📅 2018-yil 30-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 30 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 30 июля 2018 г. · Постановления Кабинета Министров
Официальный текст. Официальный документ. Редакционные примечания не включены.
📅 30 July 2018 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Жиззах вилоятининг Зомин тумани марказий қисмида қурилиш ва ободонлаштириш ишларини ташкил этиш тўғрисида
Жиззах вилоятининг Зомин тумани марказий қисмини батафсил режалаштириш лойиҳасини амалга ошириш орқали туманнинг архитектура қиёфасини тубдан ўзгартириш, аҳоли фаровонлигини ошириш мақсадида Вазирлар Маҳкамаси қарор қилади:
1. Жиззах вилоятининг Зомин тумани марказий қисмини батафсил режалаштириш лойиҳасининг умумий концепцияси Вазирлар Маҳкамаси томонидан маъқуллангани маълумот учун қабул қилинсин.
2. «ЎзшаҳарсозликЛИТИ» ДУК томонидан ишлаб чиқилган Зомин тумани Абдурайим Сатторов кўчасининг жанубий қисмида 1-босқичда қурилиши режалаштирилган, энергияни тежайдиган технологиялар асосида ишлаб чиқилган «Зомин» (арзон) уй-жой комплексининг индивидуал лойиҳаси маъқуллансин ва лойиҳанинг кейинги босқичлари учун асос қилиб олинсин.
3. Жиззах вилояти ҳокимлиги, Ўзбекистон Республикаси Қурилиш вазирлиги, Инвестициялар бўйича давлат қўмитаси, «Ипотека банк» АТИБ, «Ўзшаҳар қурилиш инвест» ИК МЧЖ Ўзбекистон Республикаси Президентининг «2017 — 2020 йилларда шаҳарларда арзон кўп квартирали уйлар қуриш ва реконструкция қилиш дастурини самарали амалга ошириш борасидаги қўшимча чора-тадбирлар тўғрисида» 2017 йил 23 октябрдаги ПҚ-3350-сон қарори доирасида 2018 йилда Зомин туманида қурилиши режалаштирилган 5 та кўп квартирали уй (225 та квартира) ўрнига янги типдаги лойиҳа асосида маиший-савдо объектлари бўлган 11 та кўп квартирали уйдан (137 та квартира) иборат «Зомин» (арзон) уй-жой комплекси қурилишини таъминласинлар.
4. Қуйидагилар:
ташқи муҳандислик коммуникацияларини қуриш бўйича, тегишлилигига кўра — вазирликлар, идоралар ва бошқа ташкилотлар буюртмачи этиб;
Вазирлар Маҳкамасининг «2017 — 2019 йилларда Жиззах вилоятининг Зомин туманини комплекс ривожлантириш чора-тадбирлари дастури тўғрисида» 2017 йил 11 ноябрдаги 902-сон қарорига асосан ичимлик суви ва канализация тармоқлари қуриш бўйича «Ўзбеккоммуналлойиҳақурилиш» ДУК бош лойиҳачи этиб, Ўзбекистон Республикаси Уй-жой-коммунал хизмат кўрсатиш вазирлиги буюртмачи этиб, «Жиззах трест 21» МЧЖ бош пудратчи этиб белгилансин.
5. «Ўзшаҳар қурилиш инвест» ИК МЧЖга «Зомин» (арзон) уй-жой комплексининг индивидуал лойиҳасида назарда тутилмаган харажатларни кўп қаватли уйлар таркибида қуриладиган маиший-савдо объектлари таннархига йўналтиришга рухсат берилсин.
6. Ўзбекистон Республикаси Молия вазирлиги Ўзбекистон Республикаси республика бюджетининг қўшимча манбалари ҳисобидан:
туман марказида режалаштирилган ичимлик ва оқова сув иншоотлари ҳамда тармоқлари қурилиши учун тегишли маблағлар буюртмачиларнинг асосланган ҳисоб-китобларига мувофиқ тегишли миқдордаги маблағлар ажратилишини;
арзонлаштирилган кўп қаватли уй-жойлар ҳудудида болалар ўйин майдончалари, ободонлаштириш, кўкаламзорлаштириш ва суғориш тизимлари, замонавий типдаги пиёдалар йўлкалари,соябон элементлари (галерея)қуриш учун зарур маблағлар жорий йилда ажратилишини;
Зомин марказий стадионини тубдан реконструкция қилишга сарфланадиган маблағлар буюртмачиларнинг асосланган ҳисоб-китобларига асосан ажратилишини таъминласин.
Жиззах вилояти ҳокимлиги Зомин туманининг Даштобод шаҳарчасида фуқароларга тегишли бўлган 23 та нотурар жой объекти бузилганлиги учун асосланган ҳисоб-китобларга мувофиқ вилоят маҳаллий бюджет маблағлари ҳисобига компенсация тўланишини таъминласин.
7. Ўзбекистон Республикаси Уй-жой-коммунал хизмат кўрсатиш вазирлиги I босқичдаги оқова сув иншооти ва коллекторларнинг қурилиш-монтаж ишлари 2018 йил 1 декабргача якунланишини таъминласин.
8. Ўзбекистон Республикаси Молия вазирлиги Инвестициялар бўйича давлат қўмитаси билан биргаликда:
янгиланган лойиҳалар асосида ишлаб чиқилган «Зомин» (арзон) уй-жой комплекси қурилиши учун лойиҳа-смета ҳужжатлари бўйича берилган давлат экспертиза хулосасига асосан қўшимча қурилиш-монтаж ишлари учун зарур маблағларини Ўзбекистон Республикаси Президентининг 2017 йил 23 октябрдаги ПҚ-3350-сон қарори билан белгиланган тартиб асосида;
Зомин тумани марказий қисмини батафсил режалаштириш лойиҳасига Ўзбекистон Республикаси Президентининг «2018 йилга мўлжалланган инвестиция ва инфратузилма лойиҳаларини тасдиқлаш тўғрисида» 2018 йил 3 февралдаги ПҚ-3507-сон қарорида шаҳарсозлик ҳужжатлари ишлаб чиқилишини молиялаштириш мақсадлари учун белгиланган манбалар ҳисобидан маблағ ажратилишини таъминласин.
9. Зомин тумани ҳудудида олиб борилаётган қурилиш-таъмирлаш ва ободонлаштириш ишларини қисқа муддатларда амалга ошириш мақсадида барча объектлар бўйича истисно тариқасида:
қурилиш ишлари 2018 йилнинг охирига қадар лойиҳа-смета ҳужжатларини ишлаб чиқиш билан бир вақтда олиб борилишига;
бош лойиҳачи ва бош пудратчилар танлов савдолари (тендер) ўтказилмасдан,уларнинг энг мақбул таклифлари асосида танлаб олиш йўли билан белгиланишига рухсат берилсин.
10. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — «Ўзбекистон темир йўллари» АЖ бошқаруви раиси А.Ж. Раматов ва Жиззах вилояти ҳокими Э.А. Солиев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2018 йил 30 июль,
602-сон
Oʻzbekiston Respublikasi Vazirlar Mahkamasining
qarori
Jizzax viloyatining Zomin tumani markaziy qismida qurilish va obodonlashtirish ishlarini tashkil etish toʻgʻrisida
Jizzax viloyatining Zomin tumani markaziy qismini batafsil rejalashtirish loyihasini amalga oshirish orqali tumanning arxitektura qiyofasini tubdan oʻzgartirish, aholi farovonligini oshirish maqsadida Vazirlar Mahkamasi qaror qiladi:
1. Jizzax viloyatining Zomin tumani markaziy qismini batafsil rejalashtirish loyihasining umumiy konsepsiyasi Vazirlar Mahkamasi tomonidan maʼqullangani maʼlumot uchun qabul qilinsin.
2. “OʻzshaharsozlikLITI” DUK tomonidan ishlab chiqilgan Zomin tumani Abdurayim Sattorov koʻchasining janubiy qismida 1-bosqichda qurilishi rejalashtirilgan, energiyani tejaydigan texnologiyalar asosida ishlab chiqilgan “Zomin” (arzon) uy-joy kompleksining individual loyihasi maʼqullansin va loyihaning keyingi bosqichlari uchun asos qilib olinsin.
3. Jizzax viloyati hokimligi, Oʻzbekiston Respublikasi Qurilish vazirligi, Investitsiyalar boʻyicha davlat qoʻmitasi, “Ipoteka bank” ATIB, “Oʻzshahar qurilish invest” IK MChJ Oʻzbekiston Respublikasi Prezidentining “2017 — 2020-yillarda shaharlarda arzon koʻp kvartirali uylar qurish va rekonstruksiya qilish dasturini samarali amalga oshirish borasidagi qoʻshimcha chora-tadbirlar toʻgʻrisida” 2017-yil 23-oktabrdagi PQ-3350-son qarori doirasida 2018-yilda Zomin tumanida qurilishi rejalashtirilgan 5 ta koʻp kvartirali uy (225 ta kvartira) oʻrniga yangi tipdagi loyiha asosida maishiy-savdo obyektlari boʻlgan 11 ta koʻp kvartirali uydan (137 ta kvartira) iborat “Zomin” (arzon) uy-joy kompleksi qurilishini taʼminlasinlar.
4. Quyidagilar:
tashqi muhandislik kommunikatsiyalarini qurish boʻyicha, tegishliligiga koʻra — vazirliklar, idoralar va boshqa tashkilotlar buyurtmachi etib;
Vazirlar Mahkamasining “2017 — 2019-yillarda Jizzax viloyatining Zomin tumanini kompleks rivojlantirish chora-tadbirlari dasturi toʻgʻrisida” 2017-yil 11-noyabrdagi 902-son qaroriga asosan ichimlik suvi va kanalizatsiya tarmoqlari qurish boʻyicha “Oʻzbekkommunalloyihaqurilish” DUK bosh loyihachi etib, Oʻzbekiston Respublikasi Uy-joy-kommunal xizmat koʻrsatish vazirligi buyurtmachi etib, “Jizzax trest 21” MChJ bosh pudratchi etib belgilansin.
5. “Oʻzshahar qurilish invest” IK MChJga “Zomin” (arzon) uy-joy kompleksining individual loyihasida nazarda tutilmagan xarajatlarni koʻp qavatli uylar tarkibida quriladigan maishiy-savdo obyektlari tannarxiga yoʻnaltirishga ruxsat berilsin.
6. Oʻzbekiston Respublikasi Moliya vazirligi Oʻzbekiston Respublikasi respublika budjetining qoʻshimcha manbalari hisobidan:
tuman markazida rejalashtirilgan ichimlik va oqova suv inshootlari hamda tarmoqlari qurilishi uchun tegishli mablagʻlar buyurtmachilarning asoslangan hisob-kitoblariga muvofiq tegishli miqdordagi mablagʻlar ajratilishini;
arzonlashtirilgan koʻp qavatli uy-joylar hududida bolalar oʻyin maydonchalari, obodonlashtirish, koʻkalamzorlashtirish va sugʻorish tizimlari, zamonaviy tipdagi piyodalar yoʻlkalari,soyabon elementlari (galereya)qurish uchun zarur mablagʻlar joriy yilda ajratilishini;
Zomin markaziy stadionini tubdan rekonstruksiya qilishga sarflanadigan mablagʻlar buyurtmachilarning asoslangan hisob-kitoblariga asosan ajratilishini taʼminlasin.
Jizzax viloyati hokimligi Zomin tumanining Dashtobod shaharchasida fuqarolarga tegishli boʻlgan 23 ta noturar joy obyekti buzilganligi uchun asoslangan hisob-kitoblarga muvofiq viloyat mahalliy budjet mablagʻlari hisobiga kompensatsiya toʻlanishini taʼminlasin.
7. Oʻzbekiston Respublikasi Uy-joy-kommunal xizmat koʻrsatish vazirligi I bosqichdagi oqova suv inshooti va kollektorlarning qurilish-montaj ishlari 2018-yil 1-dekabrgacha yakunlanishini taʼminlasin.
8. Oʻzbekiston Respublikasi Moliya vazirligi Investitsiyalar boʻyicha davlat qoʻmitasi bilan birgalikda:
yangilangan loyihalar asosida ishlab chiqilgan “Zomin” (arzon) uy-joy kompleksi qurilishi uchun loyiha-smeta hujjatlari boʻyicha berilgan davlat ekspertiza xulosasiga asosan qoʻshimcha qurilish-montaj ishlari uchun zarur mablagʻlarini Oʻzbekiston Respublikasi Prezidentining 2017-yil 23-oktabrdagi PQ-3350-son qarori bilan belgilangan tartib asosida;
Zomin tumani markaziy qismini batafsil rejalashtirish loyihasiga Oʻzbekiston Respublikasi Prezidentining “2018-yilga moʻljallangan investitsiya va infratuzilma loyihalarini tasdiqlash toʻgʻrisida” 2018-yil 3-fevraldagi PQ-3507-son qarorida shaharsozlik hujjatlari ishlab chiqilishini moliyalashtirish maqsadlari uchun belgilangan manbalar hisobidan mablagʻ ajratilishini taʼminlasin.
9. Zomin tumani hududida olib borilayotgan qurilish-taʼmirlash va obodonlashtirish ishlarini qisqa muddatlarda amalga oshirish maqsadida barcha obyektlar boʻyicha istisno tariqasida:
qurilish ishlari 2018-yilning oxiriga qadar loyiha-smeta hujjatlarini ishlab chiqish bilan bir vaqtda olib borilishiga;
bosh loyihachi va bosh pudratchilar tanlov savdolari (tender) oʻtkazilmasdan,ularning eng maqbul takliflari asosida tanlab olish yoʻli bilan belgilanishiga ruxsat berilsin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov va Jizzax viloyati hokimi E.A. Soliyev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 30-iyul,
602-son