📅 2018-yil 10-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 10 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 10 сентября 2018 г. · Постановления Кабинета Министров
Официальный текст. Официальный документ. Редакционные примечания не включены.
📅 10 September 2018 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
МАРКШЕЙДЕРЛИК ХУЛОСАСИ
Табиий ресурслардан самарали ва оқилона фойдаланишни таъминлашнинг ҳамда давлат бюджети даромадларини оширишнинг қўшимча чора-тадбирлари тўғрисида
Ҳозирги вақтда мамлакатда минерал хом ашё ресурсларидан фойдаланишга инвестицияларни жалб этиш ҳамда табиий қазилма бойликлардан оқилона ва самарали фойдаланишга алоҳида эътибор қаратилмоқда. Ушбу йўналишда бир қатор норматив-ҳуқуқий ҳужжатлар қабул қилинди.
Шу билан бирга, мазкур соҳадаги ишларнинг ҳолати табиий қазилма бойликлардан тартибли фойдаланиш ҳамда давлат бюджетига ундириладиган солиқ ва бошқа мажбурий тўловларнинг тўлиқ ундирилишига тўсқинлик қилаётган бир қатор муаммо ва камчиликлар борлигидан далолат бермоқда. Хусусан:
биринчидан, республика бўйича норуда фойдали қазилма бойликларни қазиб олувчи ташкилотларнинг рўйхати ва улар томонидан қазиб олинган фойдали қазилмалар захиралари ҳажмининг ягона интеграциялашган идоралараро электрон базаси мавжуд эмас;
иккинчидан, солиқлар тўлашдан бўйин товлашнинг турли схемалари яратилишига олиб келаётган, ер қаъридан фойдаланувчилар фаолиятини назорат қилиш бўйича берилган ваколатлардан самарасиз фойдаланилмоқда;
учинчидан, ер қаъридан фойдаланувчилар томонидан ҳақиқатда қазиб олинган (ажратиб олинган) норуда фойдали қазилмалар миқдорини ҳисоботларда камайтириб кўрсатиш ҳолатлари аниқланмоқда, бу эса солиқ суммаларининг тўлиқ ҳисобланишига салбий таъсир кўрсатмоқда.
Ўзбекистон Республикаси Президентининг «Давлат солиқ хизмати органлари фаолиятини тубдан такомиллаштириш чора-тадбирлари тўғрисида» 2018 йил 26 июндаги ПҚ-3802 сон қарорига мувофиқ, табиий қазилма бойликлардан оқилона ва самарали фойдаланишни ҳамда уларнинг ҳаққоний ҳисобини юритишни таъминлаш, шунингдек, Ўзбекистон Республикаси Давлат бюджети даромадларини ошириш мақсадида Вазирлар Маҳкамаси қарор қилади:
1. Шундай тартиб жорий қилинсинки, унга мувофиқ барча ер қаъридан фойдаланувчи ташкилотлар ҳар йили бир марта йиллик қазиб олинган фойдали қазилмалар ҳажмлари тўғрисида иловага мувофиқ маркшейдерлик хулосасини тузадилар ва Давлат геология ва минерал ресурслар қўмитаси ҳузуридаги Кон-геология фаолиятини назорат қилиш ҳудудий инспекцияларига тақдим этадилар. Бунда маркшейдерлик хулосаси:
2018 йилда — жорий йил 15 декабрга қадар;
2019 йилдан бошлаб — ҳисобот йилидан кейинги йилнинг 1 мартига қадар тақдим этилади.
2. Ўзбекистон Республикаси Давлат геология ва минерал ресурслар қўмитаси ҳамда Давлат солиқ қўмитасининг ер қаъридан қазиб олинган норуда фойдали қазилмалар ҳажмлари тўғрисидаги маълумотларнинг мазкур фаолият билан шуғулланувчи ташкилотлар бўйича электрон базасини яратиш ҳамда уни 2019 йил 1 январга қадар Ўзбекистон Республикаси Давлат солиқ қўмитаси маълумотлар базасига интеграция қилиш тўғрисидаги таклифлари маъқуллансин.
3. Ўзбекистон Республикаси Давлат геология ва минерал ресурслар қўмитаси ҳузуридаги Кон-геология фаолиятини назорат қилиш инспекциясига ҳамда Давлат солиқ қўмитаси билан биргаликда ер қаъридан фойдаланувчилар томонидан ҳақиқатда қазиб олинган (ажратиб олинган) фойдали қазилмалар ҳажмининг маркшейдерлик хулосасига мувофиқлиги юзасидан мониторинг ўтказиш ҳуқуқи берилсин.
Белгилаб қўйилсинки:
ер қаъридан фойдаланувчилар томонидан ҳақиқатда қазиб олинган (ажратиб олинган) фойдали қазилмалар ҳажмининг мониторинги бир йилда икки маротабадан ошмаган ҳолда амалга оширилади;
мониторинг жойларга борган ҳолда, солиқ тўловчи фойдаланадиган объектларда ва ҳудудларда солиқ тўловчининг мансабдор шахслари ёки уларнинг вакиллари иштирокида, қазиб олинган (ажратиб олинган) фойдали қазилмалар ҳажмини аниқлаш ҳамда маълумотнома билан расмийлаштириш орқали амалга оширилади.
4. Ўзбекистон Республикаси Давлат геология ва минерал ресурслар қўмитаси барча ер қаъридан фойдаланувчи ташкилотлар томонидан норуда фойдали қазилмаларни қазиб олиш (ажратиб олиш) ҳажмларини ташкилотлар томонидан ўтказилган маркшейдерлик хулосаларини тўплаган ҳолда 2018 йил 15 декабрга қадар ялпи хатловдан ўтказсин ва тўпланган хатлов натижаларини яратилган электрон базасига киритган ҳолда Ўзбекистон Республикаси Давлат солиқ қўмитасига 2019 йил 1 январга қадар тақдим этилишини таъминласин.
5. Ўзбекистон Республикаси Давлат солиқ қўмитаси қазиб олинган (ажратиб олинган) норуда фойдали қазилмаларнинг ҳақиқий ҳажмидан келиб чиққан ҳолда солиқларнинг тўғри ҳисобланиши, ўз вақтида ва тўлиқ тўланиши юзасидан қатъий назорат ўрнатсин.
6. Вазирликлар ва идоралар ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — «Ўзбекнефтгаз» акциядорлик жамияти бошқаруви раиси А.С. Султанов, Ўзбекистон Республикаси Бош вазирининг ўринбосари — молия вазири Ж.А. Қўчқоров, Ўзбекистон Республикаси Давлат геология ва минерал ресурслар қўмитаси раиси Б.Ф. Исламов ва Ўзбекистон Республикаси Давлат солиқ қўмитаси раисининг биринчи ўринбосари Б.А. Мусаев зиммасига юклансин.
Вазирлар Маҳкамасининг 2018 йил 10 сентябрдаги 720-сон қарорига ИЛОВА
Ер қаъридан фойдаланувчилар томонидан ҳақиқатда қазиб олинган (ажратиб олинган) норуда фойдали қазилмалар миқдори ҳақида
20___ йил учун Ер қаъридан фойдаланувчининг номи ___________________________________________________________ СТИР__________________________ Маркшейдерлик хизмати ташкилотининг номи _________________________________________________________________________________________________ Солиқ тўловчининг манзили: _________________________________________________________________________________________________ (республика, вилоят, туман, шаҳар (шаҳарча, ҚФЙ), кўча, хонадон, почта индекси) Ҳисобга олиш ўлчов бирлиги _____________
Т/р Фойдали қазилма конининг (участкасининг) номи, жойлашган жойи Фойдали қазилма тури, хом ашё номи Ҳисобот даври бошидаги захиралар миқдори Ҳисобот даврида қазиб олинган фойдали қазилма миқдори Ҳисобот даври охиридаги захиралар миқдори балансдаги балансдан ташқаридаги балансдаги балансдан ташқаридаги 1 2 3 4 5 6 7 8
Ер қаъридан фойдаланувчи раҳбари : ___________ __________ __________ Ер қаъридан фойдаланувчининг геология-маркшейдерлик хизмати _____________ __________ __________ М.Ў. (Ф.И.Ш) (имзо) (сана) М.Ў. (Ф.И.Ш) (имзо) (сана)
Ўзбекистон Республикасининг Бош вазири А. АРИПОВ
Тошкент ш.,
2018 йил 10 сентябрь,
720-сон
Oʻzbekiston Respublikasi Vazirlar Mahkamasining
qarori
MARKSHEYDERLIK XULOSASI
Tabiiy resurslardan samarali va oqilona foydalanishni taʼminlashning hamda davlat budjeti daromadlarini oshirishning qoʻshimcha chora-tadbirlari toʻgʻrisida
Hozirgi vaqtda mamlakatda mineral xom ashyo resurslaridan foydalanishga investitsiyalarni jalb etish hamda tabiiy qazilma boyliklardan oqilona va samarali foydalanishga alohida eʼtibor qaratilmoqda. Ushbu yoʻnalishda bir qator normativ-huquqiy hujjatlar qabul qilindi.
Shu bilan birga, mazkur sohadagi ishlarning holati tabiiy qazilma boyliklardan tartibli foydalanish hamda davlat budjetiga undiriladigan soliq va boshqa majburiy toʻlovlarning toʻliq undirilishiga toʻsqinlik qilayotgan bir qator muammo va kamchiliklar borligidan dalolat bermoqda. Xususan:
birinchidan, respublika boʻyicha noruda foydali qazilma boyliklarni qazib oluvchi tashkilotlarning roʻyxati va ular tomonidan qazib olingan foydali qazilmalar zaxiralari hajmining yagona integratsiyalashgan idoralararo elektron bazasi mavjud emas;
ikkinchidan, soliqlar toʻlashdan boʻyin tovlashning turli sxemalari yaratilishiga olib kelayotgan, yer qaʼridan foydalanuvchilar faoliyatini nazorat qilish boʻyicha berilgan vakolatlardan samarasiz foydalanilmoqda;
uchinchidan, yer qaʼridan foydalanuvchilar tomonidan haqiqatda qazib olingan (ajratib olingan) noruda foydali qazilmalar miqdorini hisobotlarda kamaytirib koʻrsatish holatlari aniqlanmoqda, bu esa soliq summalarining toʻliq hisoblanishiga salbiy taʼsir koʻrsatmoqda.
Oʻzbekiston Respublikasi Prezidentining “Davlat soliq xizmati organlari faoliyatini tubdan takomillashtirish chora-tadbirlari toʻgʻrisida” 2018-yil 26-iyundagi PQ-3802 son qaroriga muvofiq, tabiiy qazilma boyliklardan oqilona va samarali foydalanishni hamda ularning haqqoniy hisobini yuritishni taʼminlash, shuningdek, Oʻzbekiston Respublikasi Davlat budjeti daromadlarini oshirish maqsadida Vazirlar Mahkamasi qaror qiladi:
1. Shunday tartib joriy qilinsinki, unga muvofiq barcha yer qaʼridan foydalanuvchi tashkilotlar har yili bir marta yillik qazib olingan foydali qazilmalar hajmlari toʻgʻrisida ilovaga muvofiq marksheyderlik xulosasini tuzadilar va Davlat geologiya va mineral resurslar qoʻmitasi huzuridagi Kon-geologiya faoliyatini nazorat qilish hududiy inspeksiyalariga taqdim etadilar. Bunda marksheyderlik xulosasi:
2018-yilda — joriy yil 15-dekabrga qadar;
2019-yildan boshlab — hisobot yilidan keyingi yilning 1-martiga qadar taqdim etiladi.
2. Oʻzbekiston Respublikasi Davlat geologiya va mineral resurslar qoʻmitasi hamda Davlat soliq qoʻmitasining yer qaʼridan qazib olingan noruda foydali qazilmalar hajmlari toʻgʻrisidagi maʼlumotlarning mazkur faoliyat bilan shugʻullanuvchi tashkilotlar boʻyicha elektron bazasini yaratish hamda uni 2019-yil 1-yanvarga qadar Oʻzbekiston Respublikasi Davlat soliq qoʻmitasi maʼlumotlar bazasiga integratsiya qilish toʻgʻrisidagi takliflari maʼqullansin.
3. Oʻzbekiston Respublikasi Davlat geologiya va mineral resurslar qoʻmitasi huzuridagi Kon-geologiya faoliyatini nazorat qilish inspeksiyasiga hamda Davlat soliq qoʻmitasi bilan birgalikda yer qaʼridan foydalanuvchilar tomonidan haqiqatda qazib olingan (ajratib olingan) foydali qazilmalar hajmining marksheyderlik xulosasiga muvofiqligi yuzasidan monitoring oʻtkazish huquqi berilsin.
Belgilab qoʻyilsinki:
yer qaʼridan foydalanuvchilar tomonidan haqiqatda qazib olingan (ajratib olingan) foydali qazilmalar hajmining monitoringi bir yilda ikki marotabadan oshmagan holda amalga oshiriladi;
monitoring joylarga borgan holda, soliq toʻlovchi foydalanadigan obyektlarda va hududlarda soliq toʻlovchining mansabdor shaxslari yoki ularning vakillari ishtirokida, qazib olingan (ajratib olingan) foydali qazilmalar hajmini aniqlash hamda maʼlumotnoma bilan rasmiylashtirish orqali amalga oshiriladi.
4. Oʻzbekiston Respublikasi Davlat geologiya va mineral resurslar qoʻmitasi barcha yer qaʼridan foydalanuvchi tashkilotlar tomonidan noruda foydali qazilmalarni qazib olish (ajratib olish) hajmlarini tashkilotlar tomonidan oʻtkazilgan marksheyderlik xulosalarini toʻplagan holda 2018-yil 15-dekabrga qadar yalpi xatlovdan oʻtkazsin va toʻplangan xatlov natijalarini yaratilgan elektron bazasiga kiritgan holda Oʻzbekiston Respublikasi Davlat soliq qoʻmitasiga 2019-yil 1-yanvarga qadar taqdim etilishini taʼminlasin.
5. Oʻzbekiston Respublikasi Davlat soliq qoʻmitasi qazib olingan (ajratib olingan) noruda foydali qazilmalarning haqiqiy hajmidan kelib chiqqan holda soliqlarning toʻgʻri hisoblanishi, oʻz vaqtida va toʻliq toʻlanishi yuzasidan qatʼiy nazorat oʻrnatsin.
6. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — “Oʻzbekneftgaz” aksiyadorlik jamiyati boshqaruvi raisi A.S. Sultanov, Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov, Oʻzbekiston Respublikasi Davlat geologiya va mineral resurslar qoʻmitasi raisi B.F. Islamov va Oʻzbekiston Respublikasi Davlat soliq qoʻmitasi raisining birinchi oʻrinbosari B.A. Musayev zimmasiga yuklansin.
Vazirlar Mahkamasining 2018-yil 10-sentabrdagi 720-son qaroriga ILOVA
Yer qaʼridan foydalanuvchilar tomonidan haqiqatda qazib olingan (ajratib olingan) noruda foydali qazilmalar miqdori haqida
20___ yil uchun Yer qaʼridan foydalanuvchining nomi ___________________________________________________________ STIR__________________________ Marksheyderlik xizmati tashkilotining nomi _________________________________________________________________________________________________ Soliq toʻlovchining manzili: _________________________________________________________________________________________________ (respublika, viloyat, tuman, shahar (shaharcha, QFY), koʻcha, xonadon, pochta indeksi) Hisobga olish oʻlchov birligi _____________
T/r Foydali qazilma konining (uchastkasining) nomi, joylashgan joyi Foydali qazilma turi, xom ashyo nomi Hisobot davri boshidagi zaxiralar miqdori Hisobot davrida qazib olingan foydali qazilma miqdori Hisobot davri oxiridagi zaxiralar miqdori balansdagi balansdan tashqaridagi balansdagi balansdan tashqaridagi 1 2 3 4 5 6 7 8
Yer qaʼridan foydalanuvchi rahbari : ___________ __________ __________ Yer qaʼridan foydalanuvchining geologiya-marksheyderlik xizmati _____________ __________ __________ M.Oʻ. (F.I.Sh) (imzo) (sana) M.Oʻ. (F.I.Sh) (imzo) (sana)
Oʻzbekiston Respublikasining Bosh vaziri A. ARIPOV
Toshkent sh.,
2018-yil 10-sentabr,
720-son