📅 2018-yil 14-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 14 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 14 мая 2018 г. · Постановления Кабинета Министров
Официальный текст. Официальный документ. Редакционные примечания не включены.
📅 14 May 2018 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Фарғона вилояти Марғилон шаҳрида Эркин Воҳидов номидаги ижод мактабини ташкил этиш тўғрисида
Нодир истеъдоди, бадиий теран, фалсафий шеър ва достонлари, драматик ва публицистик асарлари билан ўзбек адабиёти ривожига улкан ҳисса қўшган Ўзбекистон халқ шоири, Ўзбекистон Қаҳрамони Эркин Воҳидов номини абадийлаштириш, шоир издошларини кашф этиш ва уларнинг ўз истеъдодларини кенг намоён қилишлари учун шарт-шароитлар яратиш мақсадида Вазирлар Маҳкамаси қарор қилади:
1. Фарғона вилояти Марғилон шаҳрида Эркин Воҳидов номидаги ижод мактаби (кейинги ўринларда — ижод мактаби) ташкил этилсин.
2. Фарғона вилояти Марғилон шаҳрида Фарғона вилояти маҳаллий бюджети маблағлари ҳисобига 100 ўринли мактаб-интернат биноси ва 80 ўринли ётоқхона биноси қурилганлиги маълумот учун қабул қилинсин.
3. Белгилаб қўйилсинки:
ижод мактабида ҳар бир синфдаги ўқувчилар сони 20 нафарни ташкил қилади, 7-синфларга эса ижодий танловлар, тест ва бошқа синовлар асосида қабул қилинади;
Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ижод мактабининг моддий-техник базаси, имкониятлари, педагог кадрлар салоҳиятидан ҳамда мавжуд талаб ва эҳтиёждан келиб чиққан ҳолда, кейинги йилларда ўқувчиларни қабул қилиш квоталарига ўзгартиришлар киритиш ҳуқуқи берилади.
4. Ўзбекистон Республикаси Олий ва ўрта махсус таълим вазирлиги Халқ таълими вазирлиги билан биргаликда мактаб-интернатга олий таълим муассасаларининг ўзбек тили ва адабиёти ҳамда хорижий тиллар факультетларини тамомлаган иқтидорли педагог-кадрлар жалб этилишини таъминласин.
5. Ўзбекистон Республикаси Халқ таълими вазирлиги:
Фарғона вилояти ҳокимлиги билан биргаликда мактаб-интернатга Фарғона вилояти Марғилон шаҳридаги 4-сон мактабнинг бўш турган бино ва иншоотлари бириктириб берилишини таъминласин;
Инвестициялар бўйича давлат қўмитаси, Молия вазирлиги, Қурилиш вазирлиги ҳамда Фарғона вилояти ҳокимлиги билан биргаликда лойиҳа-смета ҳужжатлари асосида 2019 йилги Ўзбекистон Республикасининг ривожланиш давлат дастурларини шакллантиришда ушбу банднинг биринчи хатбошида кўрсатилган бино ва иншоотларни 110 ўринли мактаб-интернат биносига мослаштирган ҳолда реконструкция қилиш ишлари учун зарур маблағларни назарда тутсин.
6. Ижод мактабининг бино ва иншоотларини реконструкция қилиш бўйича:
Фарғона вилояти ҳокимлигининг «Ягона буюртмачи хизмати» инжиниринг компанияси — буюртмачи этиб белгилансин;
бош лойиҳа ва бош пудрат ташкилоти белгиланган тартибда тендер (танлов) савдолари натижалари бўйича аниқлансин.
7. Ўзбекистон Республикаси Қурилиш вазирлиги реконструкция қилинаётган объектнинг лойиҳа-смета ҳужжатлари ва олиб борилаётган қурилиш-монтаж ишларининг сифати юзасидан давлат архитектура-қурилиш назоратини амалга оширсин.
8. Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги:
Иқтисодиёт ва молия вазирлиги билан биргаликда ушбу ижод мактабининг моддий-техник базасини мустаҳкамлаш мақсадида уни ётоқхона, ошхона, кутубхона, фаоллар зали ва ўқув-лаборатория жиҳозлари ҳамда компьютер техникаси, ўқув-методик мажмуалар, ўқитувчилар учун методик қўлланмалар ва бадиий адабиётлар билан таъминлаш чораларини кўрсин;
бир ой муддатда ижод мактабининг устави тасдиқланишини ва белгиланган тартибда давлат рўйхатидан ўтказилишини таъминласин.
9. Ўзбекистон Республикаси Иқтисодиёт ва молия вазирлиги Ўзбекистон Республикаси Давлат бюджети параметрларида Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ажратилган маблағлар доирасида ижод мактабининг таъминоти учун зарур маблағларни назарда тутсин.
10. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — «Ўзбекистон темир йўллари» АЖ бошқаруви раиси А.Ж. Раматов, Ўзбекистон Республикаси халқ таълими вазири У.И. Иноятов ва Фарғона вилояти ҳокими Ш.М. Ғаниев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2018 йил 14 май,
361-сон
Oʻzbekiston Respublikasi Vazirlar Mahkamasining
qarori
Fargʻona viloyati Margʻilon shahrida Erkin Vohidov nomidagi ijod maktabini tashkil etish toʻgʻrisida
Nodir isteʼdodi, badiiy teran, falsafiy sheʼr va dostonlari, dramatik va publitsistik asarlari bilan oʻzbek adabiyoti rivojiga ulkan hissa qoʻshgan Oʻzbekiston xalq shoiri, Oʻzbekiston Qahramoni Erkin Vohidov nomini abadiylashtirish, shoir izdoshlarini kashf etish va ularning oʻz isteʼdodlarini keng namoyon qilishlari uchun shart-sharoitlar yaratish maqsadida Vazirlar Mahkamasi qaror qiladi:
1. Fargʻona viloyati Margʻilon shahrida Erkin Vohidov nomidagi ijod maktabi (keyingi oʻrinlarda — ijod maktabi) tashkil etilsin.
2. Fargʻona viloyati Margʻilon shahrida Fargʻona viloyati mahalliy budjeti mablagʻlari hisobiga 100 oʻrinli maktab-internat binosi va 80 oʻrinli yotoqxona binosi qurilganligi maʼlumot uchun qabul qilinsin.
3. Belgilab qoʻyilsinki:
ijod maktabida har bir sinfdagi oʻquvchilar soni 20 nafarni tashkil qiladi, 7-sinflarga esa ijodiy tanlovlar, test va boshqa sinovlar asosida qabul qilinadi;
Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ijod maktabining moddiy-texnik bazasi, imkoniyatlari, pedagog kadrlar salohiyatidan hamda mavjud talab va ehtiyojdan kelib chiqqan holda, keyingi yillarda oʻquvchilarni qabul qilish kvotalariga oʻzgartirishlar kiritish huquqi beriladi.
4. Oʻzbekiston Respublikasi Oliy va oʻrta maxsus taʼlim vazirligi Xalq taʼlimi vazirligi bilan birgalikda maktab-internatga oliy taʼlim muassasalarining oʻzbek tili va adabiyoti hamda xorijiy tillar fakultetlarini tamomlagan iqtidorli pedagog-kadrlar jalb etilishini taʼminlasin.
5. Oʻzbekiston Respublikasi Xalq taʼlimi vazirligi:
Fargʻona viloyati hokimligi bilan birgalikda maktab-internatga Fargʻona viloyati Margʻilon shahridagi 4-son maktabning boʻsh turgan bino va inshootlari biriktirib berilishini taʼminlasin;
Investitsiyalar boʻyicha davlat qoʻmitasi, Moliya vazirligi, Qurilish vazirligi hamda Fargʻona viloyati hokimligi bilan birgalikda loyiha-smeta hujjatlari asosida 2019-yilgi Oʻzbekiston Respublikasining rivojlanish davlat dasturlarini shakllantirishda ushbu bandning birinchi xatboshida koʻrsatilgan bino va inshootlarni 110 oʻrinli maktab-internat binosiga moslashtirgan holda rekonstruksiya qilish ishlari uchun zarur mablagʻlarni nazarda tutsin.
6. Ijod maktabining bino va inshootlarini rekonstruksiya qilish boʻyicha:
Fargʻona viloyati hokimligining “Yagona buyurtmachi xizmati” injiniring kompaniyasi — buyurtmachi etib belgilansin;
bosh loyiha va bosh pudrat tashkiloti belgilangan tartibda tender (tanlov) savdolari natijalari boʻyicha aniqlansin.
7. Oʻzbekiston Respublikasi Qurilish vazirligi rekonstruksiya qilinayotgan obyektning loyiha-smeta hujjatlari va olib borilayotgan qurilish-montaj ishlarining sifati yuzasidan davlat arxitektura-qurilish nazoratini amalga oshirsin.
8. Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi:
Iqtisodiyot va moliya vazirligi bilan birgalikda ushbu ijod maktabining moddiy-texnik bazasini mustahkamlash maqsadida uni yotoqxona, oshxona, kutubxona, faollar zali va oʻquv-laboratoriya jihozlari hamda kompyuter texnikasi, oʻquv-metodik majmualar, oʻqituvchilar uchun metodik qoʻllanmalar va badiiy adabiyotlar bilan taʼminlash choralarini koʻrsin;
bir oy muddatda ijod maktabining ustavi tasdiqlanishini va belgilangan tartibda davlat roʻyxatidan oʻtkazilishini taʼminlasin.
9. Oʻzbekiston Respublikasi Iqtisodiyot va moliya vazirligi Oʻzbekiston Respublikasi Davlat budjeti parametrlarida Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ajratilgan mablagʻlar doirasida ijod maktabining taʼminoti uchun zarur mablagʻlarni nazarda tutsin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi xalq taʼlimi vaziri U.I. Inoyatov va Fargʻona viloyati hokimi Sh.M. Gʻaniyev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 14-may,
361-son