📅 2018-yil 24-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 24 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 24 июля 2018 г. · Постановления Кабинета Министров
Официальный текст. Официальный документ. Редакционные примечания не включены.
📅 24 July 2018 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Муҳаммад ал-Хоразмий номидаги Тошкент ахборот технологиялари университетида кадрлар тайёрлаш тизимини тубдан такомиллаштириш ва самарадорлигини ошириш чора-тадбирлари тўғрисида
Ўзбекистон Республикаси Президентининг 2018 йил 19 февралдаги «Ахборот технологиялари ва коммуникациялари соҳасини янада такомиллаштириш чора-тадбирлари тўғрисида» ПФ-5349-сон Фармони , 2018 йил 19 февралдаги «Ўзбекистон Республикаси Ахборот технологиялари ва коммуникацияларини ривожлантириш вазирлиги фаолиятини ташкил этиш тўғрисида» ПҚ-3549-сон қарорига мувофиқ, шунингдек, Муҳаммад ал-Хоразмий номидаги Тошкент ахборот технологиялари университети ва унинг филиалларида кадрлар тайёрлаш тизимини тубдан такомиллаштириш ва самарадорлигини ошириш, ўқув жараёнига таълимнинг кредит тизимини жорий қилиш орқали университетни жаҳоннинг нуфузли университетлари қаторига киришини таъминлаш мақсадида Вазирлар Маҳкамаси қарор қилади:
1. Ўзбекистон Республикаси Президентининг 2018 йил 19 февралдаги «Ахборот технологиялари ва коммуникациялари соҳасини янада такомиллаштириш чора-тадбирлари тўғрисида» ПФ-5349-сон Фармонига асосан Муҳаммад ал-Хоразмий номидаги Тошкент ахборот технологиялари университети (кейинги ўринларда Университет деб юритилади) ва унинг филиалларида 2018/2019 ўқув йилидан бошлаб ахборот технологиялари ва коммуникациялари соҳасида кадрлар тайёрлаш бўйича ўқитишнинг кредит тизимини жорий этиш таклифи маъқулланганлиги маълумот учун қабул қилинсин.
3. Қуйидагилар таълимнинг кредит тизимини жорий этиш орқали Университет ва унинг филиалларини ривожлантиришнинг асосий йўналишлари этиб белгилансин:
Университет ва унинг филиаллари профессор-ўқитувчилари таркибини юқори даражада касбий педагогик маҳоратга эга бўлган мутахассислар билан тўлдириш, шунингдек, нуфузли хорижий олий таълим ва илмий муассасаларда таълим олган, малака оширган, илмий даражаларини ҳимоя қилган иқтидорли педагог кадрлар ҳамда амалий иш тажрибасига эга бўлган мутахассисларни таълим жараёнига кенг жалб қилиш;
халқаро рейтингларда нуфузли ўринларни эгаллаган хорижий олий таълим муассасалари билан талабалар, профессор-ўқитувчилар, илмий-изланувчи олимларнинг алмашинув дастурларини кенг жорий қилиш, етакчи хорижий илмий-таълим муассасалари, илмий-тадқиқот марказлари билан ҳамкорликни мустаҳкамлаш;
ўқув жараёнини ташкил этишнинг самарали усуллари ва замонавий таълим технологияларини ўзлаштириш, малакали педагог кадрлар учун рақобат муҳитини яратиш орқали уларнинг тажрибасини мунтазам ошириб бориш;
талабага ўзининг таълим дастурини мустақил шакллантириш имконини яратиш ва билимини баҳолашда ошкораликни таъминлаш.
4. Университет Ўзбекистон Республикаси Олий ва ўрта махсус таълим вазирлиги билан келишган ҳолда, таълим сифатини ошириш мақсадида хорижий давлатларнинг ахборот-коммуникация технологиялари соҳасини ривожлантириш амалиётидан келиб чиқиб, икки ой муддатда халқаро андозаларга мос ва илғор педагогик технологияларга асосланган ўқув режалари ва дастурлари, битирувчиларнинг малака талабларини ишлаб чиқилиши ҳамда тасдиқланишини таъминласин.
5. Белгилаб қўйилсинки:
2018/2019 ўқув йилидан бошлаб Университет ва унинг филиаллари таркибидаги академик лицейларнинг таълим дастурлари замонавий ахборот ва педагогик технологиялардан кенг фойдаланиш асосида математика, физика, чет тили ва ахборот технологияларига оид фанлар чуқур ўқитилиши назарда тутилган ҳолда ишлаб чиқилади;
Университет ва унинг филиаллари таркибидаги академик лицейларнинг педагог кадрлари таркиби 30 фоизгача Университет ва унинг филиалларидан ўриндошлик асосида юқори малакали педагогларни жалб этиш ҳисобига шакллантирилади.
6. Ўзбекистон Республикаси Ахборот технологиялари ва коммуникацияларини ривожлантириш вазирлиги Университет билан биргаликда икки ой муддатда Ахборот-коммуникация технологияларини ривожлантириш жамғармаси маблағлари ҳисобидан Университет профессор-ўқитувчилари таркибини «Scopus» ва «Web of science» тизимига кирувчи халқаро илмий журналларда илмий мақолалар чоп этилишидан, шунингдек, илмий-услубий, илмий-тадқиқот, ташкилий-услубий, маънавий-маърифий ва тарбиявий ишлар бажарилишидан келиб чиққан ҳолда моддий рағбатлантириш тартибини ишлаб чиқсин ва тасдиқласин.
7. Ўзбекистон Республикаси Вазирлар Маҳкамасининг 2013 йил 28 июндаги «Муҳаммад ал-Хоразмий номидаги Тошкент ахборот технологиялари университети ва унинг ҳудудий филиаллари ташкилий тузилмасини такомиллаштириш тўғрисида» 188-сон қарори ўз кучини йўқотган деб ҳисоблансин.
8. Ўзбекистон Республикаси Ахборот технологиялари ва коммуникацияларини ривожлантириш вазирлиги манфаатдор вазирлик ва идоралар билан биргаликда бир ой муддатда ўзлари қабул қилган норматив-ҳуқуқий ва бошқа ҳужжатларни мазкур қарорга мувофиқлаштирсин.
9. Мазкур қарорнинг ижросини назорат қилиш Ўзбекистон Республикаси Бош вазирининг ўринбосари А.А. Абдухакимов ва Ахборот технологиялари ва коммуникацияларини ривожлантириш вазири А.И. Ахмедхаджаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2018 йил 24 июль,
569-сон
Oʻzbekiston Respublikasi Vazirlar Mahkamasining
qarori
Muhammad al-Xorazmiy nomidagi Toshkent axborot texnologiyalari universitetida kadrlar tayyorlash tizimini tubdan takomillashtirish va samaradorligini oshirish chora-tadbirlari toʻgʻrisida
Oʻzbekiston Respublikasi Prezidentining 2018-yil 19-fevraldagi “Axborot texnologiyalari va kommunikatsiyalari sohasini yanada takomillashtirish chora-tadbirlari toʻgʻrisida” PF-5349-son Farmoni , 2018-yil 19-fevraldagi “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi faoliyatini tashkil etish toʻgʻrisida” PQ-3549-son qaroriga muvofiq, shuningdek, Muhammad al-Xorazmiy nomidagi Toshkent axborot texnologiyalari universiteti va uning filiallarida kadrlar tayyorlash tizimini tubdan takomillashtirish va samaradorligini oshirish, oʻquv jarayoniga taʼlimning kredit tizimini joriy qilish orqali universitetni jahonning nufuzli universitetlari qatoriga kirishini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining 2018-yil 19-fevraldagi “Axborot texnologiyalari va kommunikatsiyalari sohasini yanada takomillashtirish chora-tadbirlari toʻgʻrisida” PF-5349-son Farmoniga asosan Muhammad al-Xorazmiy nomidagi Toshkent axborot texnologiyalari universiteti (keyingi oʻrinlarda Universitet deb yuritiladi) va uning filiallarida 2018/2019 oʻquv yilidan boshlab axborot texnologiyalari va kommunikatsiyalari sohasida kadrlar tayyorlash boʻyicha oʻqitishning kredit tizimini joriy etish taklifi maʼqullanganligi maʼlumot uchun qabul qilinsin.
3. Quyidagilar taʼlimning kredit tizimini joriy etish orqali Universitet va uning filiallarini rivojlantirishning asosiy yoʻnalishlari etib belgilansin:
Universitet va uning filiallari professor-oʻqituvchilari tarkibini yuqori darajada kasbiy pedagogik mahoratga ega boʻlgan mutaxassislar bilan toʻldirish, shuningdek, nufuzli xorijiy oliy taʼlim va ilmiy muassasalarda taʼlim olgan, malaka oshirgan, ilmiy darajalarini himoya qilgan iqtidorli pedagog kadrlar hamda amaliy ish tajribasiga ega boʻlgan mutaxassislarni taʼlim jarayoniga keng jalb qilish;
xalqaro reytinglarda nufuzli oʻrinlarni egallagan xorijiy oliy taʼlim muassasalari bilan talabalar, professor-oʻqituvchilar, ilmiy-izlanuvchi olimlarning almashinuv dasturlarini keng joriy qilish, yetakchi xorijiy ilmiy-taʼlim muassasalari, ilmiy-tadqiqot markazlari bilan hamkorlikni mustahkamlash;
oʻquv jarayonini tashkil etishning samarali usullari va zamonaviy taʼlim texnologiyalarini oʻzlashtirish, malakali pedagog kadrlar uchun raqobat muhitini yaratish orqali ularning tajribasini muntazam oshirib borish;
talabaga oʻzining taʼlim dasturini mustaqil shakllantirish imkonini yaratish va bilimini baholashda oshkoralikni taʼminlash.
4. Universitet Oʻzbekiston Respublikasi Oliy va oʻrta maxsus taʼlim vazirligi bilan kelishgan holda, taʼlim sifatini oshirish maqsadida xorijiy davlatlarning axborot-kommunikatsiya texnologiyalari sohasini rivojlantirish amaliyotidan kelib chiqib, ikki oy muddatda xalqaro andozalarga mos va ilgʻor pedagogik texnologiyalarga asoslangan oʻquv rejalari va dasturlari, bitiruvchilarning malaka talablarini ishlab chiqilishi hamda tasdiqlanishini taʼminlasin.
5. Belgilab qoʻyilsinki:
2018/2019 oʻquv yilidan boshlab Universitet va uning filiallari tarkibidagi akademik litseylarning taʼlim dasturlari zamonaviy axborot va pedagogik texnologiyalardan keng foydalanish asosida matematika, fizika, chet tili va axborot texnologiyalariga oid fanlar chuqur oʻqitilishi nazarda tutilgan holda ishlab chiqiladi;
Universitet va uning filiallari tarkibidagi akademik litseylarning pedagog kadrlari tarkibi 30 foizgacha Universitet va uning filiallaridan oʻrindoshlik asosida yuqori malakali pedagoglarni jalb etish hisobiga shakllantiriladi.
6. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Universitet bilan birgalikda ikki oy muddatda Axborot-kommunikatsiya texnologiyalarini rivojlantirish jamgʻarmasi mablagʻlari hisobidan Universitet professor-oʻqituvchilari tarkibini “Scopus” va “Web of science” tizimiga kiruvchi xalqaro ilmiy jurnallarda ilmiy maqolalar chop etilishidan, shuningdek, ilmiy-uslubiy, ilmiy-tadqiqot, tashkiliy-uslubiy, maʼnaviy-maʼrifiy va tarbiyaviy ishlar bajarilishidan kelib chiqqan holda moddiy ragʻbatlantirish tartibini ishlab chiqsin va tasdiqlasin.
7. Oʻzbekiston Respublikasi Vazirlar Mahkamasining 2013-yil 28-iyundagi “Muhammad al-Xorazmiy nomidagi Toshkent axborot texnologiyalari universiteti va uning hududiy filiallari tashkiliy tuzilmasini takomillashtirish toʻgʻrisida” 188-son qarori oʻz kuchini yoʻqotgan deb hisoblansin.
8. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi manfaatdor vazirlik va idoralar bilan birgalikda bir oy muddatda oʻzlari qabul qilgan normativ-huquqiy va boshqa hujjatlarni mazkur qarorga muvofiqlashtirsin.
9. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari A.A. Abduxakimov va Axborot texnologiyalari va kommunikatsiyalarini rivojlantirish vaziri A.I. Axmedxadjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 24-iyul,
569-son