📅 2018-yil 4-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 4 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 4 мая 2018 г. · Постановления Кабинета Министров
Официальный текст. Официальный документ. Редакционные примечания не включены.
📅 4 May 2018 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Болалар ва ўсмирлар адабиётини нашр этиш тизимини янада такомиллаштириш ва давлат томонидан қўллаб-қувватлаш чора-тадбирлари тўғрисида
Мамлакатимизда китобхонлик ва мутолаа маданиятини юксалтиришга қаратилган сиёсатни изчил давом эттириш, болалар ва ўсмирлар адабиётини нашр этиш тизимини такомиллаштириш ва давлат томонидан қўллаб-қувватлаш, болалар ва ўсмирларнинг маънавий, жисмоний ва ахлоқий жиҳатдан камол топиши, адабиётга қизиқишини, китобга ҳурматини ошириш, китобхонлик ва мутолаа маданиятини юксалтириш борасида олиб борилаётган ишларни янги босқичга кўтариш мақсадида Вазирлар Маҳкамаси қарор қилади:
1. Ўзбекистон Ёзувчилар уюшмасининг манфаатдор вазирлик ва идоралар билан биргаликда 2018 — 2022 йилларда болалар ва ўсмирлар адабиётини нашр этиш тизимини янада такомиллаштириш ва давлат томонидан қўллаб-қувватлаш бўйича қуйидагиларни назарда тутувчи чора-тадбирлар режасини икки ой муддатда ишлаб чиқиш тўғрисидаги таклифи маъқуллансин:
Ўзбекистон Ёзувчилар уюшмаси ҳамда Ўзбекистон Матбуот ва ахборот агентлигининг Болалар ва ўсмирлар адабиёти кенгаши фаолиятини янада такомиллаштириш;
болалар ва ўсмирлар учун мўлжалланган китобларни нашр қилишга ихтисослаштирилган нашриётларни аниқлаш мезонларини ишлаб чиқиш, уларни қўллаб-қувватлаш ва ривожлантириш;
болалар ва ўсмирлар дунёқарашини кенгайтириш, уларни эртанги куннинг чинакам қаҳрамонлари сифатида тарбиялашга қаратилган асарлар яратилишини рағбатлантириб бориш;
яратилаётган янги асарларни мактаб, академик лицей ва касб-ҳунар коллежлари, олий таълим муассасаларида кенг тарғиб қилиш мақсадида ушбу асарлар муаллифлари иштирокида мунтазам ижодий учрашувлар ташкил этиш;
болалар ва ўсмирлар мавзусида ижод қилаётган адибларга «Ижод» жамоат фонди маблағлари ҳисобидан аниқ ижтимоий буюртмалар бериш тизимини такомиллаштириш;
болалар ва ўсмирлар мавзусида ижод қиладиган ёш адиб ва шоирларни тарбиялаш, уларнинг ижод намуналарини чоп этиб бориш.
2. Ўзбекистон Республикаси Халқ таълими вазирлиги Мактабгача таълим вазирлиги, Ўзбекистон Матбуот ва ахборот агентлиги ҳамда Ёзувчилар уюшмаси билан биргаликда:
умумтаълим мактаблари ҳамда мактабгача таълим муассасалари учун болалар ва ўсмирларга мўлжалланган китобларни нашр этиш квоталари ўқувчилар (тарбияланувчилар) сони ва эҳтиёжидан келиб чиққан ҳолда белгиланишини;
квоталар асосида болалар дунёқарашини кенгайтиришга, уларнинг маънавий, интеллектуал оламини бойитишга қаратилган, болалар психологиясига мос адабиётларнинг босқичма-босқич чоп этилишини таъминласин.
3. Белгилаб қўйилсинки:
а) Ўзбекистон Матбуот ва ахборот агентлиги белгиланган квоталарга асосан ҳар йили чоп этиладиган болалар ва ўсмирлар учун мўлжалланган китобларнинг оригинал макетларини ишлаб чиқиш ва тайёрлаш учун тегишли ташкилотни энг мақбул таклифлар асосида аниқлайди;
б) умумтаълим мактаблари ҳамда мактабгача таълим муассасаларининг кутубхоналарини юқори сифат билан чоп этилган болалар ва ўсмирларга мўлжалланган китоблар билан таъминлаш учун харажатлар қуйидаги манбалар ҳисобидан қопланади:
Ўзбекистон Республикаси Молия вазирлиги ҳузуридаги бюджетдан ташқари Республика мақсадли китоб жамғармаси маблағлари;
Ўзбекистон Республикаси Халқ таълими вазирлиги ва Мактабгача таълим вазирлиги, уларнинг тизимидаги муассасаларга ушбу мақсадлар учун ажратилган бюджет маблағлари, шунингдек, ушбу ташкилотларнинг бюджетдан ташқари маблағлари.
4. Ўзбекистон Республикаси Халқ таълими вазирлиги ҳамда Олий ва ўрта махсус таълим вазирлиги Ўзбекистон Ёзувчилар уюшмаси, Ёшлар иттифоқи, Республика Маънавият ва маърифат маркази билан биргаликда икки ой муддатда:
2018-2019 ўқув йилидан бошлаб, болалар ва ўсмирлар ўртасида китобхонлик маданиятини юксалтириш ва мутолаа кўникмаларини ошириш мақсадида болалар ва ўсмирлар ўқиши зарур бўлган адабиётлар рўйхатини шакллантирсин;
умумтаълим мактаблари, академик лицей, касб-ҳунар коллежлари ва олий таълим муассасаларида ҳар ойнинг охирги шанба кунини «Иншолар куни» деб эълон қилган ҳолда, ўқувчи ва талабалар ўртасида ўзлари ўқиган китоблар бўйича иншолар танловини ташкил этиш ҳамда уларни рағбатлантириш механизмини ишлаб чиқсин.
5. Ўзбекистон Матбуот ва ахборот агентлигининг нашриёт-матбаа ижодий уйлари, «Шарқ» нашриёт-матбаа акциядорлик компанияси Ўзбекистон Ёзувчилар уюшмаси томонидан тавсия қилинадиган болалар ва ўсмирлар учун мўлжалланган адабиётларни арзон нархларда чоп этиш чораларини кўрсин.
6. Ўзбекистон Матбуот ва ахборот агентлиги, Ёшлар иттифоқи ва «Шарқ» нашриёт-матбаа акциядорлик компаниясига ўз тизимидаги китоб савдоси билан шуғулланувчи ташкилотлар томонидан ҳудудларга китобларни етказиш билан боғлиқ харажатларни ҳисоб-китоб қилишда болалар ва ўсмирларга мўлжалланган китоблар нархининг асоссиз равишда ошиб кетишига йўл қўймаслик чораларини кўриш тавсия этилсин.
7. Ўзбекистон Матбуот ва ахборот агентлиги, Ёзувчилар уюшмаси бошқа манфаатдор ташкилотлар билан биргаликда мазкур қарорнинг мазмун ва моҳияти юзасидан аҳоли ва китоб савдоси билан шуғулланувчи ташкилотлар ўртасида кенг тушунтириш ишларини олиб борсин.
8. Мазкур қарорнинг бажарилишини назорат қилиш Ўзбекистон Матбуот ва ахборот агентлиги Бош директори Л.Х. Тангриев зиммасига ҳамда Вазирлар Маҳкамасининг Маданият, санъат ва ёшлар сиёсати масалалари ахборот-таҳлил департаментига юклансин.
Ўзбекистон Республикасининг Бош вазири А. АРИПОВ
Тошкент ш.,
2018 йил 4 май,
335-сон
Oʻzbekiston Respublikasi Vazirlar Mahkamasining
qarori
Bolalar va oʻsmirlar adabiyotini nashr etish tizimini yanada takomillashtirish va davlat tomonidan qoʻllab-quvvatlash chora-tadbirlari toʻgʻrisida
Mamlakatimizda kitobxonlik va mutolaa madaniyatini yuksaltirishga qaratilgan siyosatni izchil davom ettirish, bolalar va oʻsmirlar adabiyotini nashr etish tizimini takomillashtirish va davlat tomonidan qoʻllab-quvvatlash, bolalar va oʻsmirlarning maʼnaviy, jismoniy va axloqiy jihatdan kamol topishi, adabiyotga qiziqishini, kitobga hurmatini oshirish, kitobxonlik va mutolaa madaniyatini yuksaltirish borasida olib borilayotgan ishlarni yangi bosqichga koʻtarish maqsadida Vazirlar Mahkamasi qaror qiladi:
1. Oʻzbekiston Yozuvchilar uyushmasining manfaatdor vazirlik va idoralar bilan birgalikda 2018 — 2022-yillarda bolalar va oʻsmirlar adabiyotini nashr etish tizimini yanada takomillashtirish va davlat tomonidan qoʻllab-quvvatlash boʻyicha quyidagilarni nazarda tutuvchi chora-tadbirlar rejasini ikki oy muddatda ishlab chiqish toʻgʻrisidagi taklifi maʼqullansin:
Oʻzbekiston Yozuvchilar uyushmasi hamda Oʻzbekiston Matbuot va axborot agentligining Bolalar va oʻsmirlar adabiyoti kengashi faoliyatini yanada takomillashtirish;
bolalar va oʻsmirlar uchun moʻljallangan kitoblarni nashr qilishga ixtisoslashtirilgan nashriyotlarni aniqlash mezonlarini ishlab chiqish, ularni qoʻllab-quvvatlash va rivojlantirish;
bolalar va oʻsmirlar dunyoqarashini kengaytirish, ularni ertangi kunning chinakam qahramonlari sifatida tarbiyalashga qaratilgan asarlar yaratilishini ragʻbatlantirib borish;
yaratilayotgan yangi asarlarni maktab, akademik litsey va kasb-hunar kollejlari, oliy taʼlim muassasalarida keng targʻib qilish maqsadida ushbu asarlar mualliflari ishtirokida muntazam ijodiy uchrashuvlar tashkil etish;
bolalar va oʻsmirlar mavzusida ijod qilayotgan adiblarga “Ijod” jamoat fondi mablagʻlari hisobidan aniq ijtimoiy buyurtmalar berish tizimini takomillashtirish;
bolalar va oʻsmirlar mavzusida ijod qiladigan yosh adib va shoirlarni tarbiyalash, ularning ijod namunalarini chop etib borish.
2. Oʻzbekiston Respublikasi Xalq taʼlimi vazirligi Maktabgacha taʼlim vazirligi, Oʻzbekiston Matbuot va axborot agentligi hamda Yozuvchilar uyushmasi bilan birgalikda:
umumtaʼlim maktablari hamda maktabgacha taʼlim muassasalari uchun bolalar va oʻsmirlarga moʻljallangan kitoblarni nashr etish kvotalari oʻquvchilar (tarbiyalanuvchilar) soni va ehtiyojidan kelib chiqqan holda belgilanishini;
kvotalar asosida bolalar dunyoqarashini kengaytirishga, ularning maʼnaviy, intellektual olamini boyitishga qaratilgan, bolalar psixologiyasiga mos adabiyotlarning bosqichma-bosqich chop etilishini taʼminlasin.
3. Belgilab qoʻyilsinki:
a) Oʻzbekiston Matbuot va axborot agentligi belgilangan kvotalarga asosan har yili chop etiladigan bolalar va oʻsmirlar uchun moʻljallangan kitoblarning original maketlarini ishlab chiqish va tayyorlash uchun tegishli tashkilotni eng maqbul takliflar asosida aniqlaydi;
b) umumtaʼlim maktablari hamda maktabgacha taʼlim muassasalarining kutubxonalarini yuqori sifat bilan chop etilgan bolalar va oʻsmirlarga moʻljallangan kitoblar bilan taʼminlash uchun xarajatlar quyidagi manbalar hisobidan qoplanadi:
Oʻzbekiston Respublikasi Moliya vazirligi huzuridagi budjetdan tashqari Respublika maqsadli kitob jamgʻarmasi mablagʻlari;
Oʻzbekiston Respublikasi Xalq taʼlimi vazirligi va Maktabgacha taʼlim vazirligi, ularning tizimidagi muassasalarga ushbu maqsadlar uchun ajratilgan budjet mablagʻlari, shuningdek, ushbu tashkilotlarning budjetdan tashqari mablagʻlari.
4. Oʻzbekiston Respublikasi Xalq taʼlimi vazirligi hamda Oliy va oʻrta maxsus taʼlim vazirligi Oʻzbekiston Yozuvchilar uyushmasi, Yoshlar ittifoqi, Respublika Maʼnaviyat va maʼrifat markazi bilan birgalikda ikki oy muddatda:
2018-2019 oʻquv yilidan boshlab, bolalar va oʻsmirlar oʻrtasida kitobxonlik madaniyatini yuksaltirish va mutolaa koʻnikmalarini oshirish maqsadida bolalar va oʻsmirlar oʻqishi zarur boʻlgan adabiyotlar roʻyxatini shakllantirsin;
umumtaʼlim maktablari, akademik litsey, kasb-hunar kollejlari va oliy taʼlim muassasalarida har oyning oxirgi shanba kunini “Insholar kuni” deb eʼlon qilgan holda, oʻquvchi va talabalar oʻrtasida oʻzlari oʻqigan kitoblar boʻyicha insholar tanlovini tashkil etish hamda ularni ragʻbatlantirish mexanizmini ishlab chiqsin.
5. Oʻzbekiston Matbuot va axborot agentligining nashriyot-matbaa ijodiy uylari, “Sharq” nashriyot-matbaa aksiyadorlik kompaniyasi Oʻzbekiston Yozuvchilar uyushmasi tomonidan tavsiya qilinadigan bolalar va oʻsmirlar uchun moʻljallangan adabiyotlarni arzon narxlarda chop etish choralarini koʻrsin.
6. Oʻzbekiston Matbuot va axborot agentligi, Yoshlar ittifoqi va “Sharq” nashriyot-matbaa aksiyadorlik kompaniyasiga oʻz tizimidagi kitob savdosi bilan shugʻullanuvchi tashkilotlar tomonidan hududlarga kitoblarni yetkazish bilan bogʻliq xarajatlarni hisob-kitob qilishda bolalar va oʻsmirlarga moʻljallangan kitoblar narxining asossiz ravishda oshib ketishiga yoʻl qoʻymaslik choralarini koʻrish tavsiya etilsin.
7. Oʻzbekiston Matbuot va axborot agentligi, Yozuvchilar uyushmasi boshqa manfaatdor tashkilotlar bilan birgalikda mazkur qarorning mazmun va mohiyati yuzasidan aholi va kitob savdosi bilan shugʻullanuvchi tashkilotlar oʻrtasida keng tushuntirish ishlarini olib borsin.
8. Mazkur qarorning bajarilishini nazorat qilish Oʻzbekiston Matbuot va axborot agentligi Bosh direktori L.X. Tangriyev zimmasiga hamda Vazirlar Mahkamasining Madaniyat, sanʼat va yoshlar siyosati masalalari axborot-tahlil departamentiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 4-may,
335-son