📅 2018-yil 27-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 27 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 июня 2018 г. · Постановления Кабинета Министров
Официальный текст. Официальный документ. Редакционные примечания не включены.
📅 27 June 2018 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТАРКИБИ
НИЗОМИ
«Нурли наволар» халқаро фольклор фестивалини ташкил этиш ва ўтказиш тўғрисида
Миллий қўшиқчилик санъатининг дурдонаси бўлган фольклор санъатини кенг тарғиб этиш, турли халқларнинг қўшиқ, рақс, мусиқа ва саҳна кўринишлари каби жанрларини ўзида мужассам этган, уларнинг турмуш тарзи, урф-одатлари ва қадриятларини ҳамда маънавий дунёсини бойитиб келаётган фольклор санъати ижодкорлари ўртасида ижодий ҳамкорликни йўлга қўйиш, ўзбек фольклор санъатини янада тараққий эттириш, халқ ижодиёти анъаналарини жаҳонга тараннум қилиш мақсадида Вазирлар Маҳкамаси қарор қилади:
1. Ўзбекистон Республикаси Маданият вазирлиги ҳамда Навоий вилояти ҳокимлигининг «Нурли наволар» халқаро фольклор фестивалини (кейинги ўринларда Фестиваль деб аталади) 2018 йилдан бошлаб ҳар икки йилда бир марта ташкил этиш, якуний босқичини Навоий вилоятининг Нурота туманида ўтказиш тўғрисидаги таклифи маъқуллансин.
2. Қуйидагилар:
«Нурли наволар» халқаро фольклор фестивалини ўтказиш бўйича ташкилий қўмита таркиби (кейинги ўринларда Ташкилий қўмита деб аталади) 1-иловага ;
«Нурли наволар» халқаро фольклор фестивалини ўтказиш тартиби тўғрисидаги низом 2-иловага мувофиқ тасдиқлансин.
3. Ташкилий қўмитага:
манфаатдор вазирликлар ва идоралар билан биргаликда Фестивалга тайёргарлик кўриш ва уни ўтказиш бўйича тадбирлар режасини ишлаб чиқиш, тасдиқлаш ва ҳомийлик хайрияларини жалб этиш чораларини кўриш;
Фестиваль совриндорларига топшириладиган диплом, сертификат, ҳайкалча намуналарини ишлаб чиқиш ва тасдиқлаш;
Фестивални ташкил этиш ва ўтказиш билан боғлиқ бошқа масалаларни ҳал этиш вазифалари юклансин.
4. Ўзбекистон Республикаси Маданият вазирлиги ҳамда Навоий вилояти ҳокимлиги Фестивални ташкил этиш ва ўтказиш бўйича масъул этиб белгилансин.
5. Навоий вилояти ҳокимлиги Нурота туманидаги Фестиваль ўтадиган жойларда ободонлаштириш ва кўкаламзорлаштириш ишлари амалга оширилишини, Фестиваль ўтказиладиган саҳна майдонлари талаб даражасида тайёрланишини таъминласин.
6. Ўзбекистон Республикаси Ташқи ишлар вазирлиги Фестивалга ташриф буюрувчи иштирокчилар учун Ўзбекистон Республикаси Маданият вазирлигининг виза буюртманомаларига биноан Ўзбекистон Республикасига кириш визалари Ўзбекистон Республикасининг чет элдаги дипломатик ваколатхоналари ҳамда консуллик муассасаларида, зарур ҳолларда, И. Каримов номидаги «Тошкент» халқаро аэропортида консуллик йиғимлари ва бошқа йиғимлар ундирилмасдан расмийлаштирилишини таъминласин.
7. Ўзбекистон Республикаси Маданият вазирлиги Навоий вилояти ҳокимлиги, Ўзбекистон Республикаси Туризмни ривожлантириш давлат қўмитаси, Ўзбекистон Бадиий академияси, Республика «Ҳунарманд» уюшмаси билан биргаликда:
Фестивалга бағишланган эсдалик буюмлари лойиҳалари ишлаб чиқилишини ва Фестиваль доирасида турли кўргазмалар, миллий созлар ва либослар, ҳунармандчилик буюмлари, тасвирий ва амалий санъат асарлари, бадиий ва ҳужжатли фильмлар, аудио ва видео дисклар, китоблар, альбомлар, фотосуратлар намойиши ва уларнинг сотуви ташкил этилишини;
Фестиваль тадбирлари дастури ишлаб чиқилишини ва унинг Фестивалдан уч ой аввал туристик ташкилотларга тақдим этилишини, Интернет жаҳон ахборот тармоғида, жумладан, ижтимоий тармоқларда жойлаштирилишини таъминласин.
8. Фестивални ташкил этиш ва ўтказиш билан боғлиқ сарф-харажатлар Ташкилий қўмита томонидан ишлаб чиқилган ва белгиланган тартибда тасдиқланган смета асосида қуйидаги манбалар ҳисобига молиялаштирилади:
Ўзбекистон Республикаси Маданият вазирлигининг харажатлар сметасида маданий тадбирларни ўтказиш учун ҳар йили назарда тутиладиган бюджет маблағлари;
Ўзбекистон Республикаси Маданият вазирлиги ҳузуридаги Маданият ва санъатни ривожлантириш жамғармаси маблағлари;
Навоий вилояти маҳаллий бюджетининг қўшимча манбалари, юридик ва жисмоний шахсларнинг ҳомийлик хайриялари ва қонунчиликда тақиқланмаган бошқа манбалар.
Бунда, Фестивалга хориждан ташриф буюрадиган ҳайъат аъзолари ва иштирок этувчи делегацияларнинг яшаш, овқатланиш ва ички транспорт харажатлари, шунингдек, совриндорларни тақдирлаш билан боғлиқ пул мукофотлари Ўзбекистон Республикаси Давлат бюджети маблағлари ҳисобига қопланади.
9. Ўзбекистон Республикаси Молия вазирлиги 2018 йилда ушбу қарор талабларидан келиб чиқиб Ўзбекистон Республикаси Давлат бюджетидан зарур маблағларни ажратсин, 2019 йилдан бошлаб Ўзбекистон Республикаси Давлат бюджети параметрларини шакллантиришда Фестивални ташкил этиш ва ўтказиш билан боғлиқ харажатлар учун зарур маблағлар ажратилишини назарда тутсин.
10. Ўзбекистон Миллий ахборот агентлиги, Ўзбекистон Миллий телерадиокомпанияси, «Дунё» ахборот агентлиги ва бошқа оммавий ахборот воситаларига Фестивалга тайёргарлик кўриш ва уни ўтказиш бўйича амалга оширилаётган ишларни атрофлича ёритиш тавсия этилсин.
11. Мазкур қарорнинг бажарилишини назорат қилиш Ўзбекистон Республикаси маданият вазири Б.С. Сайфуллаев, Навоий вилояти ҳокими К.Б. Турсунов зиммасига ҳамда Ўзбекистон Республикаси Вазирлар Маҳкамасининг Маданият, санъат ва ёшлар сиёсати масалалари ахборот-таҳлил департаментига юклансин.
Вазирлар Маҳкамасининг 2018 йил 27 июндаги 486-сон қарорига 1-ИЛОВА
«Нурли наволар» халқаро фольклор фестивалини ўтказиш бўйича ташкилий қўмита
Б. Сайфуллаев — Ўзбекистон Республикаси маданият вазири, Ташкилий қўмита раиси К. Турсунов — Навоий вилояти ҳокими, Ташкилий қўмита раисининг ўринбосари О. Назарбеков — Маданият вазирининг биринчи ўринбосари Б. Юсупалиев — Соғлиқни сақлаш вазирининг биринчи ўринбосари Д. Назармухаммедов — Ички ишлар вазирининг биринчи ўринбосари О. Касимов — Жисмоний тарбия ва спорт вазирининг биринчи ўринбосари Қ. Юлдашев — Ахбороттехнологияларивакоммуникациялариниривожлантиришвазиринингўринбосари Ш. Шорахметов — Туризмни ривожлантириш давлат қўмитаси раисининг ўринбосари А. Нуридинов — Ўзбекистон Бадиий академияси раиси А. Ходжаев — Ўзбекистон Миллий телерадиокомпанияси раиси в.б. А. Кучимов — Ўзбекистон Миллий ахборот агентлиги бош директори У. Абдуллаев — «Ҳунарманд» уюшмаси раиси А. Ҳайдаров — Ўзбекистон Республикаси Маданият вазирлигининг Республика маданият муассасалари фаолиятини ташкил этиш илмий-методик маркази директори, Ташкилий қўмита котиби
Вазирлар Маҳкамасининг 2018 йил 27 июндаги 486-сон қарорига 2-ИЛОВА
«Нурли наволар» халқаро фольклор фестивалини ташкил этиш ва ўтказиш тўғрисида
1-боб. Умумий қоидалар
1. Ушбу Низом «Нурли наволар» халқаро фольклор фестивалини (кейинги ўринларда Фестиваль деб аталади) ўтказиш тартибини белгилайди.
2. Фестиваль қуйидагиларни назарда тутган ҳолда ўтказилади:
фольклор санъатини кенг тарғиб этиш, турли халқларнинг қўшиқ, рақс, мусиқа ва саҳна кўринишлари каби жанрларини ўзида мужассам этган, уларнинг турмуш тарзи, урф-одатлари, анъана ва қадриятларини ҳамда маънавий дунёсини бойитиб келаётган фольклор санъати ижодкорлари ўртасида ижодий ҳамкорликни йўлга қўйиш;
хорижий давлатлар билан миллий маданиятлар уйғунлиги ва турфа хиллигини сақлаш ва ривожлантириш, номоддий маданий мероснинг энг яхши намуналарини кенг тарғиб қилиш, муҳофаза қилиш ва ривожлантириш;
анъанавий бадиий санъатни оммалаштириш ва замонавий ҳаёт тарзига сингдириш, юртимиз ва қўшни мамлакатлардаги энг яхши фольклор жамоалари ўртасида тажриба алмашишни йўлга қўйиш, гўзаллик, ватанпарварлик, бағрикенглик, дўстлик ва бошқа чин инсоний қадриятларни тараннум этиш;
миллий анъаналарни асраб-авайлаш, ёшларда санъатга бўлган муҳаббат туйғуларини камол топтириш, халқаро миқёсида ижодий алоқалар доирасини кенгайтириш, тинчлик ва бирдамлик ғояларини улуғлаш, ўзаро маданий-маънавий ҳамкорликни янада мустаҳкамлаш;
турли миллат вакилларини маънавий мулоқотга жалб этиш, миллий анъаналар ва эстетик идеаллар умумийлиги асосида халқаро маданий ҳамкорликни мустаҳкамлаш, маданий туризмни ривожлантириш.
3. Фестиваль 2018 йилдан бошлаб ҳар икки йилда бир марта ушбу Низомга мувофиқ уч босқичда ўтказилади.
Фестивални ўтказишнинг аниқ санаси ва муддати «Нурли наволар» халқаро фольклор фестивалини ўтказиш бўйича ташкилий қўмита (кейинги ўринларда Ташкилий қўмита деб аталади) томонидан белгиланади.
4. Фестивалнинг асосий ташкилотчилари — Ўзбекистон Республикаси Маданият вазирлиги ҳамда Навоий вилояти ҳокимлиги, Ташкилий қўмитанинг ишчи органи — Ўзбекистон Республикаси Маданият вазирлиги ҳисобланади.
2-боб. Фестивални ўтказиш тартиби ва шартлари
5. Фестивалда қуйидаги номинациялар бўйича танловлар ўтказилади:
фольклор санъати (алла, ўлан, лапар, рақс, терма, маросим қўшиқлари, халфачилик ва ҳоказо);
қўғирчоқбозлик томоша санъати.
6. Фестивалда Ўзбекистон Республикасидан иштирок этувчилар учун қуйидаги тартиблар белгиланади:
Фестивалининг I босқичи жойларда Қорақалпоғистон Республикаси Маданият вазирлиги, вилоятлар маданият бошқармалари ва Тошкент шаҳар маданият бош бошқармаси томонидан Қорақалпоғистон Республикаси, вилоятлар марказларида ва Тошкент шаҳрида ўтказилади;
I босқич натижаларига кўра Қорақалпоғистон Республикаси Маданият вазирлиги, вилоятлар маданият бошқармалари ва Тошкент шаҳар маданият бош бошқармаси Фестивалнинг кейинги босқичларида қатнашишга тавсия этилганларга оид ариза, ижодий тавсифнома, тадбир ҳақида баённома, фотосуратлар ҳамда видеотасвирлардан иборат ҳужжатлар ва материалларни Фестиваль ўтказиладиган йилнинг 25 мартига қадар Ўзбекистон Республикаси Маданият вазирлигига тақдим этадилар;
Фестивалнинг II босқичи Тошкент шаҳрида Фестиваль ўтказиладиган йилнинг апрель ойининг биринчи ярмида Фестивалнинг I босқич натижаларига кўра кейинги босқичда иштирок этиш учун тавсия этилганларнинг ҳужжатлари ва материаллари асосида алоҳида номинациялар бўйича сиртдан танлов шаклида ўтказилади ва унинг натижаларига кўра Фестиваль финал босқичи афишаси шакллантирилади.
Фестивалнинг якуний босқичи Навоий вилоятининг Нурота туманида ўтказилади.
7. Фестивалга хорижий давлатлардан келадиган иштирокчилар учун қуйидаги тартиблар белгиланади:
Фестивалнинг хорижий давлатлардан келадиган иштирокчилари ҳужжатлари ва материаллари тегишли давлатлардаги мутасадди ташкилотлар ва муассасалар томонидан Ўзбекистон Республикасининг хорижий давлатлардаги элчихоналари орқали тақдим этилади;
хорижий давлатлардан келадиган иштирокчилар Фестивалнинг II босқичидан бошлаб иштирок этадилар.
8. Фестивалнинг якуний босқичи, ғолибларнинг гала концерти ҳамда тақдирлаш маросими Ташкилий қўмита томонидан белгиланадиган муддатларда ўтказилади.
9. Фестиваль доирасида илмий-ижодий конференциялар, семинарлар, давра суҳбатлари, сайиллар, концертлар, кўргазмалар ва бошқа тадбирлар ташкил этилади.
10. Фестивалда идоравий мансублигидан қатъи назар турли ҳаваскор фольклор жамоалари, ашула, мусиқа ва рақс ансамбллари, яккахон ижрочилар иштирок этишлари мумкин.
11. Фестиваль иштирокчиларининг сони фольклор санъати бўйича — 12 нафардан, қўғирчоқбозлик-томоша санъати йўналишида — 4 нафардан ошмаслиги лозим.
12. Номинация бўйича ҳар бир иштирокчининг чиқиш дастурлари ижроси 15 дақиқадан ошмаслиги керак.
13. Фестивалда иштирок этишда фонограммадан фойдаланишга йўл қўйилмайди.
3-боб. Фестиваль иштирокчиларини баҳолаш шартлари ва халқаро ҳайъат фаолиятини ташкил этиш
14. Фестивалнинг I ва II босқичларида ҳудудларда фаолият кўрсатиб келаётган таниқли санъат ва маданият арбоблари, фольклоршунос олимлар иштирокида етти кишидан иборат ҳакамлар ҳайъати аъзолари рўйхати шаклантирилади ҳамда Қорақалпоғистон Республикаси Маданият вазирлиги, вилоятлар маданият бошқармалари ва Тошкент шаҳар маданият бош бошқармаси томонидан тасдиқланади.
15. Фестивалнинг якуний босқичи иштирокчиларининг чиқишларини баҳолаш учун Ташкилий қўмита томонидан етти кишидан иборат халқаро ҳайъат тузилади.
Халқаро ҳайъат таркибига юқори малакали мутахассислар, таниқли санъат ва маданият арбоблари, олимлар, тадқиқотчилар, амалиётчилар, шунингдек, иштирокчи давлатлардан тегишли соҳалар намояндалари киритилади.
16. Баҳолаш жараёнида:
репертуарнинг бадиий қиймати (этнографик аниқлик ва асар қайта ишланиши ёки стилизациясидаги афзалликлар), материалда ҳудудий ўзига хосликларининг акс этиши;
маҳорат ва артистизм савияси, халқ ижрочилиги усулларини эгаллаганлик даражаси;
оғзаки, мусиқий, ашулачилик ва рақс миллий анъаналари ижроси услублари ва йўлларининг мутаносиблиги;
безакнинг бадиий савияси (кийимлар, реквизит) ва унинг миллий анъаналарга мослиги, анъанавий мусиқа асбобларидан фойдаланиш;
декоратив-амалий ижод асарлари бадиий савияси асосий мезон ҳисобланади.
17. Фестиваль халқаро ҳайъати коллегиаллик, эркин фикрлилик ва профессионализм нормаларидан келиб чиқиб якуний босқич барча иштирокчиларининг дастурлари, асарлари ва ишлари билан танишиб чиқади, улар бўйича алоҳида номинациялар бўйича мустаҳкам асосли, ҳар томонлама мулоҳазали, мутлақо холис баҳо беради.
18. Якуний босқич Фестиваль иштирокчиларини бир неча гуруҳга бўлган ҳолда Фестиваль ўтказиладиган ҳудуддаги турли жойларда ташкил этилади. Халқаро ҳайъат кўригидан ўтган ёки ўз навбатини кутаётган гуруҳлардаги иштирокчилар Ташкилий қўмита томонидан тузиладиган махсус жадвал бўйича жойларда ташкил этиладиган концерт дастурлари ва кўргазмаларда қатнашадилар.
4-боб. Мукофотлаш тартиби
19. Фестиваль ғолиблари қуйидаги пул мукофотлари билан тақдирланадилар:
1-ўрин (ҳар бир номинация) — 3 500 АҚШ доллари;
2-ўрин (ҳар бир номинация) — 2 500 АҚШ доллари;
3-ўрин (ҳар бир номинация) — 1 500 АҚШ доллари.
20. Фестивалнинг якуний босқичи ғолибларига Ташкилий қўмита томонидан дипломлар, совринлар ва Фестиваль рамзлари туширилган эсдалик совғалари топширилади.
Халқаро ҳайъат қарори билан энг яхши деб топилган иштирокчилар ҳар бир номинация бўйича биттадан Лауреат дипломлари билан тақдирланадилар.
Бундан ташқари, ҳар бир номинацияда биттадан I, II ва III даражали дипломлар, Фестиваль иштирокчиси дипломлари ҳамда ҳар бир қатнашчига махсус диплом берилади.
21. Халқаро ҳайъатнинг қарорлари қатъий ва қайта кўриб чиқилмайди.
22. Фестиваль муассислари, давлат ташкилотлари ва нодавлат ташкилотлар, оммавий ахборот воситалари, корхоналар, муассасалар, жамғармалар, ижодий уюшмалар ва бошқа ташкилотлар иштирокчилар учун махсус мукофотлар, совринлар, эсдалик совғалари ва махсус мукофотлар таъсис этишлари мумкин.
5-боб. Ташкилий-молиявий шартлар
23. Фестивалнинг якуний босқичи иштирокчилари ва меҳмонлари, шунингдек, халқаро ҳайъат аъзолари Ташкилий қўмита томонидан Фестиваль ўтказиладиган давр ва ҳудудда ётоқхона, овқатланиш ва белгиланган йўналиш бўйича транспорт билан таъминланадилар.
24. Фестивалнинг I босқичида иштирок этиш ҳамда якуний босқич ўтказиладиган ҳудудга жойлардан келиб-кетиш билан боғлиқ харажатлар иштирокчиларни юборувчи ташкилот ва муассасалар ёки иштирокчилар ҳамда ҳомийлар томонидан қопланиши мумкин.
25. Хорижий меҳмонларнинг Ўзбекистон ҳудудидаги алоҳида меҳмонхона ва транспорт харажатлари уларни таклиф этган мезбон ташкилот ва муассасалар ёки меҳмонларнинг ўзлари томонидан қопланади.
Бунда, Ўзбекистон Республикаси ҳудудида Фестивалнинг барча хорижий иштирокчилари ва меҳмонлари учун ички қатновлар бўйича авиа ва темир йўл чипталари белгиланган тартибда сотилади, меҳмонхона ҳақи сўмда қабул қилинади.
6-боб. Якунловчи қоидалар
26. Ўзбекистон Республикаси Солиқ кодексига мувофиқ маданият ва кўрик-танлов ғолибларига бериладиган бир марталик пул мукофотларига жисмоний шахслардан олинадиган даромад солиғи солинмайди, шунингдек, ягона ижтимоий тўлов ва суғурта бадаллари бўйича солиқ солиш объекти ҳисобланмайди.
27. Ўзбекистон Республикаси Молия вазирлигининг Давлат молиявий назорат бош бошқармаси Фестивални ташкил этиш ва ўтказиш учун ажратилган бюджет маблағларининг мақсадли ишлатилиши ва тўғри тўланишини назорат қилади.
Ўзбекистон Республикасининг Бош вазири А. АРИПОВ
Тошкент ш.,
2018 йил 27 июнь,
486-сон
Oʻzbekiston Respublikasi Vazirlar Mahkamasining
qarori
TARKIBI
NIZOMI
“Nurli navolar” xalqaro folklor festivalini tashkil etish va oʻtkazish toʻgʻrisida
Milliy qoʻshiqchilik sanʼatining durdonasi boʻlgan folklor sanʼatini keng targʻib etish, turli xalqlarning qoʻshiq, raqs, musiqa va sahna koʻrinishlari kabi janrlarini oʻzida mujassam etgan, ularning turmush tarzi, urf-odatlari va qadriyatlarini hamda maʼnaviy dunyosini boyitib kelayotgan folklor sanʼati ijodkorlari oʻrtasida ijodiy hamkorlikni yoʻlga qoʻyish, oʻzbek folklor sanʼatini yanada taraqqiy ettirish, xalq ijodiyoti anʼanalarini jahonga tarannum qilish maqsadida Vazirlar Mahkamasi qaror qiladi:
1. Oʻzbekiston Respublikasi Madaniyat vazirligi hamda Navoiy viloyati hokimligining “Nurli navolar” xalqaro folklor festivalini (keyingi oʻrinlarda Festival deb ataladi) 2018-yildan boshlab har ikki yilda bir marta tashkil etish, yakuniy bosqichini Navoiy viloyatining Nurota tumanida oʻtkazish toʻgʻrisidagi taklifi maʼqullansin.
2. Quyidagilar:
“Nurli navolar” xalqaro folklor festivalini oʻtkazish boʻyicha tashkiliy qoʻmita tarkibi (keyingi oʻrinlarda Tashkiliy qoʻmita deb ataladi) 1-ilovaga ;
“Nurli navolar” xalqaro folklor festivalini oʻtkazish tartibi toʻgʻrisidagi nizom 2-ilovaga muvofiq tasdiqlansin.
3. Tashkiliy qoʻmitaga:
manfaatdor vazirliklar va idoralar bilan birgalikda Festivalga tayyorgarlik koʻrish va uni oʻtkazish boʻyicha tadbirlar rejasini ishlab chiqish, tasdiqlash va homiylik xayriyalarini jalb etish choralarini koʻrish;
Festival sovrindorlariga topshiriladigan diplom, sertifikat, haykalcha namunalarini ishlab chiqish va tasdiqlash;
Festivalni tashkil etish va oʻtkazish bilan bogʻliq boshqa masalalarni hal etish vazifalari yuklansin.
4. Oʻzbekiston Respublikasi Madaniyat vazirligi hamda Navoiy viloyati hokimligi Festivalni tashkil etish va oʻtkazish boʻyicha masʼul etib belgilansin.
5. Navoiy viloyati hokimligi Nurota tumanidagi Festival oʻtadigan joylarda obodonlashtirish va koʻkalamzorlashtirish ishlari amalga oshirilishini, Festival oʻtkaziladigan sahna maydonlari talab darajasida tayyorlanishini taʼminlasin.
6. Oʻzbekiston Respublikasi Tashqi ishlar vazirligi Festivalga tashrif buyuruvchi ishtirokchilar uchun Oʻzbekiston Respublikasi Madaniyat vazirligining viza buyurtmanomalariga binoan Oʻzbekiston Respublikasiga kirish vizalari Oʻzbekiston Respublikasining chet eldagi diplomatik vakolatxonalari hamda konsullik muassasalarida, zarur hollarda, I. Karimov nomidagi “Toshkent” xalqaro aeroportida konsullik yigʻimlari va boshqa yigʻimlar undirilmasdan rasmiylashtirilishini taʼminlasin.
7. Oʻzbekiston Respublikasi Madaniyat vazirligi Navoiy viloyati hokimligi, Oʻzbekiston Respublikasi Turizmni rivojlantirish davlat qoʻmitasi, Oʻzbekiston Badiiy akademiyasi, Respublika “Hunarmand” uyushmasi bilan birgalikda:
Festivalga bagʻishlangan esdalik buyumlari loyihalari ishlab chiqilishini va Festival doirasida turli koʻrgazmalar, milliy sozlar va liboslar, hunarmandchilik buyumlari, tasviriy va amaliy sanʼat asarlari, badiiy va hujjatli filmlar, audio va video disklar, kitoblar, albomlar, fotosuratlar namoyishi va ularning sotuvi tashkil etilishini;
Festival tadbirlari dasturi ishlab chiqilishini va uning Festivaldan uch oy avval turistik tashkilotlarga taqdim etilishini, Internet jahon axborot tarmogʻida, jumladan, ijtimoiy tarmoqlarda joylashtirilishini taʼminlasin.
8. Festivalni tashkil etish va oʻtkazish bilan bogʻliq sarf-xarajatlar Tashkiliy qoʻmita tomonidan ishlab chiqilgan va belgilangan tartibda tasdiqlangan smeta asosida quyidagi manbalar hisobiga moliyalashtiriladi:
Oʻzbekiston Respublikasi Madaniyat vazirligining xarajatlar smetasida madaniy tadbirlarni oʻtkazish uchun har yili nazarda tutiladigan budjet mablagʻlari;
Oʻzbekiston Respublikasi Madaniyat vazirligi huzuridagi Madaniyat va sanʼatni rivojlantirish jamgʻarmasi mablagʻlari;
Navoiy viloyati mahalliy budjetining qoʻshimcha manbalari, yuridik va jismoniy shaxslarning homiylik xayriyalari va qonunchilikda taqiqlanmagan boshqa manbalar.
Bunda, Festivalga xorijdan tashrif buyuradigan hayʼat aʼzolari va ishtirok etuvchi delegatsiyalarning yashash, ovqatlanish va ichki transport xarajatlari, shuningdek, sovrindorlarni taqdirlash bilan bogʻliq pul mukofotlari Oʻzbekiston Respublikasi Davlat budjeti mablagʻlari hisobiga qoplanadi.
9. Oʻzbekiston Respublikasi Moliya vazirligi 2018-yilda ushbu qaror talablaridan kelib chiqib Oʻzbekiston Respublikasi Davlat budjetidan zarur mablagʻlarni ajratsin, 2019-yildan boshlab Oʻzbekiston Respublikasi Davlat budjeti parametrlarini shakllantirishda Festivalni tashkil etish va oʻtkazish bilan bogʻliq xarajatlar uchun zarur mablagʻlar ajratilishini nazarda tutsin.
10. Oʻzbekiston Milliy axborot agentligi, Oʻzbekiston Milliy teleradiokompaniyasi, “Dunyo” axborot agentligi va boshqa ommaviy axborot vositalariga Festivalga tayyorgarlik koʻrish va uni oʻtkazish boʻyicha amalga oshirilayotgan ishlarni atroflicha yoritish tavsiya etilsin.
11. Mazkur qarorning bajarilishini nazorat qilish Oʻzbekiston Respublikasi madaniyat vaziri B.S. Sayfullayev, Navoiy viloyati hokimi K.B. Tursunov zimmasiga hamda Oʻzbekiston Respublikasi Vazirlar Mahkamasining Madaniyat, sanʼat va yoshlar siyosati masalalari axborot-tahlil departamentiga yuklansin.
Vazirlar Mahkamasining 2018-yil 27-iyundagi 486-son qaroriga 1-ILOVA
“Nurli navolar” xalqaro folklor festivalini oʻtkazish boʻyicha tashkiliy qoʻmita
B. Sayfullayev — Oʻzbekiston Respublikasi madaniyat vaziri, Tashkiliy qoʻmita raisi K. Tursunov — Navoiy viloyati hokimi, Tashkiliy qoʻmita raisining oʻrinbosari O. Nazarbekov — Madaniyat vazirining birinchi oʻrinbosari B. Yusupaliyev — Sogʻliqni saqlash vazirining birinchi oʻrinbosari D. Nazarmuxammedov — Ichki ishlar vazirining birinchi oʻrinbosari O. Kasimov — Jismoniy tarbiya va sport vazirining birinchi oʻrinbosari Q. Yuldashev — Axborottexnologiyalarivakommunikatsiyalarinirivojlantirishvaziriningoʻrinbosari Sh. Shoraxmetov — Turizmni rivojlantirish davlat qoʻmitasi raisining oʻrinbosari A. Nuridinov — Oʻzbekiston Badiiy akademiyasi raisi A. Xodjayev — Oʻzbekiston Milliy teleradiokompaniyasi raisi v.b. A. Kuchimov — Oʻzbekiston Milliy axborot agentligi bosh direktori U. Abdullayev — “Hunarmand” uyushmasi raisi A. Haydarov — Oʻzbekiston Respublikasi Madaniyat vazirligining Respublika madaniyat muassasalari faoliyatini tashkil etish ilmiy-metodik markazi direktori, Tashkiliy qoʻmita kotibi
Vazirlar Mahkamasining 2018-yil 27-iyundagi 486-son qaroriga 2-ILOVA
“Nurli navolar” xalqaro folklor festivalini tashkil etish va oʻtkazish toʻgʻrisida
1-bob. Umumiy qoidalar
1. Ushbu Nizom “Nurli navolar” xalqaro folklor festivalini (keyingi oʻrinlarda Festival deb ataladi) oʻtkazish tartibini belgilaydi.
2. Festival quyidagilarni nazarda tutgan holda oʻtkaziladi:
folklor sanʼatini keng targʻib etish, turli xalqlarning qoʻshiq, raqs, musiqa va sahna koʻrinishlari kabi janrlarini oʻzida mujassam etgan, ularning turmush tarzi, urf-odatlari, anʼana va qadriyatlarini hamda maʼnaviy dunyosini boyitib kelayotgan folklor sanʼati ijodkorlari oʻrtasida ijodiy hamkorlikni yoʻlga qoʻyish;
xorijiy davlatlar bilan milliy madaniyatlar uygʻunligi va turfa xilligini saqlash va rivojlantirish, nomoddiy madaniy merosning eng yaxshi namunalarini keng targʻib qilish, muhofaza qilish va rivojlantirish;
anʼanaviy badiiy sanʼatni ommalashtirish va zamonaviy hayot tarziga singdirish, yurtimiz va qoʻshni mamlakatlardagi eng yaxshi folklor jamoalari oʻrtasida tajriba almashishni yoʻlga qoʻyish, goʻzallik, vatanparvarlik, bagʻrikenglik, doʻstlik va boshqa chin insoniy qadriyatlarni tarannum etish;
milliy anʼanalarni asrab-avaylash, yoshlarda sanʼatga boʻlgan muhabbat tuygʻularini kamol toptirish, xalqaro miqyosida ijodiy aloqalar doirasini kengaytirish, tinchlik va birdamlik gʻoyalarini ulugʻlash, oʻzaro madaniy-maʼnaviy hamkorlikni yanada mustahkamlash;
turli millat vakillarini maʼnaviy muloqotga jalb etish, milliy anʼanalar va estetik ideallar umumiyligi asosida xalqaro madaniy hamkorlikni mustahkamlash, madaniy turizmni rivojlantirish.
3. Festival 2018-yildan boshlab har ikki yilda bir marta ushbu Nizomga muvofiq uch bosqichda oʻtkaziladi.
Festivalni oʻtkazishning aniq sanasi va muddati “Nurli navolar” xalqaro folklor festivalini oʻtkazish boʻyicha tashkiliy qoʻmita (keyingi oʻrinlarda Tashkiliy qoʻmita deb ataladi) tomonidan belgilanadi.
4. Festivalning asosiy tashkilotchilari — Oʻzbekiston Respublikasi Madaniyat vazirligi hamda Navoiy viloyati hokimligi, Tashkiliy qoʻmitaning ishchi organi — Oʻzbekiston Respublikasi Madaniyat vazirligi hisoblanadi.
2-bob. Festivalni oʻtkazish tartibi va shartlari
5. Festivalda quyidagi nominatsiyalar boʻyicha tanlovlar oʻtkaziladi:
folklor sanʼati (alla, oʻlan, lapar, raqs, terma, marosim qoʻshiqlari, xalfachilik va hokazo);
qoʻgʻirchoqbozlik tomosha sanʼati.
6. Festivalda Oʻzbekiston Respublikasidan ishtirok etuvchilar uchun quyidagi tartiblar belgilanadi:
Festivalining I bosqichi joylarda Qoraqalpogʻiston Respublikasi Madaniyat vazirligi, viloyatlar madaniyat boshqarmalari va Toshkent shahar madaniyat bosh boshqarmasi tomonidan Qoraqalpogʻiston Respublikasi, viloyatlar markazlarida va Toshkent shahrida oʻtkaziladi;
I bosqich natijalariga koʻra Qoraqalpogʻiston Respublikasi Madaniyat vazirligi, viloyatlar madaniyat boshqarmalari va Toshkent shahar madaniyat bosh boshqarmasi Festivalning keyingi bosqichlarida qatnashishga tavsiya etilganlarga oid ariza, ijodiy tavsifnoma, tadbir haqida bayonnoma, fotosuratlar hamda videotasvirlardan iborat hujjatlar va materiallarni Festival oʻtkaziladigan yilning 25-martiga qadar Oʻzbekiston Respublikasi Madaniyat vazirligiga taqdim etadilar;
Festivalning II bosqichi Toshkent shahrida Festival oʻtkaziladigan yilning aprel oyining birinchi yarmida Festivalning I bosqich natijalariga koʻra keyingi bosqichda ishtirok etish uchun tavsiya etilganlarning hujjatlari va materiallari asosida alohida nominatsiyalar boʻyicha sirtdan tanlov shaklida oʻtkaziladi va uning natijalariga koʻra Festival final bosqichi afishasi shakllantiriladi.
Festivalning yakuniy bosqichi Navoiy viloyatining Nurota tumanida oʻtkaziladi.
7. Festivalga xorijiy davlatlardan keladigan ishtirokchilar uchun quyidagi tartiblar belgilanadi:
Festivalning xorijiy davlatlardan keladigan ishtirokchilari hujjatlari va materiallari tegishli davlatlardagi mutasaddi tashkilotlar va muassasalar tomonidan Oʻzbekiston Respublikasining xorijiy davlatlardagi elchixonalari orqali taqdim etiladi;
xorijiy davlatlardan keladigan ishtirokchilar Festivalning II bosqichidan boshlab ishtirok etadilar.
8. Festivalning yakuniy bosqichi, gʻoliblarning gala konserti hamda taqdirlash marosimi Tashkiliy qoʻmita tomonidan belgilanadigan muddatlarda oʻtkaziladi.
9. Festival doirasida ilmiy-ijodiy konferensiyalar, seminarlar, davra suhbatlari, sayillar, konsertlar, koʻrgazmalar va boshqa tadbirlar tashkil etiladi.
10. Festivalda idoraviy mansubligidan qatʼi nazar turli havaskor folklor jamoalari, ashula, musiqa va raqs ansambllari, yakkaxon ijrochilar ishtirok etishlari mumkin.
11. Festival ishtirokchilarining soni folklor sanʼati boʻyicha — 12 nafardan, qoʻgʻirchoqbozlik-tomosha sanʼati yoʻnalishida — 4 nafardan oshmasligi lozim.
12. Nominatsiya boʻyicha har bir ishtirokchining chiqish dasturlari ijrosi 15 daqiqadan oshmasligi kerak.
13. Festivalda ishtirok etishda fonogrammadan foydalanishga yoʻl qoʻyilmaydi.
3-bob. Festival ishtirokchilarini baholash shartlari va xalqaro hayʼat faoliyatini tashkil etish
14. Festivalning I va II bosqichlarida hududlarda faoliyat koʻrsatib kelayotgan taniqli sanʼat va madaniyat arboblari, folklorshunos olimlar ishtirokida yetti kishidan iborat hakamlar hayʼati aʼzolari roʻyxati shaklantiriladi hamda Qoraqalpogʻiston Respublikasi Madaniyat vazirligi, viloyatlar madaniyat boshqarmalari va Toshkent shahar madaniyat bosh boshqarmasi tomonidan tasdiqlanadi.
15. Festivalning yakuniy bosqichi ishtirokchilarining chiqishlarini baholash uchun Tashkiliy qoʻmita tomonidan yetti kishidan iborat xalqaro hayʼat tuziladi.
Xalqaro hayʼat tarkibiga yuqori malakali mutaxassislar, taniqli sanʼat va madaniyat arboblari, olimlar, tadqiqotchilar, amaliyotchilar, shuningdek, ishtirokchi davlatlardan tegishli sohalar namoyandalari kiritiladi.
16. Baholash jarayonida:
repertuarning badiiy qiymati (etnografik aniqlik va asar qayta ishlanishi yoki stilizatsiyasidagi afzalliklar), materialda hududiy oʻziga xosliklarining aks etishi;
mahorat va artistizm saviyasi, xalq ijrochiligi usullarini egallaganlik darajasi;
ogʻzaki, musiqiy, ashulachilik va raqs milliy anʼanalari ijrosi uslublari va yoʻllarining mutanosibligi;
bezakning badiiy saviyasi (kiyimlar, rekvizit) va uning milliy anʼanalarga mosligi, anʼanaviy musiqa asboblaridan foydalanish;
dekorativ-amaliy ijod asarlari badiiy saviyasi asosiy mezon hisoblanadi.
17. Festival xalqaro hayʼati kollegiallik, erkin fikrlilik va professionalizm normalaridan kelib chiqib yakuniy bosqich barcha ishtirokchilarining dasturlari, asarlari va ishlari bilan tanishib chiqadi, ular boʻyicha alohida nominatsiyalar boʻyicha mustahkam asosli, har tomonlama mulohazali, mutlaqo xolis baho beradi.
18. Yakuniy bosqich Festival ishtirokchilarini bir necha guruhga boʻlgan holda Festival oʻtkaziladigan hududdagi turli joylarda tashkil etiladi. Xalqaro hayʼat koʻrigidan oʻtgan yoki oʻz navbatini kutayotgan guruhlardagi ishtirokchilar Tashkiliy qoʻmita tomonidan tuziladigan maxsus jadval boʻyicha joylarda tashkil etiladigan konsert dasturlari va koʻrgazmalarda qatnashadilar.
4-bob. Mukofotlash tartibi
19. Festival gʻoliblari quyidagi pul mukofotlari bilan taqdirlanadilar:
1-oʻrin (har bir nominatsiya) — 3 500 AQSh dollari;
2-oʻrin (har bir nominatsiya) — 2 500 AQSh dollari;
3-oʻrin (har bir nominatsiya) — 1 500 AQSh dollari.
20. Festivalning yakuniy bosqichi gʻoliblariga Tashkiliy qoʻmita tomonidan diplomlar, sovrinlar va Festival ramzlari tushirilgan esdalik sovgʻalari topshiriladi.
Xalqaro hayʼat qarori bilan eng yaxshi deb topilgan ishtirokchilar har bir nominatsiya boʻyicha bittadan Laureat diplomlari bilan taqdirlanadilar.
Bundan tashqari, har bir nominatsiyada bittadan I, II va III darajali diplomlar, Festival ishtirokchisi diplomlari hamda har bir qatnashchiga maxsus diplom beriladi.
21. Xalqaro hayʼatning qarorlari qatʼiy va qayta koʻrib chiqilmaydi.
22. Festival muassislari, davlat tashkilotlari va nodavlat tashkilotlar, ommaviy axborot vositalari, korxonalar, muassasalar, jamgʻarmalar, ijodiy uyushmalar va boshqa tashkilotlar ishtirokchilar uchun maxsus mukofotlar, sovrinlar, esdalik sovgʻalari va maxsus mukofotlar taʼsis etishlari mumkin.
5-bob. Tashkiliy-moliyaviy shartlar
23. Festivalning yakuniy bosqichi ishtirokchilari va mehmonlari, shuningdek, xalqaro hayʼat aʼzolari Tashkiliy qoʻmita tomonidan Festival oʻtkaziladigan davr va hududda yotoqxona, ovqatlanish va belgilangan yoʻnalish boʻyicha transport bilan taʼminlanadilar.
24. Festivalning I bosqichida ishtirok etish hamda yakuniy bosqich oʻtkaziladigan hududga joylardan kelib-ketish bilan bogʻliq xarajatlar ishtirokchilarni yuboruvchi tashkilot va muassasalar yoki ishtirokchilar hamda homiylar tomonidan qoplanishi mumkin.
25. Xorijiy mehmonlarning Oʻzbekiston hududidagi alohida mehmonxona va transport xarajatlari ularni taklif etgan mezbon tashkilot va muassasalar yoki mehmonlarning oʻzlari tomonidan qoplanadi.
Bunda, Oʻzbekiston Respublikasi hududida Festivalning barcha xorijiy ishtirokchilari va mehmonlari uchun ichki qatnovlar boʻyicha avia va temir yoʻl chiptalari belgilangan tartibda sotiladi, mehmonxona haqi soʻmda qabul qilinadi.
6-bob. Yakunlovchi qoidalar
26. Oʻzbekiston Respublikasi Soliq kodeksiga muvofiq madaniyat va koʻrik-tanlov gʻoliblariga beriladigan bir martalik pul mukofotlariga jismoniy shaxslardan olinadigan daromad soligʻi solinmaydi, shuningdek, yagona ijtimoiy toʻlov va sugʻurta badallari boʻyicha soliq solish obyekti hisoblanmaydi.
27. Oʻzbekiston Respublikasi Moliya vazirligining Davlat moliyaviy nazorat bosh boshqarmasi Festivalni tashkil etish va oʻtkazish uchun ajratilgan budjet mablagʻlarining maqsadli ishlatilishi va toʻgʻri toʻlanishini nazorat qiladi.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 27-iyun,
486-son