📅 2018-yil 10-sentabr · Prezident farmoyishlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 10 сентябрь · Президент фармойишлари
Расмий матн. Расмий ҳужжат. Таҳририй изоҳлар киритилмаган.
📅 10 сентября 2018 г. · Распоряжения Президента
Официальный текст. Официальный документ. Редакционные примечания не включены.
📅 10 September 2018 · Presidential orders
Official text. Official document. Editorial notes are not included.
Ўзбекистон Республикаси Президентининг
Фармойиши
Алоҳида муҳим ижтимоий, маданий ва тарихий аҳамиятга эга бўлган объектларни қуриш, реставрация, реконструкция қилиш ва мукаммал таъмирлаш бўйича қўшимча чора-тадбирлар тўғрисида
Мамлакатимиз аҳолиси ва хорижий меҳмонларга халқимизнинг маданий ва тарихий аҳамиятга эга бўлган меросини кенг тарғиб қилиш ҳамда зиёратчи ва сайёҳларга қулай шарт-шароитлар яратиш ички ва ташқи туризмни янада ривожлантиришда муҳим омил ҳисобланади.
Бу, ўз навбатида, Ўзбекистондаги ислом цивилизацияси маркази, Имом Бухорий халқаро илмий-тадқиқот маркази, Ҳадисшунослик мактаби, Имом Бухорий мажмуаси, Бухоро шаҳрининг «эски шаҳар» қисми, хусусан, «Арк қўрғони» ва «Қушбеги саройи мажмуалари», «Масжиди калон», «Минораи калон», «Мир-араб», «Саидолимхон», «Абдулазизхон», «Улуғбек» мадрасаларини (кейинги ўринларда объектлар деб аталади) қуриш, реставрация, реконструкция қилиш ва мукаммал таъмирлаш ишларининг сифатли ва қисқа муддатларда якунланишини талаб қилмоқда.
Алоҳида муҳим ижтимоий, маданий ва тарихий аҳамиятга эга бўлган объектларни халқаро мезонлар ҳамда «Маданий мерос объектларини муҳофаза қилиш ва улардан фойдаланиш тўғрисида»ги Ўзбекистон Республикаси Қонуни талаблари асосида ўзига хос хусусиятларини ўзгартирмаган ва тарихий, эстетик-аҳамиятини сақлаб қолган ҳолда қисқа муддатларда бажариш, шунингдек, ушбу мақсадларга йўналтирилаётган маблағлардан самарали фойдаланилишини таъминлаш мақсадида:
1. Қуйидагилар:
Ўзбекистон Республикаси Қурилиш вазирлиги, Маданият вазирлиги, Молия вазирлиги, Иқтисодиёт вазирлиги, Самарқанд вилояти ҳокимлиги, Бухоро вилояти ҳокимлиги ҳамда Тошкент шаҳар ҳокимлигининг Ўзбекистон Республикаси Вазирлар Маҳкамаси ҳузуридаги Алоҳида муҳим ижтимоий, маданий ва тарихий аҳамиятга эга бўлган объектларни қуриш, реконструкция, реставрация қилиш ва мукаммал таъмирлаш дирекцияси (кейинги ўринларда Дирекция деб аталади) маблағлари ҳисобидан қурилаётган, реставрация, реконструкция қилинаётган ва мукаммал таъмирланаётган объектларнинг 2019 йилда тўлиқ фойдаланишга топширилиши тўғрисидаги ахбороти;
объектлар бўйича тегишли равишда Тошкент шаҳар, Самарқанд ва Бухоро вилояти ҳокимлиги ҳузуридаги Ягона буюртмачи хизмати инжиниринг компаниялари буюртмачи (кейинги ўринларда буюртмачилар деб аталади) этиб белгиланганлиги;
Ўзбекистондаги ислом цивилизацияси маркази қурилишида лойиҳа ҳужжатларини ишлаб чиқиш бўйича — «Ўзоғирсаноатлойиҳа» АЖ, Имом Бухорий халқаро илмий-тадқиқот маркази, Ҳадисшунослик мактаби ва Имом Бухорий мажмуаси бўйича — «ТошуйжойЛИТИ» АЖ ҳамда Бухоро вилоятидаги объектлар бўйича — «Маданий мерос ЛИТИ» МЧЖ бош лойиҳа ташкилоти этиб белгиланганлиги;
Ўзбекистондаги ислом цивилизацияси маркази қурилишида тарихий мажмуаларни лойиҳалаштириш бўйича илғор тажрибага эга бўлган «Wilmotte & Associes Architectes» компанияси (Франция) сублойиҳа ташкилоти этиб белгиланганлиги маълумот учун қабул қилинсин.
3. Объектлар бўйича буюртмачилар, лойиҳа, сублойиҳа, пудрат ва субпудрат ташкилотлари, ҳомий юридик ва жисмоний шахслар объектларни қуриш, реконструкция, реставрация қилиш ва мукаммал таъмирлаш ишларини амалга ошириш доирасида ўрнатилган тартибда шакллантириладиган рўйхат бўйича чет элдан олиб келинадиган қурилиш материаллари, қурилиш техникаси, шунингдек, уларга эҳтиёт қисмлар, мебеллар, инвентарь ва жиҳозлар 2021 йил 1 январга қадар божхона тўловлари тўлашдан (божхона йиғимларидан ташқари) озод этилсин.
4. Ўзбекистондаги ислом цивилизацияси маркази қурилиши доирасида зарур юкларни мазкур марказ қуриладиган давр мобайнида ва ҳудудда божхона омбори божхона режимида жойлаштиришга истисно тариқасида рухсат этилсин.
5. Шундай тартиб ўрнатилсинки, унга мувофиқ:
буюртмачилар чет эл ва Ўзбекистон Республикаси валютасида пул шаклидаги хайрия маблағларини, шунингдек, товарлар, ишлар ва хизматларни олиш ҳуқуқига эга бўладилар;
юридик ва жисмоний шахсларнинг лойиҳани амалга ошириш доирасида йўналтириладиган хайрия маблағлари, шунингдек, товарлар, ишлар ва хизматлари фойда солиғи ёки ягона солиқ тўловини ҳисоблашда солиққа тортиладиган базадан тўлиқ чегирилади.
6. Ўзбекистон Республикаси Ташқи ишлар вазирлиги Дирекциянинг виза талабномаларига кўра, объектларда ишлар ва хизматларни амалга оширишда иштирок этадиган хорижий мутахассисларга кириш визаларини консуллик ва бошқа йиғимлар ундирилмасдан белгиланган тартибда расмийлаштиришни таъминласин.
7. Ўзбекистон Республикаси Ички ишлар вазирлиги Дирекциянинг талабномаларига кўра, объектларда ишлар ва хизматларни амалга оширишда иштирок этадиган хорижий мутахассисларга давлат божи ундирилмасдан, кўп марталик кириш визалари берилишини ва уларнинг муддати узайтирилишини, шунингдек, уларнинг яшаш жойида вақтинчалик рўйхатдан ўтказилишини ва вақтинчалик рўйхатдан ўтказиш муддати узайтирилишини белгиланган тартибда таъминласин.
8. Ўзбекистон Республикаси Бандлик ва меҳнат муносабатлари вазирлиги ўрнатилган тартибда Дирекциянинг талабномаларига кўра, объектларда ишлар ва хизматларни амалга оширишда иштирок этадиган хорижий мутахассисларни Ўзбекистон Республикасига жалб этишга рухсатномалар беришни (муддатини узайтиришни), шунингдек, уларга Ўзбекистон Республикаси ҳудудида меҳнат фаолиятини амалга ошириш ҳуқуқини берадиган тасдиқномалар берилишини (муддати узайтирилишини) таъминласин.
9. Мазкур фармойишнинг бажарилишини назорат қилиш Ўзбекистон Республикасининг Бош вазири А.Н. Арипов, Тошкент шаҳар ҳокими вазифасини бажарувчи Ж.А. Артикходжаев, Самарқанд вилояти ҳокими вазифасини бажарувчи Э.О. Турдимов ва Бухоро вилояти ҳокими У.И. Барноев зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2018 йил 10 сентябрь,
Ф-5361-сон
Oʻzbekiston Respublikasi Prezidentining
Farmoyishi
Alohida muhim ijtimoiy, madaniy va tarixiy ahamiyatga ega boʻlgan obyektlarni qurish, restavratsiya, rekonstruksiya qilish va mukammal taʼmirlash boʻyicha qoʻshimcha chora-tadbirlar toʻgʻrisida
Mamlakatimiz aholisi va xorijiy mehmonlarga xalqimizning madaniy va tarixiy ahamiyatga ega boʻlgan merosini keng targʻib qilish hamda ziyoratchi va sayyohlarga qulay shart-sharoitlar yaratish ichki va tashqi turizmni yanada rivojlantirishda muhim omil hisoblanadi.
Bu, oʻz navbatida, Oʻzbekistondagi islom sivilizatsiyasi markazi, Imom Buxoriy xalqaro ilmiy-tadqiqot markazi, Hadisshunoslik maktabi, Imom Buxoriy majmuasi, Buxoro shahrining “eski shahar” qismi, xususan, “Ark qoʻrgʻoni” va “Qushbegi saroyi majmualari”, “Masjidi kalon”, “Minorai kalon”, “Mir-arab”, “Saidolimxon”, “Abdulazizxon”, “Ulugʻbek” madrasalarini (keyingi oʻrinlarda obyektlar deb ataladi) qurish, restavratsiya, rekonstruksiya qilish va mukammal taʼmirlash ishlarining sifatli va qisqa muddatlarda yakunlanishini talab qilmoqda.
Alohida muhim ijtimoiy, madaniy va tarixiy ahamiyatga ega boʻlgan obyektlarni xalqaro mezonlar hamda “Madaniy meros obyektlarini muhofaza qilish va ulardan foydalanish toʻgʻrisida”gi Oʻzbekiston Respublikasi Qonuni talablari asosida oʻziga xos xususiyatlarini oʻzgartirmagan va tarixiy, estetik-ahamiyatini saqlab qolgan holda qisqa muddatlarda bajarish, shuningdek, ushbu maqsadlarga yoʻnaltirilayotgan mablagʻlardan samarali foydalanilishini taʼminlash maqsadida:
1. Quyidagilar:
Oʻzbekiston Respublikasi Qurilish vazirligi, Madaniyat vazirligi, Moliya vazirligi, Iqtisodiyot vazirligi, Samarqand viloyati hokimligi, Buxoro viloyati hokimligi hamda Toshkent shahar hokimligining Oʻzbekiston Respublikasi Vazirlar Mahkamasi huzuridagi Alohida muhim ijtimoiy, madaniy va tarixiy ahamiyatga ega boʻlgan obyektlarni qurish, rekonstruksiya, restavratsiya qilish va mukammal taʼmirlash direksiyasi (keyingi oʻrinlarda Direksiya deb ataladi) mablagʻlari hisobidan qurilayotgan, restavratsiya, rekonstruksiya qilinayotgan va mukammal taʼmirlanayotgan obyektlarning 2019-yilda toʻliq foydalanishga topshirilishi toʻgʻrisidagi axboroti;
obyektlar boʻyicha tegishli ravishda Toshkent shahar, Samarqand va Buxoro viloyati hokimligi huzuridagi Yagona buyurtmachi xizmati injiniring kompaniyalari buyurtmachi (keyingi oʻrinlarda buyurtmachilar deb ataladi) etib belgilanganligi;
Oʻzbekistondagi islom sivilizatsiyasi markazi qurilishida loyiha hujjatlarini ishlab chiqish boʻyicha — “Oʻzogʻirsanoatloyiha” AJ, Imom Buxoriy xalqaro ilmiy-tadqiqot markazi, Hadisshunoslik maktabi va Imom Buxoriy majmuasi boʻyicha — “ToshuyjoyLITI” AJ hamda Buxoro viloyatidagi obyektlar boʻyicha — “Madaniy meros LITI” MChJ bosh loyiha tashkiloti etib belgilanganligi;
Oʻzbekistondagi islom sivilizatsiyasi markazi qurilishida tarixiy majmualarni loyihalashtirish boʻyicha ilgʻor tajribaga ega boʻlgan “Wilmotte & Associes Architectes” kompaniyasi (Fransiya) subloyiha tashkiloti etib belgilanganligi maʼlumot uchun qabul qilinsin.
3. Obyektlar boʻyicha buyurtmachilar, loyiha, subloyiha, pudrat va subpudrat tashkilotlari, homiy yuridik va jismoniy shaxslar obyektlarni qurish, rekonstruksiya, restavratsiya qilish va mukammal taʼmirlash ishlarini amalga oshirish doirasida oʻrnatilgan tartibda shakllantiriladigan roʻyxat boʻyicha chet eldan olib kelinadigan qurilish materiallari, qurilish texnikasi, shuningdek, ularga ehtiyot qismlar, mebellar, inventar va jihozlar 2021-yil 1-yanvarga qadar bojxona toʻlovlari toʻlashdan (bojxona yigʻimlaridan tashqari) ozod etilsin.
4. Oʻzbekistondagi islom sivilizatsiyasi markazi qurilishi doirasida zarur yuklarni mazkur markaz quriladigan davr mobaynida va hududda bojxona ombori bojxona rejimida joylashtirishga istisno tariqasida ruxsat etilsin.
5. Shunday tartib oʻrnatilsinki, unga muvofiq:
buyurtmachilar chet el va Oʻzbekiston Respublikasi valyutasida pul shaklidagi xayriya mablagʻlarini, shuningdek, tovarlar, ishlar va xizmatlarni olish huquqiga ega boʻladilar;
yuridik va jismoniy shaxslarning loyihani amalga oshirish doirasida yoʻnaltiriladigan xayriya mablagʻlari, shuningdek, tovarlar, ishlar va xizmatlari foyda soligʻi yoki yagona soliq toʻlovini hisoblashda soliqqa tortiladigan bazadan toʻliq chegiriladi.
6. Oʻzbekiston Respublikasi Tashqi ishlar vazirligi Direksiyaning viza talabnomalariga koʻra, obyektlarda ishlar va xizmatlarni amalga oshirishda ishtirok etadigan xorijiy mutaxassislarga kirish vizalarini konsullik va boshqa yigʻimlar undirilmasdan belgilangan tartibda rasmiylashtirishni taʼminlasin.
7. Oʻzbekiston Respublikasi Ichki ishlar vazirligi Direksiyaning talabnomalariga koʻra, obyektlarda ishlar va xizmatlarni amalga oshirishda ishtirok etadigan xorijiy mutaxassislarga davlat boji undirilmasdan, koʻp martalik kirish vizalari berilishini va ularning muddati uzaytirilishini, shuningdek, ularning yashash joyida vaqtinchalik roʻyxatdan oʻtkazilishini va vaqtinchalik roʻyxatdan oʻtkazish muddati uzaytirilishini belgilangan tartibda taʼminlasin.
8. Oʻzbekiston Respublikasi Bandlik va mehnat munosabatlari vazirligi oʻrnatilgan tartibda Direksiyaning talabnomalariga koʻra, obyektlarda ishlar va xizmatlarni amalga oshirishda ishtirok etadigan xorijiy mutaxassislarni Oʻzbekiston Respublikasiga jalb etishga ruxsatnomalar berishni (muddatini uzaytirishni), shuningdek, ularga Oʻzbekiston Respublikasi hududida mehnat faoliyatini amalga oshirish huquqini beradigan tasdiqnomalar berilishini (muddati uzaytirilishini) taʼminlasin.
9. Mazkur farmoyishning bajarilishini nazorat qilish Oʻzbekiston Respublikasining Bosh vaziri A.N. Aripov, Toshkent shahar hokimi vazifasini bajaruvchi J.A. Artikxodjayev, Samarqand viloyati hokimi vazifasini bajaruvchi E.O. Turdimov va Buxoro viloyati hokimi U.I. Barnoyev zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2018-yil 10-sentabr,
F-5361-son