртача ўзлаштириш кўрсаткичи 71 ва ундан юқори фоиз бўлиши лозим. Талабанинг ўртача ўзлаштириш кўрсаткичи ўрганилаётган даврдаги ўқув фанлари бўйича ўзлаштириш кўрсаткичлари йиғиндисини ўтилган ҳар бир семестрдаги ўқув фанларининг умумий сонига бўлиш орқали аниқланади.
10. Иттифоқнинг Ёшлар Кенгаши томонидан моддий ёрдам кўрсатиш учун талабаларни тавсия этиш тўғрисидаги қарор жорий ўқув йили мобайнида ҳақиқий ҳисобланади.
11. Иттифоқнинг Ёшлар Кенгаши мажлиси унинг ишида Кенгаш жами аъзоларининг камида 2/3 қисми иштирок этган тақдирда ваколатли ҳисобланади.
Кенгаш мажлисининг баённомаси Иттифоқнинг Ёшлар Кенгаши раҳбари ва Кенгашнинг мажлисида иштирок этган барча аъзолари томонидан имзоланади.
12. Иттифоқнинг Ёшлар Кенгаши мажлиси баённомасининг нусхаси уч иш кунида олий таълим муассасасига ва Иттифоқнинг Марказий Кенгашига тақдим этилади.
Баённоманинг нусхасига моддий ёрдам кўрсатишга тавсия этилган талабаларнинг рўйхати илова қилинади.
13. Иттифоқнинг Марказий Кенгаши Ёшлар Кенгашининг қарорини тасдиқлаш тўғрисидаги масалани ҳужжатлар қабул қилингандан кейин ўн беш иш кунидан кечиктирмасдан кўриб чиқади.
14. Иттифоқнинг Марказий Кенгаши қарорининг бир нусхаси олий таълим муассасасига, бир нусхаси Иттифоқнинг Ёшлар Кенгашига юборилади.
15. Иттифоқнинг Марказий Кенгаши талабаларга моддий ёрдам кўрсатиш тўғрисидаги қарори қабул қилингандан кейин ўн банк куни мобайнида олий таълим муассасасининг бюджетдан ташқари маблағлар бўйича шахсий ғазна ҳисобварақларига моддий ёрдам кўрсатиш пулини ўтказади.
16. Олий таълим муассасаларининг ёзма мурожаатига кўра Иттифоқнинг Марказий Кенгаши томонидан Олий таълим, фан ва инновациялар вазирлиги билан келишилган ҳолда талабаларни тавсия этиш билан боғлиқ масалани кўриб чиқиш муддатларига ўзгартириш киритилиши мумкин.
3-боб. Моддий ёрдам кўрсатиш пулининг қайтарилиши
17. Талабалар сафидан чиқарилган ёки академик таътилга чиққан талаба Олий ва ўрта махсус, касб-ҳунар таълими муассасаларида ўқитишнинг тўлов-контракт шакли ва ундан тушган маблағларни тақсимлаш тартиби тўғрисидаги низомнинг (рўйхат рақами 2431, 2013 йил 26 февраль) 28 ва 29-бандларига мувофиқ ўзининг тўлов-контракт асосида ўқиши учун тўлаган маблағини қайтариб олиш ҳуқуқига эга бўлган ҳолларда Иттифоқнинг Марказий Кенгаши томонидан олий таълим муассасаларининг бюджетдан ташқари маблағлар бўйича шахсий ғазна ҳисобварақларига ўтказилган моддий ёрдам кўрсатиш пули қайта ҳисоб-китоб қилиниши ва Иттифоқнинг Марказий Кенгашига қайтарилиши лозим.
18. Олий таълим муассасаси талабалари сафидан чиқарилган талаба Олий ва ўрта махсус, касб-ҳунар таълими муассасаларида ўқитишнинг тўлов-контракт шакли ва ундан тушган маблағларни тақсимлаш тартиби тўғрисидаги низомнинг (рўйхат рақами 2431, 2013 йил 26 февраль) 27-бандига мувофиқ ўзининг тўлов-контракт асосида ўқиши учун тўлаган маблағини қайтариб олиш ҳуқуқига эга бўлмаган ҳолларда Иттифоқнинг Марказий Кенгаши тўланган моддий ёрдам кўрсатиш пулини талабадан қонунчилик ҳужжатларида белгиланган тартибда ундиради.
19. Талаба моддий ёрдам олиш ҳуқуқидан воз кечса, олий таълим муассасаси талаба учун тўланган маблағни Иттифоқнинг Марказий Кенгашига ўн кун ичида қайтаради.
20. Мазкур Қоидаларнинг 17 — 19-бандларида кўрсатилган ҳолатлар юз берган тақдирда Иттифоқнинг Ёшлар Кенгаши Иттифоқнинг Марказий Кенгашига ўн кун ичида хабар беради.
4-боб. Якунловчи қоидалар
21. Мазкур Қоидалар талабларининг бажарилиши, шунингдек Иттифоқ томонидан моддий ёрдам кўрсатилган талабаларнинг ўқув жараёнидаги иштироки, уларнинг ўзлаштириши, интизоми ва Иттифоқ фаолиятидаги иштироки устидан назорат қилиш тегишинча олий таълим муассасаси ҳамда Иттифоқнинг Ёшлар Кенгаши зиммасига юклатилади.
22. Ушбу Қоидалар Ўзбекистон ёшлар иттифоқи Марказий Кенгаши билан келишилган.
Молия вазири Д. КУЧКАРОВ
Олий ва ўрта махсус таълим вазири И. МАДЖИДОВ
Ўзбекистон ёшлар иттифоқи Марказий Кенгаши раиси Қ. ҚУРАНБАЕВ
Тошкент ш.,
2018 йил 6 март,
Тошкент ш.,
2018 йил 6 март,
2018 йил 6 март
59-сон
5-2018-сон
Oʻzbekiston Respublikasi Moliya vazirligi Oʻzbekiston Respublikasi Oliy va oʻrta maxsus taʼlim vazirligining
Qarori
QOIDALARI
Oʻzbekiston yoshlar ittifoqi tomonidan Oʻzbekiston Respublikasi Qurolli Kuchlari safida muddatli harbiy xizmatni oʻtagan va oliy taʼlim muassasalariga toʻlov-kontrakt shakli asosida oʻqishga qabul qilingan talabalarga moddiy yordam koʻrsatish qoidalarini tasdiqlash toʻgʻrisida
Oʻzbekiston Respublikasi Prezidentining 2017-yil 5-iyuldagi PF-5106-son “Yoshlarga oid davlat siyosati samaradorligini oshirish va Oʻzbekiston yoshlar ittifoqi faoliyatini qoʻllab-quvvatlash toʻgʻrisida”gi Farmoni hamda Oʻzbekiston Respublikasi Prezidentining 2005-yil 31-oktabrdagi PQ-213-son “Oʻzbekiston Respublikasi Qurolli Kuchlari safida muddatli harbiy xizmatni oʻtayotgan harbiy xizmatchilarga beriladigan imtiyozlar tizimini yanada takomillashtirish chora-tadbirlari toʻgʻrisida”gi qaroriga muvofiq Oʻzbekiston Respublikasi Moliya vazirligi va Oliy va oʻrta maxsus taʼlim vazirligi qaror qiladi:
1. Oʻzbekiston yoshlar ittifoqi tomonidan Oʻzbekiston Respublikasi Qurolli Kuchlari safida muddatli harbiy xizmatni oʻtagan va oliy taʼlim muassasalariga toʻlov-kontrakt shakli asosida oʻqishga qabul qilingan talabalarga moddiy yordam koʻrsatish qoidalari ilovaga muvofiq tasdiqlansin.
2. Oʻzbekiston Respublikasi Moliya vazirligi va Oliy va oʻrta maxsus taʼlim vazirligining 2016-yil 26-sentabrdagi 73, 4-2016-son “Oʻzbekiston “Kamolot” yoshlar ijtimoiy harakati tomonidan Oʻzbekiston Respublikasi Qurolli Kuchlari safida muddatli harbiy xizmatni oʻtagan va oliy taʼlim muassasalariga toʻlov-kontrakt shakli asosida oʻqishga qabul qilingan talabalarga moddiy yordam koʻrsatish qoidalarini tasdiqlash toʻgʻrisida”gi qarori (roʻyxat raqami 2838, 2016-yil 15-noyabr) (Oʻzbekiston Respublikasi qonun hujjatlari toʻplami, 2016-y., 46-son, 533-modda) oʻz kuchini yoʻqotgan deb topilsin.
3. Mazkur qaror rasmiy eʼlon qilingan kundan eʼtiboran kuchga kiradi.
Oʻzbekiston Respublikasi Moliya vazirligi hamda Oliy va oʻrta maxsus taʼlimi vazirligining 2018-yil 6-martdagi 59, 5-2018-son qaroriga ILOVA
Oʻzbekiston yoshlar ittifoqi tomonidan Oʻzbekiston Respublikasi Qurolli Kuchlari safida muddatli harbiy xizmatni oʻtagan va oliy taʼlim muassasalariga toʻlov-kontrakt shakli asosida oʻqishga qabul qilingan talabalarga moddiy yordam koʻrsatish
Mazkur Qoidalar Oʻzbekiston Respublikasi Prezidentining 2005-yil 31-oktabrdagi PQ-213-son “Oʻzbekiston Respublikasi Qurolli Kuchlari safida muddatli harbiy xizmatni oʻtayotgan harbiy xizmatchilarga beriladigan imtiyozlar tizimini yanada takomillashtirish chora-tadbirlari toʻgʻrisida”gi qaroriga muvofiq Oʻzbekiston yoshlar ittifoqi (bundan buyon matnda Ittifoq deb yuritiladi) tomonidan Oʻzbekiston Respublikasi Qurolli Kuchlari safida muddatli harbiy xizmatni oʻtagan, harbiy qismlar qoʻmondonligining tavsiyanomasiga ega boʻlgan, Oʻzbekiston Respublikasi oliy taʼlim muassasalariga toʻlov-kontrakt shakli asosida oʻqishga qabul qilingan talabalarga moddiy yordam koʻrsatish shartlari va tartibini belgilaydi.
1-bob. Umumiy qoidalar
1. Mazkur Qoidalar oliy taʼlim muassasalarida bakalavriat taʼlim yoʻnalishi boʻyicha toʻlov-kontrakt shakli asosida oʻqiyotgan talabalarga nisbatan qoʻllaniladi.
2. Mazkur Qoidalarga muvofiq Oʻzbekiston Respublikasi Qurolli Kuchlari safida muddatli harbiy xizmatni oʻtagan, harbiy qismlar qoʻmondonligining tavsiyanomasiga ega boʻlgan, Oʻzbekiston Respublikasi oliy taʼlim muassasalariga toʻlov-kontrakt shakli asosida oʻqishga qabul qilingan talabalar joriy oʻqish yilida Ittifoqning oliy taʼlim muassasalaridagi boshlangʻich tashkiloti faoliyatida faol qatnashgan taqdirda Ittifoq tomonidan moddiy yordam olish huquqiga ega boʻladi.
3. Oʻzbekiston Respublikasi taʼlim muassasalariga oʻqishga qabul qilish boʻyicha Davlat komissiyasi qarori bilan oliy taʼlim muassasalarining bakalavriat taʼlim yoʻnalishiga qoʻshimcha oshirilgan toʻlov-kontrakt asosida oʻqishga qabul qilingan talabalar bakalavriat taʼlim yoʻnalishining ikkinchi bosqichidan boshlab moddiy yordam olish huquqiga ega boʻladi.
4. Moddiy yordam koʻrsatish Ittifoq tomonidan mazkur Qoidalarning 1-bandida koʻrsatilgan talabalarga toʻlov-kontrakt shakli asosida oʻqish uchun tuzilgan shartnoma miqdorining 35 foizini toʻlash orqali koʻrsatiladi. Bunda talabalarga moddiy yordam koʻrsatish ular tomonidan shartnomada belgilangan toʻlov miqdorining 65 foizini belgilangan muddatlarda toʻlash sharti bilan amalga oshiriladi.
2-bob. Talabalarga moddiy yordam koʻrsatish toʻgʻrisidagi masalani koʻrib chiqish
5. Har yili 1-fevraldan kechikmay oliy taʼlim muassasasi Ittifoqning oliy taʼlim muassasasidagi boshlangʻich tashkiloti Yoshlar Kengashiga (bundan buyon matnda Ittifoqning Yoshlar Kengashi deb yuritiladi) Oʻzbekiston Respublikasi Qurolli Kuchlari safida muddatli harbiy xizmatni oʻtagan, harbiy qismlar qoʻmondonligining tavsiyanomasiga ega boʻlgan va oliy taʼlim muassasasiga toʻlov-kontrakt shakli asosida oʻqishga qabul qilingan talabalarning (bundan buyon matnda talabalar deb yuritiladi) roʻyxatini, shuningdek ularning oʻzlashtirishi va intizomi toʻgʻrisidagi maʼlumotlarni taqdim qiladi.
6. Har yili 20-fevraldan kechikmay talabalar Ittifoqning Yoshlar Kengashiga Ittifoq tomonidan moddiy yordam koʻrsatilishi toʻgʻrisida ariza bilan murojaat qiladi.
7. Har yili 1-martdan 5-martga qadar boʻlgan muddatda Ittifoqning Yoshlar Kengashi talabalarning arizalarini koʻrib chiqadi hamda mazkur Qoidalarning 9-bandida koʻrsatilgan koʻrsatkichlar asosida qaror qabul qiladi.
8. Ittifoqning Yoshlar Kengashi talabalarning arizalarini koʻrib chiqish natijasida:
talabaga moddiy yordam koʻrsatish toʻgʻrisida Ittifoqning Markaziy Kengashiga tavsiya etish haqida;
talabani moddiy yordamga tavsiya etishni rad etish haqida qaror qabul qiladi.
Talabani moddiy yordamga tavsiya etish rad etilgan taqdirda, Ittifoqning Yoshlar Kengashi majlisining bayonida muayyan talaba nima uchun rad etilganligi sabablari aniq koʻrsatiladi.
9. Ittifoqning Yoshlar Kengashi talabalarni moddiy yordamga tavsiya etish toʻgʻrisidagi masalani koʻrib chiqishda talabalarning oldingi oʻquv yilidagi quyidagi asosiy koʻrsatkichlari (birinchi bosqich talabalari uchun oʻquv yilining birinchi semestr natijalari) inobatga oladi:
talabaning Ittifoq faoliyatidagi (maʼnaviy-maʼrifiy va jamoat ishlarida, Ittifoqning Yoshlar Kengashi, mahalliy va hududiy kengashlari, Ittifoqning Markaziy Kengashi tomonidan tashkil etilgan loyiha tanlovlardagi) faol ishtiroki;
talabaning oliy taʼlim muassasasida belgilangan ichki tartib-qoidalariga rioya etishi (ichki tartib qoidalarga rioya etilmaganligi holati faqatgina oliy taʼlim muassasasi rektori tomonidan eʼlon qilingan hayfsan olganligi bilan aniqlanadi, bunda talabaning talabalik guvohnomasi hamda reyting daftarchasining yoʻqotilganligi uchun oliy taʼlim muassasasi rektori tomonidan eʼlon qilingan xayfsan inobatga olinmaydi);
talabaning oʻrganilayotgan davrdagi oʻrtacha oʻzlashtirish koʻrsatkichi. Bunda talabaning oʻrtacha oʻzlashtirish koʻrsatkichi 71 va undan yuqori foiz boʻlishi lozim. Talabaning oʻrtacha oʻzlashtirish koʻrsatkichi oʻrganilayotgan davrdagi oʻquv fanlari boʻyicha oʻzlashtirish koʻrsatkichlari yigʻindisini oʻtilgan har bir semestrdagi oʻquv fanlarining umumiy soniga boʻlish orqali aniqlanadi.
10. Ittifoqning Yoshlar Kengashi tomonidan moddiy yordam koʻrsatish uchun talabalarni tavsiya etish toʻgʻrisidagi qaror joriy oʻquv yili mobaynida haqiqiy hisoblanadi.
11. Ittifoqning Yoshlar Kengashi majlisi uning ishida Kengash jami aʼzolarining kamida 2/3 qismi ishtirok etgan taqdirda vakolatli hisoblanadi.
Kengash majlisining bayonnomasi Ittifoqning Yoshlar Kengashi rahbari va Kengashning majlisida ishtirok etgan barcha aʼzolari tomonidan imzolanadi.
12. Ittifoqning Yoshlar Kengashi majlisi bayonnomasining nusxasi uch ish kunida oliy taʼlim muassasasiga va Ittifoqning Markaziy Kengashiga taqdim etiladi.
Bayonnomaning nusxasiga moddiy yordam koʻrsatishga tavsiya etilgan talabalarning roʻyxati ilova qilinadi.
13. Ittifoqning Markaziy Kengashi Yoshlar Kengashining qarorini tasdiqlash toʻgʻrisidagi masalani hujjatlar qabul qilingandan keyin oʻn besh ish kunidan kechiktirmasdan koʻrib chiqadi.
14. Ittifoqning Markaziy Kengashi qarorining bir nusxasi oliy taʼlim muassasasiga, bir nusxasi Ittifoqning Yoshlar Kengashiga yuboriladi.
15. Ittifoqning Markaziy Kengashi talabalarga moddiy yordam koʻrsatish toʻgʻrisidagi qarori qabul qilingandan keyin oʻn bank kuni mobaynida oliy taʼlim muassasasining budjetdan tashqari mablagʻlar boʻyicha shaxsiy gʻazna hisobvaraqlariga moddiy yordam koʻrsatish pulini oʻtkazadi.
16. Oliy taʼlim muassasalarining yozma murojaatiga koʻra Ittifoqning Markaziy Kengashi tomonidan Oliy taʼlim, fan va innovatsiyalar vazirligi bilan kelishilgan holda talabalarni tavsiya etish bilan bogʻliq masalani koʻrib chiqish muddatlariga oʻzgartirish kiritilishi mumkin.
3-bob. Moddiy yordam koʻrsatish pulining qaytarilishi
17. Talabalar safidan chiqarilgan yoki akademik taʼtilga chiqqan talaba Oliy va oʻrta maxsus, kasb-hunar taʼlimi muassasalarida oʻqitishning toʻlov-kontrakt shakli va undan tushgan mablagʻlarni taqsimlash tartibi toʻgʻrisidagi nizomning (roʻyxat raqami 2431, 2013-yil 26-fevral) 28 va 29-bandlariga muvofiq oʻzining toʻlov-kontrakt asosida oʻqishi uchun toʻlagan mablagʻini qaytarib olish huquqiga ega boʻlgan hollarda Ittifoqning Markaziy Kengashi tomonidan oliy taʼlim muassasalarining budjetdan tashqari mablagʻlar boʻyicha shaxsiy gʻazna hisobvaraqlariga oʻtkazilgan moddiy yordam koʻrsatish puli qayta hisob-kitob qilinishi va Ittifoqning Markaziy Kengashiga qaytarilishi lozim.
18. Oliy taʼlim muassasasi talabalari safidan chiqarilgan talaba Oliy va oʻrta maxsus, kasb-hunar taʼlimi muassasalarida oʻqitishning toʻlov-kontrakt shakli va undan tushgan mablagʻlarni taqsimlash tartibi toʻgʻrisidagi nizomning (roʻyxat raqami 2431, 2013-yil 26-fevral) 27-bandiga muvofiq oʻzining toʻlov-kontrakt asosida oʻqishi uchun toʻlagan mablagʻini qaytarib olish huquqiga ega boʻlmagan hollarda Ittifoqning Markaziy Kengashi toʻlangan moddiy yordam koʻrsatish pulini talabadan qonunchilik hujjatlarida belgilangan tartibda undiradi.
19. Talaba moddiy yordam olish huquqidan voz kechsa, oliy taʼlim muassasasi talaba uchun toʻlangan mablagʻni Ittifoqning Markaziy Kengashiga oʻn kun ichida qaytaradi.
20. Mazkur Qoidalarning 17 — 19-bandlarida koʻrsatilgan holatlar yuz bergan taqdirda Ittifoqning Yoshlar Kengashi Ittifoqning Markaziy Kengashiga oʻn kun ichida xabar beradi.
4-bob. Yakunlovchi qoidalar
21. Mazkur Qoidalar talablarining bajarilishi, shuningdek Ittifoq tomonidan moddiy yordam koʻrsatilgan talabalarning oʻquv jarayonidagi ishtiroki, ularning oʻzlashtirishi, intizomi va Ittifoq faoliyatidagi ishtiroki ustidan nazorat qilish tegishincha oliy taʼlim muassasasi hamda Ittifoqning Yoshlar Kengashi zimmasiga yuklatiladi.
22. Ushbu Qoidalar Oʻzbekiston yoshlar ittifoqi Markaziy Kengashi bilan kelishilgan.
Moliya vaziri D. KUCHKAROV
Oliy va oʻrta maxsus taʼlim vaziri I. MADJIDOV
Oʻzbekiston yoshlar ittifoqi Markaziy Kengashi raisi Q. QURANBAYEV
Toshkent sh.,
2018-yil 6-mart,
Toshkent sh.,
2018-yil 6-mart,
2018-yil 6-mart
59-son
5-2018-son