📅 2018-yil 6-avgust · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 6 август · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 6 августа 2018 г. · Постановления Президента
Официальный текст. Официальный документ. Редакционные примечания не включены.
📅 6 August 2018 · Presidential resolutions
Official text. Official document. Editorial notes are not included.
Ўзбекистон Республикаси Президентининг
Қарори
СХЕМАСИ
ЖАДВАЛИ *
Ўзбекистон Республикаси Президенти ҳузуридаги Давлат бошқаруви академиясининг ҳудудий филиалларини ташкил этиш тўғрисида
Жойларда бошқарув кадрлари малакасини оширишнинг сифатини яхшилаш, тингловчиларга ҳар томонлама қулай шарт-шароитлар яратиш мақсадида, шунингдек, 2017 — 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясига мувофиқ:
1. Ўзбекистон Республикаси Президенти ҳузуридаги Давлат бошқаруви академияси (кейинги ўринларда Академия деб аталади) ва Олий ва ўрта махсус таълим вазирлигининг Гулистон, Қарши, Самарқанд, Урганч ва Фарғона шаҳарларида Академиянинг ҳудудий филиалларини (кейинги ўринларда ҳудудий филиаллар деб аталади) ташкил этиш тўғрисидаги таклифига розилик берилсин.
Ҳудудий филиалларда директор, бош мутахассис, бош методист ва техник ходим лавозимлари Ўзбекистон Республикаси Олий ва ўрта махсус таълим вазирлиги Касб-ҳунар таълими маркази тизимидаги таълим муассасаларининг умумтаълим фанлари ўқитувчиларининг 2018/2019 ўқув йилидан бошлаб қисқартирилиши ҳисобига ажратилсин.
2. Қуйидагилар ҳудудий филиалларнинг асосий вазифалари этиб белгилансин:
замонавий шароитларда бошқарув кадрларининг касбий билим ва савиясига қўйилаётган талабларни ҳисобга олган ҳолда, жойларда давлат ва жамият бошқаруви соҳасидаги раҳбар кадрларнинг малакасини ошириш;
малака ошириш курслари тингловчиларида маҳаллий бошқарув ва ҳудудий ривожланиш соҳасидаги чуқур ва амалиётга йўналтирилган, шунингдек, стратегик режалаштириш, горизонтал ва вертикал муносабатлар тизимига оид билимларни, давлат ва ҳудудий дастурларни ҳамда норматив-ҳуқуқий ҳужжатларни сифатли ижро этиш кўникмаларини шакллантириш;
маҳаллий давлат ҳокимияти органлари, давлат ва хўжалик бошқаруви органларининг ҳудудий тузилмалари, шунингдек, нодавлат нотижорат ва бошқа ташкилотларнинг бошқарув кадрлари ва масъул ходимлари учун вазирлик, идора ҳамда бошқа ташкилотларнинг раҳбарларини жалб этган ҳолда доимий асосда ўқув-амалий семинарларни ташкил этиш;
ўқув-амалий семинарлар доирасида тингловчиларда фаолиятни режалаштириш ва иш режалари («йўл хариталари»)ни сифатли бажариш кўникмаларини шакллантириш;
малака ошириш курслари ва ўқув-амалий семинарлар жараёнида аниқланган муаммолар бўйича ахборот-таҳлилий материалларни тайёрлаш.
3. Ҳудудий филиалларга Академия ректори томонидан лавозимга тайинланадиган ва лавозимдан озод этиладиган, шунингдек, мақоми ва меҳнатга ҳақ тўлаш шарт-шароитлари бўйича Академиянинг факультет деканига тенглаштириладиган директор раҳбарлик қилиши белгилансин.
4. Ҳудудий филиалларда ўқишни ташкил этиш 1-иловага мувофиқ схема бўйича амалга оширилади.
5. Белгилаб қўйилсинки:
маҳаллий давлат ҳокимияти органлари, давлат ва хўжалик бошқаруви органларининг ҳудудий тузилмалари, шунингдек, нодавлат нотижорат ва бошқа ташкилотларнинг бошқарув кадрлари ва масъул ходимлари таркибидан шакллантириладиган буюртмалар асосида ҳудудий филиалларда малака ошириш режалари Академия томонидан тасдиқланади;
ҳудудий филиалларда ўқув жараёни замонавий таълим технологияларини татбиқ этган ҳолда бошқарув кадрлари кўникмаларини шакллантириш, интерфаол машғулотлар ва давра суҳбатларини мунтазам ўтказиш, ҳудудларда юзага келган муаммоларни таҳлил қилиш ва ҳал этиш асосида ташкил этилади;
Тошкент шаҳри ва Тошкент вилоятидан ҳудудий филиаллардаги ўқув жараёнига юбориладиган шахслар ҳудудий филиалларнинг тегишли дастурлари асосида Академияда ўқитилади;
ҳудудий филиалларда ўқув режадаги фанларни ўқитиш учун профессор-ўқитувчилар ҳамда мутахассислар штат ва соатбай асосда жалб этилади;
ҳудудий филиаллардаги малака ошириш курсларида иш жойидан ажралган ҳолда таълим олаётган тингловчилар учун ўқиш даврида асосий иш жойидаги лавозими ва ўртача ойлик иш ҳақи сақланади.
6. Ҳудудий филиаллар олий таълим муассасаларининг биноларида «ноль» ставкадаги ижара тўлови асосида ҳамда тегишли коммунал ва фойдаланиш харажатларини қопламаган ҳолда 2-иловага мувофиқ жадвал бўйича жойлаштирилсин.
7. Академия ва Ўзбекистон Республикаси Олий ва ўрта махсус таълим вазирлиги:
малака ошириш даврида бошқа ҳудудлардан келган тингловчилар, профессор-ўқитувчилар ва мутахассисларга тегишли олий таълим муассасаларининг ётоқхоналаридан ва Академия меҳмонхона комплексидан яшаш учун белгиланган тартибда жой ажратилишини;
тингловчилар тегишли олий таълим муассасаларининг ахборот-ресурс марказидан белгиланган тартибда фойдаланишини таъминлаб борсин.
8. Белгилансинки, 2018 йил 1 сентябрдан бошлаб, малака ошириш курсларига машғулотлар ўтказиш учун соатбай иш ҳақи тўлаш шартлари билан жалб этиладиган шахсларга соатбай иш ҳақининг миқдори белгиланган миқдорлардан 25 фоизга кўпайтирилади.
Академия ректорига малака ошириш курсларига жалб этиладиган юқори малакали илмий-педагогик кадрларга ва тажрибали амалиётчи мутахассисларга:
уларнинг кўпи билан 20 фоизига ўқув машғулотлари ўтказганлиги учун соатбай иш ҳақи миқдорини белгиланган миқдорларидан 50 фоиз юқори этиб белгилаш;
шартнома асосида жалб қилинган бюджетдан ташқари маблағлар ҳисобидан ўқув машғулотлари ўтказганлиги учун соатбай иш ҳақининг миқдорини белгиланган миқдордан икки ярим бараваргача юқори этиб белгилаш ҳуқуқи берилсин.
9. Шундай тартиб ўрнатилсинки, унга мувофиқ:
ҳудудий филиалларда бошқарув кадрлари, шу жумладан, ишлаб чиқаришдан ажралмаган ҳолда давлат гранти ва тўлов-контракт асосида давомийлиги бир ойдан ошмаган қисқа муддатли дастурлар бўйича малака оширадилар;
ҳудудий филиаллардаги малака ошириш курсларига фақат маҳаллий давлат ҳокимияти органлари, давлат бошқаруви органларининг ҳудудий тузилмалари ҳамда бошқа давлат ташкилотларининг бошқарув кадрлари ва масъул ходимлари давлат гранти асосида қабул қилинади;
ҳудудий филиаллар фаолиятини услубий таъминлаш ҳамда малака ошириш курслари ва ўқув-амалий семинарлар учун ўқув дастурларини ишлаб чиқиш Академия томонидан белгиланган тартибда амалга оширилади;
ҳудудий филиаллардаги малака ошириш курсларидан муваффақиятли ўтган бошқарув кадрларига белгиланган намунадаги сертификатлар берилади.
10. Ўзбекистон Республикаси Олий ва ўрта махсус таълим вазирлиги:
Академиянинг талабномаси бўйича 2018 йилнинг 15 августига қадар ҳудудий филиалларда малака ошириш курсларини ташкил этиш ва жойлаштириш учун олий таълим муассасаларидаги керакли хоналарни таъмирлаш-тиклаш ишларини амалга оширган ҳолда ажратилишини таъминласин;
ҳудудий филиаллар фаолиятини амалга ошириш учун доимий равишда зарур ташкилий-методик ёрдам кўрсатсин.
11. Ўзбекистон Республикаси Ахборот технологиялари ва коммуникацияларини ривожлантириш вазирлиги, Олий ва ўрта махсус таълим вазирлиги, Ўзбекистон Миллий кутубхонаси бир ойлик муддатда:
ҳудудий филиалларнинг замонавий ахборот-телекоммуникация воситалари билан жиҳозланиши ва доимий равишда бутунжаҳон ахборот Интернет тармоғига уланишини;
ҳудудий филиалларнинг республика ҳудудларидаги иштирокчилар ҳамда Академия билан ўзаро видеоконференциялар ва масофавий тренинглар ўтказиш учун «Электрон таълим» миллий тармоғига уланишини;
Академия ва ҳудудий филиалларнинг Ўзбекистон Миллий кутубхонасининг ахборот-кутубхона фондига ҳамда етакчи хорижий лицензион ахборот-кутубхона ресурслари фондларига доимий равишда электрон уланишини таъминласин.
12. Академия:
а) 2018 йилнинг 1 сентябрига қадар:
ҳудудий филиалларнинг юқори малакали мутахассислар билан тўлдирилишини;
масофавий таълимни татбиқ қилган ҳолда ўқитишнинг замонавий шакллари ва усуллари, шунингдек, ўқув адабиётлари, замонавий ўқув жиҳозлари ва компьютер техникаси билан таъминлаш бўйича комплекс чора-тадбирлар амалга оширилишини таъминласин;
б) икки ҳафта муддатда ҳудудий филиаллар тўғрисидаги намунавий низомни ҳамда уларнинг тузилмасини тасдиқласин.
13. Қуйидагилар ҳудудий филиаллар фаолиятини молиялаштириш манбалари этиб белгилансин:
Ўзбекистон Республикаси Давлат бюджети маблағлари;
хўжалик фаолиятидан ва шартнома асосида хизматлар кўрсатишдан тушадиган тушумлар;
жисмоний ва юридик шахсларнинг ҳомийлик хайриялари;
қонун ҳужжатларида тақиқланмаган бошқа манбалар.
14. Ўзбекистон Республикаси Молия вазирлиги:
2018 йилда ҳудудий филиаллар фаолиятини ташкил этиш ва уларни сақлаш, шунингдек, мебель, ўқув ҳамда масофавий таълим учун зарур жиҳозлар, компьютер техникаси билан таъминлаш юзасидан Академиянинг асосланган ҳисоб-китоблари бўйича зарур бюджет маблағларини ажратсин;
2019 йилдан бошлаб Ўзбекистон Республикаси Давлат бюджети параметрларини шакллантиришда ҳудудий филиалларни сақлаш харажатларини ҳисобга олган ҳолда Академияга зарур маблағлар ажратилишини назарда тутсин.
15. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳудудий филиалларга малака ошириш курслари ва ўқув-амалий семинарларни самарали ташкил этиш бўйича ҳар томонлама ёрдам берилишини таъминласин.
16. Академия манфаатдор вазирлик ва идоралар билан биргаликда қонун ҳужжатларига ушбу қарордан келиб чиқадиган ўзгартириш ва қўшимчалар тўғрисида Ўзбекистон Республикаси Вазирлар Маҳкамасига бир ой муддатда таклифлар киритсин.
17. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов ҳамда Ўзбекистон Республикаси Президентининг давлат маслаҳатчилари У.С. Исмаилов ва Р.С. Қосимов зиммасига юклансин.
Ўзбекистон Республикаси Президентининг 2018 йил 6 августдаги ПҚ-3901-сон қарорига 1-ИЛОВА
Ўзбекистон Республикаси Президенти ҳузуридаги Давлат бошқаруви академиясининг ҳудудий филиалларида ўқишни ташкил этиш
Ўзбекистон Республикаси Президентининг 2018 йил 6 августдаги ПҚ-3901-сон қарорига 2-ИЛОВА
Ўзбекистон Республикаси Президенти ҳузуридаги Давлат бошқаруви академияси ҳудудий филиалларини олий таълим муассасаларининг биноларида «ноль» ставкадаги ижара тўлови асосида ҳамда тегишли коммунал ва фойдаланиш харажатларини қопламаган ҳолда жойлаштириш
Т/р Ҳудудий филиалларнинг номланиши Олий таълим муассасасининг номи Қамраб олинадиган ҳудудлар 1. Гулистон ҳудудий филиали Гулистон давлат университети Жиззах ва Сирдарё вилоятлари 2. Қарши ҳудудий филиали Қарши давлат университети Қашқадарё ва Сурхондарё вилоятлари 3. Самарқанд ҳудудий филиали Самарқанд давлат университети Бухоро, Навоий ва Самарқанд вилоятлари 4. Урганч ҳудудий филиали Урганч давлат университети Қорақалпоғистон Республикаси ва Хоразм вилояти 5. Фарғона ҳудудий филиали Фарғона давлат университети Андижон, Наманган ва Фарғона вилоятлари
Ўзбекистон Республикаси Президенти Ш. МИРЗИЁЕВ
Тошкент ш.,
2018 йил 6 август,
ПҚ-3901-сон
Oʻzbekiston Respublikasi Prezidentining
Qarori
SXEMASI
JADVALI *
Oʻzbekiston Respublikasi Prezidenti huzuridagi Davlat boshqaruvi akademiyasining hududiy filiallarini tashkil etish toʻgʻrisida
Joylarda boshqaruv kadrlari malakasini oshirishning sifatini yaxshilash, tinglovchilarga har tomonlama qulay shart-sharoitlar yaratish maqsadida, shuningdek, 2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasiga muvofiq:
1. Oʻzbekiston Respublikasi Prezidenti huzuridagi Davlat boshqaruvi akademiyasi (keyingi oʻrinlarda Akademiya deb ataladi) va Oliy va oʻrta maxsus taʼlim vazirligining Guliston, Qarshi, Samarqand, Urganch va Fargʻona shaharlarida Akademiyaning hududiy filiallarini (keyingi oʻrinlarda hududiy filiallar deb ataladi) tashkil etish toʻgʻrisidagi taklifiga rozilik berilsin.
Hududiy filiallarda direktor, bosh mutaxassis, bosh metodist va texnik xodim lavozimlari Oʻzbekiston Respublikasi Oliy va oʻrta maxsus taʼlim vazirligi Kasb-hunar taʼlimi markazi tizimidagi taʼlim muassasalarining umumtaʼlim fanlari oʻqituvchilarining 2018/2019 oʻquv yilidan boshlab qisqartirilishi hisobiga ajratilsin.
2. Quyidagilar hududiy filiallarning asosiy vazifalari etib belgilansin:
zamonaviy sharoitlarda boshqaruv kadrlarining kasbiy bilim va saviyasiga qoʻyilayotgan talablarni hisobga olgan holda, joylarda davlat va jamiyat boshqaruvi sohasidagi rahbar kadrlarning malakasini oshirish;
malaka oshirish kurslari tinglovchilarida mahalliy boshqaruv va hududiy rivojlanish sohasidagi chuqur va amaliyotga yoʻnaltirilgan, shuningdek, strategik rejalashtirish, gorizontal va vertikal munosabatlar tizimiga oid bilimlarni, davlat va hududiy dasturlarni hamda normativ-huquqiy hujjatlarni sifatli ijro etish koʻnikmalarini shakllantirish;
mahalliy davlat hokimiyati organlari, davlat va xoʻjalik boshqaruvi organlarining hududiy tuzilmalari, shuningdek, nodavlat notijorat va boshqa tashkilotlarning boshqaruv kadrlari va masʼul xodimlari uchun vazirlik, idora hamda boshqa tashkilotlarning rahbarlarini jalb etgan holda doimiy asosda oʻquv-amaliy seminarlarni tashkil etish;
oʻquv-amaliy seminarlar doirasida tinglovchilarda faoliyatni rejalashtirish va ish rejalari (“yoʻl xaritalari”)ni sifatli bajarish koʻnikmalarini shakllantirish;
malaka oshirish kurslari va oʻquv-amaliy seminarlar jarayonida aniqlangan muammolar boʻyicha axborot-tahliliy materiallarni tayyorlash.
3. Hududiy filiallarga Akademiya rektori tomonidan lavozimga tayinlanadigan va lavozimdan ozod etiladigan, shuningdek, maqomi va mehnatga haq toʻlash shart-sharoitlari boʻyicha Akademiyaning fakultet dekaniga tenglashtiriladigan direktor rahbarlik qilishi belgilansin.
4. Hududiy filiallarda oʻqishni tashkil etish 1-ilovaga muvofiq sxema boʻyicha amalga oshiriladi.
5. Belgilab qoʻyilsinki:
mahalliy davlat hokimiyati organlari, davlat va xoʻjalik boshqaruvi organlarining hududiy tuzilmalari, shuningdek, nodavlat notijorat va boshqa tashkilotlarning boshqaruv kadrlari va masʼul xodimlari tarkibidan shakllantiriladigan buyurtmalar asosida hududiy filiallarda malaka oshirish rejalari Akademiya tomonidan tasdiqlanadi;
hududiy filiallarda oʻquv jarayoni zamonaviy taʼlim texnologiyalarini tatbiq etgan holda boshqaruv kadrlari koʻnikmalarini shakllantirish, interfaol mashgʻulotlar va davra suhbatlarini muntazam oʻtkazish, hududlarda yuzaga kelgan muammolarni tahlil qilish va hal etish asosida tashkil etiladi;
Toshkent shahri va Toshkent viloyatidan hududiy filiallardagi oʻquv jarayoniga yuboriladigan shaxslar hududiy filiallarning tegishli dasturlari asosida Akademiyada oʻqitiladi;
hududiy filiallarda oʻquv rejadagi fanlarni oʻqitish uchun professor-oʻqituvchilar hamda mutaxassislar shtat va soatbay asosda jalb etiladi;
hududiy filiallardagi malaka oshirish kurslarida ish joyidan ajralgan holda taʼlim olayotgan tinglovchilar uchun oʻqish davrida asosiy ish joyidagi lavozimi va oʻrtacha oylik ish haqi saqlanadi.
6. Hududiy filiallar oliy taʼlim muassasalarining binolarida “nol” stavkadagi ijara toʻlovi asosida hamda tegishli kommunal va foydalanish xarajatlarini qoplamagan holda 2-ilovaga muvofiq jadval boʻyicha joylashtirilsin.
7. Akademiya va Oʻzbekiston Respublikasi Oliy va oʻrta maxsus taʼlim vazirligi:
malaka oshirish davrida boshqa hududlardan kelgan tinglovchilar, professor-oʻqituvchilar va mutaxassislarga tegishli oliy taʼlim muassasalarining yotoqxonalaridan va Akademiya mehmonxona kompleksidan yashash uchun belgilangan tartibda joy ajratilishini;
tinglovchilar tegishli oliy taʼlim muassasalarining axborot-resurs markazidan belgilangan tartibda foydalanishini taʼminlab borsin.
8. Belgilansinki, 2018-yil 1-sentabrdan boshlab, malaka oshirish kurslariga mashgʻulotlar oʻtkazish uchun soatbay ish haqi toʻlash shartlari bilan jalb etiladigan shaxslarga soatbay ish haqining miqdori belgilangan miqdorlardan 25 foizga koʻpaytiriladi.
Akademiya rektoriga malaka oshirish kurslariga jalb etiladigan yuqori malakali ilmiy-pedagogik kadrlarga va tajribali amaliyotchi mutaxassislarga:
ularning koʻpi bilan 20 foiziga oʻquv mashgʻulotlari oʻtkazganligi uchun soatbay ish haqi miqdorini belgilangan miqdorlaridan 50 foiz yuqori etib belgilash;
shartnoma asosida jalb qilingan budjetdan tashqari mablagʻlar hisobidan oʻquv mashgʻulotlari oʻtkazganligi uchun soatbay ish haqining miqdorini belgilangan miqdordan ikki yarim baravargacha yuqori etib belgilash huquqi berilsin.
9. Shunday tartib oʻrnatilsinki, unga muvofiq:
hududiy filiallarda boshqaruv kadrlari, shu jumladan, ishlab chiqarishdan ajralmagan holda davlat granti va toʻlov-kontrakt asosida davomiyligi bir oydan oshmagan qisqa muddatli dasturlar boʻyicha malaka oshiradilar;
hududiy filiallardagi malaka oshirish kurslariga faqat mahalliy davlat hokimiyati organlari, davlat boshqaruvi organlarining hududiy tuzilmalari hamda boshqa davlat tashkilotlarining boshqaruv kadrlari va masʼul xodimlari davlat granti asosida qabul qilinadi;
hududiy filiallar faoliyatini uslubiy taʼminlash hamda malaka oshirish kurslari va oʻquv-amaliy seminarlar uchun oʻquv dasturlarini ishlab chiqish Akademiya tomonidan belgilangan tartibda amalga oshiriladi;
hududiy filiallardagi malaka oshirish kurslaridan muvaffaqiyatli oʻtgan boshqaruv kadrlariga belgilangan namunadagi sertifikatlar beriladi.
10. Oʻzbekiston Respublikasi Oliy va oʻrta maxsus taʼlim vazirligi:
Akademiyaning talabnomasi boʻyicha 2018-yilning 15-avgustiga qadar hududiy filiallarda malaka oshirish kurslarini tashkil etish va joylashtirish uchun oliy taʼlim muassasalaridagi kerakli xonalarni taʼmirlash-tiklash ishlarini amalga oshirgan holda ajratilishini taʼminlasin;
hududiy filiallar faoliyatini amalga oshirish uchun doimiy ravishda zarur tashkiliy-metodik yordam koʻrsatsin.
11. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi, Oliy va oʻrta maxsus taʼlim vazirligi, Oʻzbekiston Milliy kutubxonasi bir oylik muddatda:
hududiy filiallarning zamonaviy axborot-telekommunikatsiya vositalari bilan jihozlanishi va doimiy ravishda butunjahon axborot Internet tarmogʻiga ulanishini;
hududiy filiallarning respublika hududlaridagi ishtirokchilar hamda Akademiya bilan oʻzaro videokonferensiyalar va masofaviy treninglar oʻtkazish uchun “Elektron taʼlim” milliy tarmogʻiga ulanishini;
Akademiya va hududiy filiallarning Oʻzbekiston Milliy kutubxonasining axborot-kutubxona fondiga hamda yetakchi xorijiy litsenzion axborot-kutubxona resurslari fondlariga doimiy ravishda elektron ulanishini taʼminlasin.
12. Akademiya:
a) 2018-yilning 1-sentabriga qadar:
hududiy filiallarning yuqori malakali mutaxassislar bilan toʻldirilishini;
masofaviy taʼlimni tatbiq qilgan holda oʻqitishning zamonaviy shakllari va usullari, shuningdek, oʻquv adabiyotlari, zamonaviy oʻquv jihozlari va kompyuter texnikasi bilan taʼminlash boʻyicha kompleks chora-tadbirlar amalga oshirilishini taʼminlasin;
b) ikki hafta muddatda hududiy filiallar toʻgʻrisidagi namunaviy nizomni hamda ularning tuzilmasini tasdiqlasin.
13. Quyidagilar hududiy filiallar faoliyatini moliyalashtirish manbalari etib belgilansin:
Oʻzbekiston Respublikasi Davlat budjeti mablagʻlari;
xoʻjalik faoliyatidan va shartnoma asosida xizmatlar koʻrsatishdan tushadigan tushumlar;
jismoniy va yuridik shaxslarning homiylik xayriyalari;
qonun hujjatlarida taqiqlanmagan boshqa manbalar.
14. Oʻzbekiston Respublikasi Moliya vazirligi:
2018-yilda hududiy filiallar faoliyatini tashkil etish va ularni saqlash, shuningdek, mebel, oʻquv hamda masofaviy taʼlim uchun zarur jihozlar, kompyuter texnikasi bilan taʼminlash yuzasidan Akademiyaning asoslangan hisob-kitoblari boʻyicha zarur budjet mablagʻlarini ajratsin;
2019-yildan boshlab Oʻzbekiston Respublikasi Davlat budjeti parametrlarini shakllantirishda hududiy filiallarni saqlash xarajatlarini hisobga olgan holda Akademiyaga zarur mablagʻlar ajratilishini nazarda tutsin.
15. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari hududiy filiallarga malaka oshirish kurslari va oʻquv-amaliy seminarlarni samarali tashkil etish boʻyicha har tomonlama yordam berilishini taʼminlasin.
16. Akademiya manfaatdor vazirlik va idoralar bilan birgalikda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga bir oy muddatda takliflar kiritsin.
17. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov hamda Oʻzbekiston Respublikasi Prezidentining davlat maslahatchilari U.S. Ismailov va R.S. Qosimov zimmasiga yuklansin.
Oʻzbekiston Respublikasi Prezidentining 2018-yil 6-avgustdagi PQ-3901-son qaroriga 1-ILOVA
Oʻzbekiston Respublikasi Prezidenti huzuridagi Davlat boshqaruvi akademiyasining hududiy filiallarida oʻqishni tashkil etish
Oʻzbekiston Respublikasi Prezidentining 2018-yil 6-avgustdagi PQ-3901-son qaroriga 2-ILOVA
Oʻzbekiston Respublikasi Prezidenti huzuridagi Davlat boshqaruvi akademiyasi hududiy filiallarini oliy taʼlim muassasalarining binolarida “nol” stavkadagi ijara toʻlovi asosida hamda tegishli kommunal va foydalanish xarajatlarini qoplamagan holda joylashtirish
T/r Hududiy filiallarning nomlanishi Oliy taʼlim muassasasining nomi Qamrab olinadigan hududlar 1. Guliston hududiy filiali Guliston davlat universiteti Jizzax va Sirdaryo viloyatlari 2. Qarshi hududiy filiali Qarshi davlat universiteti Qashqadaryo va Surxondaryo viloyatlari 3. Samarqand hududiy filiali Samarqand davlat universiteti Buxoro, Navoiy va Samarqand viloyatlari 4. Urganch hududiy filiali Urganch davlat universiteti Qoraqalpogʻiston Respublikasi va Xorazm viloyati 5. Fargʻona hududiy filiali Fargʻona davlat universiteti Andijon, Namangan va Fargʻona viloyatlari
Oʻzbekiston Respublikasi Prezidenti Sh. MIRZIYOYEV
Toshkent sh.,
2018-yil 6-avgust,
PQ-3901-son