📅 2018-yil 20-oktabr · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2018 йил 20 октябрь · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 20 октября 2018 г. · Постановления Президента
Официальный текст. Официальный документ. Редакционные примечания не включены.
📅 20 October 2018 · Presidential resolutions
Official text. Official document. Editorial notes are not included.
Ўзбекистон Республикаси Президентининг
Қарори
Давлат-хусусий шерикликни ривожлантиришнинг ҳуқуқий ва институционал базасини яратиш бўйича биринчи навбатдаги чора-тадбирлар тўғрисида
Мамлакатимизда иқтисодиётни либераллаштириш бўйича амалга оширилаётган чора-тадбирлар ва институционал ислоҳотлар инвестиция муҳитини яхшилашга, хорижий ва маҳаллий инвесторлар сонининг ортиб боришига кўмаклашмоқда.
Шу билан бирга, анъанавий равишда давлат тасарруфида ва бошқарувида бўлган иқтисодиёт тармоқлари ва ижтимоий соҳада тўпланиб қолган муаммо ва камчиликлар давлат-хусусий шериклик тизимини жорий этишни жадаллаштириш юзасидан муҳим чоралар кўришни тақозо этмоқда.
Ижтимоий ва коммунал соҳалар, шаҳарсозлик ва ободонлаштириш, йўл хўжалиги, энергетика соҳасидаги давлат монополияси товарлар ишлаб чиқариш ва хизмат кўрсатиш сифатини, давлат маблағларидан фойдаланиш самарадорлигини пасайтирмоқда.
Давлат-хусусий шерикликни ривожлантиришнинг тамойиллари, шартлари ва йўналишларини белгиловчи ҳуқуқий ва институционал база, шунингдек, ўрта ва узоқ муддатли истиқболда бюджет тизимига молиявий, техник ва тижорат таваккалчиликларининг таъсирини баҳолаш механизми ишлаб чиқилмаган.
Давлат-хусусий шериклиги механизмларидан фойдаланиш орқали инфратузилма ва ижтимоий лойиҳаларни амалга оширишда, шунингдек, уларни тизимли мониторинг қилишда давлат ва бизнес ўртасидаги ҳамкорликни таъминловчи махсус орган мавжуд эмас.
Ижтимоий аҳамиятга эга бўлган вазифаларни ўзаро манфаатли шароитларда тезкорлик билан ҳал этиш, шунингдек, давлат-хусусий шериклик тизимини самарали бошқариш ва мувофиқлаштириш учун институционал имкониятлар комплексини яратиш мақсадида:
1. Ўзбекистон Республикаси Молия вазирлиги, Иқтисодиёт вазирлиги ва Савдо-саноат палатасининг Ўзбекистон Республикаси Молия вазирлиги ҳузурида Давлат-хусусий шерикликни ривожлантириш агентлигини (кейинги ўринларда — Агентлик деб юритилади) ташкил этиш тўғрисидаги таклифи маъқуллансин.
2. Агентликнинг асосий вазифалари этиб қуйидагилар белгилансин:
иқтисодиёт ва ижтимоий соҳанинг устувор йўналишларида давлат-хусусий шерикликни ривожлантириш бўйича тармоқ дастурларини ишлаб чиқишда иштирок этиш;
давлат-хусусий шериклик лойиҳаларининг самарадорлиги ва афзалликларини баҳолаш услубини ишлаб чиқиш, ушбу лойиҳаларни тайёрлаш ва амалга оширишни услубий жиҳатдан қўллаб-қувватлаш;
давлат-хусусий шериклик соҳасидаги лойиҳаларни амалга оширишда идоралараро мувофиқлаштиришни таъминлаш, шунингдек, лойиҳалар тўғрисидаги ахборотни очиқ ҳолда жойлаштириш ва уларнинг реестрини юритиш;
давлат-хусусий шерикликни ривожлантириш дастурларини амалга ошириш, шу жумладан, муайян лойиҳалар концепцияларини ишлаб чиқишда вазирлик ва идораларга кўмаклашиш;
давлат-хусусий шерикликни ривожлантириш масалаларида инвесторлар, халқаро молия ва донор ташкилотлари, илмий ва эксперт ҳамжамиятлари, шунингдек, бозорнинг бошқа иштирокчилари билан ҳамкорликни ташкил этиш;
давлат-хусусий шериклик лойиҳалари иштирокчиларининг ҳуқуқлари ва қонуний манфаатларини ҳимоя қилишга ҳар томонлама кўмаклашиш, лойиҳаларни молиялаштириш механизмлари, шу жумладан, юзага келиши мумкин бўлган таваккалчиликларни аниқлаш ва тақсимлаш юзасидан уларнинг таклифларини кўриб чиқиш;
давлат-хусусий шериклик лойиҳаларини, шу жумладан, лойиҳаларга жалб қилинган бюджет тизими маблағларидан фойдаланилишини, шунингдек, тегишли тармоқлардаги халқаро тажрибани инобатга олган ҳолда лойиҳаларни тайёрлаш ва амалга ошириш амалиётини мониторинг қилиш.
3. Белгилансинки:
Агентлик давлат муассасаси шаклида ташкил этилади ва Ўзбекистон Республикасида давлат-хусусий шериклик соҳасида ягона давлат сиёсатини юритиш бўйича махсус ваколатли орган ҳисобланади;
норматив-ҳуқуқий ҳужжатлар лойиҳалари, танлов ҳужжатлари, шунингдек, давлат-хусусий шериклик тўғрисидаги битимлар лойиҳалари ва уларга киритиладиган ўзгартиришлар мажбурий тартибда Агентлик билан келишилиши лозим;
Агентлик давлат-хусусий шериклик лойиҳаларининг амалга оширилиши, техник-иқтисодий ҳамда молиявий кўрсаткичлари тўғрисидаги ахборотни уларнинг ташаббускорлари ва иштирокчиларидан сўраб олиш ҳуқуқига эга;
Агентликни таъминлаб туриш харажатлари Ўзбекистон Республикаси Давлат бюджети маблағларидан молиялаштирилади;
Агентликка директор — Ўзбекистон Республикаси молия вазирининг ўринбосари раҳбарлик қилади;
Агентлик директорининг биринчи ўринбосари ва ўринбосари Ўзбекистон Республикаси Молия вазири томонидан белгиланган тартибда лавозимга тайинланади ва лавозимдан озод этилади;
Агентлик ходимларига Ўзбекистон Республикаси Молия вазирлиги ходимлари учун белгиланган меҳнатга ҳақ тўлаш шартлари татбиқ этилади;
Агентликнинг Ўзбекистон Республикасининг норезидентлари бўлган ходимлари, экспертлари ва маслаҳатчилари хизматларига ҳақ тўлаш белгиланган тартибда хорижий валютада амалга оширилиши мумкин.
4. Агентлик фаолиятини молиялаштириш манбалари этиб қуйидагилар белгилансин:
Ўзбекистон Республикаси Давлат бюджети маблағлари, халқаро ва хорижий ҳукуматлар молия ташкилотлари, молия институтлари ҳамда бошқа донорларнинг грантлари ва кредитлари (қарзлари);
юридик ва жисмоний шахслар — Ўзбекистон Республикаси резидентлари ва норезидентларининг хайрия маблағлари, шунингдек, қонун ҳужжатларида тақиқланмаган бошқа манбалар.
5. Агентлик бошқарув ходимларининг чекланган сони 30 нафар этиб белгилансин.
Ўзбекистон Республикаси молия вазирига:
Агентликнинг чекланган сони ва тузилмасига, зарур ҳолларда, ўзгартиришлар киритиш;
Агентликнинг ва Ўзбекистон Республикаси Молия вазирлигининг бюджетдан ташқари маблағлари ҳисобидан Агентлик ходимлари учун қонун ҳужжатларида назарда тутилган бошқа тўловлардан қатъи назар, эгаллаб турган асосий лавозими бўйича лавозим маошларига (тариф ставкаларига) устамалар ва рағбатлантирувчи бошқа тўловларни белгилаш;
халқаро амалиёт ва бозор шароитларидан келиб чиққан ҳолда, Агентликка юкланган вазифаларни амалга ошириш учун шартнома асосида жалб этиладиган мутахассислар меҳнатига ҳақ тўлаш миқдорини белгилаш ҳуқуқи берилсин.
6. Давлат ва хўжалик бошқаруви органлари, маҳаллий давлат ҳокимияти органлари, зарур ҳолларда, давлат-хусусий шериклик лойиҳаларини тайёрлаш ва амалга ошириш учун масъул бўлган ихтисослаштирилган таркибий бўлинмаларни ташкил этсин, уларни бошқарув ходимларининг белгиланган чекланган сони доирасида камида икки нафар малакали мутахассис билан таъминласин.
7. Агентлик ва Ўзбекистон Республикаси Молия вазирлиги Адлия вазирлиги ва бошқа манфаатдор идоралар билан биргаликда:
а) 2018 йил 1 декабргача давлат-хусусий шериклик лойиҳалари амалга оширилиши назарда тутилган норматив-ҳуқуқий ҳужжатларни хатловдан ўтказиб, ёндашувлар, тартиблар ва уларни амалга ошириш механизмлари бирхиллаштирилишини таъминлаш бўйича таклифлар киритсин;
б) 2018 йил 1 декабргача Ўзбекистон Республикасининг «Давлат-хусусий шериклик тўғрисида»ги Қонуни лойиҳасини ишлаб чиқиб, Вазирлар Маҳкамасига киритсин;
в) 2019 йил 1 январгача қуйидагиларга алоҳида эътибор қаратган ҳолда Ўзбекистон Республикасида давлат-хусусий шерикликни ривожлантириш Дастурини ишлаб чиқсин ва тасдиқлаш учун киритсин:
иқтисодиёт тармоқлари ва ижтимоий соҳа кесимида давлат-хусусий шерикликни ривожлантириш бўйича комплекс ёндашув ва стратегик вазифалар;
давлат-хусусий шериклик лойиҳаларини ишлаб чиқиш, амалга ошириш ва таъминлаш бўйича мутахассисларни тайёрлаш;
давлат-хусусий шерикликни ривожлантириш учун хорижий инвестицияларни жалб қилиш мақсадида халқаро молия институтлари, донор-давлатлар, компаниялар ва банклар билан ҳамкорликни ўрнатиш.
8. Агентлик Тошкент шаҳри, Истиқлол кўчаси, 26-уй манзилида беғараз фойдаланиш ҳуқуқи асосида жойлаштирилсин.
9. Ўзбекистон Республикаси Ахборот технологиялари ва коммуникацияларини ривожлантириш вазирлиги Агентликни белгиланган тартибда зарур алоқа билан, шунингдек, юқори тезликда ишлайдиган Интернет жаҳон ахборот тармоғига уланилишини таъминласин.
10. Ўзбекистон Республикаси Молия вазирлиги:
бир ҳафта муддатда Агентлик тузилмаси ва низомини тасдиқлаш тўғрисидаги ҳукумат қарори лойиҳасини Ўзбекистон Республикаси Вазирлар Маҳкамасига киритсин;
бир ой муддатда Агентликни юклатилган вазифалар ижросини таъминлаш учун зарур назарий билим ва амалий кўникмаларга эга бўлган юқори малакали мутахассислар билан тўлдиришни таъминласин;
бир ой муддатда Агентликни зарур мебель, жиҳозлар, компьютер ускуналари, шунингдек, зарурат бўлганда, транспорт воситалари билан таъминласин;
икки ой муддатда манфаатдор идоралар билан биргаликда қонун ҳужжатларига ушбу қарордан келиб чиқадиган ўзгартириш ва қўшимчалар тўғрисида Ўзбекистон Республикаси Вазирлар Маҳкамасига таклифлар киритсин.
11. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Президенти Администрацияси раҳбари З.Ш. Низомиддинов, Ўзбекистон Республикаси Президенти маслаҳатчисининг ўринбосари Г.К. Саидова ва Ўзбекистон Республикаси Бош вазири ўринбосари — молия вазири Ж.А. Қўчқоров зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2018 йил 20 октябрь,
ПҚ-3980-сон
Oʻzbekiston Respublikasi Prezidentining
Qarori
Davlat-xususiy sheriklikni rivojlantirishning huquqiy va institutsional bazasini yaratish boʻyicha birinchi navbatdagi chora-tadbirlar toʻgʻrisida
Mamlakatimizda iqtisodiyotni liberallashtirish boʻyicha amalga oshirilayotgan chora-tadbirlar va institutsional islohotlar investitsiya muhitini yaxshilashga, xorijiy va mahalliy investorlar sonining ortib borishiga koʻmaklashmoqda.
Shu bilan birga, anʼanaviy ravishda davlat tasarrufida va boshqaruvida boʻlgan iqtisodiyot tarmoqlari va ijtimoiy sohada toʻplanib qolgan muammo va kamchiliklar davlat-xususiy sheriklik tizimini joriy etishni jadallashtirish yuzasidan muhim choralar koʻrishni taqozo etmoqda.
Ijtimoiy va kommunal sohalar, shaharsozlik va obodonlashtirish, yoʻl xoʻjaligi, energetika sohasidagi davlat monopoliyasi tovarlar ishlab chiqarish va xizmat koʻrsatish sifatini, davlat mablagʻlaridan foydalanish samaradorligini pasaytirmoqda.
Davlat-xususiy sheriklikni rivojlantirishning tamoyillari, shartlari va yoʻnalishlarini belgilovchi huquqiy va institutsional baza, shuningdek, oʻrta va uzoq muddatli istiqbolda budjet tizimiga moliyaviy, texnik va tijorat tavakkalchiliklarining taʼsirini baholash mexanizmi ishlab chiqilmagan.
Davlat-xususiy sherikligi mexanizmlaridan foydalanish orqali infratuzilma va ijtimoiy loyihalarni amalga oshirishda, shuningdek, ularni tizimli monitoring qilishda davlat va biznes oʻrtasidagi hamkorlikni taʼminlovchi maxsus organ mavjud emas.
Ijtimoiy ahamiyatga ega boʻlgan vazifalarni oʻzaro manfaatli sharoitlarda tezkorlik bilan hal etish, shuningdek, davlat-xususiy sheriklik tizimini samarali boshqarish va muvofiqlashtirish uchun institutsional imkoniyatlar kompleksini yaratish maqsadida:
1. Oʻzbekiston Respublikasi Moliya vazirligi, Iqtisodiyot vazirligi va Savdo-sanoat palatasining Oʻzbekiston Respublikasi Moliya vazirligi huzurida Davlat-xususiy sheriklikni rivojlantirish agentligini (keyingi oʻrinlarda — Agentlik deb yuritiladi) tashkil etish toʻgʻrisidagi taklifi maʼqullansin.
2. Agentlikning asosiy vazifalari etib quyidagilar belgilansin:
iqtisodiyot va ijtimoiy sohaning ustuvor yoʻnalishlarida davlat-xususiy sheriklikni rivojlantirish boʻyicha tarmoq dasturlarini ishlab chiqishda ishtirok etish;
davlat-xususiy sheriklik loyihalarining samaradorligi va afzalliklarini baholash uslubini ishlab chiqish, ushbu loyihalarni tayyorlash va amalga oshirishni uslubiy jihatdan qoʻllab-quvvatlash;
davlat-xususiy sheriklik sohasidagi loyihalarni amalga oshirishda idoralararo muvofiqlashtirishni taʼminlash, shuningdek, loyihalar toʻgʻrisidagi axborotni ochiq holda joylashtirish va ularning reyestrini yuritish;
davlat-xususiy sheriklikni rivojlantirish dasturlarini amalga oshirish, shu jumladan, muayyan loyihalar konsepsiyalarini ishlab chiqishda vazirlik va idoralarga koʻmaklashish;
davlat-xususiy sheriklikni rivojlantirish masalalarida investorlar, xalqaro moliya va donor tashkilotlari, ilmiy va ekspert hamjamiyatlari, shuningdek, bozorning boshqa ishtirokchilari bilan hamkorlikni tashkil etish;
davlat-xususiy sheriklik loyihalari ishtirokchilarining huquqlari va qonuniy manfaatlarini himoya qilishga har tomonlama koʻmaklashish, loyihalarni moliyalashtirish mexanizmlari, shu jumladan, yuzaga kelishi mumkin boʻlgan tavakkalchiliklarni aniqlash va taqsimlash yuzasidan ularning takliflarini koʻrib chiqish;
davlat-xususiy sheriklik loyihalarini, shu jumladan, loyihalarga jalb qilingan budjet tizimi mablagʻlaridan foydalanilishini, shuningdek, tegishli tarmoqlardagi xalqaro tajribani inobatga olgan holda loyihalarni tayyorlash va amalga oshirish amaliyotini monitoring qilish.
3. Belgilansinki:
Agentlik davlat muassasasi shaklida tashkil etiladi va Oʻzbekiston Respublikasida davlat-xususiy sheriklik sohasida yagona davlat siyosatini yuritish boʻyicha maxsus vakolatli organ hisoblanadi;
normativ-huquqiy hujjatlar loyihalari, tanlov hujjatlari, shuningdek, davlat-xususiy sheriklik toʻgʻrisidagi bitimlar loyihalari va ularga kiritiladigan oʻzgartirishlar majburiy tartibda Agentlik bilan kelishilishi lozim;
Agentlik davlat-xususiy sheriklik loyihalarining amalga oshirilishi, texnik-iqtisodiy hamda moliyaviy koʻrsatkichlari toʻgʻrisidagi axborotni ularning tashabbuskorlari va ishtirokchilaridan soʻrab olish huquqiga ega;
Agentlikni taʼminlab turish xarajatlari Oʻzbekiston Respublikasi Davlat budjeti mablagʻlaridan moliyalashtiriladi;
Agentlikka direktor — Oʻzbekiston Respublikasi moliya vazirining oʻrinbosari rahbarlik qiladi;
Agentlik direktorining birinchi oʻrinbosari va oʻrinbosari Oʻzbekiston Respublikasi Moliya vaziri tomonidan belgilangan tartibda lavozimga tayinlanadi va lavozimdan ozod etiladi;
Agentlik xodimlariga Oʻzbekiston Respublikasi Moliya vazirligi xodimlari uchun belgilangan mehnatga haq toʻlash shartlari tatbiq etiladi;
Agentlikning Oʻzbekiston Respublikasining norezidentlari boʻlgan xodimlari, ekspertlari va maslahatchilari xizmatlariga haq toʻlash belgilangan tartibda xorijiy valyutada amalga oshirilishi mumkin.
4. Agentlik faoliyatini moliyalashtirish manbalari etib quyidagilar belgilansin:
Oʻzbekiston Respublikasi Davlat budjeti mablagʻlari, xalqaro va xorijiy hukumatlar moliya tashkilotlari, moliya institutlari hamda boshqa donorlarning grantlari va kreditlari (qarzlari);
yuridik va jismoniy shaxslar — Oʻzbekiston Respublikasi rezidentlari va norezidentlarining xayriya mablagʻlari, shuningdek, qonun hujjatlarida taqiqlanmagan boshqa manbalar.
5. Agentlik boshqaruv xodimlarining cheklangan soni 30 nafar etib belgilansin.
Oʻzbekiston Respublikasi moliya vaziriga:
Agentlikning cheklangan soni va tuzilmasiga, zarur hollarda, oʻzgartirishlar kiritish;
Agentlikning va Oʻzbekiston Respublikasi Moliya vazirligining budjetdan tashqari mablagʻlari hisobidan Agentlik xodimlari uchun qonun hujjatlarida nazarda tutilgan boshqa toʻlovlardan qatʼi nazar, egallab turgan asosiy lavozimi boʻyicha lavozim maoshlariga (tarif stavkalariga) ustamalar va ragʻbatlantiruvchi boshqa toʻlovlarni belgilash;
xalqaro amaliyot va bozor sharoitlaridan kelib chiqqan holda, Agentlikka yuklangan vazifalarni amalga oshirish uchun shartnoma asosida jalb etiladigan mutaxassislar mehnatiga haq toʻlash miqdorini belgilash huquqi berilsin.
6. Davlat va xoʻjalik boshqaruvi organlari, mahalliy davlat hokimiyati organlari, zarur hollarda, davlat-xususiy sheriklik loyihalarini tayyorlash va amalga oshirish uchun masʼul boʻlgan ixtisoslashtirilgan tarkibiy boʻlinmalarni tashkil etsin, ularni boshqaruv xodimlarining belgilangan cheklangan soni doirasida kamida ikki nafar malakali mutaxassis bilan taʼminlasin.
7. Agentlik va Oʻzbekiston Respublikasi Moliya vazirligi Adliya vazirligi va boshqa manfaatdor idoralar bilan birgalikda:
a) 2018-yil 1-dekabrgacha davlat-xususiy sheriklik loyihalari amalga oshirilishi nazarda tutilgan normativ-huquqiy hujjatlarni xatlovdan oʻtkazib, yondashuvlar, tartiblar va ularni amalga oshirish mexanizmlari birxillashtirilishini taʼminlash boʻyicha takliflar kiritsin;
b) 2018-yil 1-dekabrgacha Oʻzbekiston Respublikasining “Davlat-xususiy sheriklik toʻgʻrisida”gi Qonuni loyihasini ishlab chiqib, Vazirlar Mahkamasiga kiritsin;
v) 2019-yil 1-yanvargacha quyidagilarga alohida eʼtibor qaratgan holda Oʻzbekiston Respublikasida davlat-xususiy sheriklikni rivojlantirish Dasturini ishlab chiqsin va tasdiqlash uchun kiritsin:
iqtisodiyot tarmoqlari va ijtimoiy soha kesimida davlat-xususiy sheriklikni rivojlantirish boʻyicha kompleks yondashuv va strategik vazifalar;
davlat-xususiy sheriklik loyihalarini ishlab chiqish, amalga oshirish va taʼminlash boʻyicha mutaxassislarni tayyorlash;
davlat-xususiy sheriklikni rivojlantirish uchun xorijiy investitsiyalarni jalb qilish maqsadida xalqaro moliya institutlari, donor-davlatlar, kompaniyalar va banklar bilan hamkorlikni oʻrnatish.
8. Agentlik Toshkent shahri, Istiqlol koʻchasi, 26-uy manzilida begʻaraz foydalanish huquqi asosida joylashtirilsin.
9. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Agentlikni belgilangan tartibda zarur aloqa bilan, shuningdek, yuqori tezlikda ishlaydigan Internet jahon axborot tarmogʻiga ulanilishini taʼminlasin.
10. Oʻzbekiston Respublikasi Moliya vazirligi:
bir hafta muddatda Agentlik tuzilmasi va nizomini tasdiqlash toʻgʻrisidagi hukumat qarori loyihasini Oʻzbekiston Respublikasi Vazirlar Mahkamasiga kiritsin;
bir oy muddatda Agentlikni yuklatilgan vazifalar ijrosini taʼminlash uchun zarur nazariy bilim va amaliy koʻnikmalarga ega boʻlgan yuqori malakali mutaxassislar bilan toʻldirishni taʼminlasin;
bir oy muddatda Agentlikni zarur mebel, jihozlar, kompyuter uskunalari, shuningdek, zarurat boʻlganda, transport vositalari bilan taʼminlasin;
ikki oy muddatda manfaatdor idoralar bilan birgalikda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.
11. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti Administratsiyasi rahbari Z.Sh. Nizomiddinov, Oʻzbekiston Respublikasi Prezidenti maslahatchisining oʻrinbosari G.K. Saidova va Oʻzbekiston Respublikasi Bosh vaziri oʻrinbosari — moliya vaziri J.A. Qoʻchqorov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2018-yil 20-oktabr,
PQ-3980-son
Президента Республики Узбекистан
Постановление
О первоочередных мерах по созданию правовой и институциональной базы развития государственно-частного партнерства
Принимаемые в стране меры по либерализации экономики и проводимые институциональные реформы способствуют улучшению инвестиционного климата, росту количества иностранных и отечественных инвесторов.
Вместе с тем, накопившиеся недостатки и проблемы в отраслях экономики и социальной сфере, традиционно находящихся в государственной собственности и управлении, требуют принятия кардинальных мер по ускоренному внедрению системы государственно-частного партнерства.
Государственная монополия в социальной и коммунальной сферах, градостроительстве и благоустройстве, дорожном хозяйстве, энергетике снижает качество производства товаров и предоставления услуг, эффективность использования государственных средств.
Не разработаны правовая и институциональная база, определяющая принципы, условия и направления развития государственно-частного партнерства, а также механизмы оценки влияния финансовых, технических и коммерческих рисков на бюджетную систему в средне- и долгосрочной перспективах.
Отсутствует специальный орган, обеспечивающий взаимодействие между государством и бизнесом в реализации инфраструктурных и социальных проектов путем использования механизмов государственно-частного партнерства, осуществление их системного мониторинга.
В целях ускоренного решения общественно значимых задач на взаимовыгодных условиях, а также создания комплекса институциональных возможностей для эффективной координации и управления системой государственно-частного партнерства:
1. Одобрить предложение Министерства финансов, Министерства экономики и Торгово-промышленной палаты Республики Узбекистан о создании Агентства по развитию государственно-частного партнерства при Министерстве финансов Республики Узбекистан (далее — Агентство).
2. Определить основными задачами Агентства:
участие в разработке отраслевых программ развития государственно-частного партнерства в приоритетных направлениях экономики и социальной сфере;
разработку методики оценки эффективности и сравнительного преимущества проектов государственно-частного партнерства, методическое сопровождение подготовки и реализации данных проектов;
обеспечение межведомственной координации при реализации проектов в области государственно-частного партнерства, а также размещение информации о проектах в открытом доступе с ведением их реестра;
содействие министерствам и ведомствам в реализации программ развития государственно-частного партнерства, в том числе разработке концепций конкретных проектов;
организацию взаимодействия с инвесторами, международными финансовыми и донорскими организациями, научным и экспертным сообществом, а также иными участниками рынка по вопросам развития государственно-частного партнерства;
оказание всестороннего содействия в защите прав и законных интересов участников проектов государственно-частного партнерства, рассмотрение их предложений по механизмам финансирования проектов, в том числе определению и распределению возможных рисков;
мониторинг проектов государственно-частного партнерства, в том числе в сфере использования средств бюджетов бюджетной системы, привлеченных к их реализации, а также практики подготовки и реализации проектов с учетом международного опыта в соответствующих отраслях.
3. Установить, что:
Агентство создается в форме государственного учреждения и является специальным уполномоченным органом, ответственным за реализацию единой государственной политики в области государственно-частного партнерства в Республике Узбекистан;
проекты нормативно-правовых актов, конкурсная документация, а также проекты соглашений о государственно-частном партнерстве и изменения к ним в обязательном порядке подлежат согласованию с Агентством;
Агентство вправе запрашивать и получать информацию о ходе реализации, технико-экономических и финансовых показателях проектов государственно-частного партнерства от их инициаторов и участников;
содержание Агентства осуществляется за счет средств Государственного бюджета Республики Узбекистан;
Агентство возглавляет директор — заместитель министра финансов Республики Узбекистан;
первый заместитель и заместитель директора Агентства назначаются на должность и освобождаются от должности министром финансов Республики Узбекистан в установленном порядке;
на работников Агентства распространяются условия оплаты труда, установленные для работников Министерства финансов Республики Узбекистан;
оплата услуг работникам, экспертам и консультантам Агентства — нерезидентам Республики Узбекистан может осуществляться в иностранной валюте в установленном порядке.
4. Определить источниками финансирования деятельности Агентства:
средства Государственного бюджета Республики Узбекистан, гранты и кредиты (займы) международных и иностранных правительственных финансовых организаций, финансовых институтов и других доноров;
благотворительные пожертвования юридических и физических лиц — резидентов и нерезидентов Республики Узбекистан, а также другие источники, не запрещенные законодательством.
5. Установить предельную численность управленческого персонала Агентства в количестве 30 единиц.
Предоставить министру финансов Республики Узбекистан право:
вносить, при необходимости, изменения в предельную численность и структуру Агентства;
устанавливать для работников Агентства надбавки и другие стимулирующие выплаты к должностным окладам (тарифным ставкам) по основной занимаемой должности, вне зависимости от других выплат, предусмотренных законодательством, за счет внебюджетных средств Агентства и Министерства финансов Республики Узбекистан;
определять исходя из международной практики и рыночных условий размер оплаты труда специалистов, привлекаемых на контрактной основе для реализации задач, возложенных на Агентство.
6. Органам государственного и хозяйственного управления, органам государственной власти на местах при необходимости создать специализированные структурные подразделения, ответственные за подготовку и реализацию проектов государственно-частного партнерства, укомплектовав их квалифицированными специалистами численностью не менее двух единиц в пределах установленной предельной численности управленческого персонала.
7. Агентству и Министерству финансов совместно с Министерством юстиции Республики Узбекистан и другими заинтересованными ведомствами:
а) в срок до 1 декабря 2018 года провести инвентаризацию нормативно-правовых актов, в которых предусмотрена реализация проектов государственно-частного партнерства, и внести предложения по обеспечению единства подходов, процедур и механизмов их реализации;
б) в срок до 1 декабря 2018 года разработать и внести в Кабинет Министров проект Закона Республики Узбекистан «О государственно-частном партнерстве»;
в) в срок до 1 января 2019 года разработать и внести на утверждение Программу развития государственно-частного партнерства в Республике Узбекистан, обратив особое внимание на:
комплексное видение и стратегические задачи по развитию государственно-частного партнерства в разрезе отраслей экономики и социальной сферы;
подготовку специалистов по разработке, реализации и сопровождению проектов государственно-частного партнерства;
установление сотрудничества с международными финансовыми институтами, странами-донорами, компаниями и банками в целях привлечения иностранных инвестиций в развитие государственно-частного партнерства.
8. Разместить Агентство по адресу: город Ташкент, улица Истиклол, дом 26 на праве безвозмездного пользования.
9. Министерству по развитию информационных технологий и коммуникаций Республики Узбекистан обеспечить в установленном порядке Агентство необходимой связью, а также подключением к высокоскоростной всемирной информационной сети Интернет.
10. Министерству финансов Республики Узбекистан:
в недельный срок внести в Кабинет Министров Республики Узбекистан проект правительственного решения об утверждении структуры и положения об Агентстве;
в месячный срок обеспечить укомплектование Агентства высококвалифицированными специалистами, обладающими необходимыми теоретическими знаниями и практическими навыками для выполнения возложенных на него задач;
в месячный срок обеспечить Агентство необходимой мебелью, инвентарем, компьютерным оборудованием, а также, при необходимости, транспортными средствами;
совместно с заинтересованными ведомствами в двухмесячный срок внести в Кабинет Министров Республики Узбекистан предложения об изменениях и дополнениях в законодательство, вытекающих из настоящего постановления.
11. Контроль за исполнением настоящего постановления возложить на Премьер-министра Республики Узбекистан А.Н. Арипова, руководителя Администрации Президента Республики Узбекистан З.Ш. Низомиддинова, заместителя советника Президента Республики Узбекистан Г.К. Саидову и заместителя Премьер-министра — министра финансов Республики Узбекистан Д.А. Кучкарова.
Президент Республики Узбекистан Ш. МИРЗИЁЕВ
г. Ташкент,
20 октября 2018 г.,
№ ПП-3980