📅 2018-yil 13-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 13 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 13 августа 2018 г. · Постановления Кабинета Министров
Официальный текст. Официальный документ. Редакционные примечания не включены.
📅 13 August 2018 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Хорижий диний таълим муассасаларида таълим олиш учун қўшимча шарт-шароитлар яратиш чора-тадбирлари тўғрисида
« Таълим тўғрисида »ги ҳамда « Виждон эркинлиги ва диний ташкилотлар тўғрисида »ги Ўзбекистон Республикасининг қонунлари, Ўзбекистон Республикаси Президентининг «Диний-маърифий соҳа фаолиятини тубдан такомиллаштириш чора-тадбирлари тўғрисида» 2018 йил 16 апрелдаги ПФ-5416-сон Фармони талабларини бажариш, шунингдек, Ўзбекистон Республикаси фуқароларининг хорижий диний таълим муассасаларида таълим олишлари учун қўшимча шарт-шароитлар яратиш мақсадида Вазирлар Маҳкамаси қарор қилади:
1. Ўзбекистон Республикаси Дин ишлари бўйича қўмитаси ва Ўзбекистон Республикаси Вазирлар Маҳкамаси ҳузуридаги Миллатлараро муносабатлар ва хорижий мамлакатлар билан дўстлик алоқаси қўмитасининг Ўзбекистон Республикаси Дин ишлари бўйича қўмитаси ҳузурида жамоатчилик асосида фаолият юритувчи Ўзбекистон Республикаси фуқароларининг хорижий диний таълим муассасаларида таълим олишига кўмаклашиш бўйича маслаҳат кенгашини (кейинги ўринларда Маслаҳат кенгаши деб аталади) ташкил этиш тўғрисидаги таклифи маъқуллансин.
2. Қуйидагилар Маслаҳат кенгашининг асосий вазифалари этиб белгилансин:
Ўзбекистон Республикаси фуқароларининг хорижий диний таълим муассасаларида таълим олишга бўлган эҳтиёжини қондириш;
Ўзбекистон Республикаси фуқароларининг хорижий диний таълим муассасаларига ҳужжатлар топшириши, таълим олиши ва таълим муассасаларини тугатганидан кейин иш билан таъминланиши юзасидан уларга тавсиялар бериш;
Ўзбекистон Республикаси фуқароларининг хорижий диний таълим муассасаларига ҳужжатлар топшириши, таълим олиши ва таълим муассасаларини тугатганидан кейин иш билан таъминланиши юзасидан уларнинг мурожаатларини кўриб чиқиш;
Ўзбекистон Республикаси фуқароларининг хорижий диний таълим муассасаларида таълим олиши учун тавсия этиладиган таълим муассасаларининг ҳар йиллик рўйхатини шакллантиришда иштирок этиш;
Ўзбекистон мусулмонлари идораси ва унинг жойлардаги вакилликлари билан ҳамкорликда фуқароларга хорижий диний таълим муассасаларида таълим олиш бўйича маълумотлар бериш;
Ўзбекистон Республикаси фуқароларига уларнинг хорижий диний таълим муассасаларида таълим олишига амалий ёрдам кўрсатишда иштирок этиш.
3. Ўзбекистон Республикаси Дин ишлари бўйича қўмитаси ва Ташқи ишлар вазирлигининг Ўзбекистон Республикаси фуқароларининг хорижий диний таълим муассасаларида таълим олиши учун тавсия этиладиган таълим муассасалари рўйхатини ҳар йили 1 январгача Ўзбекистон Республикаси Дин ишлари бўйича қўмитаси томонидан Ташқи ишлар вазирлиги билан келишилган ҳолда тасдиқлаш тартибини жорий этиш тўғрисидаги таклифига розилик берилсин.
4. Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита бир ой муддатда Маслаҳат кенгаши таркибини ҳамда Маслаҳат кенгаши тўғрисида низомни тасдиқласин.
5. Ўзбекистон Республикаси Дин ишлари бўйича қўмитаси Ташқи ишлар вазирлиги билан биргаликда 2018 йил 1 сентябрга қадар хорижий диний таълим муассасаларида таълим олаётган Ўзбекистон Республикаси фуқаролари тўғрисида маълумотлар базасини шакллантирсин ва унинг доимий равишда янгилаб борилишини таъминласин.
6. Ўзбекистон Республикаси Ташқи ишлар вазирлиги Ўзбекистон Республикаси фуқаролари диний таълим олаётган ҳамда ўқишга кириш учун ҳужжат топшираётган хорижий таълим муассасалари билан ҳамкорликни ўрнатиш, шунингдек, ўзаро тизимли маълумот алмашинувини йўлга қўйишни таъминласин.
7. Ўзбекистон Республикаси Дин ишлари бўйича қўмитаси Ўзбекистон мусулмонлари идораси, Ўзбекистон Республикаси Ташқи ишлар вазирлиги, Ўзбекистон ёшлар иттифоқи билан биргаликда ҳар йиллик режага асосан Ўзбекистон Республикаси фуқаролари диний таълим олаётган хорижий давлатлардаги элчихоналар ва консулликлар орқали мазкур давлатлардаги таълим муассасаларида диний таълим олаётган Ўзбекистон Республикаси фуқаролари билан доимий ҳамкорлик олиб бориш ва уларга ҳар томонлама кўмаклашиш, хорижий мамлакатлардаги Ўзбекистон Республикаси фуқароларига давлатимизнинг тинчликсевар сиёсати, демократик ҳуқуқий давлат, кучли фуқаролик жамияти қуриш борасида Ўзбекистоннинг мақсад ва вазифаларини, шунингдек, бугунги кунда мамлакат ҳаётининг барча соҳаларида эришилаётган муваффақиятларни кенг тарғиб қилишни таъминласин.
8. Ўзбекистон Республикаси Дин ишлари бўйича қўмитаси ҳар йили Ўзбекистон Республикаси фуқароларининг хорижий диний таълим муассасаларида таълим олиши тавсия этиладиган таълим муассасалари рўйхати тасдиқланганидан кейин мазкур рўйхат оммавий ахборот воситаларида эълон қилиниши ҳамда кенг жамоатчилик эътиборига етказилишини, шунингдек, Ўзбекистон мусулмонлари идораси ва унинг жойлардаги вакилликлари билан ҳамкорликда жойларда тадбирлар ўтказиб, фуқароларга хорижий диний таълим муассасаларида таълим олиш бўйича маълумотлар берилишини таъминласин.
9. Ўзбекистон Республикаси Дин ишлари бўйича қўмитаси, Ўзбекистон мусулмонлари идораси ва унинг жойлардаги вакилликлари, диний таълим муассасалари ва масжидларга ўзларининг Интернет жаҳон ахборот тармоғидаги расмий веб-сайтларида Ўзбекистон Республикаси фуқароларининг хорижий диний таълим муассасаларида таълим олиши бўйича тавсиялар, маълумотларни жойлаштириб бориш тавсия этилсин.
10. Ўзбекистон миллий телерадиокомпанияси, Ўзбекистон Миллий ахборот агентлиги, «Зиё» медиа маркази ва бошқа оммавий ахборот воситаларига мазкур қарорнинг мазмун ва моҳиятини очиб берувчи телекўрсатувлар ҳамда радиоэшиттиришлар тайёрлаш ва мақолалар чоп этиш тавсия этилсин.
11. Мазкур қарорнинг бажарилишини назорат қилиш Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита раиси Ж.К. Акрамов зиммасига ҳамда Вазирлар Маҳкамасининг Маданият, санъат ва ёшлар сиёсати масалалари ахборот-таҳлил департаментига юклансин.
Ўзбекистон Республикасининг Бош вазири А. АРИПОВ
Тошкент ш.,
2018 йил 13 август,
651-сон
Oʻzbekiston Respublikasi Vazirlar Mahkamasining
qarori
Xorijiy diniy taʼlim muassasalarida taʼlim olish uchun qoʻshimcha shart-sharoitlar yaratish chora-tadbirlari toʻgʻrisida
“ Taʼlim toʻgʻrisida ”gi hamda “ Vijdon erkinligi va diniy tashkilotlar toʻgʻrisida ”gi Oʻzbekiston Respublikasining qonunlari, Oʻzbekiston Respublikasi Prezidentining “Diniy-maʼrifiy soha faoliyatini tubdan takomillashtirish chora-tadbirlari toʻgʻrisida” 2018-yil 16-apreldagi PF-5416-son Farmoni talablarini bajarish, shuningdek, Oʻzbekiston Respublikasi fuqarolarining xorijiy diniy taʼlim muassasalarida taʼlim olishlari uchun qoʻshimcha shart-sharoitlar yaratish maqsadida Vazirlar Mahkamasi qaror qiladi:
1. Oʻzbekiston Respublikasi Din ishlari boʻyicha qoʻmitasi va Oʻzbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan doʻstlik aloqasi qoʻmitasining Oʻzbekiston Respublikasi Din ishlari boʻyicha qoʻmitasi huzurida jamoatchilik asosida faoliyat yurituvchi Oʻzbekiston Respublikasi fuqarolarining xorijiy diniy taʼlim muassasalarida taʼlim olishiga koʻmaklashish boʻyicha maslahat kengashini (keyingi oʻrinlarda Maslahat kengashi deb ataladi) tashkil etish toʻgʻrisidagi taklifi maʼqullansin.
2. Quyidagilar Maslahat kengashining asosiy vazifalari etib belgilansin:
Oʻzbekiston Respublikasi fuqarolarining xorijiy diniy taʼlim muassasalarida taʼlim olishga boʻlgan ehtiyojini qondirish;
Oʻzbekiston Respublikasi fuqarolarining xorijiy diniy taʼlim muassasalariga hujjatlar topshirishi, taʼlim olishi va taʼlim muassasalarini tugatganidan keyin ish bilan taʼminlanishi yuzasidan ularga tavsiyalar berish;
Oʻzbekiston Respublikasi fuqarolarining xorijiy diniy taʼlim muassasalariga hujjatlar topshirishi, taʼlim olishi va taʼlim muassasalarini tugatganidan keyin ish bilan taʼminlanishi yuzasidan ularning murojaatlarini koʻrib chiqish;
Oʻzbekiston Respublikasi fuqarolarining xorijiy diniy taʼlim muassasalarida taʼlim olishi uchun tavsiya etiladigan taʼlim muassasalarining har yillik roʻyxatini shakllantirishda ishtirok etish;
Oʻzbekiston musulmonlari idorasi va uning joylardagi vakilliklari bilan hamkorlikda fuqarolarga xorijiy diniy taʼlim muassasalarida taʼlim olish boʻyicha maʼlumotlar berish;
Oʻzbekiston Respublikasi fuqarolariga ularning xorijiy diniy taʼlim muassasalarida taʼlim olishiga amaliy yordam koʻrsatishda ishtirok etish.
3. Oʻzbekiston Respublikasi Din ishlari boʻyicha qoʻmitasi va Tashqi ishlar vazirligining Oʻzbekiston Respublikasi fuqarolarining xorijiy diniy taʼlim muassasalarida taʼlim olishi uchun tavsiya etiladigan taʼlim muassasalari roʻyxatini har yili 1-yanvargacha Oʻzbekiston Respublikasi Din ishlari boʻyicha qoʻmitasi tomonidan Tashqi ishlar vazirligi bilan kelishilgan holda tasdiqlash tartibini joriy etish toʻgʻrisidagi taklifiga rozilik berilsin.
4. Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita bir oy muddatda Maslahat kengashi tarkibini hamda Maslahat kengashi toʻgʻrisida nizomni tasdiqlasin.
5. Oʻzbekiston Respublikasi Din ishlari boʻyicha qoʻmitasi Tashqi ishlar vazirligi bilan birgalikda 2018-yil 1-sentabrga qadar xorijiy diniy taʼlim muassasalarida taʼlim olayotgan Oʻzbekiston Respublikasi fuqarolari toʻgʻrisida maʼlumotlar bazasini shakllantirsin va uning doimiy ravishda yangilab borilishini taʼminlasin.
6. Oʻzbekiston Respublikasi Tashqi ishlar vazirligi Oʻzbekiston Respublikasi fuqarolari diniy taʼlim olayotgan hamda oʻqishga kirish uchun hujjat topshirayotgan xorijiy taʼlim muassasalari bilan hamkorlikni oʻrnatish, shuningdek, oʻzaro tizimli maʼlumot almashinuvini yoʻlga qoʻyishni taʼminlasin.
7. Oʻzbekiston Respublikasi Din ishlari boʻyicha qoʻmitasi Oʻzbekiston musulmonlari idorasi, Oʻzbekiston Respublikasi Tashqi ishlar vazirligi, Oʻzbekiston yoshlar ittifoqi bilan birgalikda har yillik rejaga asosan Oʻzbekiston Respublikasi fuqarolari diniy taʼlim olayotgan xorijiy davlatlardagi elchixonalar va konsulliklar orqali mazkur davlatlardagi taʼlim muassasalarida diniy taʼlim olayotgan Oʻzbekiston Respublikasi fuqarolari bilan doimiy hamkorlik olib borish va ularga har tomonlama koʻmaklashish, xorijiy mamlakatlardagi Oʻzbekiston Respublikasi fuqarolariga davlatimizning tinchliksevar siyosati, demokratik huquqiy davlat, kuchli fuqarolik jamiyati qurish borasida Oʻzbekistonning maqsad va vazifalarini, shuningdek, bugungi kunda mamlakat hayotining barcha sohalarida erishilayotgan muvaffaqiyatlarni keng targʻib qilishni taʼminlasin.
8. Oʻzbekiston Respublikasi Din ishlari boʻyicha qoʻmitasi har yili Oʻzbekiston Respublikasi fuqarolarining xorijiy diniy taʼlim muassasalarida taʼlim olishi tavsiya etiladigan taʼlim muassasalari roʻyxati tasdiqlanganidan keyin mazkur roʻyxat ommaviy axborot vositalarida eʼlon qilinishi hamda keng jamoatchilik eʼtiboriga yetkazilishini, shuningdek, Oʻzbekiston musulmonlari idorasi va uning joylardagi vakilliklari bilan hamkorlikda joylarda tadbirlar oʻtkazib, fuqarolarga xorijiy diniy taʼlim muassasalarida taʼlim olish boʻyicha maʼlumotlar berilishini taʼminlasin.
9. Oʻzbekiston Respublikasi Din ishlari boʻyicha qoʻmitasi, Oʻzbekiston musulmonlari idorasi va uning joylardagi vakilliklari, diniy taʼlim muassasalari va masjidlarga oʻzlarining Internet jahon axborot tarmogʻidagi rasmiy veb-saytlarida Oʻzbekiston Respublikasi fuqarolarining xorijiy diniy taʼlim muassasalarida taʼlim olishi boʻyicha tavsiyalar, maʼlumotlarni joylashtirib borish tavsiya etilsin.
10. Oʻzbekiston milliy teleradiokompaniyasi, Oʻzbekiston Milliy axborot agentligi, “Ziyo” media markazi va boshqa ommaviy axborot vositalariga mazkur qarorning mazmun va mohiyatini ochib beruvchi telekoʻrsatuvlar hamda radioeshittirishlar tayyorlash va maqolalar chop etish tavsiya etilsin.
11. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasi huzuridagi Din ishlari boʻyicha qoʻmita raisi J.K. Akramov zimmasiga hamda Vazirlar Mahkamasining Madaniyat, sanʼat va yoshlar siyosati masalalari axborot-tahlil departamentiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 13-avgust,
651-son