📅 2018-yil 18-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 18 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 18 октября 2018 г. · Постановления Кабинета Министров
Официальный текст. Официальный документ. Редакционные примечания не включены.
📅 18 October 2018 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Наманган вилоятида хусусий тиббиёт соҳасини ривожлантириш ва замонавий тиббиёт марказини ташкил этиш бўйича қўшимча чора-тадбирлар тўғрисида
Наманган вилоятида соғлиқни сақлаш соҳасида хусусий секторни ривожлантириш, аҳолига, биринчи навбатда, кам таъминланган ва ижтимоий ҳимояга муҳтож шахсларга сифатли ва малакали тиббий хизмат кўрсатилишини таъминлаш, самарасиз фаолият юритаётган давлат тиббиёт муассасалари негизида хорижий инвесторлар иштирокида замонавий диагностика марказини ташкил этиш мақсадида Вазирлар Маҳкамаси қарор қилади:
1. Қуйидагилар:
Ўзбекистон Республикаси Президентининг «Соғлиқни сақлаш соҳасида хусусий секторни ривожлантириш мақсадида давлат активларини сотиш борасидаги қўшимча чора-тадбирлар тўғрисида» 2017 йил 29 сентябрдаги ПҚ-3297-сон қарорига мувофиқ Наманган вилояти, Наманган шаҳри, «Сиҳатгоҳ» маҳалла фуқаролар йиғини, Чаманзор даҳаси, 2д-уй манзилида жойлашган «Вилоят тиббий диагностика маркази» давлат унитар корхонасининг бино ва иншоотлари (кейинги ўринларда объект деб аталади) фаолият турини 10 йил мобайнида сақлаш шарти билан хусусийлаштирилиши белгиланган бўлсада, мазкур объект оммавий савдоларда сотилмагани;
Наманган вилояти ҳокимлиги ва «Gold — dream» Ўзбекистон — Корея қўшма корхонаси масъулияти чекланган жамияти (кейинги ўринларда «Gold — dream» МЧЖ деб аталади) ўртасида Наманган шаҳрида умумий қиймати 30,0 млн. АҚШ доллари бўлган тўғридан-тўғри чет эл инвестицияси ҳисобига замонавий тиббиёт диагностика марказини ташкил этиш тўғрисида келишувга эришилгани маълумот учун қабул қилинсин.
2. Ўзбекистон Республикаси Соғлиқни сақлаш вазирлиги, Хусусийлаштирилган корхоналарга кўмаклашиш ва рақобатни ривожлантириш давлат қўмитаси ҳамда Наманган вилояти ҳокимлигининг объектни «Gold — dream» МЧЖга замонавий хусусий тиббиёт марказини ташкил этиш учун инвестициявий ва ижтимоий мажбуриятларни бажариш шарти билан «ноль» харид қийматида сотиш тўғрисидаги таклифи маъқуллансин.
3. «Gold — dream» МЧЖга объект доирасида инвестиция лойиҳасини амалга ошириш жараёнида қуйидаги инвестициявий ва ижтимоий мажбуриятлар юклатилсин:
а) бир йил давомида ўз маблағлари ҳамда жалб этиладиган хорижий ҳамкорларнинг маблағлари ҳисобига 30,0 млн. АҚШ доллари миқдорида инвестиция киритиш орқали объектни реконструкция қилиш, замонавий асбоб-ускуналар сотиб олиш ҳамда жиҳозлаш;
б) объект негизида замонавий 4 та жарроҳлик амалиёти бўлими, 20 та жонлантириш ва 200 та стационар даволаниш ўринлари, шунингдек, бактериологик ва гистологик таҳлил лабораториялари хизматини ташкил этиш;
в) объект ишга туширилган санадан бошлаб, 3 йил давомида республика бўйича камида 5 000 нафар кам таъминланган ва ижтимоий ҳимояга муҳтож ҳамда барча турдаги гуруҳ ногиронларига беғараз тиббий хизмат кўрсатиш, шу жумладан камида 200 та жарроҳлик амалиётларини бажариш;
г) камида 150 та янги иш ўринлари ташкил этиш ва 15 йил давомида фаолият турини сақлаб қолиш.
4. Ўзбекистон Республикаси Хусусийлаштирилган корхоналарга кўмаклашиш ва рақобатни ривожлантириш давлат қўмитаси Наманган вилояти ҳокимлиги билан биргаликда:
ўн кун муддатда мазкур қарорнинг 3-бандида назарда тутилган шартлар асосида объект бўйича олди-сотди шартномаси тузилишини;
«Gold — dream» МЧЖ томонидан шартнома асосида инвестициявий ва ижтимоий мажбуриятларнинг ўз вақтида ҳамда сифатли бажарилиши юзасидан тизимли мониторинг ўрнатилиши таъминлансин.
5. Ўзбекистон Республикаси Соғлиқни сақлаш вазирлиги «Gold — dream» МЧЖ билан биргаликда икки ҳафта муддатда кам таъминланган ва ижтимоий ҳимояга муҳтож аҳолига ҳамда барча турдаги гуруҳ ногиронларига беғараз тиббий хизмат кўрсатиш ва жарроҳлик амалиётларини бажариш мажбуриятини белгилаб берувчи вақтинчалик тартиб ишлаб чиқсин ва тасдиқласин.
6. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари А.А. Абдуҳакимов, Ўзбекистон Республикаси Соғлиқни сақлаш вазири А.К. Шадманов ва Наманган вилояти ҳокими Х.Х. Бозаров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2018 йил 18 октябрь,
834-сон
Oʻzbekiston Respublikasi Vazirlar Mahkamasining
qarori
Namangan viloyatida xususiy tibbiyot sohasini rivojlantirish va zamonaviy tibbiyot markazini tashkil etish boʻyicha qoʻshimcha chora-tadbirlar toʻgʻrisida
Namangan viloyatida sogʻliqni saqlash sohasida xususiy sektorni rivojlantirish, aholiga, birinchi navbatda, kam taʼminlangan va ijtimoiy himoyaga muhtoj shaxslarga sifatli va malakali tibbiy xizmat koʻrsatilishini taʼminlash, samarasiz faoliyat yuritayotgan davlat tibbiyot muassasalari negizida xorijiy investorlar ishtirokida zamonaviy diagnostika markazini tashkil etish maqsadida Vazirlar Mahkamasi qaror qiladi:
1. Quyidagilar:
Oʻzbekiston Respublikasi Prezidentining “Sogʻliqni saqlash sohasida xususiy sektorni rivojlantirish maqsadida davlat aktivlarini sotish borasidagi qoʻshimcha chora-tadbirlar toʻgʻrisida” 2017-yil 29-sentabrdagi PQ-3297-son qaroriga muvofiq Namangan viloyati, Namangan shahri, “Sihatgoh” mahalla fuqarolar yigʻini, Chamanzor dahasi, 2d-uy manzilida joylashgan “Viloyat tibbiy diagnostika markazi” davlat unitar korxonasining bino va inshootlari (keyingi oʻrinlarda obyekt deb ataladi) faoliyat turini 10 yil mobaynida saqlash sharti bilan xususiylashtirilishi belgilangan boʻlsada, mazkur obyekt ommaviy savdolarda sotilmagani;
Namangan viloyati hokimligi va “Gold — dream” Oʻzbekiston — Koreya qoʻshma korxonasi masʼuliyati cheklangan jamiyati (keyingi oʻrinlarda “Gold — dream” MCHJ deb ataladi) oʻrtasida Namangan shahrida umumiy qiymati 30,0 mln. AQSH dollari boʻlgan toʻgʻridan-toʻgʻri chet el investitsiyasi hisobiga zamonaviy tibbiyot diagnostika markazini tashkil etish toʻgʻrisida kelishuvga erishilgani maʼlumot uchun qabul qilinsin.
2. Oʻzbekiston Respublikasi Sogʻliqni saqlash vazirligi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasi hamda Namangan viloyati hokimligining obyektni “Gold — dream” MCHJga zamonaviy xususiy tibbiyot markazini tashkil etish uchun investitsiyaviy va ijtimoiy majburiyatlarni bajarish sharti bilan “nol” xarid qiymatida sotish toʻgʻrisidagi taklifi maʼqullansin.
3. “Gold — dream” MCHJga obyekt doirasida investitsiya loyihasini amalga oshirish jarayonida quyidagi investitsiyaviy va ijtimoiy majburiyatlar yuklatilsin:
a) bir yil davomida oʻz mablagʻlari hamda jalb etiladigan xorijiy hamkorlarning mablagʻlari hisobiga 30,0 mln. AQSH dollari miqdorida investitsiya kiritish orqali obyektni rekonstruksiya qilish, zamonaviy asbob-uskunalar sotib olish hamda jihozlash;
b) obyekt negizida zamonaviy 4 ta jarrohlik amaliyoti boʻlimi, 20 ta jonlantirish va 200 ta statsionar davolanish oʻrinlari, shuningdek, bakteriologik va gistologik tahlil laboratoriyalari xizmatini tashkil etish;
v) obyekt ishga tushirilgan sanadan boshlab, 3 yil davomida respublika boʻyicha kamida 5 000 nafar kam taʼminlangan va ijtimoiy himoyaga muhtoj hamda barcha turdagi guruh nogironlariga begʻaraz tibbiy xizmat koʻrsatish, shu jumladan kamida 200 ta jarrohlik amaliyotlarini bajarish;
g) kamida 150 ta yangi ish oʻrinlari tashkil etish va 15 yil davomida faoliyat turini saqlab qolish.
4. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi Namangan viloyati hokimligi bilan birgalikda:
oʻn kun muddatda mazkur qarorning 3-bandida nazarda tutilgan shartlar asosida obyekt boʻyicha oldi-sotdi shartnomasi tuzilishini;
“Gold — dream” MCHJ tomonidan shartnoma asosida investitsiyaviy va ijtimoiy majburiyatlarning oʻz vaqtida hamda sifatli bajarilishi yuzasidan tizimli monitoring oʻrnatilishi taʼminlansin.
5. Oʻzbekiston Respublikasi Sogʻliqni saqlash vazirligi “Gold — dream” MCHJ bilan birgalikda ikki hafta muddatda kam taʼminlangan va ijtimoiy himoyaga muhtoj aholiga hamda barcha turdagi guruh nogironlariga begʻaraz tibbiy xizmat koʻrsatish va jarrohlik amaliyotlarini bajarish majburiyatini belgilab beruvchi vaqtinchalik tartib ishlab chiqsin va tasdiqlasin.
6. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Abduhakimov, Oʻzbekiston Respublikasi Sogʻliqni saqlash vaziri A.K. Shadmanov va Namangan viloyati hokimi X.X. Bozarov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 18-oktabr,
834-son