📅 2018-yil 15-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 15 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 15 августа 2018 г. · Постановления Кабинета Министров
Официальный текст. Официальный документ. Редакционные примечания не включены.
📅 15 August 2018 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Навоий вилоятининг Томди туманида табиий фанларни чуқурлаштириб ўқитишга ихтисослаштирилган мактаб-интернатни ташкил этиш тўғрисида
Ўзбекистон Республикаси Президентининг «Навоий вилоятининг Томди, Учқудуқ, Конимех, Нурота туманлари ва Зарафшон шаҳрини комплекс ривожлантириш ҳамда аҳолиси бандлигини таъминлашга доир қўшимча чора-тадбирлари тўғрисида» 2017 йил 29 сентябрдаги ПҚ-3301-сон қарори ижросини таъминлаш, шунингдек, ихтисослаштирилган давлат умумий ўрта таълим мактаблари тармоғини кенгайтириш, олис ҳудудлардаги иқтидорли ўқувчиларнинг сифатли таълим олишлари учун зарур шарт-шароитлар яратиш мақсадида Вазирлар Маҳкамаси қарор қилади:
1. Навоий вилояти ҳокимлиги, Ўзбекистон Республикаси Олий ва ўрта махсус таълим вазирлигининг Касб-ҳунар таълими маркази ҳамда Халқ таълими вазирлигининг 100 нафар ўқувчига мўлжалланган табиий фанларни чуқурлаштириб ўқитишга ихтисослаштирилган мактаб-интернат (кейинги ўринларда мактаб-интернат деб аталади) ташкил этиш тўғрисидаги таклифига розилик берилсин.
2. Қуйидагилар мактаб-интернатнинг асосий вазифалари этиб белгилансин:
умумий ўрта таълимнинг давлат таълим стандартлари асосида замонавий ахборот-коммуникация ва педагогик технологиялардан самарали фойдаланган ҳолда биология ва кимё фанларини чуқурлаштириб ўқитишни ташкил этиш;
ҳар бир ўқувчининг индивидуал хусусиятларини ҳисобга олган ҳолда уларда мустақил тадқиқотчилик фаолияти кўникмаларини шакллантириш ва ривожлантириш;
юқори касб маҳоратига эга бўлган педагогларни жалб этган ҳолда ўқувчиларнинг ёш биологлар, ёш зоологлар, ёш кимёгарлар жамоаларини ташкил этиш, ўқувчиларнинг фан сирларини чуқур ўрганишлари ҳамда ижодий салоҳиятларини намоён қилишлари учун зарур шароитлар яратиш.
3. Ўзбекистон Республикаси Халқ таълими вазирлиги:
2018-2019 ўқув йилидан бошлаб мактаб-интернатнинг 7-8-9-10-11-синфларига ўқувчиларни қабул қилиш, бунда биринчи навбатда, Томди туманининг олис ҳудудларидан ўқувчиларни қабул қилишга эътибор қаратиш;
мактаб-интернатнинг моддий-техника базасини мустаҳкамлаш мақсадида ўқув-лаборатория жиҳозлари, компьютер техникаси, ўқув-методик мажмуалар, ўқитувчилар учун методик қўлланмалар ҳамда бадиий адабиётлар билан таъминлаш чораларини кўрсин.
4. Навоий вилояти ҳокимлиги:
бир ой муддатда Халқ таълими вазирлиги билан биргаликда мактаб-интернатнинг устави ишлаб чиқилиши, белгиланган тартибда тасдиқланиши ҳамда давлат рўйхатидан ўтказилишини;
2018 йил 1 сентябрга қадар мактаб-интернатнинг бино ва иншоотларини тўлиқ таъмирлаш, ўқувчиларнинг яшаши ва овқатланиши учун зарур шароитларни яратган ҳолда фойдаланишга топширилишини таъминласин.
5. Навоий вилояти, Томди тумани, «Янги-Томди» марказида жойлашган Томди агроиқтисодиёт касб-ҳунар коллежининг бино ва иншоотлари тегишли ҳудуди билан биргаликда Томди тумани халқ таълими бўлимига оператив бошқарув ҳуқуқи асосида бепул берилсин ва унга мактаб-интернат жойлаштирилсин.
6. Ўзбекистон Республикаси Олий ва ўрта махсус таълим вазирлигининг Касб-ҳунар таълими маркази:
мактаб-интернат бино ва иншоотларида Томди агроиқтисодиёт касб-ҳунар коллежининг иккинчи ва учинчи босқич ўқувчиларининг таълимни амалдаги ўқув дастурлари бўйича якунланишига шароит яратсин;
Бандлик ва меҳнат муносабатлари вазирлиги Навоий вилояти ҳокимлиги билан биргаликда Томди агроиқтисодиёт касб-ҳунар коллежининг бўшайдиган ходимлари бандлигини таъминласин;
2019 йил 1 августга қадар Томди агроиқтисодиёт касб-ҳунар коллежи устахонаси жиҳозлари ҳамда ўқув-машқ автомобилларини тегишли таълим йўналишлари мавжуд бўлган касб-ҳунар коллежларига бепул бериш чораларини кўрсин.
7. Белгилаб қўйилсинки:
ҳудуднинг жойлашуви ва ўзига хос шарт-шароитларини инобатга олиб, мактаб-интернатга ўқишга қабул қилинган ўқувчилар уларни овқатлантириш учун тўланадиган тўловлардан озод этилади;
мактаб-интернат биносида бажариладиган қурилиш-таъмирлаш ва жиҳозлаш ишлари Ўзбекистон Республикаси Молия вазирлиги ҳузуридаги бюджетдан ташқари Таълим ва тиббиёт муассасаларининг моддий-техника базасини ривожлантириш жамғармаси маблағлари ҳисобига амалга оширилади.
8. Ўзбекистон Республикаси Молия вазирлиги Давлат бюджети параметрларида «Таълим» соҳасига ажратилган маблағлар доирасида 2018-2019 ўқув йилидан бошлаб мактаб-интернатнинг таъминоти учун зарур маблағларни назарда тутсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.А. Абдухакимов, Ўзбекистон Республикаси халқ таълими вазири Ш.Х. Шерматов ва Навоий вилояти ҳокими К.Б. Турсунов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2018 йил 15 август,
665-сон
Oʻzbekiston Respublikasi Vazirlar Mahkamasining
qarori
Navoiy viloyatining Tomdi tumanida tabiiy fanlarni chuqurlashtirib oʻqitishga ixtisoslashtirilgan maktab-internatni tashkil etish toʻgʻrisida
Oʻzbekiston Respublikasi Prezidentining “Navoiy viloyatining Tomdi, Uchquduq, Konimex, Nurota tumanlari va Zarafshon shahrini kompleks rivojlantirish hamda aholisi bandligini taʼminlashga doir qoʻshimcha chora-tadbirlari toʻgʻrisida” 2017-yil 29-sentabrdagi PQ-3301-son qarori ijrosini taʼminlash, shuningdek, ixtisoslashtirilgan davlat umumiy oʻrta taʼlim maktablari tarmogʻini kengaytirish, olis hududlardagi iqtidorli oʻquvchilarning sifatli taʼlim olishlari uchun zarur shart-sharoitlar yaratish maqsadida Vazirlar Mahkamasi qaror qiladi:
1. Navoiy viloyati hokimligi, Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markazi hamda Xalq taʼlimi vazirligining 100 nafar oʻquvchiga moʻljallangan tabiiy fanlarni chuqurlashtirib oʻqitishga ixtisoslashtirilgan maktab-internat (keyingi oʻrinlarda maktab-internat deb ataladi) tashkil etish toʻgʻrisidagi taklifiga rozilik berilsin.
2. Quyidagilar maktab-internatning asosiy vazifalari etib belgilansin:
umumiy oʻrta taʼlimning davlat taʼlim standartlari asosida zamonaviy axborot-kommunikatsiya va pedagogik texnologiyalardan samarali foydalangan holda biologiya va kimyo fanlarini chuqurlashtirib oʻqitishni tashkil etish;
har bir oʻquvchining individual xususiyatlarini hisobga olgan holda ularda mustaqil tadqiqotchilik faoliyati koʻnikmalarini shakllantirish va rivojlantirish;
yuqori kasb mahoratiga ega boʻlgan pedagoglarni jalb etgan holda oʻquvchilarning yosh biologlar, yosh zoologlar, yosh kimyogarlar jamoalarini tashkil etish, oʻquvchilarning fan sirlarini chuqur oʻrganishlari hamda ijodiy salohiyatlarini namoyon qilishlari uchun zarur sharoitlar yaratish.
3. Oʻzbekiston Respublikasi Xalq taʼlimi vazirligi:
2018-2019 oʻquv yilidan boshlab maktab-internatning 7-8-9-10-11-sinflariga oʻquvchilarni qabul qilish, bunda birinchi navbatda, Tomdi tumanining olis hududlaridan oʻquvchilarni qabul qilishga eʼtibor qaratish;
maktab-internatning moddiy-texnika bazasini mustahkamlash maqsadida oʻquv-laboratoriya jihozlari, kompyuter texnikasi, oʻquv-metodik majmualar, oʻqituvchilar uchun metodik qoʻllanmalar hamda badiiy adabiyotlar bilan taʼminlash choralarini koʻrsin.
4. Navoiy viloyati hokimligi:
bir oy muddatda Xalq taʼlimi vazirligi bilan birgalikda maktab-internatning ustavi ishlab chiqilishi, belgilangan tartibda tasdiqlanishi hamda davlat roʻyxatidan oʻtkazilishini;
2018-yil 1-sentabrga qadar maktab-internatning bino va inshootlarini toʻliq taʼmirlash, oʻquvchilarning yashashi va ovqatlanishi uchun zarur sharoitlarni yaratgan holda foydalanishga topshirilishini taʼminlasin.
5. Navoiy viloyati, Tomdi tumani, “Yangi-Tomdi” markazida joylashgan Tomdi agroiqtisodiyot kasb-hunar kollejining bino va inshootlari tegishli hududi bilan birgalikda Tomdi tumani xalq taʼlimi boʻlimiga operativ boshqaruv huquqi asosida bepul berilsin va unga maktab-internat joylashtirilsin.
6. Oʻzbekiston Respublikasi Oliy va oʻrta maxsus taʼlim vazirligining Kasb-hunar taʼlimi markazi:
maktab-internat bino va inshootlarida Tomdi agroiqtisodiyot kasb-hunar kollejining ikkinchi va uchinchi bosqich oʻquvchilarining taʼlimni amaldagi oʻquv dasturlari boʻyicha yakunlanishiga sharoit yaratsin;
Bandlik va mehnat munosabatlari vazirligi Navoiy viloyati hokimligi bilan birgalikda Tomdi agroiqtisodiyot kasb-hunar kollejining boʻshaydigan xodimlari bandligini taʼminlasin;
2019-yil 1-avgustga qadar Tomdi agroiqtisodiyot kasb-hunar kolleji ustaxonasi jihozlari hamda oʻquv-mashq avtomobillarini tegishli taʼlim yoʻnalishlari mavjud boʻlgan kasb-hunar kollejlariga bepul berish choralarini koʻrsin.
7. Belgilab qoʻyilsinki:
hududning joylashuvi va oʻziga xos shart-sharoitlarini inobatga olib, maktab-internatga oʻqishga qabul qilingan oʻquvchilar ularni ovqatlantirish uchun toʻlanadigan toʻlovlardan ozod etiladi;
maktab-internat binosida bajariladigan qurilish-taʼmirlash va jihozlash ishlari Oʻzbekiston Respublikasi Moliya vazirligi huzuridagi budjetdan tashqari Taʼlim va tibbiyot muassasalarining moddiy-texnika bazasini rivojlantirish jamgʻarmasi mablagʻlari hisobiga amalga oshiriladi.
8. Oʻzbekiston Respublikasi Moliya vazirligi Davlat budjeti parametrlarida “Taʼlim” sohasiga ajratilgan mablagʻlar doirasida 2018-2019 oʻquv yilidan boshlab maktab-internatning taʼminoti uchun zarur mablagʻlarni nazarda tutsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Abduxakimov, Oʻzbekiston Respublikasi xalq taʼlimi vaziri Sh.X. Shermatov va Navoiy viloyati hokimi K.B. Tursunov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 15-avgust,
665-son